قصتي و آآآآآآآآآخ من قصتي

[توأمي الغالي]

السلام عليكم ورحمة الله و بركاته خواتي

من كثر الضيج والتعب النفسي قررت أكتب لكم قصتي لأني أحس أني شوي وبتخبل
يمكن أرتاح شوي لما أشوف حد يهون علي مصيبتي
أنا بنت مطلقة بعد شهرين زواج فقط رب العالمين رزقني بتوأم بنت وولد ولله الحمد

بتقولون وين المشكلة ... مشكلتي أني دووووووم أفكر في سالفة طلاقي مب قادرة أنسى السالفة أبدا .. بتقولون معقولة أبدا ما تنسين... بجاوبكم هي والله العظيم في أي موقف يمر علي في حياتي اليومية أذكر طليقي ..

بقولكم قصتي من البداية

مثل أي بنت خطبتني صديقة أمي حق ولدها ... وهذا ولدها كان مالج قبل وطلق حرمتها قبل عرسهم بمدة قصيرة جدا .. يوم خطبوني أمي وافقت على أساس الكلام إلي ربيعتها نقلته لنا أن الغلط من البنت مب من ولدها .. يوم شاوروني أنا قلت لهم أنا ما عندي مانع أتزوج قبل ما أخلص دراستي مثل ربيعاتي .. بس طلبت من أهلي أنهم لازم يسألون عنه يصلي ولا لا .. أهلي راحوا فريجهم وسألوا عنه الجيران مدحوه وقالوا الولد ما عليه كلام والأيام إلي يكون نازل فيها من الدوام يشوفونه يصلي في المسجد .. المهم قلت حق أمي أوكي إذا أنتوا ما تشوفون فيها شي وراضين .. صارت النظرة الشرعية وصليت استخارة وكل شي كان أوكي هذا قبل الملجة

بعد الملجة يا سبحان مغير الأحوال .. انقلبت ربيعة أمي 180 درجة .. ولا كأنا احنا كنا نعرفها من 10 سنوات .. كانت جدامنا فرفوشية تحب الضحك والغشمرة .. بس طلع ويها الثاني .. الله لا يراويكم .. ما شفت في حياتي مثل هالويه .. في البداية قامت تدخل بالشبكة والكوشة مالت الملجة وبعدين تمت تدخل في ترتيب الملحق إلي راح أقعد فيه .. كان طليقي باني ملحق في بيت أهله بس كانت غرفة كبيرة فأنا طلبت أنه يقسمها قسمين عشان تصير غرفة وصالة وطلبت أنه يبني مطبخ صغيرون .. تمت تدخل عمرها فل كل صغيرة وكبيرة .. وأنا كنت أشوف طليقي ما يدخل كنت أحسب عشان هو معظم الوقت في دوامه بأبوظبي وعشان جي أمه إلي ترمس ما كنت أدري أنه شخصيته ممسوحة تماما خصوصا جدام أمه ... المهم ما بطول عليكم استوت مشاكل وااايدة ونصحوني أهلي اني أفصخ الملجة قبل المممزواج أحسن وأنا على نياتي ما كنت أفهم شي تميت أصيح أقول في خاطري ما أبي أصير مطلقة .. ما كنت أدري أنه الطلاق قبل الزواج أفضل وأحسن خصوصا إذا صار حمل.. قلت حق طليقي تعال البيت لأن أهلي يبون يتكلمون وياك في شي ضروري .. المهم أن طليقي يا البيت بعد عناء طويل من اقناعي له لأنه ما كان يبي يي ويسألني ليش أهلج يبوني وأنا أقوله ما أدري .. يوم يا أهلي تموا يتكلون وياه بالهداوة عن المشاكل وخيروه بين حل المشاكل وبين الطلاق وأهلي قالوا له إذا اختار الطلاق كل فلس سلماه لي راح يرجعله .. تم سااااااااكت وبعدين جان يقول لا حصل خير إن شاء الله وما راح تصير مشاكل .. ويوم رجع البيت بعد صارت مشاكل وقبل العرس بأسبوع أمي وقفت له وقالت أنها راح توقف كل شي حتى العرس إذا أمه ما وقفته حركاتها ومشاكلها .. هو اضطر في نفس اليوم يكلم أمه لأنه كان زايغ أنه أمي توقف العرس وخلاها تتصل حق أمي عشان تتأسف منها .. مع أنها اتخيلوا هي ربيعة أمي من زمان .. المهم مشا الموضوع علينا لأن احنا وااايد طيبين وصار العرس

يوم العرس ما يت أمه وتمت في البيت تصيح .. وأونه هو من دافع المجاملة أونه قال لها أنا ما بروح الفندق إذا أنت ما ييتي وياي ... وكل الحريم إلي في القاعة كانوا شاكين أن في شي لأنها ما يت أبدا إلا لما ولدها دخل .ز وتخيلوا أونه بعدين ولها قالي أنها أونه زعلت ليش حرمتك كانت متغطيه .. أنزين كل الحريم المحترمات يتغطون وإخوانه كلهم كلنوا داخلين وأنا كنت بكامل زينتي وهذا حرام ..\

هذا كله أهون .. المصايب العودة يوم رحت عندهم في البيت بعد أسبوع من العرس .. تمت كل شوي تعق غلي كلام عن أمي وعن أختي لأنها بعد كانت تبي أختي إلي أصغر عني حق ولدها الثاني .. وعلى هالحالة مع أني كنت بالرغم من كلامها السم وإلي يجرحني كنت كل ما أشوفها أسلم عليها وأبوس راسها مع أنها ما تستاهل .. كنت أبا هالشي يبن في عيونها بس أبدا .. العناد والحقد عموا عيونها .. تمت تتدخل في حياتنا .. بقولكم أمثلة : مرة كنت أبغي أغسل الثياب فسكرت الباب إلي بيني وبينها فطرشت بنتها الصغيرة عشان ترد تفتح الباب أونه ليش سكرتوا الباب خلوه مفتوح عشان أشوفكم متى بتطلعون ووين بتروحون .. وهذا الباب إلي تسبب في طلاقي تخيلوا يا بنات والله العظيم .. يوم شافت أنه الباب كل شوي يتسكر يابت نجار وخلته يشل الترباس إلي أنا محطتنه من صوبي عشان ما أسكره وغيرت المفاتيح عشان بس هي تتحكم في الباب .. وأنا كنت وااايد متضايجة من السالفة وعلى نياتي ما كنت أدري رحت خبرت أمي .. عاد هاي كانت أكبر غلطة في حياتي .. يت أمي عندي الملحق وركبت بروحها ترباس .. يوم يا طليقي منالدوام شاف الترباس راح شله .. فأنا يوم رجعت من الجامعة شفت الترباس مشلول ... عصبت ورحت خبرت أهلي أهلي ما رضوا وقالوا أتم عندهم لين هو يركب ترباس مرة ثانية .. تخيلوا راح يستأذن من أمه .. فهي طبعا رفضت وقالت له خلها بيت أهلها إذا تبي تيي جذي بدون الترباس كيفها .. بتقولون أنت ليش مصرة على الترباس لأن بيتهم كلهم شباب غيره هو هنده 7 إخوان شباب وأختين بس .. وفعلا صار لي موقف أصلا يوم أنا كنت أغسل الملابس دش علي أخوه صح أنه بالغلط بس إذا في ترباس أحسن وأريح لي لأني أنا قاعده أشتغل وأبي أخذ راحتي في اللبس .. المهم تميت بيت أهلي أسبوع ما في خبر .. بعد أسبوع بغيت أروح الملحق عشان آخذ كتبي وشوية ملابس لأن الامتحانات كانت على الأبواب وكتبي كلها في الملحق .. أمي ما رضت قالت لازم اروح معاج ما بخليج تروحين بروحج .. ورحت ويا ريتني ما رحت ..يوم دخلت أنا وأمي شافتنا أخته الصغيرة وركضت راحت خبرت أمها .. واحنا ما ندري يلست أنا أشوف شو الكتب إلي أبا أخذها وفجأة ولا أسمع صراخ وسب وشتيم في الحوش .. ركضت ركض ولا أشوف ربيعة أمي زاغدة أمي وتقولها شو يايبنكم يايين تشرقون أغراض ولدي .. وأمي منصدمة مب رايمة تقول شي وأنا بعد منصدمه .. تصاعدت المشكلة وكبرت وزاد السب والشتيم من ربيعة أمي وأمي ترد عليها بكل أدب وأنا مب قادة أتصلت على طليقي عشان يي يوقف هالمهزلة ويا ليتني ما اتصلت فيه ..يا وقف مثل الطوفة إلي وراه ما حرك ساكن أبدا قاعد يشوف المصخرة وما يسوي شي .. شاف أمه وهي تدزني على الباب وأنا بعدني في الشهر الأول من الحمل وهو أبدا ما سوا شي .. ( الرياييل بس شطار يبون عيال ) المهم هاليوم كان صدمة حياتي في أول شخص حبيته ودخلته قلبي .. وكملت الصدمة بعد ما أنا روحت الطوارئ عشان أكشف لأني حشيت بألم في ظهري بعد الدزة .. فجأة يرن موبايل أبوي إلا المخفر يقول لأبوي أنه أمي مطلوبة في المخفر أونه معتدية على ربيعتها ... المهم خلصنا ورحنا المخفر وتم التحقيق وعرف الضابط أنها سالفة عناد واستدعوا طليقي يبون يحلون المشكلة ويا بس ما رضا تم لاصق في أمه وأنا أشوف وأتحسر على عمري كأنه ياهل لاصق في أمه .. طلعنا وما انحلت المشكلة .. وبعد أسبوع ما صار شي وأنا كنت ميتة في هالأسبوع نزل وزني واااااايد لأن الوحام بدأ وأنا كانت نفسيتي دااااااااااااااون مب قادرة أستوعب الموقف إلي حطاني في طليقي .. أهلي شافوا أن ماشي فايدة من الانتظار واقترحوا أروح عند محامية .. أنا في نفس اليوم كنت محتاجة أسمع من طليقي شي عشان أقرر شو أقول عند المحامية .. قررت أرص على عمري شوي ودست على كرامتي واتصلت فيه .. رد عادي وقام يكلمنب ببرود شديد وسوالف وضحك ولا كأنه شي صاير أنا طبعا أبدا ما سايرته وتميت ساكته .. قلت له أنت لك خلق تسولف وتضحك وليش ما اتصلت فيني ما تبي تطمن علي وأنا تعبانه وااايد .. قال أن الضابط طلب من ينتظر يومين وبعدين يتصل فيني عشان تهدا الأمور .. قلت له صار أسبوع مب يومين .. المهم كلمته عن المشكلة إلي صارت و ما أشوف إلا وانقلب ويكلمني بطريقة أول مرة أسمعها منه من أول ما ملجنا .. أونه أاحين أنا الريال وأ=كلمتي إلي تمشي وأنت حرمة .. جان أقول له عيل قبل شو كنت مب ريال وتضاربنا وفي نهاية المكالمة قلت له أنا ما برد الملحق إذا تبيني بنطلع شقة برع قال لي طلعة برع انسي ما بطلع وهالي إلي عندي ما عندي شي غير قلت له خلاص خل ننفصل أحسن جان يقولي خلاص أشوفج في المحكمة عيل .. بلاه عليكم في ريال محترم نفسه يرضا يدخل حرمته المخفر وألحين المحكمة .. وهي بعد في شي قال لي أقولج من ألحين إلي في بطنج ما راح أسجله باسمي .. أنا انصدمممممممممممممممممممممممت ... كل هالكلام صار قبل المحاضرة دخلت وأنا منصدمةلأي في بطني باسمه .. رحنا عند المحامية وقلنا لها القصة خيرتني بين خيارين إما أطلب بيت مستقل أو أطلب الطلاق على طول .. أنا قلت لها بطلب الطلاق بس بتنازل عنه إذا وفر لي بيت برع .. وكل هذا عشان إلي في بطني بس .. المهم مرينا بروتين المحاكم وحبلها الطويل بدون فايدة .. ما نفع وياه ولا نصايح من الشيوخ والكمين ولا شي .. يقولون له بتظلم بنت الناس على حساب أمك يقول لا ما أقدر أزعل أمي .. وفي النهاية طلقني القاضي طلقة وحدة طلاق بائن .. أنا يوم وصلني الخبر كنت برع البلاد أول يوم ما طلع مني أي ردة فعل كأني ما استوعبت الخبر .. اليوم الثاني فجأة انفجرت جدام أمي وتميت أصيح وأمي حضنتني وتمت تقول حسبي الله ونعم الوكيل .. المهم مرت الأيام وعرفت أني حامل بتوأم وفرحت وحزنت في نفس الوقت .. فرحت لأن بيكون عندي طفلين وعرفت أنهم بنت وولد .. وحزنت أنهم بيكونون بعاد عن أبوهم كأنهم يتامى ومسؤوليتهم عوووووووودة وااااايد .. مرت الأيام علي ثجيلة وبطيئة وأنا أنتظر أشوف عيالي وتقر عيوني بهم .. يا يوم الولادة .. والله العظيم وربي يشهد علي أنه الحريم كانوا يصيحون من العوار وأنا كنت أصيح من الطعنة إلي يت في قلبي كنت أصيح أمي تقولي ما علي حبيبتي لازم تصبرين شوي وأن أصيح زيادة هي تحسبني أني أصيح من العوار وأنا قاعدة أصيح أبي ريلي يكون عدالي كنت أتمنى والله .. حتى أذكر يوم طلع ولدي أمي تقولي بعد اضغطي عشان تطلع البنت وأنا أقولها ما أقدر أبي ريلي ...

المهم أبوي من كثر طيبته قال حق أمي بتصل في أبوهم ببارك له وبخبره ..أبوي اتصل وخبره .. اتخيلي قال حق أبوي الله يبارك فيك وبس وسكر .. المهم ثاني يوم أخته اتصلت فيني وباركت لي وقالت لي أنه قالت حق أخوها يي يشوف اليهال .. إلا شوي طبت علينا أمه ودخلت الغرفة وسلمت علينا واحنا منصدمين من قوة عينها ولا كأنها سوت فينا شي وخليناها تشوف اليهال وبعدين قال أبوهم يبي يشوفهم أمي قالت عادي أوكي ودخل الغرفة بعد ما أنا تغطيت طبعا مع أنه أمه ما كانت تبيني أتغطا أونه بعدني حرمته .. دخل وأمه أونها تبي تصلح الأمور قالت له سلم على خالتك جان يقول وبكل قواة عين كانت خاتي وجان أمي تقول له مشكور ما تقصر وبعدين جا تقول له قول حق حرمتك الحمدلله على السلامة جان يتم ساااااااااكت ما رمس بس أمي ردت عليها وقالت لها كانت حرمته ألحين لا .. بس تم يشوف اليهال وصورهم وحسيت أنه كان يطالعني من تحت النظارة الشمسية بس أنا أبدا ما صديت صوبه كانت حالتي حالة ..

أدري حبيباتي أنكم ما تحبون حد يجزأ المواضيع بس مب قادرة أكمل ألحين
إن شاء الله بحطي لينك ثاني بنفس العنوان الجزء الثاني وبكمل لكم القصة

دعواتكم لي فديتكم

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[A+k]

هاي المشكلة يوم تاخذين واحد ولد امه..اخس شي

الله يعينج والله ..\

[london girl]

الله يكون في عونج ويصبرج و يخلي لج التوام الحلويين اكيد

[توأمي الغالي]

هاي المشكلة يوم تاخذين واحد ولد امه..اخس شي

الله يعينج والله ..\

شو أسوي نصيب و مكتوب لي وأنا أبدا ما كنت أعرف أنه شخصيته جي قبل العرس
لأن الملجة كانت 3 شهور وما مداني أعرفه

الله كريم إن شاء الله

[توأمي الغالي]

الله يكون في عونج ويصبرج و يخلي لج التوام الحلويين اكيد

آمييييييين يا رب
مشكورة الغالية على مرورج

[طالبة قانون]

فديييييييتج عورتي قلبي
يلا الحمدلله ع سلامتج وربي يخلي لج التوام ...

[توأمي الغالي]

فديييييييتج عورتي قلبي
يلا الحمدلله ع سلامتج وربي يخلي لج التوام ...

ما أقدر أقول إلا حسبي الله ونعم الوكيل في هالحرمة

والله يسلمج يا رب ... تسلمين فديتج

[Asoomah]

واااااااااااااااايد تأثرت بقصتج

ياربي امه الصراحه شررررررررررريييييييييييييييييييييييره

بس طليقج احس لين الحين فيه طيبه قلب و يحبج ......عندي احساس انه بيتغير .......فيه امل خصوصا يوم بيشوف عياله يكبرووووون

الله يخليهم لج يارب و يفرج عنج كربتج ان شاءالله عاجلا غير اجل

[فديت طلتي]

قطعتي قلبي والله
بس ربي عوضج بتؤام رح ينسوج الدنيا كلها ربي يحفظهم لج

[snow heart]

مشكلة صعبة جدا
الله يقويج ويصبرج الغالية عليج بالاستغفار
والمشكلة من الولد ان شوي متهور ومب متفكر أوعقله كبير تزوج بس يالله عيال وبس

مافكر ان مسوؤلية كبيرة ومهمة الله يهديه
مافكر أيام الملجة يسـتأجر بيت او شقى ويبين بيت وتسكنون فية مافكر براحتج كيف راح تاخذينها اذا كنتي في بيت أمه
شو بقول غير الله فوق وبيحل لج كل أمورج وبيسرها ويفرج ضيقتج

واتمنى الصلاح من بينكم والهداية للام ولدها
وتعيشون حياتكم سعيدة

[اخت بوحميد]

فديت التؤام ياربيه

الله الله فيهم وربيهم احسن تربيه والله يسخر قلب ابوهم ويرجغج بقرب وقت والغلا العمات مرات يكونو السبب

انا خواتى اطلقن والسب العمه عمت عين العدو

الله المستعان والله يوفقج وحبيلي التؤم على راسهم فديت روحهم
انا من ومحبين التؤم

[عن الصدعه]

الله يعوضج في توامج ويبارك فيهم ويحفظهم لج

قصتج اثرت فيني والله لا يبلي حد فيها

الله يكون في عونج ويعوضج خير .. والدنيا جدامج وربج بيسخر لج اللي احسن منه

[Ḿ O Ŋ Д]

دمعت عيوووووني و الله

الله يصبرج .. و الله يرزقج بالزووووج الصااااااالح إللي يعوضج عن كل شي صاااااار لج

الله يعيييييين

كل حد شال بقلبه حزن .. محد يدري به غييييير رب العااااالمين

اللهم فرج هم المهمومييييين

[بنت العبيدلي]

عيالج بيعوضونج ‎?آِّنـِْ ‏??ـَِـَ?ـّ?إءَِ آللَّہ

[شـ ـ ـوق]

الله يعينج حاسه فيج لاني كنت نفس حالتج من تدخلات امه في كل شي من الملجة الين ماربيت بس الحمد الله تحسنت اوضاعي بس على قولت الرياييل اتم امنا هذي هيه الاول وانتوا عقب


صح

بس المذهب مب بهذي الطريقة

عفان الله

الله يخلي لج التوأم وتشوفينهم معاريس ويمكن يكونون في صلاح بينج وبين ريلج