نحتاج رقابة و حماية على محلات تجهيز الاعراس !!!

[ريم العسووله]

السلام عليكم و رحمة الله و بركاته أخواتي العزيزات
شخباركم و شمسويات


حبيت أطرح هالموضوع و أناقشكم فيه و هو محلات تجهيز الأعراس و أسعارها الخيالية !!!
يا جماعة الخير أنا أشوف الموضوع زاد عن حده صراحة ما في أبدا أبدا رقابة على محلات تجهيز الأعراس !!!
استغلال عيني عينك للعروس !!! بمجرد ما يسمعون المحلات اسم ( عروس) على طول زادوا في الاسعار و يا ريت زيادة معقولة البعض يزيده 3 او 4 اضعاف سعره الاصلي !!! عشان يربح من ورى هالعرايس المساكين ...


نبتدي من الصالون بمجرد ما يسمعون انج عروسه و يايه تتحنين على طول دايركت يزيدون و يضاعفون لج السعر اضعاف مضاعفة و بشكل مبالغ بحجة انج عروس و لازم يضبطون لج النقش ،،، انزين صح عروس بس مو لدرجة يزيدون عليج السعر بالألفين و الثلاث آلاف لان في النهاية نفس النقش و متقارب ما راح ينقشون لج نقوش سومرية او نقوش ثانية محد اخترعها قبلهم !!! ،،، صارت حنة عروس ب 4000 و 5000 !!! حتى ال2000 و 3000 انا اشوف وايد صراحة ما راح ينقشون العروس بماي الذهب مثلا !!! هو نفسه معصار الحنة الي يستخدمونه بصالونهم ، فقط بياخذون مبلغ شغل يد الحنايات ،،، ليش هالنصب و الاستغلال !!!


و تعالوا لاسعار المكياج و الشعر و قارنوا اسعار مكياج العروس في سنة2000 و سنة2005 عن اسعارها في سنة2015 و شوفوا الفرق ، حشى مكياج بالاربعة آلاف و الخمس آلاف و طالع !!! شو بيسون في ويهها مثلا بيخترعون لها عيون و بشرة و خشم ثاني !!! على شو كل هالمبلغ ؟! حتى لو كان المكياج ماركة ما يحتاي هالسعر لأنها مب رايحه تشتري المكياج هي رايحه تسوي مكياج ... و شغل يد الممكيجه هل معقولة يكلف كل هالسعر ؟! و لا بعد تعالو حق الي تقول لج باخذ منج 3000 اذا يتي عندي و 6000 اذا ييت عندج القاعة !!! ما يستحون هالاشكال ما يخافون الله ؟! زيادة 3000 درهم لانج رحتي لها القاعة ؟! و لا هاي سعر البترول لانج رحتي لها القاعة ؟! شو هالاستغلال الي يستغلونها هالممكيجات و الماكيرات الله يهديهم !!!


و تعالوا لاسعار صالات الاعراس يمكن بعضها اضعاف سعر مهر العروس هههههه والله شر البلية ما يضحك انا اشوف تاخذ سعر ايجار القاعة و تسوي عرس في بيتهم ابرك ، و غيره من اسعار بطايق العرس و ال دي جي و التصوير الخ الخ احسه بصراحة استغلااااااااااااااااااااااااااااال لحاجات العرايس ، و محد فيهم بيراعي العرايس لانهم عارفين بأن العروس مضطرة تتعامل وياهم و لا حول لها و لا قوة و حتى لو كانت العروس مقتدرة مع ذلك أنا احس أن الاسعار مبالغة و تحتاج الى رقابة ...


عيل سي دي زفة ب 5000 و 3000 و 2000 !!!! بصراحة ما تشوفون هالشيء مبالغ فيه يعني زفة مدتها كم دقيقة عشان العروس تدخل ليش هالسعر الخيالي !!! شو بتسوي عقب العروس بهالسي دي مال الزفة !!! و هي مجرد زفة جاهزة مغنيها المطرب فقط نزلوها على سي دي و ضافوا بعض التعديلات و ضربوا عليج هالمبالغ !!!


والله لو بتكلم من اليوم لين باجر ما بخلص
بالمختصر المفيد اغلب محلات تجهيز الاعراس و الصوالين مستغلين العروس استغلال بشع
و أنا أطالب برقابة شديدة و حماية العرايس من شجع و طمع و نصب هالمحلات على العرايس
و لا شو رايكم يا سيدات الامارات ؟!

المزيد من آخر المواضيع من نفس القسم:

• صور تورتة اعراس غاية الجمال والرقي
• خلطات طبيعية سريعة ومضمونة لتطويل شعر العروس
• طريقة عمل ماسك الموز للعناية بشعر العروس
• صور بدلات عريس انيقة وجميلة
• صور ديكورات اعراس شتوية ساحره
• صور ديكورات طاولات زفاف راقية لحفل زفاف انيق
• اجمل تصاميم كروت زواج انيقة وعصرية
• كيكات زواج انيقة ومميزة باللون الازرق
• اجمل اشكال كيكات زواج لاعراس موسم الشتاء
• تنسيقات طاولات زفاف بألوان مبهجة وعصرية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[فـطامــي]

وعليكم السلام ورحمه الله وبركاتـه .. الحمدلله بخير شحالج انتـي؟
..
ايه والله صدقتي في كل كلمه قلتيها انتي بس قولي لهم انا عروس بيتخيلونج بنك متنقل هههههههه؟
انا افتقرت منهم وتعبت من المكاسر يتعبون الواحد الصراحه !!
مثلا بتروحين تاخذين قطع! القطعه بيعطييج اياها ب ١٦٠٠! عشان تفصلين مغربي؟
اوكي القطعه ب ١٦٠٠ .. بفصلها ب ١٥٠٠ مع الحزام؟
كم بيطلع ؟ انا خسرت على القطع ب ٧ الف وشي وفصلت المغربي يعني كامل طلع ٢٦ الف!
نصب عيني عينك ؟ وراعيه المغربي ولا طاعت تنزل ف شي ؟ وحتى الحزام بتقولج سعره بروحه!!!
وغير الصوالين .. وغير وغير وغيرر!
الله يعيين العروس بس

[جنان الفجيره]

للاسف يا اختي يوم يسمعون انها عروس يستغلون الفرصه كانها بنك متنقل للاسف يعني من جميع الاشياء يغلون للاسف ولمتى ومن غير القاعه للاسف احيانا تكسر الظهر و الذهب

ما شاء الله عليهم الاوليين لا كسرت ظهورهم عروس ولا ديون لكن الحين من يعرس الديون مره و السبب العرس و الفستان بعشرين الف ليش

ومكياج لساعتين بخمسه الاف وكوشه باربعين و القهر بعدين ترجع لهم الكوشه

ومن غير الاكل للي ينصب بالزباله لا حول ولاقوة الا بالله

[Yazi.90]

والله صدقتي اختي ريم كل شي الحين غالي ،،
اصلا حتى الشعر والميكب لسهره نار و فالبيت السعر دبل
ف كيف لو الوحده كانت عروس صراحه الله يعينهن
قبل ٦ و ٧ سنين على ايامنا والله كانت وايد اوكي ومقدور عليها ،،
و كلنا نشكي ونبكي من الاسعار فالصوالين بس خلاص كلهم جي شو نسوي
ولو ييتي تكلمين راعية الصالون بتقول تبين اهلا وسهلا ماتبين الله وياج ،،

[رومنسية 84]

و عليج السلام
يسرج الحال
للاسف حقيقة
الله يعيين يا رب
والله يهدي خلقه و يحطون الله في بالهم تبون تستغنون مب النصب و كثرة البيزات بالاسعار الخيالية لا بالبركة اللي الله ينزلها على البيزات حتى لو كانت قليلة

[ريم العسووله]

وعليكم السلام ورحمه الله وبركاتـه .. الحمدلله بخير شحالج انتـي؟
..
ايه والله صدقتي في كل كلمه قلتيها انتي بس قولي لهم انا عروس بيتخيلونج بنك متنقل هههههههه؟
انا افتقرت منهم وتعبت من المكاسر يتعبون الواحد الصراحه !!
مثلا بتروحين تاخذين قطع! القطعه بيعطييج اياها ب ١٦٠٠! عشان تفصلين مغربي؟
اوكي القطعه ب ١٦٠٠ .. بفصلها ب ١٥٠٠ مع الحزام؟
كم بيطلع ؟ انا خسرت على القطع ب ٧ الف وشي وفصلت المغربي يعني كامل طلع ٢٦ الف!
نصب عيني عينك ؟ وراعيه المغربي ولا طاعت تنزل ف شي ؟ وحتى الحزام بتقولج سعره بروحه!!!
وغير الصوالين .. وغير وغير وغيرر!
الله يعيين العروس بس

هههه شفتي أنتي بروحج مجربة
أنتي تقولين إنج دفعتي حق المغربي بروحه 26 ألف درهم هاي راتب كامل عند البعض !

محد فيهم بيرضى ينقص لج السعر لعدة أسباب :

الأول بيقولون لج هاي سعر السوق ...
والسبب الثاني يدرون أن العروس محتاجة و مالها غيرهم و مردها لهم ...
و السبب الثالث محد يالس يراقبهم او ملتفت لهالشيء ...

يا أخواتي الموضوع أكبر من سالفة أسعار ، حتى لو كانوا البنات مقتدرات , و يشتغلون , و عندهم مال قارون مع ذلك نطالب برقابة على هالأسواق لأن أولا الأسعار وايد غالية و البنت أولى بهالفلوس و ثانيا و الأهم من هاي كله (هذا مب سوق عقارات و لا سوق سيارات عشان نعطيهم مطلق الحرية ،،، زيادة أسعار سوق العرايس يا أخواتي تسبب مشاكل اجتماعية كثيرة و خطيرة و هي عزوف الشباب عن الزواج و وقوع البعض في ديون و قروض كبيرة و هالشيء فيه تصعيب للزواج و الشرع ما يرضى فيه أبدا فلابد من الحفاظ على المجتمع من هذه المشاكل ، و الحد من حرية ( سوق العرايس و مراقبتها و وضع قوانين لها من الجهات المختصة بحماية المستهلك) ... لان مشكلة زيادة اسعار محلات تجهيز العرايس تجر معاها مشاكل اجتماعية اخطر و هاي واقع نعيشه و لابد من اخذ الموضوع على محمل الجد قليلا ...

[bnooota]

طيب و الحل
طرحنا الموضوع و الكل ايد إن الاسعار مبالغ فيها
نبي الحل الحين؟
و لا هو بس كلام و الكل هيه صح و مناك يسيرن و يدفعن الاف الالاف

إذا بتسوي شي لازم انكوون جماعة و كلمة وحدة

[far7t3umr]

كل شي استوى غالي ايجارات محلاتهم مئات الالوف رواتب عمال المكياج روحه شقد ارتفع سعره كل شي غالي مدارس اليهال كتبهم اغراضهم ليش توترون اعماركم وانتو عرايس رتبو مصاريفكم واهتمو بتفاصيل العرس لان يبقى ذكرى طول العمر نحن نطلع مطعم والا كوفي شوفو كم ندفع في عشا والا غدا كل شي غالي لا تستون سلبيين والحمدالله يارب ويوم تصرفون فالعرس قولو الحمدالله ياسين ندفع للفرح ماندفع لمرض او خسارة لا سمح الله وربي يسعدكم

[Ward-uae]

فيه رقابه حبيبتي اذا سعر الصالون انتي عارفه كم وعندج الفاتوره وسرتي بعد فترة تسوين نفس الشي وزاد عندج الفاتورتين واتصلي لحماية المستهلك
وفيه بعض الامارات محدد للصالونات أسعار القص والصبغ والحنا من البلدية
اما انها عروس وتبي شي مميز وتطلب طلبات غريبة شرات ربيعتي طلبت ورود معينه من برع وشحنوه لها فهي تعرف انه سعره غالي بس تبي شي مميز تتحمل
اذا سعر الكوشه غالي فتروح محل ثاني دور بتحصل الراقي وعلى قد ميزانيتها 

[thenightqueen]

مافي داعي نحسس عمارنا بالاضطهاد كل شي غالي الدنيا كلها غلت حتى بمبي استوت غالية تايلند غالية والعروس لي يعدلونها كل شي يسونه بدقة و ياخذ وقت كل شي غالي انا وريلي ندور شقة بسعر معقول هب لاقين اجارت المحلات بعد العن والعن اقول العروس تريح عمرها وتتنقى لي يناسب ميزانيتها و بتحصل تبين حنه واو تيلس الحناية ساعات تعور ظهرها تنقشج والا كوشه ممزوره ورد والا مكياج الحرمه تدور كل اشغالها وعيالها وتجابلج وتحطي لج مكياج من ارقى الماركات وكل شي بدق ودهديه لانج عروس اكيد بيطلع غالي الدنيا كلها مستويه نار ادفعي وانتي تضحكين ولا تغصصين بعمرج انا هذا رايي

[سامية22]

للرفع

[سحر الغموض]

ما نروم ندفع ونحن نضحك اذا ما كنا مقتنعين بالسعر والنتيجة ،،يعني حنا ب5000 والله ما ادفع !! بصراحه في ناس عادي عندها هالشي وتشوف عمرها مضطرة انها تكون ضحيه ،،لا حبيبتي مب لازم تكونين ضحيه .اللي عليج تسوينه انج ترتبين ميزانيتج وتحطين حدود حق كل شي بدون ما يتعداه.
مثلن تدورين محل مغربيات <<اوكي اول شي دوري تصاميم تعيبج والحين الصور فكل مكان والتجاره صارت عالمكشوف تقدرين تشوفين 20 محل خلال ساعه وحده عقب اختاري الانسب لميزانيتج والتصميم الي فبالج ،في اشياء غاليه بس جمييله هني لازم نتعلم نقول (لا) مسكي عمرج واعطي نفسج وقت تبحثين مردج بتحصلين.
بعض الاستغلاليين ممكن نتجنب نقوللهم عرس ،مثلن الحنا بختار تصميم اشوفه مناسب وبقوللها حنيني عادي نفس باقي الاسعار لانه الديزاين من عندي مب هي مألفتنه ...بس اذا سرتي عندها وانتي ما تعرفين وين الله حاطنج وانج عروس الخ هني بتطلع كل ابداعاتها وبتضاعف الاسعارر وبيني وبينج الصور اظمن

[نبض الشارقة]

الله المستعان

[مبدعة الجمال]

موووووووووووووووووفقه

[thenightqueen]

ما نروم ندفع ونحن نضحك اذا ما كنا مقتنعين بالسعر والنتيجة ،،يعني حنا ب5000 والله ما ادفع !! بصراحه في ناس عادي عندها هالشي وتشوف عمرها مضطرة انها تكون ضحيه ،،لا حبيبتي مب لازم تكونين ضحيه .اللي عليج تسوينه انج ترتبين ميزانيتج وتحطين حدود حق كل شي بدون ما يتعداه.
مثلن تدورين محل مغربيات <<اوكي اول شي دوري تصاميم تعيبج والحين الصور فكل مكان والتجاره صارت عالمكشوف تقدرين تشوفين 20 محل خلال ساعه وحده عقب اختاري الانسب لميزانيتج والتصميم الي فبالج ،في اشياء غاليه بس جمييله هني لازم نتعلم نقول (لا) مسكي عمرج واعطي نفسج وقت تبحثين مردج بتحصلين.
بعض الاستغلاليين ممكن نتجنب نقوللهم عرس ،مثلن الحنا بختار تصميم اشوفه مناسب وبقوللها حنيني عادي نفس باقي الاسعار لانه الديزاين من عندي مب هي مألفتنه ...بس اذا سرتي عندها وانتي ما تعرفين وين الله حاطنج وانج عروس الخ هني بتطلع كل ابداعاتها وبتضاعف الاسعارر وبيني وبينج الصور اظمن

حبيبتي شي صوالين تمكيج العروس مع التسريحة بالف وخمسمية ليش تدورين الغالي خلج ع قد ميزانيتج وحنا العروس يختلف يزيدون مواد في الحنه عسب يطلع غامج ويتم والنقشة بكل دقه بدون لخبوطه ولا غلطه وغير ان الديزاين يكون اكثر من الزبونه العادية حد يسوي لين فوق الركب عن نفسي بختار لي يناسب ماديتي وما بجذب عشان احصل سعر اقل ويمكن النتيجه ماتعيبني والا شو رايج ؟