انقلب حالي من .... حال إلي حال

[نبع الإبداع]

مرحبا خواتي ..


حبيت أفضفض اشوي عسى ألاقي كلام يواسيني .. أنا انسانه متزوجه وعندي عيال

كنت موظفه ولكن ضعاف النفوس إلي بدلهم الجشع والطمع والوضع إلي انحطيت فيه خلاني استغنى

عن وظيفتي لأنيحسيت انه كرامتي انجرحت من ناس عمري ماتوقعت أنه الإساءه تي منهم و زاد الطين

بله جهة العمل اليديده الي كنت بنتقل لها .. كانت مثل الرخويات صلبه الشكل من برع ولكن رخوه من

الداخل في نظام الموارد البشريه عندهم .. كل واحد يقول كلام شكل بس عشان اقتنع بالوضع إلي

حطوني فيه .. طبعا فالآخر يوم عرفت وفهمت الي يستوي رفضت أني ايلس في شغلتي اليديده

ثانية وحده ومن غير سابق إنذار .. انقطعت عن العمل والكل كان متفاجى بس إلي أكدلي أني سويت

الصح .. الإنسانه إلي كنت قريبه منها وكانت دايما موجوده شكلا ومعنويا حذالي وكنت إيدها اليمين

ما سألت فيني ولا حتى طرشت مسج تتخبر ليش غيرتي رايج فجأة .. عرفت أنه الطمع أعماها وماقامت

اتفكر غير في مصلحتها ..

المهم .. الحين أنا من كم شهر ما أشتغل حاسه بفرااااااااغ كبييييير .. وحاسه أنه الصوره إلي رسمتها

وترسخت فالناس حولي اهتزت بسبب أني ما أشتغل .. بديت أسمع نغزات يمين ويسار

عن الحال اليديد إلي أنا فيه .. يعني على شكل نصايح غير مباشره أني أنسى إلي طاف وأهتم بحالي

اليديد ولا أفكر أني أشتغل بعد .. يعني كأنهم يقولون حتى لو حاولتي ما تلقين خلاص انسي

حبطوني وايد .. واستغرابهم أني استويت عاطله عن العمل حطمني و في نفس الوقت شجعني أني

أدور شغل .. بس ريلي مايساعد بالشي إلي أباه .. يعني حسب المزاج رايق بيركضلي .. ماله بارض

بيطنش .. قدمت في كذا مكان وللأسف معظمهم أماكن بعيد عن سكني .. وانا ما أسوق .. كان حلمي

الثالث في حياتي أني أتعلم السواقه .. ولكن شاءت الظروف أني ما أتعلم مع أني من كثر حبي للسواقه

أحس أني لو زخيت سياره في إيدي بسوقها جنه عندي ليسن .. أعلم غيري صديقاتي إلي كانن يتعلمن

السواقه يوم ماينجحون فالتراي أوضحلهم الخطأ وأقولهم المفروض كيف يتصرفون ويستغربون

لمعرفتي وما عندي ليسن .. أحسأني مربوطه ماقدر أتحرك أحس انه قيمتي قلت أحس أني ما أقدر

أقدم شي مادي واضح وملموس .. أحلامي كبيره ولكن حالتي الاجتماعيه أبدا ما تساعد .. أحب أطور

نفسي .. أحب أتعلم اليديد وأحب أتقنه .. الحمدلله في دوامي سابقا كنت معروفه بشغلي معظم

المؤسسات والدوائر اتعرفني واتعرف اشكثر شغلي مرتب .. بس للأسف دورت شواغر عندهم ماحصلت

أو يحطون الأولويه للخريجات إذا قالوا خبره قلت عندي بالسنوات قالوا أنتي متزوجه!!.. وإذا قالوا

شهاده قلت عندي وياها خبره قالوا نبا خريجات!! ماعرفت لهم شو يبون بالضبظ .

والله قدمت على وظيفه أنا أعرف انها تعب وصعبه مع ذالك قبلت فيها بس استغربت انهم طالبين

الشهاده إلي عندي والخبره إلي عندي بس مايبونها متزوجه ×__× شو هالشرط العجيب !!

المهم .. وضعي الحالي خلاني ما أطلب أشياء بسيطه من ريلي لأني قبل كنت أسويها بنفسي

ومرات قليله كنت أطلب منه فلوس .. قبل كنت بكل ثقه أقوله مثلا ودني الصالون الحين .. أفكر 10

مرات قبل لا أقول أبا أسير الصالون .. أحس أنها ثقيله على لساني .. !! شو أسوي دبروني أنا تفكيري

وايد ملخبط أبا أشغل مره ثانية الشغل بيفتحلي باب السواقه ومساعده ريلي في أمور ثانيه هو مب

محتاج المساعده مني يعين مب الزاميه بس أنا أحس بثقلها و أحس لو اشتغلت بخفف عليه وايد وبرد

أحس بكياني أنه لي شغلي ومعاشي..

آسفه أني طولت عليكن بس من الضيقه إلي فيي ما قدرت أسكت أكثر

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[حمامة نودي]

السلام عليكم
قال الله تعالى
{وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}
لا تقولين (ليش ما يقبلوني باي وظيفه)
لكن قولى( كيف اتكيف مع وضعي الجديد)
يمكن وضعج حاليا افضل بس لان نظره الانسان تكون مقتصره على المدى القصير فتحسين انه وضعج سيء
لكن رب العالمين هو الاعلم بحالج و دايما حطي في بالج انه اللي كاتبه يكون فيه الخير و الصلاح لج وللي حولج
انتي تقولين(وضعي الحالي خلاني ما أطلب أشياء بسيطه من ريلي لأني قبل كنت أسويها بنفسي

ومرات قليله كنت أطلب منه فلوس)
الحين وضعج تغير و لازم تعودين نفسج انج تطلبين منه لانه اول شي ها حق من حقوقج انه يصرف عليج و حتى لو كانت ثقيله على لسانج كلميه بدلع و اطلبي
ادعي رب العامين انه يعوضج باحسن من هالوظيفة
و دام عندج وقت فراغ اشغلي عمرج باشيا مفيده..اي عباده انتي تحسين انج مقصره فيها اجتهدي و طوري من نفسج لين الله يسهلج وظيفه افضل
اتمنى اكون افدتج وانا نيتي خالصه لله
الله يوفقج

[بهلولة]

اسعي
هي نعم اسعي
مره ومرتين وثلاثة

حبيبتي لا تحبطين عمرج
ولا تقللين من قميتج
نبع الابداع مو عبارة عن موظفة فقط
نبض الابداع انسانة لها قيمها الانسانية والمعنوية والاجتماعية والعملية
ومو وظيفة هي اللي بترفعج وبنتزلج
انتي اللي ترفعين عمرج وتنزلينها

ويقولج المثل عزيزتي اللي ما يكسرك يقويك
يعني اللي صارلج هذا خذي منه عبره
ان الشي اللي تحبينه وتبينه تتمسكين فيه لاخر لحظة
وتتعلمين من اغلاطج
وتعرفين فيه قيمة نفسج
(وللعلم انا استوالي موقف على كثر ما احبطني وكنت هاييج الفترة على شفا حفرة على كثر ما عرفت فيه قيمة نفسي وتعلمت فيه اشكثر اكون اقوى وافضل )

لا تعتمدين على حد
قولي انا بسير وبدور وبسوي وبسعى وان شاء الله بتحصلين
خليج واثقة من رب العالمين وباذن الله بينولج اللي تبينه
وبالاخير يوم بتحصلين الوظيفة الزينة بتكونين فخوووورة انج حصلتيها بسبب تعبج ومجهودج

ويارب يفرج همج يا عزيزتي
وينولج اللي تبينه

[ماحد شراتي]

اعرف وااايد صعبه يوم يكون راتبج بايدج وتسوين اللي تبينه ...الله يعوض صبر خير ان شاءالله..سؤال ريلج ما يعطيج مصروف شهري؟ اذا هيه حاولي انج تقسمين هالراتب حسب احتياجاتج من صالون وغيره ..وياارب تحصلين وظيفه قريب.. دوري فكل مكان ومب شرط يكون في نفس مجالج ..

ربي يحفظج ..

[ابتسامتي غير]

انتي تحسين ان مالج دور فالحياه

طيب ودورج في بيتج مع ريلج وعيالج هذا اهم دور واسمى دور حتى لو ما اشتغلتي يكفيج هذا الشرف

يمكن يا الوقت الي ترتاحين فيه ومن الشغل وتشوفين نفسج

موفقه

[مطلبي الجنة]

اشوف انج محتاجة لفترت راحه تحددي فيها امورج وايد افكار ادور في راسج مب عافه منوين تبدي انصج انج تريحي نفسج بالاستغفار .قال تعالى (الا بذكر الله تطمئنوا القلوب)

[اذكروا الله]

احساس طبيعي من وحدة كانت تشتغل ومالي وقتها وودرت الشغل وصار فراغ

اذا تبين تملين وقتج و تسكرت كل ابواب الشغل
ليش ما تكملين دراستج فالوقت الحالي و نفس الوقت ادورين شغل ما تيأسين
ما يسوى تضيعين طاقتج بدون ما تسوين شي

[ღcute girlღ]

[shaima_20]

الله يعينج الغالية ويسرج في دنياج واخرتج ويفج عنج مصيبتج وكل المسلمين يا رب

[فديتني غاويهـ]

|| سبحآن آلله وبحمده . . سبحآن آلله آلعظيم ||

[سكر محترق]

انتي ما ذكرتي بالتفصيل اسباب تركج للوظيفتين

بس واضح ان السبب هو طباع الناس الي كانوا معاج

انا موظفة ما لي خص في حد علاقاتي سطحية

و بعيدة عن المشاكل

احب شغلي وايد و اشتغل حتى لو ما عندي شغل ادور لي شغل

المهم يمشي وقت الشغل و انا مشغولة بالشغل ، و لما ارجع البيت ارفه عن نفسي بكل شي طلعات تسوق مكالمات مع صديقاتي الوفيات ، تصفح النت و غيره ....

اتمنى انج فهمتيني و الله يوفقج في الحصول على وظيفة جديدة

[ونة العود]

اختي ابدا لا تياسين ولا تحبطين من عمرج احساسج هذا لانج اخلصتي فشغلج وسويتي كل اللي ترومين عليه ومره وحده تغير هالوضع بس بعد دورج ما انتهى بالعكس دورج انج تعطين وقتج وعطاءج وطاقتج للبيت ولريلج عيالج .. مب قصدي اقول انج قصرتي بهالشي يوم اشتغلتي بس قصدي انج ترومين تعطين وتسوين كل اللي فخاطرج حتى لو ما اشتغلتي ..

سويلج شغله تحبينها فالبيت .. ابتدي مشروع صغير .. طوري هوايتج .. سوي اي شي متاح وفي حدود الامكانيات .. لا تضغطين على عمرج .. وخلي ريلج الداعم الاساسي لج اطلبي منه وشاوريه وخذي رايه و خليه يقترح عليج افكار ويساعدج معنويا وماديا مااافيها شي

..وخذي حياتج بتفاؤل و ايجابيه واعتبري عمرج انولدتي من يديد وانج انسااانه غير ^^

الله ايسر امرج واسمحيلي طولت عليج :-)

[نبع الإبداع]

مرحبا خواتي .. بصراحه كلامكم بغى يصيحني لو ما مسكت نفسي .. أولا أحب أشكر لكم وقفتكم وياي ومشاعركم الحلوه وكلامكم المريح ..

حبيت أقول إلي في خاطري وأرد على بعض النقاط و الاستفسارات إلي قالوها الخوات ..

صحيح عسى أن أكره شي وهو خير لي .. الحين أحاول أني أشوف الي مقصره فيه من ناحيه عبادتي وبيتي .. مع أنه بالنسبة لطريقة عيشتنا
ماتغيرت وايد من عقب ما تركت الشغل يعني مافيه هاك التغيير الكبير إلي ممكن يصير فالبيت .. إلا الشي البسيط والحمدلله معناه أني مب مقصره وايد في بيتي .. اللهم لك الحمد والشكر


خواتي أنا مب يالسه أقلل من قيمتي بالعكس الحمدلله أن ملكه في بيتي وريلي وعيالي محسسيني بهالشي باإنجازات إلي تتحقق لهم وانا اكود الداعمه المعنويه لهم .. أنا قصدي أنه عندي طاقه أني أقدم شي للي حولي سواء البيت أو الناس إلي حولي غير عن الاهتمام بـ بيتي أو توجيب الناس وصله الرحم .. عندي طاقه أبا أفرغها بتقديم الخدمه للناس

عن طريق الشغل أبا أحس أني يالسه أسوي كذا انجاز في حياتي غير البيت .. أنا ما أقدر ما أعتمد على حد عشان يخلصلي أموري .. سواقه ما أسوق والعائق ياي من صوب ريلي مب مقتنع وايد بالفكره إلين ينحط في موقف صعب يجبره أني أتعلم السواقه .. قبل كنت أداوم وأختي ألي اتوصلني فالروحه والرده فالأيام إلي ريلي عليه دوام .. الحين هي لاهيه ما تقدر .. وريلي مسنانس بيلستي بالبيت وبالقوه يتشجع أنه يركض لي عشان أشتغل يعني بمزاج .. هو مايبا يكون له السبب الرىيسي في أني ما اشتغل يباها تي مني بس أنا صامده أحس الشغل في دمي يسري .. و طبها ممنوع التكاسي وشركات المواصلات ريلي مايرضى


بالنسبه للمصروف يعطيني مصروف بس بعد مايكفي للأمور الأساسيه الحين كل يوم الأسعار نار و مب كل الصالونات شغلها مضبوط ..

بالنسبه للدراسه خااااااطري أكمل دراسه و أنقهر أني مب رايمه أكمل أحس فيني حماس دراسي وعملي حتى دوارت تدريبيه مب رايمه أسيرها لأنه كلها يبالها مواصلات يوميا

بس مب محصله مجال عشان أنخرط في هالهدفين إلي لازموني من تخرجت من الثانويه .. أنا مب كبيره فالسن فالعشرينات وأحس الأيام بعدها جدامي وأبا أستغلها عدل .. بس ليس كل ما يتمناه المرء يدركه

الي محمسني زياده وخصوصا هالأيام أنا يالسين نبني بيت العمر .. وريلي محاج مساعده مني بس مايرمس

يعني الشغل فالبيت واقف من فتره بسبب الميزانيه و أحس هذا سبب مقنع أني أرد أشتغل و عندي طموح مثل كل وحده خاطرها يكون لها بيت أنها تبني البيت واتأثثه بأحلى الأثاث وأحلى الديكور فالآخر هو بيت واحد نبنيه مره وحده فالعمر .. كل أفكار للبيت أسويها عشان اترد عليي بمردود طيب فالمستقبل ما أحتاج أكسر فيه أو أغير أو أوسع كل شي أسويه وأقترحه على ريلي بحيث أنه مايكون عقبه لنا ولعيالنا فالمستقبل ..

بالنسبه للشغل أنا تركته لأنه ياني نقل لمكان ثاني وكان النقل اجبار على جميع الموظفين لأنه المؤسسه انحلت

والمكان اليديد كانت ميزاتهم أنزل عن مستواي الوظيفي وااااايد .. وفيه تحكمات وياد يعني بالكلام يقولوج عادي إذا بتطالبين بهالشي إذا حسيتي أنه حقج ناقص أو مظلومه أتبين تترقين لوظيفه ثانيه بس للأسف العقد إلي قريته ينفي هذا كله كلامهم مب واحد كل حد يقولي رمسه شكل في موضوع واحد تدودهت ما عرفت حسيته انه ماعندهم مصداقيه و إلي خلاني واثقه من قراري أني كنت مظلومه في دوامي القديم بس كنت أتريا الترقيه إلي بتحل مشاكلي كلها إلي فالدوام .. بس انصدمت بإحلال المؤسسه و راحت الترقيه وياها .و ماحبيت أني أنتقل لدوام يديد وأنا حاسه أني مظلومه

اتشجعت واتخذت هالقرار لأنه معظم المؤسسات والدائر إلي حولينا يعرفوني ويتمنون موظفاتهم إلي في نفس الوظيفه يكونون مثلي قلت أكيد من يعرفون أني ما أشتغل بتهل عليي طلبات التوظيف من كل صوب بس للأسف الكل كان عنده فائض فالموظفين و يتأسفون لهالشي وطبعا ما برضى أكون سبب في قطع رزق حد.

طموحي أني أوصل لمركز عالي فشغلي إلين أقدر أحقق الحلم إلي بعده وهو جائزة محمدبن راشد للموظف المتميز يعني هدفي متخطي السحاب وهذا مابيي بين سنه والثانيه يباله سنوات من الجهد في الشغل ..

صراحه ما قصرتن وياي .. أحبكم واااااايد و الله يعطي كل وحده ويرزقها على قد نيتها يااااارب ^^

واسمحولي طولت واااايد

[فرحة عمر]

الله يكون بعونج اختي ويسر امورج ييارب

[نبع الإبداع]

‎??آمـــ?ـ?ـ?ـ يا رب العالمين ـــ?ـ?ـ?ــن