قصه معاناتي ....

[old.love]

السلام عليكم ورحمه الله وبركاته

انا صديقه جديمه في المنتدى بس حبيت ادخل بنك ثاني
صح الكلام الي كتبته واايد بس ارجوووووكم اقروه لي النهايه

كلن منا يمر بظرووف صعبه ابحياته .. والحمد الله عمري ما فكرت اشكي لحد عن همومي ومشاكلي لان اسااسا ما لقيت حد اشكي له ولا شخص ارتمي ابحضنه واقوله عن الي في قلبي
والله احس الدنيا ضاقت بي مع اني كنت دووم اقول كل شي كاتبنه ربي فيه خير
بدت قصتي اول ما فتحت عيوني ع هالدنيا واشوف المشاكل بين هلي .. عشت كوابيس طول الليل و النهار ومادري من الصح امي او ابوي
وهالشي خلاني ادور عن شخص يعوضني . وحبيت وهالانسان الي كان كل شي ابحيااتي وما يهمني غيره بهالدنيا
تمينا ويا بعض 3 سنين .. بس يا يوم ورديت من العمره وقررت اني اهده لان الي اسويه ما يرضي ربنا .. وتركنا بعض واناا دموعي من يومها ما اوقفت بس كنت واثقه ان ربي بيعوضني بأحسن منه !
وعقب ست شهور يا لي الباب يطلبني ..بس ابوي رفض هالشخص بحجه تافهه واعتبرها تخلف .. لان اسلامنا عمره ما فرق بين اثنين .. ان نحن عرب وما اناسب اللا عرب !
بجييت وصرخت .. وانهرت .. بس من يهتم !
عقبها ابفتره ابوي توفى . . يمكن ما حسيت اني فقدت شي كبير .. بس بعد حزنت لان مهما صار هذا ابوي !
قررنا ان انسافر لان امي مب من الامارات .. من دوله خليجيه بدون ذكر .. وفجأه امي غيرت رايها واقنعتني ان يمكن نحن انثجل على خوالي ومحد بيصرف علينا ... المهم ان امي تزوجت .. وكان اسوء اياام حياتي عشتها مع ريلها الي كان يذلنا ذل على كل درهم يطلع من جيبه !!
عشنا بذل واهانه .. وامي باعتنا وعيشتنا في شقه صغيره ويا الشغاله
مرت الايام ويا يوم سافرت عند خوالي تميت فتره وقبل لا ارد عرفت ان رفيج خالي طلبني وهو جافني قبل يوم دخلت عليه الميلس بالغلط .. هالانسان مب من مستوانا .. ربي ما مقصر عليهم يعني مثل ما انقول ناس راهيين وعندهم عزز مااشا الله
مع التفكيير الطويل وافقت عشان خاطر خواني والذل والاهانه الي كنا عايشين فيها .. صح انهم ما بيعيشون وياااي بس ع الاقل اصرف عليهم .. وخصوصا اني اكبرهم
تزوجت ودموعي يومها ما اوقفت .. ما كنت ابيه بس مجبوره .. هو اكبر عني بـ 10 سنوات وانا تزوجت وعمري 20
عشت معاه فتره وانا ما ادانيه خير شر ع كثر ما كان يحبني ويهتم فيني .. وهو بنفسه خلاني احبه ومو بس احبه الا اموت فيه .. عطاني كل شي .. كل شي يخطر ع بالكم ... كل شي تتمناه اي بنيه حب وحناان ومال ودلال وحتى خواني ما قصر معاهم ابد
كنت ما استغني عنه ولا هو يقدر يتم يوم بدوني خصوصا عقب ما عرف انه ما اييب عيال ..
مع العلم ان شي ناس من هله ما يدانوني خير شر .. لاني مب من مستواهم !
تميت وياه 4 سنوات وفجأه انقلبت حياتي ..دمرو حيااتي وخذو عني الانسان الي كان معطيني امل في هالدنيا ما ادري كيف اقنعوه .. بس اقنعوه اني بنيه وصخه واركض ورا الشبااب !! وكلاام كبير والله استحي اقوله !
صحت وبجيت وترجيييته ترجييته عند ريوله ان يصدقني . وانا اترجاه قالي انا واثق فيج بس ما اقدر.. وما كمل كلامه ومسكني من جتفي بكل قو ونزلني وانا اصاارخ ابي افهمه .. وهو يجرجرني جدام هله والخدم وجني ما اسوى بيزه
والله لوشو قلت ووصفت ما راح تتخيلون الموقف الي كنت انا فيه ... كسر قلبي وحطم كل آمالي
رحت عند خوالي بس حسيت اني ثقيله عليهم رديت عند امي الي نزلت بكرامتي الارض جدام ريلها وعيالها ..طلعت ورحت عند خواني في نفس الشقه الي كنا عايشين فيها ولحين انا وياهم
رديت حق ريلي كل شي حتى الثياب الي كانت علي رديتهم .. انا طويت الماضي لان مضت سنه وشوي ع هالسالفه
بس الي زاد جرحي ان قبل جم يوم ريلي يا يصيييح عندي يبيني اردله ...كشف الي سووه فيني وان انا مالي ذنب بس قلتله كلمتين ورحت عنه ..<< انا مابي منك شي ومابقى لك شي عندي روح الله يوفجك وانا ما بطردك شرات ما طرتني واهنتني جدام هلك انا بطلب منك باحترام انك تبعد عني ....وطلعت من الحجره الي هو فيها !
انا بعدني احبه بس مو شوي الي سواه فيني وخلاني سنه .. مادري كيف صدقهم وجذبني .. صح ما قصر وياااي وعطاني كل شي بس بعد والله الجرح الي فيني كبييييير وخصوصا ان خواني تعلقو فيني هالفتره !
والله مب عارفه شسوي .. لو كنتي مكاني شبتسوين ؟؟ الله يخليكم اعتبروني اختكم وانصحوني .. مالي حد اقوله الي ابخاطري ولا اشكيله ...
اسمحولي طولت عليكم بس والله لو اكتب قصه معاناتي بالتفصيل ما بتسدني الف صفحه ....

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[// نُـون..~]

يعلني فدااااج ياقلبي..!!

ماعرف شو أقووووولج...بس أحس لو صدق هو يباج رديله حلو يكون لكم سند

انسى الماضي وصدقيني احسه بيعوضج اكثر وبيتحدى الكل هالمرة عشانج

وعوضيه انتي بعد تراج تحبينه فلا تعذبين عمرج صلي استخارة مرة ثانيه لاتسوين شي تندمين عليه فالمستقبل

والله احس ماعندكم حد غيره بيكون لكم سند خويتيه

هذا رايي الشخصي مدري شو راي الخوات

وصح حطي شروط وقوليله هلك مايدخلون فحياتي وماتسمع لهم ومايخصهم فيني ولا شي وانت تعرفني

وعلني افداج ربييه يوفقكم ويسعدكم ويحفظكم من كل شر وسوء

[أم اشجان]

عورتي قلبي صراحه .. بس فكري انتي محتاجه سند واخوانج محتاجين سند .. فكري وردي له جانه شارنج بس حطي شرووط يرد كرامتج لج جدام الكل كيف مانزلها واهانج يردها لج .. صدقيني لو مايحبج مارجع لج ماتعرفين شو كان تاثيرهم عليه .. استخيري ربج وفكري دام قلبج يحبه ومتعلق فيه رجعي له ولاتخسرينه مره ثانيه .. ماعرف يمكن كلامي غلط بس انا اجوف انج محتاجه من يكون معاج انتي وخوانج .. بس حطي له شرووط عسب مايهينج مره ثانيه .. والله يوفقج في حياتج وايسر امرج

[سوود الأهداب]

موقف صعب الصراحه

بس الي سوااه ريلج مب هين ..اهانه لج و جرح كبييير واايد ..حتى لو يحبج المفروض ما كان يخطج في هالموقف على الاقل يردج باحترام عند اخوانج..

الحين الماضي انتهي و مر على السالفه سنه ...

اخوانج متعلقين فيج...


انتي فكري لو رجعتي لريلج بتقدرين تعيشين شراات قبل ؟؟! بنفس شعور الحب و الامان ..؟؟!!

..

و اهم شي اهم شي صلي استخاره و ادعي ربج يهديج لصح

و الله يوفقج

[مهرة الكون]

الله يعينج اختي والله قصتج قطعت قلبي...بس الغالية فكري عدل في الموضوع هو غلط صح بس ما حد معصوم من الغلط ولا تنسين الايام الحلوة بينكم ...وكيف ساعدج وقف وياج على الحلوة والمرة..فكري عدل قبل ما تخصرينه والله يوفقج.

[old.love]

تسلمون ع الرد .. يعطيكم العافيه خواتي
صارله اربع اياام ايي يوقف عند بااب الشقه بس ما دريت عليه وما خليتهم يفتحونله الباب
مم بصلي استخاره مره ثانيه .. والي فيه خير بيصير ان شا الله ..
وانا واثقه ربي ما بيضيعني
يعطيكم العافيه ..

[cute uae]

الله يعينج اختي والله قصتج قطعت قلبي...بس الغالية فكري عدل في الموضوع هو غلط صح بس ما حد معصوم من الغلط ولا تنسين الايام الحلوة بينكم ...وكيف ساعدج وقف وياج على الحلوة والمرة..فكري عدل قبل ما تخصرينه والله يوفقج.

و لا تنسين صلاة الاستخارة قبل كل شي

[عطرك انفاسي]

ربي يحفظج وين ما تكونين
ما ادري شو اقول انت ما غلطتي بس اذا تبين تسمعين كلامي انا اقولج شقايل رب العالمين يسامح ونحن البشر ما نسامح وصدقيني اكيد ريلج كان بعدج عنه سنه كامله معذبنه مش انتي بس خاصة انه يحبج اكيد كان كل يوم بالنسبه له سنه ولو كان العكس عمرة ما كان بيرجعلج او بيتزوج وحدة ثانيه بكل بساطه بس هو مش من هالنوع
توكلي عالله يا حبيبتي وانشا الله الله ما بيضيع لج حقج ردي له عسى الله يجمع بينكم ع خير بس قبل قوليله انه لا زم يسمعج وعقب يحكم عليج لان لو ما سمعج مستحيل يعرف الصدق وترى كثرة الدج يفج اللحام من صوب اهله والسموحه منج عالتطويل

[أميرة البيت]

حبيبتي حطي نفسج مكانه ويو وقالولج حرمتك كذا كذا كذا....الخ شو بتسوين اكيد بتسوين شرات ما سوى بس غلطته انه ما تأكد من كلامهم واهانج قدامهم أنا أقول إن الله يغفر فليش نحن ما نغفر ..... سامحينه وانسي الماضي وان شاء الله حياتج الياية معاه بتعوضج عن السنه ونص اللي مرت....الله يسعدكم

[كيكه حلوهـ]

الله يحفظج ويخليج لأخوانج

[فن القفطان]

الغالية صلي صلاة استخارة و ربي يكتب لج اللي فيه الخير

[نقنوقة]

رديله لانه شاريج =)
لكن قوليله هاي آخر مره اسمح لك فيها ... بأن تشك فيني =)

[ظنحانية 2020]

يعلني فدااااج ياقلبي..!!

ماعرف شو أقووووولج...بس أحس لو صدق هو يباج رديله حلو يكون لكم سند

انسى الماضي وصدقيني احسه بيعوضج اكثر وبيتحدى الكل هالمرة عشانج

وعوضيه انتي بعد تراج تحبينه فلا تعذبين عمرج صلي استخارة مرة ثانيه لاتسوين شي تندمين عليه فالمستقبل

والله احس ماعندكم حد غيره بيكون لكم سند خويتيه

هذا رايي الشخصي مدري شو راي الخوات

وصح حطي شروط وقوليله هلك مايدخلون فحياتي وماتسمع لهم ومايخصهم فيني ولا شي وانت تعرفني

وعلني افداج ربييه يوفقكم ويسعدكم ويحفظكم من كل شر وسوء

انا
رآيي من رآي آختي..والله يوفقج ياربي..
والله فيني صيحه من داخلي..
يالييت تخبرينآ قصتج اذا حابه بالتفصيل عسب غيرج يآخذ العبره والعظه..
والسمووحه..

[miss 2ta]

اول شي سويه صلي استخارة .. وان شاء الله ربي بيسهل امرج وتردين له

بعدها حطيلج شروط .. لا تردين له جي .. اول شي يردلج كرامتج اللي انمسحت جدام اهله
وثاني شي قوليله يعيشج ببيت روحج واذا اخوانج صغار قعديهم معاج .. ترا مالهم غيرج
وانتي تقولين انهم تعلقوا فيج وايد ..
واهله خلج بعيييد عنهم مالج شغل فيهم ولا لهم شغل فيج ..

ولو صج يبييج الحين بيبين ..

والله يوفقج حبيبتي .. وييسر امرج

[أم سعيد 15]

ربج يسامح يا اختي
سامحيه ولو أني اعرف وايد وايد وايد وايد صعب موقفج يا اختي

بس ان شاء الله ترجعون مثل الاول وأحسن
وربي يرزقج باللي تتمنينه