كذا مشكله في مشكله

**أم الحلا** · 2011-03-15, 02:15

السلام عليكم ورحمة الله وبركاته

شخباركم خواتي

انا حبيت اطرح عليكم موضوع ما ادري هل اني اطرحه هني او في قسم ثاني
لان الموضوع يتعلق بشيئين
اول الشي عن تربية الاطفال وثاني شي عن مشكله خاصه بالام
صدقوني الموضوع مش سهل
اول شي حبيت اعطيكم نبذه عن الام..هي صديقة عزيزه على قلبي واعتز بصداقتها وايد
وهي مطلقه وعندها بيبي والبيبي الحين عمره سنتين "ربي يحفظه لها"..
وهي نفسيتها وايد تعبانه لانها في اليوم اللي ربت فيه اطلقت فيه الابو الله لا يسامحه عقاها هي وولدها ولا سال عنهم ولا شي وما تتصورون اشكثر هالموضوع اثر على نفسيتها وحطمها تماما وطبعا تربية الطفل وخاصة في عدم وجود الاب جدا صعبه ولين الحين اتعاني من هالشي ومش عارفه كيف تتصرف ويا البيبي..اوقات اتشد عليه واوقات اتقول حرام اعصب عليه واضربه كفايه انه انحرم من ابوه..
والمشكله الرئيسيه ان الولد جدا متعلق بالام ولو غابت عن عينه دقايق يروح ويدور عليها والمشكله الاكبر انه بيكمل سنتين وبعده يرضع رضاعه طبيعيه..طبعا بتقولون هالشي مش مشكله بالعكس هالشي زين لانه كمل سنتين وهو يرضع من امه..بس هي مش عارف كيف تفطمه؟ حتى هي ما تشتغل وقاعده في البيت وظروف الحياة مخلتنها اتفكر تشتغل بس كسف وولدها جدي؟
هو ياكل ربي يحفظه عادي ويشرب حليب بالمرضعه قبل ما ينام بس ما يرضى يرقد بدون ما يرقد على صدرها..
هي قالت لي انها حاولت انها اترقده بدون ما يرضع بس كان يصيح وكانت اتحس انه خيفان يعني كانها اتحس انه يخاف انها تبا تبتعد عنه وهي طبعا ما تبغي هالشي كل اللي هي تبا اتسويه انها اترقده بدون ما يرضع بس كيف اتسوي هالشي بدون ما اتوصل له احساس انها ما راح افارقه وكيف اتحسسه بالامان؟
في حد قال لها حطي دواء مر يبيعونه في الصيدليه بس خافت اتجربه لانها قالت اخاف من شدة تعلقه عادي بيرضعه وهو مر..وحد قالها لا اترقدينه في النهار بيتعب وبيرقد بروحه بالليل وسوتها ورقد وبعد ساعتين نش ويبا يلعب..وحد ثاني قال لها حطي له التلفزيون وطيحيه حذالج وهو بروحه بيرقد وبعد ما نفع..
مع العلم انه ينش بالليل مرتين او اكثر ويبا بس اتحط صدرها في حلجه علشان يرقد هالشي ملعوزنها وايد وامها قالت لها سوي له مرضعه وعطيه وهو راقد بس ما جربنة هالشي..
المهم عندها الحين كيف اتسيطر على نفسيتها وكيف تتحكم في نفسها وتقدر تفطمه..
والله يا خواتي انها كانت اترضعه وهي اتصيح من كثر ما نفسيتها تعبانه.. واتعرفون كيف الحرمه لما تنكسر وشو يصير فيها..

السموحه طولت عليكم واللي تقدر اتفيد باي شي أوعندها تعليق اواقتراح حياها واللي ما عندها اي خلفيه ما تبغي منكم غير دعوتكم ان الله يصبرها ويقدرها على تربية ولدها..

المزيد من آخر المواضيع من نفس القسم:

**سوارة** · 2011-03-15, 02:16

**أم الحلا** · 2011-03-16, 04:25

معقول ولا وحده عندها أي تعليق أو رد أو حتى دعوه حلوه

**rosebraze** · 2011-03-16, 04:33

مسكينه الله يعينها البنات ما بيقصرن انا ما اعرف وايد في هالامور

**أم الحلا** · 2011-03-16, 04:37

للرفع

**فراشه_وردية** · 2011-03-16, 06:05

الله يعينها على همومها اولا وعلى فطام ولدها ثانيا

حبوبه انا فطت بنتي وكان عمرها سنة وشهرين والحين مكملة سنتين فديتها وتشرب المرضعه
وبنتي كانت مووول ما تطيق المرضعه ولا حتى تحطها بحلجها ابد
و فطمتها لانها كانت وااااااااااااااااايد متعلقه بالرضاعه والله هلكت بصراحة
وحتى بليل مب مرة تنش صدقوني كانت تنش كل ساعه كنت حتى النوم محرومه منه

وعقب قررت بيووم اني ما ارضعها مووول وعقب بروحها بتشرب المرضعه
طبعا سوتلي مناااحه وصياااح طول الوقت والليل ما اذا نشت ما تنام لانها تعودت ترضع وتنام
وتكمل صياح لساعات الين تتعب وتنام

صراحة تعبت معاها شهر بطوله .. وعقب شوي شوي اتعودت على المرضعه وارتحت وااايد الحمدلله
يعني الحل ان يوم يصيح تقوي قلبها وما تعطيه وبس.. لان حتى المرررة انا جربتها مع بنتي ههه وكملت رضاعه
ولا اهتمت خخخ

ويوم يصيح لازم تاكله وتشربه سوائل .. وحليب بالكوب وبس لانه كبير الحين فديته
والله يحفظه لها يارب وييسر امورها

طولت عليكم هههه السموحة منكم بس لاني حاسه فيها وايد

**@أم عمر@** · 2011-03-16, 06:15

الله يعينها ويسهل عليها تربية ولدها ..

**شوشو_24** · 2011-03-16, 06:24

الله يعينها ويفرج همها ويعوضها عوض خير يارب

وبهالمرحلة هي اظن محتاجة دعم نفسي من اللي حولها امها اخوانها صديقاتها

اي حد مقرب منها يساعدها يكون زين

وبخصوص الفطام تدريجيا راح يتعود هاي مب مشكلة ...

**أم الحلا** · 2011-03-18, 04:01

rosebraze مشكوره أختي

**صغيره بس خطير** · 2011-03-18, 11:34

حبيبتي هو كل الي بينفطمون جي ترحمينهم بس هي تحس انه خايف لا نها مرة بتجربة الطلاق مب حابه تحسس ولدها خل تقوي قلبها وتفطمه عاادي

**رشـة عطر** · 2011-03-18, 12:33

ختيه لازم بيصيح اذا ما بتعطيه الحليب ,,بس بيصيح مره مرتين اسبوع وخلاص بينسى

وهو ما ظنيه يحس بشعور انه بيفقدها ,,هو يبا حليب ويصيح يباه

لانزم تصبر لانه ما يقدر يعبر عن اللي فخاطره غير الصياح

ولديه سنه وشهرين يوم رحت الحج وكان يرضع منيه ,, ولكن بعد اسبوع ما ييت من الحج نسى!!
وخلاف رديت للرضاعته ,,الوضع جدا جدا عادي للي يبى يفطم ولده

اعرف حريم يحطن مره على الصدر ,,خليها اتجرب الدوا او المره ,,لاتسبق الاحداث وتقول بيشرب وما ادري شوه ,,قوليلها تقوي قلبها ^_^

وحد يحط فلفل للولديها مر ه ما يصبر عن الصدر بيخاف بيجرب مره وانتي اتقوليله فلفل اح اح ,,كذا مره وخلاص بيودر

ودوم يوم تبين تمنعينه تجهزين مرضه

في الغالب او الايام بيتم يصيح وما يطيع يشرب,, بعد فتره يشرب رقم الى رقمين يمكن لمده اسبوع وخلاف خلاااص تعود ونسا الصدر

الله يجعله من الذريه الصالحه

**أم سيفان** · 2011-03-18, 12:49

الله يعوضها خير

و قوليلها انها مأجورة على رضاعة الولد وتربيته

باجر ان شاء الله بيكبر وبيكون سند لها فالدنيا ^^

عن الفطام خليها ماتشيل هم وتفكر و ايد وتخلي الامور تاخذ مجراها طبيعي

أول شي خليها ماتطلع صدرها و تشبعه بالاكل و و تشربه حليب نيدو او فرش قبل لا يرقد

و صدقيني بيتعب وبيرقد وشوي شوي بينسى

أنا عيالي ماعطيهم مرضعة لانهم مايتقبلونها ولانهم خلاص كبرو احس بيأثر عل اسنانهم ..الخ

احط عدالي الفليل حليب بالفراولة " لانه حبه .. خليها تعطيه كذا نوع حليب فرش او بالكاكاو او نيدو " و كل ماينش اخليه يشرب ويرد يرقد روحه

قوليلها الموضوع ابسط مما تتصور بس كلام الغير ومبالغتهم تخلينا نستصعب الموضوع

و خليها تمارس هواياتها و تدور على شغل اذا تقدر عسب تتحسن نفسيتها

**بثـينه** · 2011-03-18, 17:22

ما شاء الله البنات ما قصرن ..

شوفي الغاليه قوليلها الطلاق مب نهايه الحيااااااه ..
وسبحان الله يمكن هالشي خير لها و يمكن زوجها لو استمر وياها يخرب تربية الولد أو يمكن يكون من النوع اللي ما يحب صدعة اليهال وصياحهم ويضربه مثلا و يمكن ما يكون لها عون أصلا في تربيته و بجذه بتضيج أكثر و بعاده أرحم لها و لولدها ...
و الزواج تجربه اذا نجحت كانت أساس لحياه ثانيه واذا فشلت و وصلت للطلاق فهي مجرد تجربه فاشله و ان شاء الله الفرص جدامها وبتنجح في يوم .. مب شرط تنجح بزواج يمكن تنجح بوظيفتها أو مشاريعها الخاصه اللي لاااااااااااااااااازم تبدا تخطوا خطواتها من ألحين ...
و تعلق ولدها فيها سببه الرئيسي هي .. أكيد هي تعلقت فيه لأنه الشي الوحيد بنظرها اللي تم لها من الدنيا بعد ما فقدت ريلها .. و شي طبيعي انه هالشي بيأثر على الولد وبينعكس عليه و بيخليه يتعلق فيها أكثر وأكثر ...
بس هالشي بيتعبها أكثر كل ما كبر الولد .. ولا تنسين الياهل محتاج لأقران يلعب وياهم و باجر بيسير الروضه والمدرسه و بيخالط ناس أشكال وألوان واذا تعود على أمه في كل شي تراه بيتعب في حياته .. لااااازم تهيأه من الحين انه يكون اجتماعي أكثر ويلعب و يسير ويرد ويا الأهل طبعا و حاولوا تخلون خالاته أو خواله يشلونه ويا عيالهم يلعب بدون وجود أمه .. يمكن في البدايه يكون الموضوع صعب بس اشوي اشوي بيتعود ..
سبحان الله لو الله لا قال مرضت أمه شو بيستويبه !! بيتم يصيح يباها تعابل فيه وهي بروحها محتاجه لاهتمام و رعايه هاييج الحزه !! الواحد يفكر لجدام الغاليه .. السالفه مب سالفه حليب وبس ..
الحليب نوع من أنواع الحجج اللي تخليه يتعلق فيها بس تعلقه الزايد بيضره مستقبلا ..

خل تفطمه بشكل نهااااااااااائي و بدون حيل و ما أعرف شو .. تقطع عنه الرضاعه وبس و بالليل لو نش يصيح خل تعطيه حليب طازج يشربه بالكوب و خل تاخذ له أنواع أكواب مختلفه اللي يكونوا بسترو ( بيب ) أحسن له .. بس مب تعطيه المرضعه لأنه ما شاء الله كبير عليها احين ... خل يسيرون رحله لمحل بيبي شوب أو مذركير أو تويز أر أس و يشتري أكواب على كيفه اللي يعيبه أشكال وألوان عسب يتحمس يشرب فيها الحليب الفريش أو النيدو .. بس المهم ما يرضع أبداااااااااا لا من صدرها ولا من المرضعه ..

صح في البدايه بيلعوزها و بيتم يصيح بالساعات و يمكن يرقد من الصياح و يتم بيوعه وما يرضي يشرب أي شي ثاني بس مع الأيام بيتعود ..

وأصلا حبيبتي هو المفروض من بعد السنه ما ينش يرضع بالليل حتى لو طبيعي !! لأنه ياكل ما شاء الله و الأكل يشبع الياهل .. قوليلها خل تأكله وجبه دسمه بالليل علشان تثجل راسه .. خل تعطيه مثلا حليب بالتمر تخلطه بالخلاط واااااايد زين للياهل يغذيه و يشبعه و يخليه يرقد عدددددددددل .. أو تعطيه عيش و روب بالليل ... أو شوفان بالحليب .. كلهم مفيدين للياهل و يشبعونه ..

والله يعينها على تربيته التربية الصالحه يا رب ..

وصدقيني كلنا يغمظونا عيالنا يوم نفطمهم بس ما باليد حيله وهالشي بيصير عاجلا أم آجلا ..

و مأجووووووووره باذن الله وربي يعوضها خير ان شاء الله و يجعل ولدها من الصالحين و خير عون لها في الدنيا والآخره ..

**رتوـش** · 2011-03-19, 01:22

الله يكون في عونها يارب

**فديت هشوم** · 2011-03-19, 15:06

الله يعينهااا

ان شاء الله يفيدوونج

الموضوع: كذا مشكله في مشكله

أدوات الموضوع

عرض

كذا مشكله في مشكله

المزيد من آخر المواضيع من نفس القسم:

المواضيع المتشابهه

مشكله بنت.. مشكله عجيبه غريبه اخوي متعلق فيني بدون ما يعرفني...52

مشكله بنت ..مشكله عويصه :( .خيانه... . زوجها ما يقدر يمارس حقوقه الشرعيه و السبب؟؟38

مشكله لأبن صديقتى >>> مشكله تربويه اخلاقيه ساعدوها

على فكرة ها مكان للمشاكل .. ! سواء كان ف القسم مليون مشكله او مشكله وحدة !!