عمة ريلي وبنتها

[Al3'wya]

مرحبا بنات
هذي عضويه ربيعتي استاذنت منها عشان اطرح مشكلتي واتمنى مساعدتكم

انا متزوجه بدايه شهر 6 من واحد اكبر عني ب 10سنين الحمدالله وهو مش من الاهل وقبل العرس شفته مرتين مره فالشوفه ويوم الملجه اللي كانت قبل العرس بشهر بحكم دوامه اللي يجبره يسافر وهذي هي مشكلتنا
كلامي معاه من فتره الملجه للعرس يمكن 4 او 5 مرت مانكثر عن 5 دقايق .. كنت مضايجه بس ارجع واقول بعد العرس بيتغير وعرسنا رحنا شهر عسل عساس بيكون 3 اسابيع صار 10 ايام ورجعنا لان قالي دوامه طلبوه لسفره ولازم يروحلها ماعرضت بس كنت مضايجه فنفس الوقت وسافر وهو كان قايل بس اسبوع لكن رجع بعد 3 اسابيع وماقلت شي كان تواصلي معاه شبه يومي وكلامنا برسميه يعني مول ماحسيت انه ريلي لاني ما اعرف كيف اتعامل معاه وهو نفس الشي كلامه معاي برسميه وبعد 5 دقايق بالضبط يسكر
بعد ما رجع من السفر كان تقريبا فنص رمضان قال ما بيسافر لبعد العيد وانا استانست لاني حاطه فبالي اكسر الروتين واكلمه عادي مش كاني اكلم موظف او شخص غريب بس للاسف اسلوبه رسمي بحت يعاملني بتحفظ بغض النظر عن الاشياء الثانيه واللي الحمدلله ماعندنا مشاكل فيها وانا مابا اطرق لها .. فاخر اسبوع من رمضان عمته كانت معزومه عالفطور وقعدت تطلع عيوبي بطريقه تخلي الكل يضحك علي حتى لو ماقصدو والمشكله اكثر من موقف واكثر من مره تعيد وتزيد بنفس الموضوع هذا غير تدخلاتها الثانيه اللي مالها داعي واكثر شي تعلق ع لون بشرتي لاني حنطيه و ريلي ابيض فاي وحده فمكاني بتتنرفز وقمت وطلعت ورحت الغرفه وياني بعد ساعتين قالي الحركه اللي سويتها مايباني اكررها وانا قلتله اني ما تصرفت الا لما هي تمادت فرد علي بانها تاج راسي ولو تذبحني حلال عليها لانها ربته وهو صغير والله انفجعت بدفاعه عنها وضليت ساكته وماطلعت لانها موجوده لفتره السحور وانا ماكان لي خاطر اكل شي ودخل الغرفه قالي تبين تتسحرين تسحري ولو ماتبين عساج تموتين بيوعج انصدمت من اسلوبه وضليت ساكته للصبح وقلتله بروح بيت اهلي خصوصا والعفو منكم يتني الدوره وانا ما اتحمل ويعها فلازم اظل نايمه طول اليوم
قعدت يومين فبيت اهلي وهو ولا سال عني واهلي عرفو باللي صار وكلموه ويا اعتذر وقال ياريت تردين بيتج وانا مسافر عندي مؤتمر وبرجع بعد العيد .. عمتي ام ريلي ماقصرت يت وحبتني ع راسي ورجعتني معاها بس المشكله فعمته اللي مطلعه خبر اني كنت حامل وعقيت الياهل وكلهم مصدقين .. انا ماعورت راسي قلتلهم اللي يبا يصدق يصدق واللي ما يبا لايصدق.. فالعيد قضيت اول يوم فبيت عمي عقب رجعت بيت اهلي يومين على اساس انه يرجع وتفاجات لما عمته قالتلي هو بيسافر ويا بناتي المانيا يغيرن جو قبل المدارس واللي قهرني اكثر اني لما كلمته قال ان عرسنا خرب عليهم هو متعود كل سنه يوديهن قبل رمضان وكأنهن يهال مش كانهن كبار اصغر وحده عمرها 17 .. وانا المتطفله اللي بعرسي خربت عليهم السفر !
حاولت اتواصل معاه واغير من اسلوب مع اني ما اغثه ولا اضايقه وللاسف هو ولا تغير نفس الاسلوب والكلام
من يومين صارت سالفه وللحين انا مقهوره منها كنت قاعده فبيت عمي فالصاله انا وعمتي ودشت علينا عمته وولدها الكبير وانا ع طول قمت بطلع بس هي قالت يلسي بنشاورج قلتلها ما عليه بوقف ورا الباب خصوصا ولدها ماحشم حد وقعد يطالعني بنظرات قالت برايج عاد ريلج امس رمسني وقال من يرد بيخطب بنتي
انصدمت ورحت غرفتي دقيتله قلتله صدق اللي صار قال هيه حليلها يتيمه سكرت فويهه وشليت اغراضي ورحت بيت اهلي مع ان عمتي منعتني وقالت ماعليج منهن لا انا ولا عمج موافقين بس انا محترق قلبي ماقدرت وطلعت .. فنفس اليوم فليل كلم اخوي اكثر من مره عشان اللي صار والوالد قاله يوم بيرجع يقرب عندنا

للعلم خواته ماقصرن يخففن عني اللي تسويه عمتهن فيني بس للاسف دورهن محدود خصوصا ريلي البجر ومحد يقدر يقول انه غلطان

بنات شسوي ؟ بعدني ما تهنيت
ريلي ماعرف اتعامل معاه !
واسلوبه جاف معاي
غير هذا عمته اللي ادخل عمرها بينا
وبنتها اللي بيخطبها


هل اكسب نفسي وابتعد عنه ؟ والا اعطيه فرصه يمكن يتغير ؟

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[ام براق]

افففففففففف راسي عووورني. شو ها. الله يعيينج صراحه. صراحه ماف شي يسوا عشان تتحملين من زينه الاسلوب والا التعامل انا مافيا صبر ما بنصحج يمكن اضرررج يمكن غيري يفييدج ان شا الله

[Maryoom1]

لا تسكتين الي يسكت فهالزمن يناكل حقه
انا أقولج قولي كل الي فخاطرج له خليه يحس انه مهمل وبالنسبة لعمته حقريها لانها تبا تنزفزج
كل شي له حل لا تحاتين

[مـــــريم]

استغفر الله كله كوم وبنت عمته الي بيخطبها كوم2 ماروم اتكلم بخربها مالي شغل بس ياختي الله يعينج..

[سديموو]

شكله متزوج بالغصب يمكن هو يحب بنت عمته نزين ليش ماخذها من البداية بعدك عروس ويفكر يعرس الله يعينج على مابتلاج أنقهرت وايد عليج والله ريلج يقهر ماعرف شو انصحج بس لو بيعرس مستحيل أتم وياها انا وعروس وجرحني بكلامه كيف لو ياب لي عديله وبنت عمته الي يحبها بأجر عمته بتم تحن فوق راسه شان يطلقج ولانه يحبها بيسمع كلامها
الله يهدي ريلج وعمته قهروني

[الأحلام الملونة]

الغالية أنت بالحالتين متضررة تزوج أو لا

هو رجل غير سوي وعلاقتة معك من أولها غلط هو موا شاعر أصلا عندة زوجة يراعي مشاعرها ويتقرب منها بس الغريب ليش تزوجك ؟؟؟؟

واضح أن حتي أهله ما لهم عندة كلمة وعمتة الكل بالكل وبهذا الجو أستحاله بترتاحي

الله يكون بعونك يارب

[راقية بطبعها]

ما اعتقد انه متزوج بالغصب بس عمته وبناتها لاعبات في راسه

انصحج تبعدينه عن عمته وبناتها و تروحين بيت اهلج تخبرينهم بالسالفة وتشرطين عليه تطلعون في بيت بروحكم حتى لو شقة عسب ما يشوفهم ولا يحتك فيهم و قولي حق ابوج واخوانج يزقرونه ويتفاهمون وياه ويقولون له البنت مب لعبة ماخذنها من شهرين وتبغي تتزوج عليها ومب ناقصنها شي ولا فيها عيب و بنت عمتك جدام عينك من استويت ما حلت في عيونك الا عقب ما خذت بنتنا !

واضح ان أمه وأبوه وخواته طيبين بس مالهم شخصية جدام العمة المسيطره والمتحكمة .. الحل تبعدينه عنها وعن بناتها وخلي شخصية قويه حطي شروطج ولا تنكسرين وتكونين ضعيفه ومسكينه وتخلينها تاخذه منج

[سديموو]

أكيد الحين لازم أيي بيت اهلج عشان يردج قوليه وكوني صارمة اذا انت مب قد زواج ومسؤليه ليش تزوجتني من البدايه كان تزوجت بنت عمتك ليش تلعب على بنات الناس
وليش ارد وياك دامك مقصر لأحب ولا أسلوب ولا معامله قولي كل شي بقلبج يمكن يحس
رغم اني ماحب انصح حد إلا بالخير بس صدق تخيلت نفسي مكانج وايد انقهرت
مأكملتي اربع شهور من زواجج ويبي يتزوج
الله يهديه ويسخره لج ويبعد قلبه عن بنت عمته

[سديموو]

أكيد الحين لازم أيي بيت اهلج عشان يردج قوليه وكوني صارمة اذا انت مب قد زواج ومسؤليه ليش تزوجتني من البدايه كان تزوجت بنت عمتك ليش تلعب على بنات الناس
وليش ارد وياك دامك مقصر لأحب ولا أسلوب ولا معامله قولي كل شي بقلبج يمكن يحس
رغم اني ماحب انصح حد إلا بالخير بس صدق تخيلت نفسي مكانج وايد انقهرت
مأكملتي اربع شهور من زواجج ويبي يتزوج
الله يهديه ويسخره لج ويبعد قلبه عن بنت عمته

[بنت بوظبـي]

ما اعتقد انه متزوج بالغصب بس عمته وبناتها لاعبات في راسه

انصحج تبعدينه عن عمته وبناتها و تروحين بيت اهلج تخبرينهم بالسالفة وتشرطين عليه تطلعون في بيت بروحكم حتى لو شقة عسب ما يشوفهم ولا يحتك فيهم و قولي حق ابوج واخوانج يزقرونه ويتفاهمون وياه ويقولون له البنت مب لعبة ماخذنها من شهرين وتبغي تتزوج عليها ومب ناقصنها شي ولا فيها عيب و بنت عمتك جدام عينك من استويت ما حلت في عيونك الا عقب ما خذت بنتنا !

واضح ان أمه وأبوه وخواته طيبين بس مالهم شخصية جدام العمة المسيطره والمتحكمة .. الحل تبعدينه عنها وعن بناتها وخلي شخصية قويه حطي شروطج ولا تنكسرين وتكونين ضعيفه ومسكينه وتخلينها تاخذه منج

[أبل7]

قسم بالله شيء يقققققققققهر

أبا أعرف شو سالفته هالريال
الحين عرف ان عنده بنت عمه ويبا يتزوجها

والله شكلج مبينه له انج ضعيفة لازم تراوينه العين الحمرا

[m.dxb88]

فعلا إنسان غريب ،،،،
الله يكون بعونج خلي هلج يتدخلون عشان يعرف وراج سند وعمته تلزم حدودها

[عروس يديدة~]

كيف يسافر ووياهن وهن كبار وفيهن اجسام خصوصا لو برع يلبسن لبس سفر...بعض الناس يلبسون المهم الحمدلله لبسي موحد فكل بقاع الارض.....يعني بعد فامور الوناسه والحواطه الواحد يبدي زوجته وربعه محد ثاني...ولا مرافق مريض فسفر مب شال حريم وياه..نحن عيال عمنا عمرنا ما شفناهم.

حاله صعبه بس سمعي لا تخلينه بكيفه اتخذي موقف صارم خبري اهلج...ويكلمونه نفس ما قالت بنت بوظبي



تصدقين شيء غريب تصرفاته وتصرفاتها..يمكن يسولوج اختبار شخصيه..لا ما ادري بس سيري بيت اهلج وخللي اهلج يرمسونه بنبره حاده جديه وطلعي كل شيء خبريهم عن كل شيء...

الله يفرج همج ويسخره لج ويبعدها هالعمة وبنتها عن حياتكم نهائيا

[أم_سواف]

الموضوع ينرفز و بالقوي

بس ما عيبني شي في تصرفاتج..

كل ما زعلتي شليتي بعمرج؟!!!

لا تخلين الطلعه من البيت بهذي السهوله ,,,
هذا ريلج اتمسكي فيه

و حاولي تلصقين فيه في شي من سفراته
بادري بكم كلمه حلوه عشان تأسرين قلبه ويدورج

[delights]

لا حول ولا قوة الا بالله اختي انا رأي تقعدي مع زوجك وتتفاهمو مع بعض قبل ماتدخلي حد بالمشكلة بعدين ازا ما تفاهمتو وما وصلتو لحل دخلي اهلك واهم شي تطلعو من البيت وتعيشو لحالكم ببيت مستقل