مشكلتي ويا ريلي

[eljoryah_el7amra]

السلام عليكم خواتي
أنا مشكلتي ويا ريلي
كل يوم والثاني يقولي انتي تغيرتي

بقولكم الصراحه أنا تغيرت عليه لعدة أسباب
أولا: عندي شغاله ومب مرتاحتلها لأنها وايد وصخه لدرجه فضيعه
يعني أقوللها نظفي هالشي وأأشر عليه و ترده مثل ما هوه و غبيه بشكل فضيييييع(وهوه مب طايع يسفرها) يقولي هيه ومسلمه وما ترمس وأي شي تبينه بتسويلج

ثانيا: أنا عندي بيبي و ما أقدر أخليها عند الشغاله لأني مب واثقه في نظافتها

ثالثا: أنا طالبه جامعيه وأمي بيتها ف إماراة ثانية وما أقد أودي البيبي عندها وعمتي حرمه عوده

رابعا:أنا عقب ما ربيت متنت وااااااااايد، طبعا من يلست البيت وقلة الحركة ونفسيتي تعبانه لأني كل ما أسير السوق ما يظبط علي لبس ولا شي

خامسا: كل ما أقوله أبغي أسير النادي ما يطيع ويقولي وين بتخلين البيبي؟؟؟
(ما رضى يخليني أييب مدربة للبيت بحجة انها طلبت وايد) وانا عيازه وايد يعني عندي جهاز ف البيت بس ما أستخدمه..... أنا لو عندي حد واقف ع راسي بسوي بس إذا محد شجعني بتم مكاني

سادسا: وفوووووق هذا كله مب سلمانه منه (ينازعني) وأنا من النوع اللي أسكت وما أرد إذا حد نازعني يعني أتم منزله راسي وساكته حتى لو عندي تعليق ما أتكلم

وعقب هذا كله ماتبوني أتغير عليه؟ هاااا ردوا علي

صدقوووووني أنا أنلام لو تغيرت عليييييييييه

والله اني وايد متضايجه لدرجه اني كل يوم قبل ما أرقد أصيييييييييييييييح لين ما أقول بس وعقب أرقد

ساعدوني فديتكم
وما أبغي وحده تدش بدون ما ترد

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[سراب الشارجه]

وما ابغي وحده تدش بدون ما ترد

تصدقين كنت بطلع من غير ما ارد الصراحه احترت شو اقول والحينه بعد يالسه افكر شو الحل لا تصيحين قبل الرقاد ومشكلتج بسييييييطه وحلها سهل بس

ان ما عندي حل غير اشويه تخفين على البشكاره وتتحملين ريلج

وكل عام وانتي بخير

[الكـ دلوعة ــون]

فديتج الغلا الله يعينج
حاولي حبيبتي تهتمين في عمرج اذا مب عشانج عشان ريلج اللي اختارج من بين البنات
وحاولي دوووم اتعدليلة وتظهرين جدامة وانتي بأحلى صورة
واذا نازعج ماعلي تحمليه مهما كان هذا ريلج بو عيالج والحياة الزوجية يبالها تنازلات يلسي وياه وفهمي منه يمكن مستوي عندة شي ومايبي يقولج او مضايقنة شي
حاولي تهتمين في عمرج وفي ولدج وفي ريلج بعد يمكن هو مضايق لانج تهتمين في البيبي اكثر عنة لاتستغربين في رياييل جي
يلسي وياه وشوفي شو فخاطرة
والله يسعدج

[ام_الريم]

وعليج السلام والرحمه اختيه ,,
والله مشكلتج بسيطه مايبالها ,,
دامنه قالج انتي متغيره معناته يحبج ومايباج تتغيرين عليه ,,

والبشكاره دامنها مب نظيفه اشعنه خالينها ,,
وووع كله ولا البشاكير إن عرست ان شاءالله مستحيل
أفكر اييب شغاله بلاويهن اكثر عن نفعهن

ويمكن بعد قالج جذه لانه يشوفج مب مهتمه
فيه ابحكم انج تدرسين ف الجامعه ,,
حاولي قد ماتقدرين اتوفقين بين الجامعه
وبيتج ,,
البسيله كل يوم اظهريله ابشكل يديد ^ *
عشان يتخبل ههههههههههه ,,
<< هاي مب امعرسه وجذه الله يستر هههه ..

واشعنه تتعايزين اتسوين رياضه بالعكس ,,
شجعي عمرج ابعمرج لاتتريين حد يشجعج ,,
قولي ف خاطرج انا لازم يكون جسمي حلو ومتناسق ,,
والكل ينبهر فيني ..
وإبجذه بتتشجعين اكثر واكثر ^ *

والله يوفجج ويسعدج ويهنيج يااااااااااااااربي ^ *

[eljoryah_el7amra]

مشكورات خواتي ع المرور والمشاركة

[مي الاماراتية]

الله يهديه وييسر عليكم اموووركم ويريح بالج ...


ماعندي غير دعوه صادقه ... ماعرف ليش محد مرتاح في حياته ....

[أم عايشة]

السلام عليكم
كل عام وإنتي بخير أختي أول شيئ خليج طبيعية ومافي داعي تصيحين كل يوم وتييبين لعمرج أمراض نفسية وعضوية...أول مشكلة عندج هيه:
أولا: عندي شغاله ومب مرتاحتلها لأنها وايد وصخه
كثر الدق يفج اللحام تمي على راسها كل يوم لين تصطلب وتصير نظيفة دام إن ريلج مايبا يرجعها وإني تعرفين خساير الشغالات يعني بخسر على تسفيرها وبعدين بخسر مره ثانية عشان ييب وحده ثانية فإنتي حاولي معاها مره وإثنين وثلاث...الله يهديها..
ثانيا: أنا عندي بيبي و ما أقدر أخليها عند الشغاله. تقدرين تخلين البيبي ويا الشغالة بس مب بالبيت وديهم عند عمتج عشان تكونين مطمنه على البيبي...
رابعا:أنا عقب ما ربيت متنت وااااااااايد، طبعا من يلست البيت وقلة الحركة.
لا تهملين عمرج وحاولي تسوين رجيم وامشي كل يوم وسوي رياضه لأن الريال يحب الحرمه اللي تهتم بنفسها وبشكلها عشان ترضي زوجها..
خامسا: كل ما أقوله أبغي أسير النادي ما يطيع ويقولي وين بتخلين البيبي؟؟؟
مثل ماقلتلج سوي رياضة بروحج بالبيت وإن شاء الله تضعفين..
سادسا: وفوووووق هذا كله مب سلمانه منه (ينازعني) وأنا من النوع اللي أسكت وما أرد.أتوقع ريلج ينازعج لأنج متغيره عليه أنا أقول أشتريله هديه وسويله ليله رومانسية وبعدين حاولي تكلمينه بهدوء شو اللي مضايقنه منج.....وإن شاءالله تنحل كل أمورج والله يوفقج بحياتج ويحنن قلب ريلج عليج قولي آمين..إسمحيلي طولت عليج وإن شاء الله البنات بفيدونج بس أختي إنتي مشكلتج بسيطة جدام المشاكل اللي نسمعها هالأيام فاحمدي ربج على كل حال...

[Q8ia_100%]

لا تزعلين مني اختي بس بقولج الصراحه
انتي امسويه من الحبه قبه
اولا خدامتج هذي غصبن عليها اتنظف واتعدل
يعني هذا دورج يا حبيبتي انتي علميها النظافه وان سوت الشي بطريقه ما تيوز لج ردي قوليلها اتنظفه مره ثانيه وثالثه الى ان اتعلم عن النظافه
وخليها اتسبح باليوم مرتين بعد الغدا وقبل النوم

ثانيا متنج وضعفج هذا بيدج يعني النادي مو اساس الضعف
انتي لو تحركتي مع خدامتج بالبيت وجابلتي بنتج ونظمتي اكلج صدقيني ابتضعفين

لا اتمللين الريال من كثر التذمر والتشكي
توج بنت شابه التفتي لعمرج واهتمي بجسمج وبريلج وفي بيتج

المشكله الوحيده اللي عندج الجامعه
انا انصحج انج اتضبطين جدولج واتعلمين خدامتج على البيبي واذا ما تبينها قطي بنتج في حضانه فتره الصبح واخذيها اذا خلصتي محاضراتج

الله يوفقج وهدي بالج ترى انتي محتاجه تغيير من الداخل يعني ابتدي بنفسج حبيبتي وحرام اتخلين ريلج مهمل

[الوفيه]

الصراحه ماعرف شو اقولج وماحبيت اطلع بدون ماادعي ان الله يسهل امورج ويهدي ريلج ياااااارب

[bent_elfreej]

السلام عليكم

اختي الخوات ما قصرو كفو و فوو

و انا اشوف المشكله كلها في البشكاره اذا ماقدرتي اتعلمينها عدل لانج تدرسين و صعب اتجابلينها 24 ساعه ...طرشيها بيت امج و وصي بشكارت امج عليها.. و ان شاء الله ان تعلمت شليها هيه و البيبي كل يوم و وديهم عند عمتج ....

و عن الرياضه: اولا: خففي من الاكل
ثانيا:- امشي (لان المشي وايد زين)
ثالثا: خذيلج جهاز و تدربي عليه و نتي تشوفين التلفزون او اتابعين اي برنامج..لانه يوم تتدربين و نتي اتابعين شي يمر الوقت و تحرقين سعرات وايد بدون ما تحسين



و لاتهملين ريلج و بيتج ..ادري انه هالاشياء صعبه شوي لانج طالبه و تدرسين..بس يبالها صبر و صدقيني بتتعودين....

و لاتنسين الويكند طلعو سيرو اي شاليه او فندق و غيرو جو و كسرو الروتين....


و الله يوفقج و يسعدج دنيا اخره يا قلبي

[ديور]

الله يجمعكم على خير ليش متتفقين مع ربيعه لج انكم تسون رجيم وصدقيني يوم حد بيكون وياج تشجعين اكثر

[دبي1212]

االغاليه انتي عندج ريل يعني عندج دافع تضعفين عشانه وغير جيه انتي متنتي عقب الولاده يعني سهل انج تنزلين بسررررررعه حاولي انج تنزلين الحين ولا عقب انسى انج تضعفيييين يوم بتراكم الشحوم فووق بعضض

وغير جيه البشكاره علميها شو تسوي كلهم ايوون ما يعرفون شي وعامليها بطيب وقولي الي بخاطرج لريلج عشان ترتاحين و تريحيينه ترا محد يحب النكد وحده مبوزه وزعلانه ومتغيره وما يعرف شو فيج حتى وتقولين ليش ينازعج بعد اكره شي عند الريال النكككككككد وقولي الحمدالله عكل حال انتي في نعمه اظهري من هالموضووع وانزلي شوفي مصايب الحرييييم في المواضيع بتحمدين ربج

[m@rzouqia]

الله يهديه وييسر عليكم اموووركم ويريح بالج ...


ماعندي غير دعوه صادقه ... ماعرف ليش محد مرتاح في حياته ....

صدقج والله^^

الله يهدي الجميع^^

[شيما333]

؟؟؟؟؟؟؟؟؟؟؟؟؟

[•.·° دلال °·.•]

صدقهن البنات ماشاءالله عليهن كفن ووفن

إختي الغاليه ماعليج إلا إنج تفضين عمرج دقايق:
1-تتعوذين من ابليس
2-ترقدين البيبي
3-تصلين ركعتين
3-تيلسين بينج وبين ربج وتستغفرينه
عقبها فكري بهدوء في المشاكل اللي ذكرتيهن لنا..
هاتي ورقة وقلم واكتبي الحلول اللي كتبنهن لج البنات
بتلقين أفكارج ترتبن وبتعرفين شو الأنسب لج

لاتستهمين.. وادعي الله إنه يعينج على أمور بيتج وريلج والله سبحانه بيستجيب لج.. وكثري من الدعاء والاستغفار قبل لاترقدين
الله يهون عليج وايسرأمرج يارب