ليش يا ابوي :(

[قلبي صويبي]

السلام عليكم و رحمة الله وبركاته ..

بنات والله ماعرف شو اكتب او كيف ابدا

بنات ادعولنا ادعو لامي الله يخليكم ادعولها بالصبر ..

بنات امي وابوي اتزوجو من قبل 35 سنه وامي يلست 10 سنين ما يابت شي وابوي يبا عيال بعد علاج وسفر وعفسة امي حملت فيني وانا كنت اول بنت لها ابوي فرح وايييييييد وعاشووو بحياه حلوه وبعد ما ربت امي فيني يلست 7 ماحملت والناس تسال وابوي يبا عيال ومايسده ان الله رزقه فبنت وحده نسيت اخبركم ان ابوي اتزوج ف وحده من بلد اسيوي قيل ما امي تحمل فيني وطلقها اول ماربت امي فيني .

انزين يلست امي 7 سنين بعدي ماحملت وابوي محتشر وردت حياتهم نفس قبل مشاكل وضرايب والله رزق امي باخوي من عقب 7 سنين يعني كان عمري انا 7 وامي يابت اخوي ..

من عقب هذا مرت حياتنا وكانت حلوه نفس كل العوايل طلعات و روحات وسفرات بس بعد ابوي ماسده يبا اكثر ما يسده 2 وما قال الحمدالله انا ما الومه اكيد كل ابو يبا يشوف عياله

رد ابوي تزوج مره ثانيه وخذ وحده صغيره عمرها 18 سنه وهالبنت ف الامارات بس ماعنده جواز .. وانا ما بذكر قبايل الله يسامحها هالحرمة خربت حياتنا

الله يسامحها

حسبي الله ونعم الوكيل

ابوي من خذ هاي تغير ونحن ما نلومه لانه مسحور .!!! بنات هالبنت سحرته وشفنا السحر فالبيت ..


بنات ماعرف احس كلامي ملخبط بس ان شاء الله تفهمون

عقب ما خذاها حملت ع طول ما شاء الله ويابت ولد ونحن كنا ساكنين ف اماراه وابوي دوامه ف اماره ثانيه فكان قبل اينا فالويكند بس من خذاها قام اينا الجمعه ويرد فاليل حقها وايد اتغير كان اي عندنا بس حق الضرايب وامي فديتها ساكته الله يصبرها مرت سنه ومره فيوم الجمعه ابوي يانا بس المفاجاه ان يايب وياه حرمة وهاي اول مره انشوفها !! المهم دخلها الميلس ويا الصاله عندنا امي ماتكلمت فديتها ولا قالتله ليش يبتها بنات (( ترا امي غلطتها انها سكتت من البدايه وبتشوفون اخر شي شو بيصير بس ترا غلطتها انها سكتت ويوم اسال امي ليش ساكته تقول عشانكم عشان اختج واخوج حرام صغار بنات انا معرسه الحمداله )) المهم عقب الغدا امي شلتنا ورحنا البحر ويوم ردينا هاي كانت واقفه صوب الدريشه وتهاوش والكلمة الي اذكرها من هاك اليوم مع ان كان عمري 10 مدري 11 سنه كانت تقول حق امي انت عيوز ماتقدرين اتيبين عيال وسبحان الله بعد هالسالفه بشهرين ولا ثلاث امي رايحه المستشفى ترا الوالده الله يحفظها فيها السكري وكالعاده كل شهر مواعيد وتحاليل فالنتايج طلعت انها حامل سبحان الله !! يالله كيف انك تساعد الحمدالله الله رد ع كلام حرمة ابوي .. المهم يوم حرمة ابوي درت ان امي حامل سوت مشاكل وصارت وايد سوالف المهم النتيجه ان ابوي من بعد ما امي حملت هجرها !! هيه بنات ابوي هاجر امي 9 سنين من يوم حملها لين احين اختي الله يحفظها عمرها 9ادري بتقولون مطلقه بس شو نسوي

حسبي الله ونعم الوكيل

المهم مرت الايام وطلع لنا بيت انتقلنا ( بيت شعبي( ابوي عطانا الفله وهو وحرمة وعيال الميالس وبنالهم بعد .

بنات نسيت اخبركم ان حرمة ابوي كل سنه اتيب بيبي واحين عدد اخواني منها 6

وابوي هاجر امي

وطبعا كل يوم مشاكل وضرايب

والمصروف بس يعطي امي 500 وباقي الفلوس حق هذيك

واشترا سياره يديده حق هذيك و خذاله وعطا امي ماله الجديييييييييييييمه موديلها فالتسعينات ..

وترا ال 500 الي يعطيها حق امي مب هو ايبها هذيك اتي تفرها ع امي ومايطيع امي اتيب خدامه وهذيك عندها 2

بنات وصلت الجراه انه مره اشترا قفول وقفل بيبان البيت يوم امي واخواني كانو طالعين ويوم ردو خلاهم برع

قبل كان دوم يسكر الباب من داخل واخوي يوم يردون ينقز ويبطل الباب بس احين اشترا قفل وخلاهم برع

كل يوم ايي ويهدد هم اطلعو من البيت

ويقول ما بعطيكم فلوس وهذيك وعيالها يضحكون

بنات اتخيلو انه اختي من ابوي صغيره عمرها 3 اتي تقول حق امي اطلعي من بيت ابوي


بتقولون امج شو تقول بقول امي ساكته تقول عشان اخوج واختج

بنات اخوي واختي مساكين يكسرون الخاطر حرمة ابوي دوم تسوي مشاكل حق احتي الصغيره الي عمرها 9 لان انا عندي بعد احت من ابوي عمرها 8 فهم ف نفس السكول كل يوم تقول حق ابوي بنتك قالت حق بنتي مدري شو وتخرط وتسوي مشاكل وابوي كل يوم يضربها ويهاوشها بنات اتخيلو كنت ادرسها والسوال كان شو تتمنين تعرفون شو قالت قالت اتمنى ابوي يحبني و بيتنا يكون مافي مشاكل قالت اتمنى ابوي ياكل معانا و يرقد معانا


بنات نسيت اخبركم ترا ابوي معانا ف نفس البيت بس ما نشوفه لا يتغدا ولا يتعشا عندنا وما ايي الا اذا بيهاوش

وايد بنات وايد سوالف ماعرف شو اكتب وشو اخلي بنات امي كاسره خاطري واييييد اتخيلو انها ساكته وحاطه فقلبها كل شي اخاف يصير فيها شي بنات بنات الله يخليكم ادعو ان ابوي يرد لعقله وان الله يهديه بنات ادعو ان حرمة ابوي الله يهديها

حسبي الله ونعم الوكيل


بنات ادعو ان الله يريح قلب امي


بنات من اسبوع وابوي ايي كل يوم ويقول حق امي اطلعي برع وخلي عيالج ولازم يوم يتكلم يتكلم جدام اخواني حرام صغار بنات يقولها جدام حرمته هذيك اطلعي ويسبها و يقول وايد اشياء يقول حرمتي متضايقه ماعندها مكان اطلعي انتي . بنات وايد يقول اشياء ماعرف شو اقول وشو اخلي بنات توها اميي تكلمني ساعه حرام والله تتكلم وانا اصيح ماعرف شو ارد عليها تقول حرام يكلمني جدام اخوانج واخوانج يصيحون بنات اخوي احين صف اول ثانوي واختي 3 بنات اخوي اول ثانوي بس ابوي ما ييلس معاه ولا يعطيه ويه كل مع اولاده هذيلاك يشتريلهم ويطلعهم ويوديهم بس اخواني لا وهذيلك ايون يراون اخواني حرام بنات والله ماعرف شو اقول


ترا ابوي مايسوي شي فقسم امي اذا اخترب شي ولا شي مايسوي كل امي تروح وتسوي واتيب اما فقسم هذييك كل شهر يصبغ وكل شهر شي يديد بنات وكل شي


بنات ماعرف شو اكتب


المهم ادعو يمكن الله يسمع منكم بنات الله يخليكم ادعو لامي


وان الله يرد كيد حرمة ابوي

لانها من شهر تحاول اطلع امي واخواني من البيت


بتقولون خل امي تكلم اهلها بقولكم امي ساكته تقول ما بسوي شي عشان اخوانج



بنات سامحوني ع الكتابه ...


ماعرفت اكتب تراني اصيح من امي سكرت وانا عطول دخلت وكتبت

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[bellegirl]

لا حول ولا قوة إلا بالله

للاسف رايي يمكن ما يعيبج بس للأمانـة بقوله

أختي عندج خيارات وانتي أدرى بالوالد

يا انه تخلون حد عاقل يكلمه ويكون امام مسجد أو حد من اخوانه الي يثق فيهم أو جدج إذا بعده على قيد الحياة


يا ان الوالدة تسير المحكمـة ترفع دعوة قضائيـة للنفقـة والسكن بدون ما تتطرق للطلاق

فقط تشتكي ان الزوج ما يعطيها حقوقها وبيهزبونه >_< !

أو الإنفصال أختي السموحـــة

لكن ما أبغى اقوله لإن ما عمرني طرحته كحل

لكن فعلا أمج محتاجة إعادة نظر في حياتها

وانتي تقولين ما تبغى عشان اخوانج

أنا اشوف ان اخوانج أصلا تعيسين مع الوالد !

الله يصبركم ويعينكم ويهديه ويصلحه

وما في شي اسمه بياخذ عنها العيال الدنيا مب سايبة والحضانـة للأم شائت أم أبت

وأمك عندها كل أوراقها وحقوقهـــا فحتى البيت بيقسمونه

وبيعطونها نصيبها وإذا حد خطى خطوة وحدة فيه بدون شورها بينسجن يتأدب !!


وبييه يوم وبيندم ,, رب العالمين يمهل ولايهمـــــل

الله يسامحه وياخذ حقكم من الظالمين

ووصي الوالدة ووصي نفسج بالدعاء أختي بتيسير الأمور

والإستغفار ثم الاستغفار يسوي عجايب أختي

وأخيرا سورة البقرة دائما شغلوها في البيت والمعوذات والرقية الشرعية

والله فوق ..

اللهم علّمنا ما ينفعنا وانفعنا بِمَا علّمتنا وزدنا علْمًا يا رب العالمين

[أحزان قلبي]

الله يكون في عونكم ادعي ربج وان شاء الله ربج بياخذ حق أمج وحقكم والله يهدي أبوج وحرمته

[الجوؤد...}]

الله يحنن قلبج ابوج على امج

مالكم غير الدعاء وقيام الليل
واكثروا من الاستغفار حبيبتي

ورب العالمين ماينسى عبيده
وصدقيني بيي وربي بيفرجها عليكم ^^

والله يوفقج حبيبتي ^^

[ريتااااال]

حبيبتي خلي امج تطلع من البيت وترفع قضيه عليه فالمحكمه نفقه وبيت لها بروحها وان شاء الله ربج ما بيضيع تعبها وصبرها

[حبي لك]

ياربي والله عورتي قلبي

فديتكم الله يخفف عنكم

قسم بالله الدنيا مب بخير

اذا الاب يسوي جي بعياله عشان وحده

والله ما ادري شو اقولج يالغالية

بس الله يفرج عنكم

[قلبي صويبي]

بنات امي ما تبا تتطلق عششان اخواني تقول يكفي الا ابوج يسويه ماتبا تزيدهم

[سفيرة دبـي]

ماعرف شو اقولج بس احساس انه وحده ساحره ابوج قهر ( حاسه فيج )
عالعموم

الجأي لاستشاري مختص افضل عسب تعرف امج اشو تسوي و تكون اوراقها قانونيه

[حفيدة المل]

يالله ربي يصبرها مسكينه على هذا الظلم حسبي الله ونعم الوكيل على كل وحده تسحر زوجها عشان يكره زوجته وعياله

امج معاها حق غاليتي لانها اذا طلعت مابعيد هذه الظالمه تشغل اخوانج عندها يخدمونها وتدمر مستقبلهم الله يعينها ويعين اخوانج يارب

[عذاابي]

بنات اتخيلو كنت ادرسها والسوال كان شو تتمنين تعرفون شو قالت قالت اتمنى ابوي يحبني و بيتنا يكون مافي مشاكل قالت اتمنى ابوي ياكل معانا و يرقد معانا

قطعتي قلبي


لا حوووووووول شو هالاب

مايخاااف الله

عسى الله يهديه

حبوبه تحملووو تطلعووون من البيت اصلااا هااابيتهااا والقانووون معاااها يعني بامكانهااا تروووغ هااايييج

انا منهااا برفع عليهم قضيه واخليهم يظهرووون من البيت واطالب بالنفقه

واصلااا ابوووج غصبااا عنه بيدفع

بس كفاااايه حرااام امج ماتتحمل اكثر خلوووه يطلقهااا ويطلعووون من البيت

خلوهااا ترتاااااااح والله حرااام

[قلبي صويبي]

بنات نحن مانعرف كيف يعني الاخت الي قالت خل تسير للاستشاره القانويه كيف يعني ؟؟

شو بيسون ؟؟؟


امي ماتحب المشاكل .. يعني انا ابا اساعد امي بس ابعد عنها عوار الراس لانها مب ناقصه

[ملكة الاحاسيس]

ياختي اشتكوه عند المحاكم وبيصطلب
انا هالشّياب لو يمنعونهم من الزواج كان افضل بنظري
قصتج تشبه قصة وحده اعرفها

[قلب حموودي]

الله يعين أمج ليش سااااكته عن أبوج الرياييل جي يستتؤون يوم الحرمه تسكت عنهم قسم بالله أعرف عائله صار فيها نفس الشي تخيلي الحرمه الثانيه كانت تييب ورإ بعض وعيالها زادوا وتمت تحن على ريلها تطلع حرمته الأولي تخيلي خذت البيت كامل وعطتها بس غرفتين بس لا غير يعني عادي مرت أبوج تسويها في أمج ليش لا. بس انتوا لا تيأسوا عليج بالدعاء ثم الدعاء وحبيبتي البيت من حق الحرمه الأولى في القانون حتى هالشي حتى لو طلق أمج البيت من حقها والله يفتح عليكم وان شاء الله باجر أخوج بيكبر وبيشتغل وبيعوض أمج أن شاء الله والله مابيضيع حقها أبدا

[ايزال]

الله يكون في عونكم ادعي ربج وان شاء الله ربج بياخذ حق أمج وحقكم والله يهدي أبوج وحرمته
الله يعينكم الصراحه .

[в6яααŋн]

ماعرف شو اقولج بس احساس انه وحده ساحره ابوج قهر ( حاسه فيج )
عالعموم

الجأي لاستشاري مختص افضل عسب تعرف امج اشو تسوي و تكون اوراقها قانونيه