قررت .. إني أتطلق..

[الأساور]

...بعد 15 سنه زواج ... وبعد هدايا ودلع وحب مستمر للحين ... بعد عشرة وأبناء وبيت .. وديون .. وصبر ... وفرح ...وأحلام حققنا بعضها والبعض نترياه يكبر في عيالنا ..

عقب الحياه الحلوه قررت أتطلق...

ليش؟

لآني تعبت ومليت من خيانات زوجي لي ... ما عندي حل ... 15 سنه جربت فيها واايد حلول ... طلبت استشاريين .... دخلت أهلي وأهله بطريقه غير مباشرة لمحت غنه مقصر بدون ما افضحه ...لاني لو فضحته وردت علاقتنا زينه عقب .. لا أهلي بيسامحونه ...ولا هو بيقدر يحط عينه في عينهم

بس خلاص تجاوز حد المعقول ...زووووجي أمام الجميع .. هو الزوج العاشق الهايم فيني .. تعلقه فيني مضرب للمثل في العايله ... كلامنا لبعض دايما دلع ...يرجع من الدوام اخر الاسبوع .. مستحيليدخل من دون هديه أو مفاجأة ..
دايما خصوصا جدام أهلي يحب يكرمني ويكرمهم ... يفاجئني بهدايا حلوه جدامهم .. ويخدم أمي واهلي بعينه ... بالمقابل علاقته رسمية جدا معاي بين أهله ... وبالمقابل أيضا ... رغم كل الهدايا والحب والشعر اللي يألفه فيني ..
أنصدم بين فتره والثانية بعلاقات متعدده مع الثانيات ... تعبت ... حياتي صارت معاه : انصدم .. ازعل و.. يراضيني ويبجي تحت ريلي مثل اليهال ويحلف ان الشيطان قص عليه .. احط شروطي ....وينفذ شروطي فعلا ..

..لكن عقب كم شهر .. رب العالمين يسوق لي دليل يديد على خياته ..... وكل مره يبرر لي : الشيطان شاطر .... مجرد مكالمات ...أخر مره ...عيزت من جلسات المصارحه معاه .. جربنا أنا وياه حلول واااايد

لدرجة انه غير تلفوناته كم مره وغير أرقامه .. صار ما يسهر برا البيت موووول ولا يطلع مولات إلا معاي ... ولا يسافر مع حد من الشباب ...وبعد كم شهر .... اكتشف له علاقة ..وهذه حياتي

تعبت ومليت .... كرهته .. والله كرهته .. عقب ما عيالي صاروا طولي وطوله ....عفته .... بتقولون ليش ما دخلتي حد من أهلكم .. وليش ما طلبتي الطلاق؟؟؟

طلبته .... من سنتين .. صارت مشكله عوده .. لدرجة أن وحده حقيره من اللي يكلمهم تهجمت علي وعلى عيالي ... ووصلت معاه للطلاق ...وانفصلنا عاطفيا وجسديا شهور طويله .. انا ارتحت فيها وهو مرض ..

وعيالي دمرت نفسيتهم مع اني مول ما قط طريت مشاكلنا جدامهم .. بس هم كبار وحسوا ... وعلشانهم .. وعلشان من ستر على مسلم .. وعلشان ما متقبله اني اكون مطلقه .. والناس ماخذين زوجي مضرب المثل في الحب ...
علشان كل هذا صبرت .. وطلبنا استشارة زوجيه .. ومشا عليها فتره ... وشرط عليه ان اي غلطه يسويها .. راح افضحه خلاص .. خلاااااااااااااااااص .. راح افضح غرامياته .. وبطلب الطلاق ..للضرر النفسي

طبعا قد ما يقدر مخليني يا دهينه لا تنكتين .... محطني تاج على راسه .. وبالمقابل ولله الحمد عمري ما قصرت لا بدلع ولا بلبس ولا بمساعده شو ما كان نوعها ...بالعكس .... كان يداوم ويرجع البيت رغم ان دوامه باماره ثانيه ...

يرجع البيت يجوفني كاني عروس بلبسي ومكياجي ...ودلعي ... مستحيل يمر اسبوع ما نحجز بفندق وندلع روحنا .... وصرت احط راسي على كتفه واقول الحمدلله ... الحمدلله يارب ,,,انه حس ... ودايما يصيح ... ندمان .. يقول ما ابي رب العالمين يراويني شي مو زين في بناتي ..

شكرت ربي وهدت نفسي...وما كان معكر علي غير شكي ببعض البنات على تويتر يقطون عليه كلام ..بس هو ما يرد عليهم بالكس حذفهم وحط لهم بلوك بعد .....لان الموضع ضايجني وما ابي بذرة الشك تدخل بينا ...

وعمري ما بنيت قرار او موقف على شك .. والحمدلله .. عشان جيه .. رب العالمين كشفه لي هالمره ... بعد ....15 سنه حب .. زواج .. ابناء ...عطاء متبادل ...رومانسيه ...عرفت أن زوجي يحب الحب ...

يحب يعيش دور الدون خيشوت ...الحبيب .... يحب يكون مصدر اهتمام البنات ... جفت عنده محادثات بتويتر مع نفس البنات اللي حاذفنهم بحساب مختلف ...

يعني يوم انك غبي .. ما تعرف تغازل بحرفنه .. وكل مره تنكشف .. ما عرف ليش يعيد نفس الاخطاء ...

قررت خلاص اني اتطلق .. ادري طولت سامحوووووووني ....

بس الحين كيف اخبر اهلي واهله اني ما ابيه ....هل اشاورهم أول .. هل اخبرهم بسبب طلبي للطلاق ؟؟ والا اتطلق واحطهم امام الامر الواقع .. هل يستاهل مني الستر .. والا من حقي عالاقل اخبر ابوه وحد من أهلي بسبب طلاقنا .. عشان ما يظنون ظنون مب زينه فيني ...

محتاره .... شو اسوي وطبعا هو ميت من الندم والخجل ...يقول لي بننفصل بس وديا .. يعني يهجرني بدون .. طلاق .. ما رضيت .... ما بي اسمي يتم لاصق باسمه ...

يترجاني اعطيه فرصه يديده ...حلف انه يغير ارقام فوناته ويلغي كل حساباته بمواقع التواصل الاجتماعي,,,, لكن خلاص ... اكون غبيه اذا صدقته .. وادري بتقولون اصلا غبيه نطرتي كل هالسنين ...

مب ندمانه اني عطيته فرصه وثنتين وعشر .. بس ابي اعرف كيف اطلب الطلاق ..... وكيف بتكون نفسيتي .. وكيف بتكون صدمة أهلي واهله .. وربيعاتي اللي يتحروني تاج على راسه .... محتاره ابي مساعدتكم وسامحوني

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[الشاعريه]

ماعرف شو اقول
بس اباج تكونين قويه وتفكرين عدل لان الطلاق مب سهل .. بتواجهين صعوبات خصوصا مع عيالج .. فكري بقرارج من كل النواحي .. انا ماقول هالكلام عشان تتراجعين .. اقولج عشان تكونين مستعده للي بيستوي بعدين وماتنهارين او تضعفين
اشوف قبل كل شي ان الاهل لازم يكونون في الصوره .. لازم تخبرينهم كل شي .. انتي سكتي عنه كل هالفتره ومحد يدري عن تصرفاته .. الحين دورهم خصوصا انج فكرتي بالطلاق يعني مب خسرانه شي اذا عرفو عن الموضوع
الخيانه مرض وادمان بالنسبه له .. لكن بعده ماخسرج ولا خسر عياله ..
انا رايي تيلسين ويا اهلج وتخبرينهم وهم يتواصلون ويا اهله

[الأساور]

مشكوره اختي الشاعريه على ردج .... اللي احسه مبني على عقل وحكمه ...

بس ما هاينه علي نفسي افضحها عند اهلي قبل لاا افضحه .. احس كأني اقول لهم .. انا فشلت في ادارة حياتي .. تعالوا اتصرفوا

[ناروتا]

كان الله في عونك يا اختي, والله احس بكل كلمه قلتيها , الخيانة شي صعببببب
لكن حابه احكيلك ان الدنيا دار ابتلاء,كل انسان الله سبحانه وتعالى ابتلاه ابتلاء ليشوفه يصبر ويشكر ام يجزع!
وما احد في هالدنيا مرتاح,لان ببساطه شديدة الراحه ما انخلقت في الدنيا, الراحه انخلقت للآخره

فبداية الأمر فوضي الأمر كله لله وحاولي تهدي وما تاخدي قرار وانت معصبه لانه اكيد بيكون قرار غلط, اتوضي وصلي واقرئي ما تيسر من القرآن,بعدها عيدي التفكير بقرارك

انا اشوف ان اولادك يستحقون منك صبر اكثر من 15 سنة, اولادك الي تحلم فيهم كل امرأه ما كتب لها الله انها تنجب, او ما كتب لها انها تتزوج اصلا, اولادك يستحقون منك صبر العمر كله...
قرار طلاقك بيخرب حياتهم وبيأثر عليهم سلبا,خاصة بناتك وهذا امر ما تقدري تنكريه
وخلي زوجك يسوي الي بخاطره , له رب يحاسبه,عليكي تدعيله بصلاتك وتنصحيه, وانفصلي عنه بس بدون طلاق واضح امام الناس واولادك,وعيشي حياتك مع اولادك من دون ما يخسروا والدهم واحترامهم له, وتذكري انك لو فضحتيه قدام اهلك او اهله اولادك هيخسروا احترامهم لأبوهم وهيتأثروا نفسيا جدااااا,وهتصير حياتكم محل نقاش الي يسوى والي ما يسوى

وربنا يقدم لك ما فيه الخير ويهديكي للصواب

[طيف الغربة]

هذا قرارك اختي ف النهاية لانه تختلف قدره التحمل من وحده لاخرى واستخري الله في ذلك

ماشاء الله عليج صبرتي عمر بس عندي سؤال قبل :

هل خيانته مجرد كلام ام يقابلهن بعد ؟؟ اذا المسأله بعد فيها خروج مع هالاشكال فهنا اشوف الامر يختلف ولازم اتخاد قرار حاسم

لكن لو بمحلك وحسيته ندمان ماراح افضحه قدام الاهل والناس عشان اولاده اقلها ., لكن ممكن حد ثقة من اهلك

يكون الامر سري بينكم كالوالد مثلا يكون على علم بالسبب الرئيسي ومب شرط التفاصيل .,

لانه مطلوب في النهايه من الاهل تقديم مببرر

اسال الله ان يكتب مافيه الخير لك ولاولادك

[ام حمده 77]

اختي الغالية اعطيه فرصة اخيرة خاطر عيالج

بس يتعهد لج امام المحكمة او شخص واثقه منه انه يودر ها السوالف

واهم شي اختي الدعاء والتقرب لله يمكن يكون بلاء من رب العالمين

والله ييسر لج يا رب ويصلح زوجك

[ام مصطفى..]

حبيبتي انتشر هالشي الحين وبكثره الحين بنت صغيره عندها تيلفونين ..
وعندها وآتسساب و بلاك بيري و آنستقرام و تويييييييييييتر !!!!!!!!!!!!!!
و ترمس كل من هب ودب .. لا تستوين غبيه و تخسرين ريلج عشاان بنات الشوارع
هاذيل يدورن حد يستر عليهم ويزوجهن لانه محد معبرنهم غير ريلللللللللللللللللللللج ..
فككككري بعقلج و لا بقلببببببببببببج .. !! يرضيج كل من هب و دب يدمر حياتج الي من 15 سنه ؟
فكري مره و مرتيييييين وثلاث و عشششششششششششر .. وربي يييسسر آمورج الغاليه

[مذهــله]

ماشاء الله عليج مبين انج حرمة رزين وعاقل.. ومن العقل انج اتفكرين ابنقاط .. انج صبرتي كل هلسنين عليه فبعدج عطيه فرصه وصبري اكيد رصيدج من الصبر وفير لانه علمج شو معنى الصبر من خياناته .. فكري للمدى البعيد شو وكيف راح اتعيشين .. باجر بتتطلقيين وبتتعبيين نفسيا من كل النواحي نفسج والمجتمع والعيال والناس والدنيا ماترحم وجوده مهم ومهم وايد بعد افحياتج وهو دامه يعتذر ويترجى مشي وياه مشي عشانج مش عشانه هو بعيش وبيتزوج وبينساج وعياله بيذكرونه وبيزورونه وبيعرسون وبييبون عيال وبيسمون بسمه وبيتواصلون وياه وانتي الخسرانه نصيييييييحه لاتضعيين تعب سنين افلحظه .. حبيبتي لنج ماتهونيين علي قلتلج هالكلام الرياييل مش شراتنا الغالية .. الله بيهديه ان شاء الله ولو على كبر والله يسخره لج ويبعد عنكم الشيطان ..ودعواتج لي برضا ربي علي وحسن الخاتمة ..

[لأنني مختلفة]

الخيانة جداً موجعة والفترة اللي صبرتي فيها مب هينة
ومب من حقي أنا ولا حق أي وحدة انها تتفلسف
هذا شي راجع لج
احسن حل هو صلاة الاستخارة
صلي استخارة وادعي اللي ييسر لج اللي فيه الخير
من حقج تعيشين مرتاحة والمراكض ورا شخص خاين مثل انج تطفين الحريجة بغاز
الله يكون بعونج

[بنت الشوامخ]

ما انصحج تتطلقين
( بغض النظر عن الخيانه )
ريلج مبين عليه يحبج وتعامله معاج ومع اهلج الحمدلله زين
اقصد مايمد ايده مايطول لسانه وموفر لج الحياه الكريمه ويحبج ويدلعج هذه كلها امور حلوه

بس

مسألة انه يخونج هذا شي مب سهل ابداااا وخصوصا انه من سنين يتكرر ولا تغير
لكن السؤال
خيانته فقط مكالمات ورسايل ؟؟

اذا جي ف المشكله اهون من انه يتلاقى وياهن !!! صح الخيانه مرررره ومحد يرضى فيها بس بعد في مستويات منها
يعني اذا وصلت للزنا هني المصيبه
اذا مكالمات ورسايل .. احساسي يقول انه للاسف فيه ادمان وتعرفين كيف علاج الادمان صعب

ريلج يحتاج يقويه ايمانه لانه اللي يخون باختصار مايخاف الله
دايما ادعي ربج انه يهديه ويملأ قلبه بالتقوى ويبعد عنه الحرام
وانتي ساعديه على هذا الشي

اذا تسمعون اغاني وقفو هالشي
اي شي يغضب الله ابتعدو عنه

صدقيني

من اصلح مابينه و بين الله ، اصلح الله له مابينه وبين الناس

وعطي ريلج هذه الفرصه الاخيره
مب خسرانه شي

واذا حسيتي رجع لخياناته خلاص خبري اهلج و اهله لانه عطيتيه واااايد فرص وانتي ساتره عليه

صدقيني الطلاق شين ومر

خصوصا عندكم عيال والله نفسيتهم راح تتذمر وانتي راح تتعبين نفسياً

[مذهــله]

الخيانة جداً موجعة والفترة اللي صبرتي فيها مب هينة
ومب من حقي أنا ولا حق أي وحدة انها تتفلسف
هذا شي راجع لج
احسن حل هو صلاة الاستخارة
صلي استخارة وادعي اللي ييسر لج اللي فيه الخير
من حقج تعيشين مرتاحة والمراكض ورا شخص خاين مثل انج تطفين الحريجة بغاز
الله يكون بعونج

حبيبتي بعد الحرمة ضايجه وتعبانه مش نزيدها ونولعها الواحد يحاول كثر مايقدر يصلح والريال يعترف ان غلطان وهي زوجته وابخص فيه وان شاء الله ربنا يصلح الحال من بينهم لو مش عشانه عشانها الفقيرة ويا عيالها الله لا يشتت شملهم ويهده ويهديه .. استغفر الله العظيم واتوب اليه..

[ضيقة القلب]

قبل ما تفكرين بنفسج فكري بعيالج اللي هم صدق محتايين يعيشون بين أمهم وأبوهم
مهما كان الأبو ومهما كانت الأم شو
بس بوجودهم بيحسون بالأمان ليش تحبين يروحون المدرسة او أي مكان واليهال يرمسون عن أمهم او أبوهم وانتي بتحرمينهم
ريلج ماشاء الله أبد أبد مش مقصر فيج هذا على كلامج
عيبه الوحيد انه خائن أنا مااقولج شي هين ولا سهل
أنا عشت الخيانه وأقسم بالله حاسه فيج الخيانه هي موت الزوجه كسر قلبها
ليش ادمرين حياتج وحياة عيالج عشان شوية بنات وهو مرده حق بيته وعياله وحرمته
والله فيه رياييل فوق شينهم قواة عينهم يخونون ويضربون حريمهم ويشربون فوق كل هذا الحرمة تصبر وتحتسب الأجر وتدعيله بالهدايه
وانتي ريلج ماشاء الله تبارك الله مش مقصر عليج في كل النواحي بس ها عيبه وعقب هذا لعمر كله تبين تطلقين
ليش ما تفكرين بالحلول
ليش ما تشوفين شو يحب فيهم
جريئات؟؟ استوي جريئه أكثر عنهن
كشيخات اكشخي زود وزود
انتي ريلج أي يعتذر تحت ريلج ويصيح ويترجاج حتى لو يعيدها
وأقسم بالله فيه رياييل من تعرف الحرمة بخيانته طز فيها ابركها من ساعه زين يوم عرفت
يرمس جدامها ويجرحها ويغازلهم جدامها وووو
أنا من رأيي وهذا الحل مع كل زوج خائن لا تنبشين وراااااااااه لا تنبشييييين مدامه مش مقصر
أنا قبل والله كنت افكر لااااا خائن وبتطلق وكيف يخون وانا وانا وانا
أتصدقين آخر مره. يالسه فالسيارة وهو نزل مكان وولدي والله بالغلط طلع فون من ألسده
استغفر الله داس فون فالسيارة وانا توه جرحي مابرى من خياناته القبليه
تم يوزني الشيطان أني أفتحه وافتش وأشوف بس والله تعوذت من الشيطان ورديته مكانه وما فتحته وماحسسته باااي شي والله نفسيتي ارتاحت لأني لو شفت يمكن أموت بس ليش اييب الهم لي
الله بيحاسبه هو بيعاقبه هو وتدرين عقاب الزاني المحصن شو حتى لو يرمسهن هذا زنا اللسان ولو يشوف صورهن زنا النظر هو زاني محصن عقابه شديد فالدنيا والاخره ربج بيتكفل به
طنشي وعيشي حياتج شوفي الإيجابيات اللي فيه بذكاء وكيد النسا بتخلينه ينساهن
اول ما يطلع استودعيه دائماً ادعيله بالهدايه وانه الله يرده لج ردا جميلا ويبعد عنه بنات الحرام
صدقيني انتي بترتاحين
بس عقب هالعمر تطلقين الحرمة سارت او يت محتاجه ريال يوقف معاها حتى لو مب زين
اممم اسمحيلي طولت بس صدقيني الطلاق مش حل فكري وفكري واستخيري
والله يسخره لج ويسخر لي ريلي ويبعد عنهم بنات ابليس

[المحروقة]

اختي انا بكون صريحة وياج...طنشي كل الردود اللي تقولج اصبري عليه زيادة و لا عشان عيالج و لا عشان الناس

انتي صبرتي 15 سنة و ما اظن ان صبر 15 سنة زيادة بيغير من واحد مريض نفس زوجج يدور الاهتمام و الحب و الحنان من كل وحدة يشوفها بدربه ... و انفظح جدامج اكثر من مرة و رد يعيد هالحركات الوسخة يعني ما همه ...تعرفي شو الندم اختي؟ الندم أن اييلج يعتذر و يوقف هالحركات مب انه يعتذر و يرد يعيد هالحركات بعدين هاي مب عيشة كريمة ردا عالاخت اللي قالت تحملي لانه يعاملج زين و انه يعيشج عيشة كريمة شكله مفهوم الزواج ضارب عندها لأن لو مد ايده عليج تقدري تاخذي حقج منه القانون ينصف الكل و دامه خان و اكثر من مرة و سرتو استشارة و ما فاد خلاص لج كل الحق تتطلقي منه و يصرف ععياله....لا تصبري عشان عيالج لان هالعيال بيكبرو و العيال مب اغبيا اكيد فاهمين و لا عارفين و لا حاسين دامهم عايشين وسطكم

الخيار خيارج بالاخير اختي بس انا من رايي ان الطلاق احسن حل تنفصلي عنه و يمكن الله يرزقج ع قدام بواحد احسن منه ما عليج من رمسة الناس أرفعي راسج فوق دامج مب غلطانة ..

بالاخير الصبر اختيار مب جبر لا عشان المجتمع و لا عشان عيالج و لا عشانه هو ..هاي حياتج و انتي بتعيشيها..اذا راضية تكملي معيشة مع هالانسان المريض رح تتحملي اكثر ...و اذا انفصلتي عنه بتتعبي فترة عقب بترتاحي

و الله يوفقج

[المحروقة]

حبيبتي بعد الحرمة ضايجه وتعبانه مش نزيدها ونولعها الواحد يحاول كثر مايقدر يصلح والريال يعترف ان غلطان وهي زوجته وابخص فيه وان شاء الله ربنا يصلح الحال من بينهم لو مش عشانه عشانها الفقيرة ويا عيالها الله لا يشتت شملهم ويهده ويهديه .. استغفر الله العظيم واتوب اليه..

ضايقة و ياية هنيه تبا حل ...الحل انها تصبر عليه زيادة؟ اختي الله يخليج ردي اقري الموضوع زين هي صبرت 15 سنة و خيانات لا تعد و لا تحصى و هو ما اعترف بذنبه منا و الدرب تراه انكشف اكثر من مرة بعد شو؟ و فوق كل هذا رد يعيدها!!! ما همه لا حرمته و لا عياله يبكي قدام ريلها دمعتين مال التماسيح عشان خيفان من الفظيحة و اكبر دليل ع هالشي انه قالها يبا ينفصل عنها بدون طلاق بذمتج هاي رمسة واحد ندمان و معترف بذنبه؟ الله يهديكم بس زيدو تحريض عالفجور بعد ... من راى منكم منكر فليغيره بيده فان لم يستطع فبلسانه فان لم يستطع فبقلبه و ذلك اضعف الايمان...هالحديث يكفي و يوفي لكل وحدة تقول لهالحرمة تسكت

[راقية بطبعها]

شوفي عزيزتي الخيانة تجرح محد يختلف على هالشي
و ريلج مثل ما قلتي عنده مرض ادمان يحب يكون دونجوان والبنات معجبات وميتات عليه
لو انا منج بما انه مب مقصر ويايه في شي و ما وصلت للخيانة في الفراش والزنا والعياذ بالله بطنش وبسوي عمري ماعرف شي عن هالغراميات وبعيش حياتي بدون عوار رأس ولا اضايج بعمري لان كله من صحتج وعمرج
خصوصا عقب هالعشره 15 سنة والعيال كبار شو بتسوين هذا انسان مدمن علاقات غرامية ويحب يحس انه محبوب ومحط اهتمام وكل البنات عاشقينه وما يعيشون بدونه
شو بتستفيدين من الطلاق بتهدمين اسرتج وبتشتتين عيالج وبتبعدينهم عن أبوهم خصوصا أنه مب مقصر وياهم والمرحلة هاي حساسة عمر المراهقة يحتاجون وجود الأب في حياتهم
عشان جيه مثل ما قلتلج طنشي وعيشي حياتج واستانسي ولا تعورين راسج وتاكلين بعمرج وتفتشين وراه!
أما لو كان مقصر وياج وما يعطيج حقوقج أو يضربج وما يعاملج باحترام أو لو وصلت للزنا والخيانه بالفراش هنيه بقولج ستوووب طلاق بدون ما تفكرين