كيف اقنعه

[مشكلتي]

السلام عليكم اتمنى تفيدوني من خلال خبرتكم
انا متزوجه صارلي 8 سنين وعندي 3 عيال ونسكن ويا اهل ريلي وان
الموضوع اني ابا اقنع ريلي بالسكن بروحنا
المشكله هو مرتاح من ناحية المصاريف طبعا لكن انا مب مرتاحه من امور ويمكن كثير منكم يعرفونها او متعرضين لها
طبعا الخصوصيه معدومه كل تحركاتج لازم يدرون بها وتدخلات بتربية العيال حدث ولا حرج لدرجه العيال احس صابهم لخبطه مايعرفون يسمعون كلام منو وغيره من امور كثيره اهمها اني كحرمه ابا احس اني ملكة في بيتي انتوا ادرى بهالشي اتوقع كلكم تحسون بنفس الشي
يوم اكلم ريلي بهالامر يقول لي انتي ما راح تتحملين انتي متعوده عالطلعات والمطاعم وعيالج بمدارس خاصه وتبين سفرات (للعلم احنا ما نسافر الا نادرا جدددا والسبب الحاله الماديه)وغيره متطلبات البيت والراشن وفواتير الكهربا والماي
اقول له تراك انته في بيت اهلك تساهم ايضا بهالامور وحتى شهريا تدفع فواتير الكهربا كامله ووحط فبالك انت يالسه تدفع لفيلا كبيره وعدد سكانها كبير ف اذا طلعنا طبعا راح نسكن في بيت اصغر وعددنا اقل ف لاتقارن فواتير بيت اهلك بفواتيرنا والعيال ترا المدارس الحكوميه الحمدلله مستواها تغير مب نفس من عشرين سنه الله يعز حكومتنا والطلعات تراني اطلع لاني ابا انفس عن كربتي لاني مب مرتاحه في يلستي بس لو فبيتي راح تقل الطلعات بكثير لاني بكون اساسا مرتاحه

قولوا لي هل انا معاي حق؟ والا غلطانه وما راح اتحمل العيشه بروحنا

انا مقهوره لان اخوه اللي اصغر عنه ساكن بروحه واخوه الثاني اصغر بعد الحين بيعرس وبيسكن بروحه واحنا محكوم علينا مؤبد في هالفيلا

شوروا علي وانصحوني باللي تشوفونه صح والله يجزيكم كل خير

المزيد من آخر المواضيع من نفس القسم:

• كرهت حياتي
• مطلقة و اريد اعيش لحالي
• مشكلتي الفراغ
• مضغوطه وفقدت الامل
• تزوجت مريض نفسي
• مشكلة حالتي بعد الأمومة
• مشكلة تقدم لي خاطب وافد
• مشكله بنتي
• زوجي تعبني بالضرب كليوم💔
• أواجه زوجي بكذباته ولا اسكت