حب من طرف واحد

**انيقه** · 2011-10-26, 11:33

السلام عليكم

يبون الصراحه ؟
صارلي فوق الساعه وانا اقرا في المواضيع اللي كاتبينها البنات في ها القسم...والله يعين الجميع انشاالله
بالنسبه لي ...انا مب قادره اعرف شو نوع العلاقه اللي بيني وبين زوجي..صدقوني ..انا اي شي بس لايمكن اكون زوجته...
علاقتي بزجي سطحيه جدا..وكل كلامه عن العيال وغالبا يسويلي محاضره طويله عريضه ممكن تستمر فوق الاربعين دقيقه او ممكن ياخذ طلعه طالعينها لسوق او زياره او موعد مستشفى بس علشان ينتقدني او ايطلع عيوب الدنيا فيني..
ف البدايه ..كنت اجي على نفسي واحاول اناقشه ف اللام اللي يقوله..
بعد فتره مليييت لاني مالاحظت اي تغيير ف تصرفاته ..
قلت طيب ليش لما يبدا يتكلم كذا اغير الموضوع وابدا ف موضوع رومانسي؟؟ جربت بس والله بلا فايده..
وانا من النوع الحساس جدا
فقررت انه لما يبدا يتكلم وها شي مفروغ منه اسكت واتخيل نفسي ف مكان ثاني مع ناس ثانين...علشان لا اضايج نفسي ولا اتم اصيح طول الوقت..لانه حتى ابوي سألني ..في شي صاير بينكم؟؟ مزعلنج ف شي ..انت خبريني وانا باتفاهم وياه..قلتله ما بيني وبينه الا الخير..قالي مستحيل ..لانج مب انت بنتي اللي عرفتها ..دووم ضحكتها ماليه البيت وسعيده وفرحانه وتشاغب ويا اخوانها..قسم بالله لما قالي ها الكلمه تميت اصيح لا شعوريا شغلت ساعه...بس وربي تعبت
فكرت كم مره اطلب الطلاق ..لاني عارفه انه عمره ما حبني ..بس كانت شغلة زواج واعيال وبس
ما شي بيني وبينه حوار هادف او نقاش ..برغم انه انسان مثقف ومتعلم..لكن صارلنا ست سنوات متوجين ولا عمره قالي حبيبتي ..او احبج...
او اي تعبير شاعري ...لدرجة اني صرت ما انتظر ها الشي منه
ما اعرف لي كتبت ها الموضوع؟؟ بس جد كنت مضايجه وحبيت اعور روسكم بس
السموحه
للعلم زوجي مب راعي بنات او خش ودس بس ماشي بعيد على الريايل
والحمدلله انا على قدر من الجمال
واحب اهتم دايما بنفسي وبلبسي ومكياجي

المزيد من آخر المواضيع من نفس القسم:

**مـــــريم** · 2011-10-26, 11:40

جربي حبيبتي انتي ابدي قوليله حبيبي وفديتك ولا تناديه بسمه ومن يعطيج محاضره اسمعيه اكيد بالنسباله شي مهم وتغيري عشانه لو انج مش مقتنعه اهم شي ما تغضبين رب العالمين .. واضحكي وسولفي نحن مش مخلوقيين للريال عشان انصب كل تفكيرنا واهتمامنا فيه انا عندي ربي ونفسي ومي وبوي وهلي وربيعاتي وزوجي هذولا كلهم يبون حقوقهم مني .. حياتي بعيشها مره فليش اعيشها ابهم ونكد والعمر يمر انتبهي لعمرج غناتي وربي يسخرلج ريلج ..

**انيقه** · 2011-10-26, 11:54

المشاركة الأصلية كتبت بواسطة مـــــريم

جربي حبيبتي انتي ابدي قوليله حبيبي وفديتك ولا تناديه بسمه ومن يعطيج محاضره اسمعيه اكيد بالنسباله شي مهم وتغيري عشانه لو انج مش مقتنعه اهم شي ما تغضبين رب العالمين .. واضحكي وسولفي نحن مش مخلوقيين للريال عشان انصب كل تفكيرنا واهتمامنا فيه انا عندي ربي ونفسي ومي وبوي وهلي وربيعاتي وزوجي هذولا كلهم يبون حقوقهم مني .. حياتي بعيشها مره فليش اعيشها ابهم ونكد والعمر يمر انتبهي لعمرج غناتي وربي يسخرلج ريلج ..

هذا اللي نويت اسويه...احاول اعيش حياتي ولوبدونه..وكل الاقتراحات اللي اقترحتيها سويتها بدون فايده..حتى اني كنت اطلب منه ايقولي كلمة حبيبتي اللي كل وحده تتمنى تسمعها من زوجها..بس ما نفع..الحينه وضعي تغيير ما انتظر منه ارضائي عاطفيا لاني عارفه انه ما بيصير بس اسوي اللي يرضي ربي ويرضيني ويسعدني ويسعدعيالي واهلي بعد
وتسلمين ياقلبي على الرد

**..قلب طفلة..** · 2011-10-26, 13:45

الله يسخر قلب زوجج لج ويسر أمورج حبوبة ,,

**نبض الشارقة** · 2011-10-26, 13:47

اللهّم اغننا بحلالك عن حرامك ،

وبطاعتك عن معصيتك ، وبفضلك عمن سواك ،

اللهّم لا تكلنا إلى أنفسنا طرفة عين ،

اللهّـــم آميـــن .

**تراثنا الغالي** · 2011-10-26, 15:00

في ناس ما اتحب تعبر عن مشاعرها او ما عندها أسلوب للتعبير لكن من داخلهم يحبون الشخص ..

فيمكن زوجك منهم ..حاولي تكتبين له رسايل الكتابة أحيانا لها تأثير قوي

**أم عبـد الرحمن** · 2011-10-26, 16:00

المشاركة الأصلية كتبت بواسطة تراثنا الغالي

في ناس ما اتحب تعبر عن مشاعرها او ما عندها أسلوب للتعبير لكن من داخلهم يحبون الشخص ..

فيمكن زوجك منهم ..حاولي تكتبين له رسايل الكتابة أحيانا لها تأثير قوي

نفس الراي

**ام شما11** · 2011-10-26, 15:19

الغاليه زوجج هـو بو عيالج وأقرب الناس لج وشريك حياتج ? تياسين منه

حاول تغيرين الروتين
العبي معاه اللعاب الزوجيه وحطيه فيها أسأله تضحك أو أي شـي ثاني
? ياسامـع الحياه ولا حياة مع اليأس

حاولي أكثر وأكثر
صدقيني بتغير مهما كان هذا زوجج ولازم فـي يوم بيتغير وتكون حياتكم أحلى وأحلى
هاي الحياه الزوجه مراحل وروتين

فبيديج تغيرين كل شـي ولا تقلقين يا ختي خلي أملج بالله كبير

**برق لمع** · 2011-10-26, 16:05

مشكلة ريلج انه نكدي حاولي تقوليله دايما انت نكدي ومنكد البيت وياك يمكن ينصدم ويحس على نفسه شوي
بس الطلاق مب حل وخصوصا بينكم يهال
حاولي وياه قد ما تقدرين والله يصلح حالكم

**ابتسامة قمر** · 2011-10-26, 16:52

الله يعينج يا رب

**ام زايد21** · 2011-10-26, 17:06

يا ختى ما عليه تحملى عشان خاطر عيالج ومشكلتج اغلبنا نعانى منها وهى الخرس العاطفى يعنى تقولين ريلج ما مقصر بالكلام بس بالنقد والاتهام بالتقصير اما من صوب المشاعر اييهم خرس مول ما ينطقون مع الوقت بتتاقلمين والله يسعدج غناتى

الموضوع: حب من طرف واحد

أدوات الموضوع

عرض

العرض المتطور

حب من طرف واحد

المزيد من آخر المواضيع من نفس القسم:

المواضيع المتشابهه

المشد السحري Slim & Lift ...اشتري واحد والثاني مجانا عرض لمدة شهر واحد

صورة جآآآي بايوجي تبين أي واحد الأصي وأي واحد التقليد !!