امنية مستحيلة

[رسايل غلا]

مساء/ صباح الخير

بنات ابا رايكم في موضوع بس بدون تجريح الله يخليكم لأن السالفة شوي معقدة واستوت لي فالدوام بس قبلها بخبركم عن نفسي
نحن نداوم في مكان الغالبية فيه رياييل واجانب من مختلف البلدان بس المواطنين الشباب اللي عندنا شوي مب وايد
المهم انا عمري الحين 29 سنة بس شكلي يعطي اقل من هالعمر بدون مبالغة وربي يشهد علي اني يوم اقول عمري حق اي حد يقول لي انتي جذابة ويعاملوني عساس اني بنت صغيرة, مب ملكة جمال بس احب ملامحي وشكلي, وواثقة اني حلوة
المهم السالفة وما فيها انه في واحد من الدوام مواطن اشتغل وياه, مب في نفس القسم بس اقسامنا تتبع بعض وشغل عالخفيف بيننا, هالريال من سنتين وهو كله يطالعني ومهتم فيني بس من بعيد ما بيننا اي كلام ولا سوالف الا عالخفيف حتى السلام مرات لا انا اسلم ولا هو يسلم
لاني انسانة وايد استحي من الرياييل وبس يالسة ويا ربيعاتي
اول مرة شفته كان الوضع عادي لاني توني مداومة وما اعرف حد, فجأة لقيته بس سرحان في ويهي ويتأملني طول الوقت واي حركة اسويها يهتم فيها لدرجة انه يقلدني يعني يوم نكون يالسين نتغدى انا والبنات في كانتين الدوام وهو موجود اذا ضحكت ويا ربيعاتي هو يضحك مع ربعه
اذا حطيت ايدي ع خدي وابتسمت يسوي نفس الحركة تقدرون تقولون انه جدامي شرات المنظرة اللي عاكسة صورتي وتصرفاتي
كملنا سنة على هالحال وكل هذا وانا ما اعرف عنه غير اسمه وبس فهالسنة, استمر الوضع للسنة الثانية وهو مهتم فيني لدرجة انه اذا سمع صوتي من بعيد يلتفت يدورني ويشوف انا اسولف مع منو ومرات يكون يالس في اجتماع مع موظفين وانا موجودة ما يركز وياهم
وربيعاتي يدرون عنه ويخبروني ببعض التصرفات حتى اللي ما انتبه لها فالسنة الثانية عرفت انه معرس وعنده عيال بس عقب ما تعلقت فيه وتمنيته زوج لي وحسيت انه يحبني ومازال لين الحين على نفس تصرفاته يعني ثلاث سنين بعد
انا مب عارفة شو اسوي ولو هالانسان فكر يتقدم لي شو ذنب زوجته وعياله, مابا ابني سعادتي ع حسابهم هل هالشي حرام ولا حلال الحين؟
واذا هو يتمناني من خاطره هل هذا غلط ولا صح لاني امس يالسة اشوف فيديو حق وسيم يوسف هني عن الزوجة الثانية وكان ينصح الرياييل بس شو الحل وانتوا شو رايكم؟

انا عمري ما فكرت بشي يضر غيري ولا فكرت اكون زوجة ثانية... ساعدوني بافكاركم وحلولكم

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[افناان]

عزيزتي :
ليش تستبقين الاحداث خل يخطبج عقب لكل حادثة حديث
ما اتوقع انه يفكر يتزوج تعرفين ليش ؟؟
من تجربتي لاحظت انه الريال المتزوج لما يعزم يتزوج و يلقى الفرصة المناسبة على طوول يقتنصها بدون تردد ما يقعد يبادل الاعجاب !!
الشي الثاني ممكن هو معجب فيج لا اكثر من ذلك بدليل انه يقلدج و انتي راح مخج بعيد !!

نصيحتي لج : انسي موضوعه و حاولي تقللين الاحتكاك فيه قدر المستطاع

[رسايل غلا]

اختي يمكن يكون كلامج صح بس هل فيه شخص يعجب لمدة ثلاث سنين!, ويهتم بوحدة لأقصى درجة ويحاول يعرف كل شي عنها؟! تصرفاته كلها ما تدل عالإعجاب وبس
صح انه ما تقدم للحين بس السبب فيني انا مب فيه هو وتقريبا هو اللي يمنع اي حد يتقدم لي
وانا مثل ما ذكرت ما احتك فيه اصلا نادر جدا ما يكلمني او اكلمه كله يطالعني وساكت.

مشكورة الغالية على الرد والنصيحة ما قصرتي

[Fa.R]

لو وحدة ثانية جميلة فالدوام أكيد بيسوي نفس الحركات وبينعجب فيها
، ماصار شيء رسمي فشو الأفكار الي تبينا نعطيج ياها عزيزتي ؟

فالشغل لازم يكون فيه أجواء ونظرات وحركات بطريقة غير مباشرة ،
دام أن الريال معرس أشوف أن أحسن تنسين الموضوع غلاية

[ناروتا]

3 سنين , متى بيتقدم يعني!
واضح انه يتسلى او انه مشاعرك تصورلك انه الموضوع اكثر من اعجاب
حتى انتي ما اظنك حبيتيه تعرفين ليش! كل انسان يحب يكون محل اهتمام ويحب يشعر انه جميل في نظر الآخرين, هالريال اعطاكي هالشعور فحسيتي انك تحبيه! يعني لو اي ريال ثاني مكانه تصرف بنفس الطريقة هتحبيه بعد
انا رأيي تنسي السالفه ولا تعطيه وجه , ولو هو فعلا معجب وناوي يتقدم خله يتقدم وبعدها لكل حادث حديث
والله يرزقك شاب حلو عازابي على دين وخلق , قولي آمين

[هجير الشمس]

انسي احساسج فيه لنه مبني عالوهم
مبين ان احساسه عادي واذ كبر فهو ما يتعدى الاعجاب اللي له عمر وينتهى
لحقي عمرج قبل لا تتعلقين فيه اكثر
وخليه لعايلته لن واضح انه متعلق فيهم بدليل ثلاث سنين ما قدم لج فيها اي شي
طنشيه وعيشي جوج
والله يرزقج الريل اللي يسعدج ويكون (ملكج)

[مالتيزرس]

نصيحتي لج لاتدخلي فدوارة مالها اول لا أخر ..ولاتعلقي قلبج فيه .. لأنه لو يباج صدق جان تقدم لج بالحلال أو اعترف لج بها الشي وأنا أجوف ثلاث سنين وايد حبيبتي ..انتي ماتعرفي علاقته فحرمته يمكن يحبها ومتعلق بها واايد ومايبي يخسرها وعياله..اختي عسى الله يرزقج بالزوج الصالح ..اللي يكون لج ملكج ماحد يشاركج فيه. انتي شو ناقصنج جمال وأخلاق عشان تكوني زوجة ثانية وتعيشين عمرج فهم ؟؟

[الوردة الجورية]

وااايد رومانسية انتي

هذا مغازل عزيزتي ما يخصه في الزواج!!!!

الريّال وقت يشوف وحدة "لقطة" للزواج على طول يتقدم قبل غيره وتروح عنه
ماتعرفين كيف تفكير الرياييل

هو يبا يعيش رومانسيات خارج اطار الزواج

ويتعمّد يقلدج عشان يلفت انتباهج وشكله خبرة في هذي الامور بس انتي البريئة

البنات تفكيرهن زواج لكن المتزوجين يبون يعيشون رومانسيات بدون قيود الزواج والمسؤوليات


اذا تبينه يركض يتقدم لج بعلمج كيف
لكن هو متزوج! وانتي ماتبين تكونين زوجة ثانية!

غضي النظر عنه وعن غيره وان شاء الله بييج النصيب في وقته

[طبعي مزاجي 85]

لو وحدة ثانية جميلة فالدوام أكيد بيسوي نفس الحركات وبينعجب فيها
، ماصار شيء رسمي فشو الأفكار الي تبينا نعطيج ياها عزيزتي ؟

فالشغل لازم يكون فيه أجواء ونظرات وحركات بطريقة غير مباشرة ،
دام أن الريال معرس أشوف أن أحسن تنسين الموضوع غلاية

اوافقها الراي ..لو يبيج بدق بابج

[[..دانــة..]]

وايد مستبقه الاحداث!
هو لا خطبج ولا كلمج بشي ولا صار بينكم شي
ف ليش عايشه هالوهم؟

انسي الموضوع وركزي بنفسج وخلي سوالف القيل والقال بين البنات

[laila226]

غضي النظر عنه وعن غيره و ان شاء الله بييج النصيب ...

[future dreams]

لو يباج جان تقدم لج او لمح لج بموضوع خطبه ...
الشخص معجب وانتي ٢٩ سنه تبغين تتزوجين انا حاسه فيج اي شخص بيهتم فيه بهل الطريقه بستانس وبحط امل اني اعرس ..
عزيزتي اذا هو ناوي ع الحرمه الثانيه بيتقدم لج من زمان ما ينتظر ثلاث سنوات ....

[غلآ نفسي]

هو مب ناوي ع حرمه ثانيه والا جان سواها من زماان

والريال عايبنه قصة الاعجاب والنظرات هذي

انتي الشي بايدج تبين تتعلقين فيه اكثر او اطنشين ولا كأنه يطالعج

صدقيني لو في حد غيره من بعده دخل حياتج او اهتم لج بتتعلقين فيه واكثر بعد

نحن البنات فينا عاطفه وهاللي مخربنا

بالتوفيق عزيزتي

[رسايل غلا]

خواتي العزيزات
كلامكم جميل وما فيه شي ونصايحكم حلوة واكيد حابة اطبقها بس بقول لكم شي يمكن يغير وجهة نظركم
اول شي هذا الريال انا اعرف عنه بعض الأشياء مثل سوالفه عالفون مع بعض البنات وابتسامته لأي وحدة تعطيه الفرصة انه يغازل
لكن بسألكم سؤال: واحد مثل هذا فترة طويلة وهو على نفس حاله كل يوم حاط عينه في عيني وكل يوم يثبت لي انه في مشاعر يحس بها تجاهي حتى بدون ما يتكلم
وانا كنت احاول اتجاهل
سؤالي: اذا هو لعاب هالكثر ويتسلى وياي عشان هو متزوج شو اللي مانعنه ايي ويطلب رقمي مثلا او يسولف وياي مثل اللي يعرفهن؟
بنات والله انا نفسي مستغربة من حالتي وفكرت وقلت يمكن انا اتوهم ويمكن ويمكن...الخ
انا مابا اتعب نفسي او افكر زوجة ثانية ولا زوجة اولى بس والله انا انسانة اكثر من ريال يشوفني اول مرة يخطف عادي ثاني مرة يتم بس سرحان في ويهي لدرجة اني مرات اسأل نفسي هل انا فيني شي غلط او شي ملفت او او بس ما الاقي شي
انا وحدة متحجبة كل اللي ينحط في ويهي بودرة وبلاشر وبس الصبح اول ما اداوم وان حطيت روج الصبح وانمسح ما ارد احط مرة ثانية او اعدله, يا بنات الريال وياي مب لعاب ولا شي ولا سوى اي حركة غلط بالعكس حتى كلمة ما يتكلم وياي الا ناااادر جدا انا الحين عمري 29 سنة مب صغيرة عشان واحد بيلعب في مشاعري او يتسلى وياي وصح اني افكر فالزواج والارتباط
لكن فيه شي مانعني عن الزواج الوحدة اللي نفس حالتي يوم تنخطب والمعرس ما يوصل لين البيت حتى ولا تشوفه ويختفي شو يكون رايكم في موضوعها؟!
صدقوني لو هو يتسلى عمري ما بلتفت له او افكر فيه ولا حتى في اي شخص نفسه بس مشكلتي ما اعرف شو اسوي, انا عندي امل فالزواج حتى من اي شخص ثاني بس لو انفجت العقدة وتقدم لي هالشخص شو بسوي هذا اللي بغيت اعرفه!
والسموحة منكم

[حلوه وقموره]

اختي انتي مسويه لج فلم وعايشه فيه وتفكيرين فيه

شو لو تقدم لي شو اسوي احين انتي خليه يتقدم عقب تعالي اسالينا

واضح انج بوهم ومافي اي دليل انه يبا يتزوجج الا هي نظرات وحركات شباب

واتحدى اذا خطبج اعرف هالحركات وخاصه من المعرسين

والحب والاعجاب شي والزواج شي ثاني عندهم

الله يرزقج بالي اخير منه