صور خطوبتي

[جنيه غاويه]

السلام عليكم و رحمة الله و بركاته

شحالكن عرايس ؟ و بنوتات ؟

بعرض لكم صور خطوبتي انشالله تستفيدن




حفلة الخطوبه : يوم السبت ـ تاريخ 28/2/2009
مكان الحفــــل : جمعية الاتحاد النسائية / الشارجه << ممتازه لحفلة الخطوبه
عدد الكراسـي : 150 كرسي << كفن المعازيم و لله الحمد
كشختـــــــــــي : باللون الازرق
تم تغيير الكوشه / زفة العروس تكون الاضاءه ع شكل ديسكو واايد حلوه هالحركه



الكوشه


هاديه مرتبه و حلوه






الهدايا

ع الزاويه شي صندوقين هدايا من اهل المعرس
صندوق لي و صندوق للوالده الله يحفظها
تسلم يدينهم ع الهدايا الروووعه و الرااااقيه

ملحوظه : حلوه هالحركه من اهل المعرس ، العروس تستانس و تتفاجأ ، و تحس
انهم يحبونها





الشبكه


مسوين الهدايا و تزيين الشبكه بنفس لون كشختي ( حلو منهم التنسيق )
و مختارين الشبكه بناءً ع شخصيتي من خلال زيارتهم لنا في الخطبه و النظره الشرعيه
و الاتفاق ع الملجه و شافوا اني " كيوت و مبتسمه و مرحه " فاختاروا لي هالشبكه
كيووت و ناايس ( و تبين في العين ) .. معاها ساعه من " باريس غالاري "
و دبله هاااديه و عمليه بناءً ع طلبي .. اتفلسف بعد ^^ ..





عن قرب




الزفه


زفتي الحسن المثير ـ
مرت حمي و بنفس الوقت اخت ربيعتي يت عندي و قالت لي يالله الحين بنزفج
و اقري على عمرج اللين ما تنشل الستاره و تشوفين المعازيم ، لا تحاتيين ،
" شكر خاص لها ع وقفتها وياي " و المعرس موصني قبل اني اقرا ع عمري
انا صح كنت اقرا بس و الله القلب طالع من مكانه احاتي كيف بنزل من الدري
و لابسه كعب اش طووله

قلت لكن ان كشختي باللون الازرق







الفستااان


الفستان اجرته من عند : ريم الحوسني / الشارجه / الفلج
استايله مايل ع الخليجي ،، خبااااال
اجرته : ( 4000 درهم ) هذا سعره لاني اول لبسه من بعد صاحبته، مع الفستان سله عباره عن مسكه
و اكسسوار عووود للشعر عباره عن و رده ( حركه غريبه بس واايد حلوه ركبت ع التسريحه )






الفستاان عن قرب





المسكة

المسكه عباره عن سله و ديتها محل الورود و زينها لي
حلوه حركة السله لانها يديده .. و كان نازل منها اوراق رفيعه داخلها لؤلؤ
و اخر طرفها و رده زرقه
و خواتي و بنات خالتي محتشرن عليه الا يصور الخاتم مع المسكه





المكياااج

خبيرة التجميل : ايمان ( مب متاكده من الجبيله يمكن المرزوقي او الزرعوني واحد منهم )
شغلها شفته ع ربيعتي عروس و خواتها ، عيبني واااااااااايد ، فلما اختي عرست يابتها و
حطت لها مكياج نااري روووعه ، و انا تمكيجت عندها في عرس اختي و قلت لها حطي لي
مكياج ثجييل (لان ملجتي كانت بعد عرس اختي بـ 11 يوم ) و الطامه الكبرى ان لون فستاني لعرس اختي ازرق و لون فستاني لخطوبتي بعد ازرق " بس الفرق في درجة اللون " فقلت لها السالفه
و اتفقنا ان يكون ثجيل الحين ( لانه يركب عليه بشكل رهييب ) شووو طلعت اجنن و حياتكم خبااال
عذبت المعاازيم ( هذاا رايهم مب راايي ) << خقاااقه يخرب بيت العدوو
و لخطوبتي استاايل هااادي ( بناءً ع ذوق اهل ريلي ) و طلعت حييل كيووت ^^ يهبل الميك اب

الشعر : امل و غاده احلى شي / انا يبت امل استايلهاا دووم روول و فير ، فسوت تسريحتي
لعرس اختي غريبه روول ياي على جهه وحده و وشويه فوق عن قصتي ،، و تسريحة الخطووبه بعد رووول بس مختلفه تمااااااااااما عن تسريحة عرس اختييه و حطت الاكسسوار و طلع استايل يديد و راقي ..

اللي تحب الروول و الفير انصحها : بأمل و هي تكون موجوده عند ايمان

ملحوظه : مهم انج تراعين ذوق اهل ريلج

( اشكر ايمان و امل ع اللوك اللي كلمة يجنن شوي عليه و بشهادة الجميع )

علما ان ربيعتي غيرت الماكيره اللي كانت بتيبها لعرسها من بعد ما شافت مكياج خطوبتي
و ربيعتي الثانيه خذت رقمها من بعد ما شافت الصور و مكيجت اخت ربيعتي في خطوبتها وتخبلوا عليها

تسلم ايدهاا ع المكيااج الرااقي

مكياج الخطوبه : 2000 درهم
مكياج العرس : 4500 ما ادري بـ 4000
تروح لبوظبي ( لان ربيعتي حاجزه عندها لبوظبي ) : 5000 << رخيص مقارنه بغيرها

الصوره واايد ظالمه المكياج و الله انه رهييب و ناعم





حفلة الخطوبه كاملها

الصراحه طول عمري كنت احلم ان خطوبتي تكون على كل لسان من حلاتها و الحمدلله
و الف شكر لرب العالمين انها تحققت .. من قاعة و كوشه و شبكه و فستان و مسكه و مكياج و شعر
و فوق هذه هدااياا و مفاجا حلوه من اهل المعرس .. رقصوا مصري و تركي لدرجه ان الحين يطلبون ان يعيدون هالحركه في العرس ... و انشالله الله يتمم ع خير عسب يعيدون الحركه ..
و الخطوبه كاانت ربششششه بمعنى الكلمه ..


ملااحظه : الحفل ما يحلى الا بالرقص لو شو ما سويتي و ما كان في رقص يطلع العرس بارد ما في طعم .. خاصه اذا كان رقص ثنائي او جماعي مثل رقص هندي مصري شامي ايراني

و حلو ان اهل المعرس يسوون للعروس قدر جدام اهلها و اهلهم

اشكر كل من حاول ان يظهر الحفل باحلى ما يكون


اخـــــــيــــــــــرا

عرسي قرييب تاريخ 27/7/2009 يوم الاثنين

بتمكيبج عند هيفاء صفر و حاطه ايدي ع قلبي

اخاف منها عيوني واايد ترمش اخاف تعصب و تردني بيت ابويه


ادعوووولي بالخير و ان الله يتمم عرسي ع خير و يسعدني و يحفظنا لبعض انا و زوجي و كل اللي يحبوني ..

الله يرزقكم بولد الحلاال دين و اخلاق و جمال


امواااح .. احبكن .. سودااات .. هع هع



سيتم حذف صور المكياج بعد يومين باذن الله و صورة زفتي ..

المزيد من آخر المواضيع من نفس القسم:

• صور تورتة اعراس غاية الجمال والرقي
• خلطات طبيعية سريعة ومضمونة لتطويل شعر العروس
• طريقة عمل ماسك الموز للعناية بشعر العروس
• صور بدلات عريس انيقة وجميلة
• صور ديكورات اعراس شتوية ساحره
• صور ديكورات طاولات زفاف راقية لحفل زفاف انيق
• اجمل تصاميم كروت زواج انيقة وعصرية
• كيكات زواج انيقة ومميزة باللون الازرق
• اجمل اشكال كيكات زواج لاعراس موسم الشتاء
• تنسيقات طاولات زفاف بألوان مبهجة وعصرية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[منار2009]

بالتوفيق الغاليه وعقبالنا وماشاءالله روعه

[سكر_قطر]

ماشاء الله

الله يحفظج ويوفقج في حياتج

مبينه الحفله وايد كيوت ولون فستانج وايد يهبل

تتهنين يالعروس

[أم خلاد]

حلوة ترتيباتكم ما شاء الله

مكياجج وفستانج رووووووووووووووووووعة شوية عليه

الله يتمم لج الفرحة الكبيرة إن شاء الله

[LoOoL]

ألف الف مبرووووووك يا احلى عروووووووس

حلوو لو المكياااااااج
وكل شي حلو ومرتب

وتســــــتاهلين كل خيــــــــــــــر

ربي يسعدج ويوفقج ان شاء الله ويحفظج

بانتظار تقـــــرير العرس وشهر العســــل لول اذا بتسافرين .. نترياج

[حدي دلوعه]

ما شاء الله تبارك الرحمن...

مبينه انها واااااايد مرتبه الحفله.. الله يتمم لج عرسج على خير الغلا..

عن جد فستانج وااااااايد حلو الميك اب كشووووووووووووخي وناعم... خصوصا انا احب هاللون

[ابتساام]

ماشاء الله الفستان خبال عيبني
الله يوفقج ويسعدج غناتي

[Miss Business]

ما شاء الله ..

الله يتمم لج على خييييييييييير الغالية ...

وعقبال ما نشوووووووووف صور العرس ان شاء الله ...

[وردة غلااا]

ألف ... ألف مبروك وتستاهلين كل خير ان شاء الله وربي يسعدج ياااااااارب

[إهداء]

الله يهنيييييييييييج

ولا تحاتين هيفا ما تودي البيت هههههههههههههههههههه .. وميكابها ما عليه كلالالام ...

ربي يوفقج

[ريـــــــم]

ألف مبروك حبيبتي ،،

روووعهـ ما شاء الله وشي صدق مرتب ^_^

حبيت الفستان وايد بصراحة والميك اب رهيب ما شاء الله ^_^

الله يتمم عرسج على خير ويوفقج ويسعدج يااااااااااااااااا رب

[جنيه غاويه]

مشكوورااات حبيباتي ع طلتكن و ردودكن المفرحه
عسى الله يسعدكن

متأكده ما تودي البيت >> ع ضمانتج

انشالله تقرير العرس بيوصل لكم بعد العرس لما بيكون المزاج راايق هع هع
يعني استكانت جااي تخلي الموود كدااا ميه ميه

و الله عن السفر للحين ما في معألوم هزا مرز واايد مشكل
انشالله ازا ياني اوزاء زين يسافر .. انت سو دعاء حق انا .. جي ماما

[ro0o0osa]

http://forum.uaewomen.net/showthread.php?t=487696

اتمنى تقرين الموضوع هذا

الله يوفقج بحياتج

[العرقوبه]

نآيس وآلله

رووووووووووووعت فستآنج

جنآن ..

كل شي حلووووووو وآلله

تسلمين غنآتي

[جنيه غاويه]

هلا روزا

يا عيني انا فصلت جسمي عن الفستان بالفوتوشوب و بعدين حطيته في شريحه ثانيه
و رتبتهااا و ظهرت شريحه ثالثه و حطيت عليها نكي و سيفتها ..

في فرق لما اظلل الصوره و لما اقص الصوره

و العين شو بيسوون فيها ؟؟!!!!!!!!!!

يعني بيودروون الفسق ( اللي بالنسبه لهم متعه ) اللي موجود في النت و بيوون ع العين !!!!!؟

نصيحتج يالغاليه ع عيني و راسي يا تاج راسي و الف شكر لج غناتي

مشكووره ع مرورج ^^