اكره حرمة اخويه

[هادية الطبع]

السـلام عليكم ورحمة الله وبركاته

بخبركم سالفتي مع حرمة اخويه واخويه وانا كلي حزن على اخويه ...
حرمة اخويه انجليزيه ’ وتوها يديده في الاسلام , يعني ما تعرف غير الصلاه والصيام , باجي الامور ما تعرفها يبغيلها وقت لين تعرف امور واحكام الدين , المصيبه انها عندها ولد من علاقة غير شرعيه قبل اخويه لياخذها , اخويه رضا ياخذها حتى لو عندها ولد من علاقه غير شرعيه دام انها برضاها دخلت الاسلام قام اخويه تزوجها ويابها البلاد وعيشها في شقه مع ولدها معززه مكرمه , كل جمعه ايبها عندنا تزورنا تسلم علينا بالذات على الوالده , فيوم من ايام الجمعه كنا يالسين ويا بعض جان اسأله عن ولد حرمته وتمينا نسولف عن ولد حرمته سألته لين الحين مسجل الولد بسمها هنيه اخوه انصدم من سؤالي يتحسبي غشيمه ما افهم انه في الغرب واروبا البنت اذا كانت يايبه ولد من علاقه غير شرعيه تسجله بسمها اخويه سكت شوي جان يقولي لا سجلته بسمي انا هنيه عصبت وايد وعاتبته قلت له ليكون هو ولدك بس ما تبغي تخبرنا وتبغي تستر عليها عصب عليه وحلف انه مب ولده وانه ابوه اجنبي قلت له اشوف عمره نفس عمر دراستك في بريطانيا قالي استهدي بالله ولا تظنين بي انا حلفت والحلف مب لعبه .
كيف تنسب وتتبنى واحد لاسمك ما يستوي وما ايوز حرام التبني في الاسلام التبني يعني تخليه ابن لك وتسجله باسمك جان ايبله الادله كلها وعطيته اياها ما اقتنع بكلامي قلت له بيسجلونه على انه ولدك في الجنسيه يعني بيكتبون في الجنسيه المولود الاول محمد ما عيبه كلامي قالي لا ما بيكتبون اسمه في الجنسيه قلت له بيكتبون لانك كتبته بسمك وانته الحين معرس اسم زوجتك بيكتبونه في الجنسيه وعدال اسمها مكتوب المولود الاول طبعا بيكتبون اسم محمد عصب عليه قالي انا راضي انتي ما يخصج قلت له اوكي مب مشكله الايام بينا بس انا ما ارضا حد يشل اسم ابويه ويشاركنا باجر في الحلال قلت التبني شي والكفاله شي اما الكفاله يعني تكفل طفل عادي لانه الرسول صلى الله عليه وسلم قال انا وكافل اليتيم في الجنه كهاتين واشار باصبعيه السبابه والوسطى
طلبت منه يتصل في وزارة الشؤن الاسلاميه عسب يسألهم ويتأكد بنفسه من كلامي اتصل فيهم يوم الاحد بداية الدوام وعطوه الفتوه كامله بالاختصار قالوله حرام التبني في الاسلام يعني تخليه ابن لك وتسجله بإسمك طلبو منه يغير اسم الولد ويسجله بسم وهمي مثل فلان بن ادم او فلان بن عبدالله جان يصدق اخويه كلامي اتصل في السفاره البريطانيه وخبرهم التفاصيل طلبوا منه يسير بريطانيا ويغير هناك عقب يرجع دبي عسب السفاره اتكمل الاجراءات الي عليها .
حرمته يوم ردت الشقه طرشت لي مسج تقولي هادية احنا ما كنا نعرف انه حرام واذا غيرتوا اسم محمد انا برجع بريطانيا بعيش ويا محمد هناك انا اخاف على محمد من الضياع واخاف مستقبله يضيع اذا عاش من غير جواز وهويه انا ابغي ولدي يتعلم ويتسجل في مدرسة فيها اماراتين شي استوى وخلاص مابا حد يتكلم في هالموضوع مره ثانيه اوكي .
رديت عليها الغلطه مب غلطتج الغلطه غلطة اخويه الي ما يعرف شي
انتي مسلمه يديده احترمي كل احكام الشرعيه الاسلاميه ولا تعترضين على الدين والاسم لازم يتغير لانه حرام واذا مب عايبنج اطلبي الطلاق وارجعي بلادج ويا ولدج محمد وشلي اسم اخويه من ولدج لانه محمد مب ولدنا ولا لد اخويه عسب يتسجل في اسمنا . الاسلام غير عن المسيح .
سارت خبرت اخويه جان يتصل فيني معصب ليش اقولها هالكلام قلت له عسب قالت ماا تبغي حد يتكلم في هالموضوع مره ثانيه جنه على كيفها مب هي الي تمشينا على كيفها حرام يعني حرام وعليها ترضا مب تتعرض ما لقيت الا اجنبيه بلاهم بنات البلاد وبلاهم بنات الاهل انا ارفض هالزواج وما نبغي اجنبيه اذا اسلمت اسلمت حق نفسها مب حقنا احنا . اذا تبغي اتعرف عن الاسلام تسير المركز الاسلامي في بريطانيا وهم بيعلمونها في الدين و انته جان ساعديتها على الاسلام وطلعت من حياتها مب تاخذها قلت له احس انه اسلامها مب من الخاطر قالي انتي ما عاشرتيها ولا عرفتيها عدل عسب تحكمين عليها . قلت له منوه ما يبغي كل شي جاهز وببلاش وهي لو فيها خير جان خذها الي كان مسوي معاها علاقه مب شرعيه . بيني وبينكم احسها ماخذه اخويه مصلحه بس بعدها ما طلعت على حقيقتها .

قلت له لو كانت مواطنه وعندها ولد بالحرام بتفكر تاخذها ؟؟ ومن هالكلام العادي
قلت له هذي اول انسانه في حياتك فاعتقدت هذي هي الي تقدر تكلم حياتك معاها لو كانت لك علاقات بتعرف تختار صح ( اخويه يوم سار يدرس في بريطانيا كان عمره 20 سنه ) والحين عمره 26 سنه

قلت له انتو المواطنين كلكم جيه بنت البلاد تعفونها اذا غلطت اما الاجنبيه تحلى في عينكم حتى لو كانت مب زينه لو كانت مواطنه ما بتتشرف تاخذها بتفكر الف مره لا نك بتستحي تطلع معاها في المولات وتستحي حد من ربعك يشوفها ويقول هذي كانت اربيعتي قلت له انته حر في حياتك وما يخصني فيكم بس الاسم لازم يتغير فكر في باجر وفي المستقبل قالي انتي شو مضايقنج قلت له بس سالفة الاسم مضايقتني قال لو اغيره ما بتتكلمين قلت ما بتكلم ولا يخصني فيكم اعتقد شفتني يوم عرفت انك خذت اجنبيه ما اتكلمت ولا ادخلت في حياتك بس يوم عرفت انك سجلت ولدها بسمك هالشي الي ضايقني غير الاسم وسجله مثل ما قالك المطوع بسم وهمي عقب تقدر اطلع له جواز اماراتي ولا بريطاني عادي لانه بيعرفون وضع حرمتك كيف كان قبل الاسلام وبيراعونك وبتقدر ادخله المدرسه والجامعه عادي يدخل مدراسنا حتى لو عنده جواز بلاد امه اقتنع بكلامي بس كابر .

ومن عقب هالسالفه يا خواتي علاقتي ويا اخويه مب اوكيه

الحين هالايام اخويه قرر ايبها تعيش عندنا تعب من ايجار الشقه وطبعا ولدها محمد بيكون معاهم استوت مشكله ثانيه بينا وجود محمد بينا بقيد راحتنا ولبسنا وانا مب مستعده اتم 24 ساعه لابسه الشيله في البيت ولا مستعده 24 ساعه البس جلابيات انا واختيه طبعا اختيه ما تتكلم وما تقدر تكلم اخويه اما انا غيرلاني انا الكبيره نبغي ناخذ راحتنا في البيت قلت هالكلام حق اخويه قال سنه وبيتحولون في بيتهم اليديد طلب مني اصبر لين يتحولون وقال محمد ما بيلس وياكم بخليه بعيد عنكم
وجود محمد بينا بيضايق فينا خاصه اني ما استلطفته هو وامه لانها اعترضت ومصره يتم اسم ولدها في اخويه , اخويه سمع كلامها والحين ما بيشل اسمه من اسم محمد لانه هو راضي طبعا هالشي مضايقني واااايد قالي لا تتكلمين وما يخصج بشي شوفي واسكتي يوم حد بيتكلم في البيت اتكلمي , اخويه وايد يدافع عن محمد لدرجه انه ساعات يصارخ عليه عشانه وعشان امه الي هي حرمة اخويه
قلت له صدقني ما بتستمر معاها اول اختلاف بينكم قالت بترجع بلادها باجر يوم بيون العيال بتزيد مشاكلكم وانتم مب احسن عن الناس المشاكل ما تطلع الا يوم ايون العيال باجر بتاخذ عيالكم وبتشرد قالي بخش جوازها وبخليه عندي قلت له بتشتكي عليك في سفارة بلادها وبيسفرونها عن طريجهم هاذيلا بلادهم واقفه في صفهم على الغلط , فكر باجر في العواقب انا اختك العوده وافهم عنك في الحياه فكر في عيالك وعواقب الزواج من الاجنبيات .

انا ناويه اذا يابها اخويه عندنا ارابعها لاني افكر في باجر والمستقبل مابا عيال اخويه ما يعرفون عماتهم ولا يكلمونا حبيت اقيس نبض اخويه في هالشي اتصلت فيه وقلت له انا ملانه خل حرمتك تمر عليه ونسير نتمشى قالي بسألها وبرد اتصل فيج يا خواتي والله اترييته وايد ولا اتصل جان اتصل فيه قلت له شو صار قالي ما تبغي تسير قلت له انته اصلا ما قلت لها قال هيه ما قلت لها انا مابا اتسير معاج انزين قلت له مشكور وفيك الخير

اعذروني لاني طولت عليكم في الموضوع

خواتي بغيت شوركم
انا مضايقه وايد غامضني اخويه هل غلطت يوم نبهت اخويه بخصوص التبني والاسم وهل يحق لي اعترض على هالزواج ولا لا فهموني وخبروني الصح انا اقبل النقد البناء وارفض النقد الجارح

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[المزاااجية]

الله يهدي اخوج حراااااااااااااااااااام يسجله باسمه

[Asooma]

انا ما اشوف انج غلطتي

بالعكس باجر بتصير مشاكل اصلن

الله يهدي اخوج ما حصل غير اجنبيه

وصدقج يوم قلتي اذا بنت البلاد غلطت طول عمرها بتم في بيت اهلها
انا ماعرف الشباب كيف يفكرون

وبصراحه مابتاخذون راحتكم اذا تم ولدها وياكم

الله يعينكم

والسموحه

[ريامي دبي]

والله هالسوالف معقده...والأجنبيات قوايا والله ماراح يقدر لها يوم بتزعل وبتاخذ عياله اذا الله رزقه منها عيال
وبعدين وين اهلج من السالفه وشو ردة فعلهم وأبوج وأمج شو رايهم في الموضوع
أشوف بس انتي اللي قاهره نفسج؟؟
بعدين اختي لو كان ولده مستحيل يبين هالشي جدام خواته لانه يخاف عليكن من الغلط أكيد
صدقيني ماراح يكون اخوج مدمغ لهدرجه بس تمسكه واصراره مثل السر اللي مخلنه متمسك بوجود اسم هالولد
الله يهديه ادعوا له والله اييسر اموركم

[twinckle]

ما غلطتي يوم نبهتيه
الساكت عن الحق شيطان أخرس
الله يهديه

[المندوس]

ما غلطي بس صدقيني بي يووم وبيندم ندم

[غيد الاماليد]

كل كلامج صح

الله يهدي اخووج

[بنت النوووور]

ما شاء الله عليج عيني عليج باردة ما شاء الله عقلج كبير وكلامج ما شاء الله صح

وحاولي مع باباتج

[زوجة صلاح]

اخوج وايد صغير ومب خاسبها صح بس وين ابوج عمامج عن السالفه هذي لان ولد الانجليزيه يكون محسوب عليكم كعائله

[زوجة صلاح]

اختي يمكن كلامج الولي صح انه ولده قبل مايتزوجها
لان صعبه انه يضيفه باسمه حتى قانونيا هناك يعني هو من البدايه مسجل باسمه

[maithooo]

هو كم كبره ولد حرمة اخوج؟ انتي خذي اخوج بالهداوة,صدقيني بينه وبين نفسه هو حاس بتظارب افكار. إلا مايرجع اموره وترجع الامور طبيعية بالتدريج, انك لاتهدي من احببت ولكن الله يهدي من يشاء

[راشـ أم ـد]

الله يهديه ان شاءلله

[حروف الحب]

السالفة قهرتني و الله جنها تخصني .. بس انتي ما شاء الله عليج صراحة .. بس بنفس الوقت اختي
شدي و ارخي .. لا تخلين اخوج يعند و يسوي اللي فراسة .. هو الحين في نص المصيبة و مب حاس
انه امسوي غلطة ... و اذا حسكم تهاجمونه و في الليل الحبيبة اطبطب عليه اكيد بيكرهكم ..
و انتوا ما تبون هالشي..

اللي حاولتي اتسوينه صح ..حاولي تكسبين مرته في صفج حتى لو من ورا خاطرج بس اهم شي اخووووج
و ادعي انه اذا في راسها شي يبين قبل لا اتيب منه عيااال ..

و الله يعينكم على ما بلاااكم ...

[بنت هنيامي]

الله يهدي اخوج

[غــ الروح ـلآ]

لا حول و لا قوة الا بالله العلي العظيم .... و الله قهرني اخوج من ناحية الاجنبية و الولد ...آآآه بس الله يهديه
و الله كل كلامج صح و و عين الصح.... بس اسأليه سؤال لو خيروك من بين المعصية و الطاعة شو بتختار ؟؟!!!

و اذا قال الطاعة قوليله عقلك في راسك تعرف خلاصك ... يعني انت تعصي ربك عشان حرمة !!!!! سبحانه ان كيدهن عظيم ... حرام تتبنى و لد ... و ذكريه يوم الرسول -صلى الله عليه و سلم - تبنى زيد بن حارثه نزل الله الحكم بعدم التبي قال تعالى ((ادْعُوهُمْ لِآَبَائِهِمْ هُوَ أَقْسَطُ عِنْدَ اللَّهِ)) {الأحزاب: 5} صدق الله العظيم ... ربي يهدي اخوج و يرد لصوابه ....