غــلآآ قلــبي :: { قصــة ولآدتي } ::

**طآلبة جآمعية** · 2010-10-20, 13:07

كان اخر يوم في امتحانات الجامعة ..وانا يالسة امتحن حسيت بماي ينزل وااايد .. اول شي تحريت انا تخبلت ويالسة ابول على عمري .. بس بعدين شفت الماي يزيد وما يوقف لا اراديا .. خلصت الامتحان على السريع .. حاولت اقوم واقول في قلبي ( وجعلنا من بين ايديهم سدا ومن خلفهم سدا فاغشيناهم فهم لا يبصرون ) لاني كنت خايفة حد من الاساتذة الرياييل يشوف الماي .. بس الحمد لله محد انتبه وسرت كلمت المس وقالتلي سيري بسرعة ووصلتني لين باب السيارة .. والحمد لله ان ريلي كان يترياني .. اول ما ركبت السيارة .. تم خايف علي .. وكلم امه وقالتله خلها تيي البيت عندنا تمشي بعدها ما بتولد الحين .. بس انا ما طعت .. لاني كذا مرة قريت انه الحرمة دام نزل الماي عليها فلازم اتسير المستشفى .. وفعلا سرت المستشفى وما كنت احس بأي ويع .. ودخلوني الغرفة .. وتميت لييين نص الليل وريلي فديته وياي يسولف ويابلي كل انواع الاكل خخخخ .. وبعدين تمينا نتمشى انا وهو في المستشفى ونسوي سباق في المشي.. وها كله وكان مفتوح عندي 3 سانتي.. وبعدين حطولي الطلق الصناعي وياااااااااااااااريييييييييييييييييييييييييييييييي يييييييتهم ما حطوووه .. عقبها بساعة تقريبا بدت الالام كلها مرة وحدة .. وتميت اسكت دقيقة واصرخ نص ساعة .. اسكت دقيقة واصرخ نص ساعة .. صراخ لا ارادي من الويع ما رمت اتحمله.. وكل ما اصرخ ريلي يصيح ويحظني ويقرا علي .. ويقولي (ماشي عيااال خلاص ما باهم ) حرام كان يصيح اكثر عنيي .. الين ما سار عند الدكاترة والممرضات وتم يصارخ عليهم .. وشوي كان بيصفعهم ويفصخ نعال ويضربهم .. وعقب يوني ركض وانا اصييييييح واصارخ وعطوني مهدىء .. هالمؤدئ خلاني ارقد اقل من ساعة عقب رد الويع بزيادة ووقتها كانت الساعة تقريبا 8 او 9 الصبح .. وتميت على هالحال لييييين قبل صلاة الجمعة بساعة .. اشفقو علي وحطولي ابرة الظهر وعقبها حسسسسسيت براااحة عجيبة ورقدت شوي وبعدين ريلي سار يصلي الجمعة وفي هالوقت يت اخته ويلست وياي وتمت تسولف وياي شوي وتقرى علي شوي ..وبعدين حسيت بشي يضغط على تحت بالقو .. وبعدين الممرضة فحصتني ولقته مفتوح 8 سانتي .. وقالتلي اني الحين بربي .. وفعلا طافن ربع ساعة وعقبها طلعت احلى غلا في العالم .. خفت وصحت لانها ما كانت تصيح .. وبعدين اول ما نظفتها الممرظة بالفوطة بدت تصيح( شكلها فديتها كانت راقدة ) .. وعطتني اياها عسب احطها على صدري شوي .. وعاد انا تميت اصيح واضحك وارتجف واخت ريلي تضضضضحك وتدمع .. وبعدين غسلوا غلويتي ولبسوها ويابوها لي .. وفي نفس الوقت وصل ريلي واول ما شاافها تم يضحك ويصيييييييييح وخايف يشيلها عن تطيح من ايده .. وبعدين شلاها واذن في اذنها .. وحب راسي

وبس .. والحين غلا عمرها 4 شهور وأسبوعين

المزيد من آخر المواضيع من نفس القسم:

**فرحة الامارات** · 2010-10-20, 13:11

الحمد لله على سلامتج
ومبروك ما ياتج

**زهره كرز** · 2010-10-20, 13:14

الحمدالله ع سلامتج يا ام غلا

وتتربى في عزج غلا الغاويه يااارب ^_^

**حـرم الغـالي** · 2010-10-20, 13:15

الله يخليها لج يااااااارب

والله دمعت عيني

والحمدلله على سلامتج .. وادعووووولي اربي طبيعي واكتب لكم قصتي انا بعد ^_^

**الدبه** · 2010-10-20, 13:16

الحمدالله ع سلامتج يا ام غلا

وتتربى في عزج غلا الغاويه يااارب ^_^

**ام حمني و طمطم** · 2010-10-20, 13:20

الحمدالله ع سلامتج يا ام غلا

وتتربى في عزج غلا الغاويه يااارب حلوه قصتج الحمدالله

**زم_قمر_ان** · 2010-10-20, 13:20

االحمدلله على سلامتج

وربي يحفظ لج بنووتج ويرزقج برهااا

**.. محتارهـ ..** · 2010-10-20, 13:21

..

حبيبتي .. تتربا في عزج ان شالله .. و الحمدلله على سلامتج

عقبالي يارب .. لاني ناويه اسميها نفس الاسم ان شالله ^^

..

**وردتبسم** · 2010-10-20, 13:48

الله يخليها لج يااااااارب

والله دمعت عيني

والحمدلله على سلامتج .. وادعووووولي اربي طبيعي واكتب لكم قصتي انا بعد ^_^

**الغزلان** · 2010-10-20, 13:54

الله يخليها لكم
والله انج صيحتيني

**+ميثه+** · 2010-10-20, 13:57

دمعت عيني

الله يخليها لكم ان شاء الله وتتربى في عزكم ^.^

وبوسيلي [غــلويهـّ]

والله يسهل عليه وعلى كل حامل ولادتها ان شاء الله

ويرزق كل محرومهـّ بالذريه الصالحه *آمييين*

/

**حياتو ^^** · 2010-10-20, 14:10

الحمدلله على سلامتج ....

الله يخليها لكم وتسعدكم يالغاليه....فديت أحلى غلا...^^

**شوشو_24** · 2010-10-20, 14:54

الحمدلله ع السلامة
من يوم ماكتبتي موضوع انه فاتح عندج 2 سانتي وانا احاتيج لووووول
وعقب يوم شفتج اختفيتي
قلت اكيد الحرمة ربت ^_^
تتربى بعزكم غلا ~

**العوف** · 2010-10-20, 15:10

الحمدالله ع سلامتج يا ام غلا

**طيرالحبارى** · 2010-10-20, 15:28

الحمد لله عالسلامة وربي يجعلها من مواليد السعادة ..

الموضوع: غــلآآ قلــبي :: { قصــة ولآدتي } ::

أدوات الموضوع

عرض