تمارين لصق البطن في الظهر مناسب حتى لبعد القيصرية ( الجزء الأول )...

**الوردة الجورية** · 2012-02-14, 13:33

السلام عليكم خواتي ورحمة الله وبركاته

كثير يعانن من الكرش خاصة بعد الولادة، وكثير منا يتكاسل حتى يلعب رياضة
لكن
الكرشة بشعة بشعة بشعة
تعالي نتخلص منها عشان تلبسين احلى الفساتين واحلى التنانير وتكونين واثقة من نفسج بينج وبين نفسج وبينج وبين ريلج

اخترت لكم تمارين جداً بسيطة وسهلة ماتحتاح احماء ( تسخين ) ولا تحتاج اجهزة ولا روحة جيم لكنها فعّالة لمنطقة البطن والحوض وتناسب الاغلبية حتى اللي ولدت بقيصرية شرط مرور 6 اسابيع بس على العملية ونفس الشي اللي ولدن طبيعي واللي عندهم انفصال في عضلات البطن واللي عضلات بطنهم مرتخية تناسبهم كلهم ( اي مشاكل ثانية خاصة في العمود الفقري او كسور او فتق مالي شغل فيها تسأل الدكتور اولاً عن هذي التمارين

بسم الله نبدأ

تمارين (( الاسبوع الاول )) من برنامج لصق البطن في الظهر
كل تمرين كرريه خمس مرات اذا تقدرين اكثر زيدي،، حدج 12 مرة تكرار
اللي مسوية قيصري اذا حسيتي الم مكان العملية وقفي ( التمارين تغذي مكان العملية بالدم ويسرع في الشفاء والالتئام السريع،، لكن وقفي اذا سار الم)

1- في هذا التمرين يشد عضلات البطن العميقة: تنامين على ظهرج وترفعين ركبج عن الارض والاقدام ثابتة على الارض
تخلين جسمج ثابت وتحركين فقط الحوض،، توجهين قاع الحوض من تحت الى السقف قد ماتقدرين لين يلصق ظهرج في الارض،، ((لكن بدون شد قوي اذا مسوية عملية)) تمسكين ثواني

الخطوة الثانية توجهين اسفل قاع الحوض للارض قد ماتقدرين لين يسير ظهرج مثل القوس على الارض وامسكي ثواني

2- في هذا التمرين بتسوين نص كرنش: بتكونين نايمة على ظهرج ورافعة ركبج
اليد اليمين تحت راسج،، اليد اليسار تخلينها مثل الكاس المجوف تحطينها على مكان العملية اذا مسوية قيصري.. ترفعين راسج وتلفين بالخفيف باتجاه الركبة اليسار ببطئ نص كرنش مثل الصورة الثانية من هذا التمرين وردي مكانج بالبطيئ.. الشد لازم تحسينه منطقة الرقبة من جدام والصدر والبطن،،، اذا حسيتي الشد من خلف الرقبة والاكتاف معناة وضعيتج غلط في الرفع

3-تمرين الجسر ممتاز خاصة للمتزوجات: مب بس يشد البطن بعد يشد بين الفخوذ ويشد المؤخرة ( لاتخافين مابيصغرها على التكرارات اللي ذكرتها)
تنامين على ظهرج وترفعين ركبج وتخلينهم شوي متباعدين بس متوازنين مع جسمج واقدامج ثابتة على الارض
ويدينيج محاذاة جسمج
ترفعين المؤخرة بالبطيئ اين تشكلين مثلث مثل الصورة تثبتين ثواني وتحاولين تقربين بين فخوذج وتباعدين وتردين تنزلين بالبطيئ

تمارين (( الاسبوع الثاني )) من برنامج لصق البطن في الظهر

تسوين تمارين الاسبوع الاول وعقب تزيدين عليهم هذي التمارين الاقوى بشوي،، التكرار خمسة كبداية وممكن تزيدين لين 12 مرة من التكرار.. اذا تحسين بعدج محتاجة تطولين في تمارين الاسبوع الاول على راحتج،، بس المفروض اذا داومتي بشكل يومي على التمارين تكونين مستعدة الحين المهم مايسير لج الم مكان العملية اذا مسوية قيصري

1- تنامين على ظهرج ويدينج محاذاة جسمج ترفعين ركبج والاقدام مرفوعة نفس ارتفاع الركب
يعني يكون شكلج كأنج قاعدة على كرسي بس ظهرج على الارض
بالبطيئ تنزلين قدم وحدة بدون ماتصك الارض وترجعين ترفعينها،، وتسوين نفس الشي للرجل الثانية

2- التمرين هذا بيشد البطن عدل
نتامين على الارض وتكونين في نفس وضعية التمرين اللي فوق،، غير انج مابتنزلين القدم.. لا.. بتمرجحين القدم في الهواء بشكل قوس،، تخلصين القدم اليمين تنتقلين للقدم اليسار

تمارين (( الاسبوع الثالث )) من برنامج لصق البطن في الظهر

بتستمرين على تمارين الاسبوع الاول والثاني وبتزيدين عليهم هذي التمارين

1- تمرين يا سلام عليج لو سويتيه خخخ
يحتاج قوووووووة،،،، لاتحاتين الحين عضلات بطنج اقوى
تنامين على ظهرج ويدينج محاذاة جسمج،، ترفعين ركبج والاقدام فتسير الركب والاقدام نفس المستوى ( وضعية الكرسي ) تنزلين القدمين مع بعض ببطء بس ماتجيس اقدامج الارض وترجعين ترفعينهم ببطء

2- تمرين المقص الطولي
تنامين على ظهرج وضعية الكرسي وتخلين اقدامج تتناوب في الرفع والنزول في نفس الوقت مثل المقص،، بس ماترفعين الاقدام اعلى من مستوى الركب ولا تجيس الارض خخخخ،، صعب؟؟ بس انتي شطورة تخيلي التنورة الحلوة على البطن المخصر

،، اذكرج سوي التمرين ببطء،، حاولي يكون الشد في منطقة البطن اكثر من الفخوذ عشان تستفيدين

3- تمرين المقص العرضي
يفيد عضلات البطن وعضلات الفخوذ الداخلية وينفع المتزوجات
تنامين على ظهرج وترفعين اقدامج في الهوا وتخلينهم متباعدين سةي حركة مقص بس بالعرض،، يعني تودين القدم اليمين مكان اليسار،، والقدم اليسار مكان اليمين وترجعين تباعدين وتخالفين الاقدام،، مرة الرجل اليمين فوق،، ومرة الرجل اليسار فوق،، بالتناوب وهذا التمرين سويه بسرعة

) (
) (

اعيد اذكر
كل تمرين يكرر خمس مرات كحد ادنى و 12 كحد اعلى
تمارين الاسبوع الاول والثاني يفضل يومياً
تمارين الاسبوع الثالث والرابع مرتين الى ثلاث مرات بالاسبوع زيادة على التمارين السابقة

يفضل عمل التمارين بعد الاكل بساعتين او قبل الاكل بساعة واذا جعتي في هذي الفترة كلي قطعة صغيرة خيار ورشفات ماي

اضيفي تمارين كيجل لهذا البرنامج لتقوية عضلات قاع الحوض وعشان تتعافين بسرعة وترجعين مثل قبل الحمل بسرعة حتى لو ماحملتي بيفيدج هذا التمرين

في حركة سويها يومياً تساعد على تصغير البطن:
فوق السرة بأربع اصابع اضغطي باصابعج على البطن ةسوي حركات دائرية ثابتة حول السرة نفس المسافة مع عقارب الساعة عشرين لفة وعقب عكس عقارب الساعة عشرين مرة

تم بحمد الله الجزء الاول من تمارين لصق البطن في الظهر

ماريد منكم الا دعوة طيبة ( اللهم بارك لي في ذريتي وارزقني و والدي وذريتي من فضلك واحسانك ورحمتك بغير حساب في الدنيا والآخرة)

المزيد من آخر المواضيع من نفس القسم:

**أم هـند** · 2012-02-14, 13:59

انا تقريبا كنت اسوي تمارين البطن

بس متكاسله هالايااااااااااااااااام

الله يحفظ لج البيبي حبوبة

**أم خليفة 11** · 2012-02-14, 14:08

مشكورة أختي على الموضوع الاكثر من رائع

اترقب باقي الموضوع بفارق الصبر

**سوسورورو** · 2012-02-14, 22:52

مشكورة الوردة ع الموضوع وان شاء الله إذا عندي وقت بسوي التمارين

**miss Givenchy** · 2012-02-15, 09:05

متى اقدر أبدا بالرياضة بعد الولادة الطبيعية؟

**نبض الشارقة** · 2012-02-15, 09:08

رررفع

**ام رشوودي** · 2012-02-15, 09:11

يبالي. صراحة

**الوردة الجورية** · 2012-02-15, 17:03

المشاركة الأصلية كتبت بواسطة miss Givenchy

متى اقدر أبدا بالرياضة بعد الولادة الطبيعية؟

بعد الولادة بيوم تبدين تمارين كيجل وبعض الحركات للأقدام لتحريك الدورة الدموية في الجسم

تقدرين تبتدين بتمارين الاسبوع الاول من نظام لصق البطن في الظهر من الاسبوع الثاني بعد الولادة الطبيعية واستمري عليهم اسبوعين او ثلاث اسابيع عقب تنتقلين لتمارين الاسبوع الثاني حسب دم النفاس اذا سار خفيف وايد

**الوردة الجورية** · 2012-02-15, 17:25

هلا خواتي
اتمنى حد ابتدا معاي
توني مخلصة تمارين الاسبوع الاول
انسب وقت لي العصر
سويت:
تمرين الحوض
تمرين نص كرنش
تمرين الجسر
قدرت اسوي 12 مرة لكل تمرين بس نص الكرنش 12 مرة لكل جهة
حاولي ابد ماتشدين على الفخوذ
الشد كله الحوض والبطن
وقت الشد تطلعين الهوا زفير
وقت الارخاء تتنفسين الهوا شهيق
وكل ماسويتي التمارين ببطئ استفدتي اكثر
تحياتي

**ليندااااا** · 2012-02-15, 17:37

انا كسلانة وايد بالتمارين

**أم موضي** · 2012-02-15, 19:49

يزاج الله خير وما قصرتي حبيبتي

**بقعة ضوء** · 2012-02-18, 17:41

مشكورة وتسلمين والله يحقق كل اللي تبيه

**سامية22** · 2012-02-18, 23:32

للرفع

**تاليا** · 2012-02-19, 03:23

فديتج مشكوره وايد على الموضوع الصراحه مميز ومتعوب عليه

فديتج التمارن هذي بس تنفع حق المربيات يعني؟؟؟

**الوردة الجورية** · 2012-02-23, 16:32

المشاركة الأصلية كتبت بواسطة تاليا

فديتج مشكوره وايد على الموضوع الصراحه مميز ومتعوب عليه

فديتج التمارن هذي بس تنفع حق المربيات يعني؟؟؟

لا اختي،، مب بس اللي مربيات

تنفع لكل وحدة تريد تشد بطنها
حتى لو بعدها بنية

الموضوع: تمارين لصق البطن في الظهر مناسب حتى لبعد القيصرية ( الجزء الأول )...

أدوات الموضوع

عرض

تمارين لصق البطن في الظهر مناسب حتى لبعد القيصرية ( الجزء الأول )...

المزيد من آخر المواضيع من نفس القسم:

المواضيع المتشابهه

.. تمارين البطن ..

العملية القيصرية وسواد البطن

فيديو :تمارين لتقوية عضلات البطن وشد البطن

تمارين شد البطن..~

اريد اعرف افضل كريم يشد البطن لبعد الولاده