اربيعتي وتعطل أمر الزواج عندها

**بنت دبي444** · 2011-02-02, 16:53

السلام عليكم خواتي

صارلي فترة ما كتبت في هالمنتدى عقب ما انشغلت بعرسي، بس أدخل بين فترة والثانية أشيك واقرا مواضيع خواتي البنات. وهالفترة أنا وايد ضايجة باللي صار لاربيعتي واقرب اخت لقلبي وما اقدر اساعدها الا بدعائي لها، وعقب ما استأذنتها حبيت اخبركم قصتها ودخيلكم بنات ادعولها وغير إنها للعبرة بعد.

اربيعتي ما شالله عليها الله رزقها بالعلم والأخلاق والأدب والجمال، والله كتبلنا كلنا من شلتنا إن انعرس إلا هي لين الحين محد يدق بابهم وكل ما كان ينفتح موضوع الزواج اتيها نوبة صياح أو اتصير نضرة شرعية والريال يروح وما يرجع. وكنا انقول الله مب رايد ونصيبها بعده ما ايي.

بس الكل يستغرب ويقولها إنتي لين الحين ما عرستي، لأنها ما شالله عليها مهندسة وحبوبة واجتماعية وعمرها صار 26 سنة. وصار هالشي امتعبها نفسيا وافقدها ثقتها بنفسها وكل مرة اقولها واضبي على صورة البقرة وبالفعل تمت تقراها طول شهر رمضان وهني بدأت قصتنا معاها.

تمت اتحس إنه في حد يلاحقها في غرفتها او اتنش على اصوات والله لدرجة كانت تكره نوم الليل وصارت تهمل نفسها وايد وشكلها وهاللي اللي معروفة ما شالله بأناقتها وتكره التجمع بالناس وحتى أنا صارت تكره اتكلمني وعزلت نفسها عن العالم تماما.

وظلت على هذه الحالة ست شهور الين ما نحن في البيت قبل شهرين يبنا وحدة اتسويلنا حجامة، واتصلت فيها وقلتلها فلانة ترا هالشي ما يضر وإن شالله بينفعج وهاي سنة الرسول، وسبحان الله يمكن تنكشفلج أشياء، وأتخيلي يا بنات كنا 12 حرمة سوينا وهي من بينا ومحد عقب ما اخلص كان يحس بتعب غيرها هي، وكانت اتحس إن مب قادرة تصلب ظهرها، ورجعت البيت تعبانة وثاني يوم ما راحت ادوام وسارت المستشفى وانصدمت الدكتورة إن ضغطها كانت مرتفع بشكل مب طبيعي وتموا اعيدون الفحص لأن ملفها مافيه إن من قبل صار معاها هالشي ويتها حمى وكحة مب طبيعية لمدة أسبوع. وطول هالاسبوع بس كانت كالجثة ع السرير. وبعد اسبوع بالضبط كانت رايحة بيت الأهل وفجأة عقب المغرب طاحت عليهم ويتها نوبة تشنج ولما قروا عليها الفاتحة زادت.

ونفسيتها هذاك اليوم كانت وايد تعبانة، وقلتلها لازم شيخ يقرا عليج لأنها نفستها كانت وايد تعبانة، وفعلا راحت عند شيخ جزاه الله الف خير هني عندنا في دبي وقرا عليها، وهني كانت الصدمة أول ما قرا عليها ايات الحسد تعبت وبعدين قالها شو حاسة، كانت اتحس إن بطنها يغلي. وبعدها قرأ عليها آيات السحر وبدأ العارض يشتد عليها لدرجة إنه خالها صاح لما شافها جي تعبانة، والعارض اللي داخلها ما طاع يتكلم لأنه كان مربوط بالسحر وطلع إن سحر مأكول ومن سنين وهي ما اتعرف عنه شي.

وبعد جلستين اللهم لك الحمد استفرغت السحر ولله الحمد، الله أنعم عليها بالشفاء بعد 3 جلسات، وتبين إن اللي سوالها هالشي ناس قريبين منها وايد واحسديها على ما هي فيه، لدرجة إن والله قطعت قلبي يوم يتني اتصيح واتقولي ليش اسوون فيني جي وأنا ما سويت فيهم شي، ليش فكرت ادرس واصير مهندسة ياريتني ما درست ولا تعلمت وتميت على شهادة الثانوية وعشت حياة طبيعية حالي حال اي بنت.والله صيحتني معاها لأنها ما تستهاهل.

الله أتم عليها الشفاء من اسبوعين ولكنها الين الحين تحت هاجس اللي صار معاها لأنه مب سهل وزاد عندها الخوف والحزن. ومب عارفة كيف اطلعها من الجو اللي فيها

ادعولها خواتي...ما تتخيلون اشكثر اتمنى إن الله يرزقها عاجلا غير اجل بالزوج الصالح وافرح فيها واوقف معاها مثل ما وقفت معاي

نصيحة يا خواتي اتحملوا تاكلون من اي مكان، واتحصنوا دوم ولا اتهدون اذكار الصباح والمساء وعليكم بسورة البقرة

الله يبعد عنا كل عين حاسدة وعمل السحرة ويجعل كيدهم في نحرهم إن شالله

المزيد من آخر المواضيع من نفس القسم:

**ام ميودي3** · 2011-02-02, 17:00

مسكينه قطعت قلبي
الله يرزقها الزوج الصالح عاجل غير اجل

**-"فكتورية"-** · 2011-02-02, 17:00

بعد عممممممري !!!

مـآ تستااهل الي صار معااهااا !!!

قطططعت قلبي والله >< . .

الله يرزقها الزوج الصالح عاجل غير آجل يا رب . . / و إن شاء الله تطيب نفسيتها و تنسى الي صار

وتعيش حياتها بسعاده و آمان يارب . .

**تووتانة** · 2011-02-02, 17:01

والله انها قطعت قلبي

الله يشفيها واسير امورها وينور دربها

الله يرزقها الزوج الصالح عاجلا غير آجلا وتكون قرة عينه وقلبه ودمه ويعوضها السنين اللي راحت

**أم خليفه 21** · 2011-02-02, 17:07

أعوذ بالله من ها ناس الي مافي قلوبهم خوف من الله ..
غمضتني يحليلها خليج معاها فديتج الله يفرج همها وان شاء الله طالما تبطل السحر خليها تواظب على قرآة القرآن وان شاء الله بيها نصيبها.سلمي عليها وايد وقوليلها ان شاء الله ما راح ننساها من الدعاء.

**أم منــصور** · 2011-02-02, 17:15

غمضتني ربي يفرج عليها و الله ما تستاهل

**دلـــوعـــة** · 2011-02-02, 17:21

الحمدلله انها تشافت بسرعه

وخليها تستمر على سورة البقرة واذكار الصباح والمساء والله يرزقها الزوج الصالح اللي يسعدها ويهنيها ويعوضها عاجلا غير اجلا

**عالية الغالية** · 2011-02-02, 17:24

ممكن رقم الشيخ ضرووووووووووووري

**بنت دبي444** · 2011-02-02, 18:48

المشاركة الأصلية كتبت بواسطة أم خليفه 21

أعوذ بالله من ها ناس الي مافي قلوبهم خوف من الله ..
غمضتني يحليلها خليج معاها فديتج الله يفرج همها وان شاء الله طالما تبطل السحر خليها تواظب على قرآة القرآن وان شاء الله بيها نصيبها.سلمي عليها وايد وقوليلها ان شاء الله ما راح ننساها من الدعاء.

المشاركة الأصلية كتبت بواسطة تووتانة

والله انها قطعت قلبي

الله يشفيها واسير امورها وينور دربها

الله يرزقها الزوج الصالح عاجلا غير آجلا وتكون قرة عينه وقلبه ودمه ويعوضها السنين اللي راحت

المشاركة الأصلية كتبت بواسطة -"فكتورية"-

بعد عممممممري !!!

مـآ تستااهل الي صار معااهااا !!!

قطططعت قلبي والله >< . .

الله يرزقها الزوج الصالح عاجل غير آجل يا رب . . / و إن شاء الله تطيب نفسيتها و تنسى الي صار

وتعيش حياتها بسعاده و آمان يارب . .

المشاركة الأصلية كتبت بواسطة ام ميودي3

مسكينه قطعت قلبي
الله يرزقها الزوج الصالح عاجل غير اجل

المشاركة الأصلية كتبت بواسطة أم منــصور

غمضتني ربي يفرج عليها و الله ما تستاهل

فديتكم خواتي الله يسمع منكم إن شالله، ويعوضها خير ع صبرها، هذا ابتلاء من رب العالمين وإن شالله بخبرها إن مب بس أمها وأهلها يدعولها وأنا، بعد خواتها في الاسلام ما يعرفونها ويدعولها عنظهر غيب.

الله يكتبلها الخير ويرزقها من حيث لا تحتسب إن شالله

**بنت دبي444** · 2011-02-02, 18:51

المشاركة الأصلية كتبت بواسطة دلـــوعـــة

الحمدلله انها تشافت بسرعه

وخليها تستمر على سورة البقرة واذكار الصباح والمساء والله يرزقها الزوج الصالح اللي يسعدها ويهنيها ويعوضها عاجلا غير اجلا

الحمدالله- الله الحمدالله كتبلها الشفاء بسرعة نحمده ونشكره رفع عنها البلاء بسرعة لأنها ما تستاهل والله.

ونفس ما قلتي سورة البقرة واذكار الصباح والمساء وكثرة الاستغفار الحمدالله ملتزمة فيهم والله يثبتها إن شالله

**فديتني نونو** · 2011-02-02, 18:58

حبييييييييييبتي والله الحمدلله الله شفاها وعافاها يلا الحين خليها تبدا فالبقره والاستغفار بنية الزواج وان شالله مايمر اسبوع الا ويو عشر يدقون باب بيتهم صدقيني ان شالله هالشهر نسمع خبر ملجتها

**زهرة جميلة** · 2011-02-02, 19:14

الله يحميها من كل الي مايخافون الله

**بنت دبي444** · 2011-02-02, 19:22

المشاركة الأصلية كتبت بواسطة فديتني نونو

حبييييييييييبتي والله الحمدلله الله شفاها وعافاها يلا الحين خليها تبدا فالبقره والاستغفار بنية الزواج وان شالله مايمر اسبوع الا ويو عشر يدقون باب بيتهم صدقيني ان شالله هالشهر نسمع خبر ملجتها

إن شالله الله يسمع منج ويا رب اكتب موضوع أبشركم فيه

**بنت دبي444** · 2011-02-02, 19:24

المشاركة الأصلية كتبت بواسطة زهرة جميلة

الله يحميها من كل الي مايخافون الله

آمين إن شالله، حتى الشيخ قال لأخوها لا اتخبرون حد إن الحمدالله الله شفاها من هالسحر، عشان ما يسوولها مرة ثانية لأنها هالفئة ما اتخاف ربها، الله يجعل كيدهم في نحرهم إن شالله

**احلامي 2009** · 2011-02-02, 19:33

قوليلها تقرا الرقيه الشرعيه يوميا واذكار الصباح والمساء
تشرب ماي زمزم
الله يشفيها يارب ويرزقها الزوج الصالح عاجلا غير آجل

الموضوع: اربيعتي وتعطل أمر الزواج عندها

أدوات الموضوع

عرض

اربيعتي وتعطل أمر الزواج عندها

المزيد من آخر المواضيع من نفس القسم:

المواضيع المتشابهه

تذكرون موضوع اربيعتي وتعطل زواجها

منو عندها رقم مفتي شرعي في امور الزواج والطلاق

أعطال الكيبل البحري وتعطل الانترنت في الخليج