عروس حزينه

[meeeeemoooo]

السلام عليكم ورحمة الله وبركاته

اخواتي انا ابا رايكم في مشكلتي هل انا غلطانه ام لا ؟

انا ملجت من 7 شهور من زوج معروف عنه باخلاقه وسيرته الحمدلله طيبه

ولكن تعامله معاي مؤلم احس بأنه مب مقتنع فيني او مجبور علي

تخيلو من 7 شهور ولا مره قالي كلمة حلوه او مدحني او قال انه معجب في شي فيني
او تغزل فيني لو بكلمه وحده بس

يطرش مسجات حلوه مره كل شهر والباقي كله مساء الخير وصباح الخير ..

ماحسيت فيه موده لي او مشاعر طيبه تجاهي

ولا مره قالي اشتقتلج ولا احبج

غير جيه اذا يبا يسال وين انا مايكتب شي فالمسج بس يطرش علامة استفهام ؟

او اريد منه شي اكتب اسمه

مايكتبلي هلا او كلمه طيبه

بس يطرشلي استفهام ؟

ولامره قالي مستعيل على العرس اقوله اناجل يكون اوكيه مايحسسني انه يباني او لي قيمه عنده
بصراحه انا تعبانه نفسيا والعرس قرب ولا احس بفرحه ولا احس اني مستانسه
ولا لي خاطر اشتري شي للعرس

وكل سوالفه عن الشغل و عن بيتهم ولامره تكلم عني او عن مستقبلنا وكيف بيتكون حياتنا ؟

كل ماتذكر اني بعيش وياه اتم اصيح ماحس له في قلبي محبه او موده طرشتله كم مره مسجات حلوه مالقى منه رد والله العظيم طرشتله احبك مارد عليه الا فاليوم الثاني كتب احبج ولا عادها جنها مجامله

غير جيه مافي خصوصيه مبينا كل شي خواته بيعرفون عنه والكل مدخل يعلموني كيف اتعامل وياه ؟ شو اسوي ؟ وشو مبينا زعل حتى بنت اخوه تعرف تسالني شو مبينا ؟؟

شو اسوي كيف اتعامل وياه ؟ قلتله كمن مره اذا ماتباني طلقني
تصير مشكله ويقول انا شاريها ؟ زين ليش اتعاملني جيه ؟

انا الحمدلله مافيني شي ينعاب الكل يتمناني والكل يمدح فيني والله مامدح عمري بس مرات اقول فخاطري هل فيني شي ؟ بديت اشك في عمري الكل يحبني والحمدلله في قلبي حب للكل

رغم كل الي صار ماحسيت اني اكرهم بس شاله في خاطري مواقف جرحتني

ساعدوني ... خايفه وايد ماريد اعيش حياتي بنكد وتعاسه

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[قمر ضاوي..!!]

الله يعيينج ختييه انا لو مكانج اكيد بكون بنفس حالتج واخس

امم حاولي تعرفين منه هو ليش جي يعاملج سأليه ولا تستحيين قولي له الي تحسيين فييه خل يعرف الي بخاطرج يمكن يحس شوي يعني انتي تتعذبين ويمكن هو بعد شي فخاطره حاولي فديتج والله يسعدج ويفرج همج

امم ان شاءا لله الخوات يقدرون يساعدونج ويفيدونج اكثر عني ^^

[وردة تسامح]

هلا وغلا
حياتي خذيها كلمة مني وتذكريني علي مر الأيام
العشره والأعيال تغير الواحد ويصير متعلق في الحرمه زيادة وعلي حسب أسلوب الحرمة ..
والريال يباله مسايسة وطولة بال والحين اهو بعيد عنج باجر لما يكون في معاج بيكوووون غير ...
((((( الحب الحقيقي بعد الزواج ))))

[reem hamad]

الله يعينج

[pink blusher]

مرحبا اختي ....
يمكن هو من النوع الانطوائي الي ماله خبره ولا سوابق..
ويمكن مايعرف يتعامل مع البنات يمكن يكون خجول ...الخ
وبنفس الوقت يبا اهتمام اكبر منج ..
دامه قال شارنج ..معناته يباج صج ,,دام يته الفرصه وقلتيله نطلق لو كان هو يبا هالشي جان شفتيه ماصدق وقال اووووووكي نطلق..بس هو قال انا شارنج ...حاولي تتقربين اكثر ..حاولي تفهمين شخصيته وواجهيه وصارحيه مافيها شي ..يمكن بتغير او يحس انج ملاحظه تصرفاته ..اذا تميتي ساكته بيقول انج ماتبينه وبيحط اللوم عليج...فديتج الطلاق مب حل ..وزين ان بس اسلوبه الي مب اوكي قولي الحمد لله في رياييل اخس عن جي ...الاسلوب ممكن مع الوقت يتغير..وانا حسيت انه خجول والله اعلم ...الله يوفقج حبيبتي ويسعدج ولاتتسرعين ...

[شواقة]

يلسي وياه يلسة صراحة اختيه وصارحيه باللي تحسينه وقولي له

اذا هو مغصوب عليج ومن هالكلام اللي ذكرتيه

و قولي له نحن بعدنا ع البر اذا ما تباني خلاص

ولا انج تتوهقين عقب العرس وربي يوفقج ويسهل لج امورج

[فاخره 2010]

فديتج ليش هالحزن بالعكس بيدج كلشي انتي ما تحكمين وانتي بعيده عنه باجر ان شاء الله يوم بتعيشون في بيت واحد كلشي بيختلف بس انتي لا تتدققين في كلشي منه فهميه شو تحبين مع الوقت بتفهمينه

[رآحت أيامك ,]

مرحبا اختي ....
يمكن هو من النوع الانطوائي الي ماله خبره ولا سوابق يمكن يكون خجول
وبنفس الوقت يبا اهتمام اكبر منج ..
دامه قال شارنج ..معناته يباج صج ,,دام يته الفرصه وقلتلتيله نطلق لو كان هو يبا هالشي جان شفتيه ماصدق وقال اووووووكي نطلق..بس هو قال انا شارنج ...حاولي تتقربين اكثر ..حاولي تفهمين شخصيته وواجهيه وصارحيه مافيها شي ..يمكن بتغير او يحس انج ملاحظه تصرفاته ..اذا تميتي ساكته بيقول انج ماتبينه وبيحط اللوم عليج...فديتج الطلاق مب حل ..وزين ان بس اسلوبه الي مب اوكي قولي الحمد لله في رياييل اخس عن جي ...الاسلوب ممكن مع الوقت يتغير..وانا حسيت انه خجول والله اعلم ...الله يوفقج حبيبتي ويسعدج ولاتتسرعين ...

صدقيني خجووووووووووووووووووووووول


وماعنده سوابق

هاي نعمه وبنفس الوقت اشوفها نقمه


حلاته الكلام الحلو بين الحرمه والريال

والا كل شي احسه ينهدم


ااذا الريال يعامل حرمته مثل اخته ؟!

انا حاسه فيج والله العظيـــــــــــــــــــــــــــــــم


بحاول اراسلج ع الخاص,

[أم عزوووزي]

الاسلوب مقدور عليه وتقدرين تغيرنه مع الايام بس وقفي شي واحد صدق رفع ضغطي ان اي شي يستوي بينكم خبر اهله

يوديه ويلسي وياه وكلميه قوليله حبيبي في اشيا انا وايد مضايجتني في امور يمكن انته تتعامل معاها على ويهك ترا الرياييل يسوون اشيا احيانا يحسونها ب غلط

قوليله اي شي يستوي ما بينا خاص فينا مايطلع برع اي شي يستوي بينا اختك والا بنت اختك يتصلون فيني
هالشي مب حلوه في حقي و لا في حقك

و الله يسسرر امورج حبيبتي

[براءة1]

عزيزتي ..
انتي استخرتي واستشرتي اصحاب العلم..؟
اختي والله نصيحتي لج انج تختارين الريال اللي يصونج ويكرمج ويحافظ عليج كحرمة.. مب كحيطة!
و الريال الصالح يخاف الله ف حرمته مب يخليها كأنها ولا شي فالدنيا! والله حرام
اختي استخيري الله مرة ثانية واسألي اهل العلم واستشيري الناس اللي اكبر عنج..
لو مب مرتاحة ومايعطيج حقوقج كإنسانة وكأنثى.. اسحبي نفسج من احين احسن من الندم بعدين..
وهالانسان مايصلح. لأن بدايته دمار وانتي بحالة نفسية.. عيل بعدين شو بيستوي عليج !
الله يعطيج الخير

[فللة]

الله يصبرج بس اسلوبه غريب مادري شو اقولج الله يعينج ويصبرج

[ام سلوم ^^]

حبوووبه ما عليه ليش جيه اتقولين الحين اكيد غير وانه يستحي يمكن مع الاياام اشووي بيتغير

لانه عقب الزواج يكون غير واحسن بعد ف ريايل لما يملجون او يعرسووون ما يحبون يتكلمون واايد يعني يكون

ثقييييييييييييييييل ادري باحسااااااسج كل وحده تتمنى ان ريلهااا يدلعهااا ويسمعهااااا احلا كلاام حتى انا كنت جيه

واايد حساااسه ... خليه اشوووي لا طرشين له رسايل دوووم احبك يطرش مسا الخير انتي بعد طرشي مثله

اشوووي اشووي يتغير كل شي انتي توج مالجه اكييييد الرياال يستحي لاني انا تميت مثلج بس اخر شي عرفت ان

ريلي من النوع الخجووول وااايد ... فانتي اسألي خواته كيف طبعه وكيف هو ويااهن ....

اوووهووو نسيت ابااركلج مبروووووووووووك عليج شهر رمضااان... ^_^

[meeeeemoooo]

مشكورات خواتي على ردوردكم

بس انا استخرت وايد مرات احس اني مرتاحه واقول دامه اخلاقه زينه ودينه الله بيحاسبني لو طلبت الطلاق
ومرات احس اني مب مرتاحه وودي نفترق اليوم قبل باجر لاني ماحبه ولا يحبني

ادعولي في هالشهر انه الله يسوي لي فيه الخير .. بصراحه ماعرفت لمنو اقول والله استحي اقول انه مايقولي كلمة حلوه لاهلي قلت اكتب هنيه يمكن حد يعطيني حل في طريقة التعامل معاه او يشور عليه بشور

[أميرة المنتدى]

اصبري اختيه.. هذا طبعه هو جي جامد.. هاي شخصيته..
وبعدين عقب الزواج كل شي بيتغير..
حاولي انتي ابذكائج اتغيرينه بس لاااااا تكونين عجووووووله...

عقب العرس والعيال ان شاء الله بيتغير صدقيني.. وكم تسوى كلمة " أنا شاريها "

وأبدا لاتيبين طاري الطلاق مب زين يالغاليه..

ربي يوفقج...

[hiba_003]

يلسي وياه يلسة صراحة اختيه وصارحيه باللي تحسينه وقولي له

اذا هو مغصوب عليج ومن هالكلام اللي ذكرتيه

و قولي له نحن بعدنا ع البر اذا ما تباني خلاص

ولا انج تتوهقين عقب العرس وربي يوفقج ويسهل لج امورج