أنا في خدمة كل من يطلب المساعدة في رياض الأطفال

**منى الحمادي** · 2011-10-04, 21:50

السلام عليكم ورحمة الله وبركاته
أبارك لكم افتتاح قسم رياض الأطفال
هذا الموضوع يخص معلمات رياض الأطفال و أولياء الأمور من الامهات
للاستفسار او لطلب معلومة او استشارة او مساعدة من خلال هذا الموضوع
انا في خدمتكم

اختكم/ منى الحمادي
موجهة رياض الأطفال

المزيد من آخر المواضيع من نفس القسم:

**munamoor** · 2011-10-05, 00:29

هلا و غلا اختنا بنت الحمادي منورة
فديتج من اي امارة انتي يالغلا

**أم ناصـــر** · 2011-10-05, 15:12

السلام عليكم و رحمة الله وبركاته

الله يعطيج العافية أختي منى ..
و ان شاء الله لي عودة لان عند ولد في اول روضه

ربي يوفقج الغلاااا

**نبض الشارقة** · 2011-10-05, 21:44

موفقه

**بنوتـــهـ** · 2011-10-05, 22:03

يزاج الله خير أكيد وايدات بيستفيدن من هالخدمة استاذتي منى الحمادي

**--أم سيف--** · 2011-10-05, 22:12

يزاج الله خير....

**دلع بوظبي** · 2011-10-05, 22:25

هلا اختي مشكوره على هالعطاء

بغيت تعطيني تقنيات لتعليم طفلتي في البيت هي عمرها ثلاث سنوات ونص بس مادخلتها اول روضه ان شاء الله السنه الجايه...واذا حابه احصل على كتب أول روضه وابدا اعلمها لوحدي ..وين احصلها .. ؟؟

انتظرج يا معلمتي

**نهاوندة** · 2011-10-05, 22:53

مرحبا اختي الكريمة منى انا عندي بنت عمرها 4سنوات بس مادخلتها شو تنصحين اعلمها الحين بالبيت جزاج كل خير فيديني بالرد اكون شاكرة لج نهاوندة

**مون لايت** · 2011-10-05, 23:00

هلا اختي ..............
انا بنتي في كجي تو بس مادري شو بلاها في البدايه اوكيه حابه المدرسه الحين ماتبا تسير كل يوم صياح لين ادخلها الباص ............ شو الحل برايج ؟؟؟؟؟؟؟؟؟؟؟؟؟

**اليامي** · 2011-10-06, 10:22

هلا اختي عندي ولدي في الكيجي 1 ما يبا يمسك القلم ولا يردد الحروف كله يقولي لا مع اني سويت كل شي وياه حتى سويتله اوراق عمل عشان اساعده بس هو ما يبا عطيني الحل وكيف اتعامل وياه

**سلة زهر** · 2011-10-09, 09:40

السلام عليكم أختي الغالية
أنا عندي بنت عمرها 4 سنوات دخلتها روضة أولى والحمد لله هي تحب تسير المدرسة والحمد لله تحفظ بعد بس المشكلة في الكتابة بعدها ماتبي تمسك القلم ما تبي تكتب واجباتها ما تعرف تلون اتم اضارب وياها لين ما تخلص واجباتها بصعوبة مستواها واااااايد ضعيف صار لها شهر تسير المدرسة بس بعدها ما تعرف تكتب حرف أ أو حرف A الصراحة متعبتني وايد شو أسوي معاها وطبعا تشخبط الدفاتر والكتب والمدرسة تشتكي منها بعد

**منى الحمادي** · 2011-10-09, 12:32

المشاركة الأصلية كتبت بواسطة دلع بوظبي

هلا اختي مشكوره على هالعطاء

بغيت تعطيني تقنيات لتعليم طفلتي في البيت هي عمرها ثلاث سنوات ونص بس مادخلتها اول روضه ان شاء الله السنه الجايه...واذا حابه احصل على كتب أول روضه وابدا اعلمها لوحدي ..وين احصلها .. ؟؟

انتظرج يا معلمتي

هلا اختي دلع بوظبي
بالنسبة لبنوتج ربي يحفظها حاولي الحين توفرين لها العاب الفك والتركيب والمكعبات والخرزوبعض القصص المصورة وتلعبين معاها بالالعاب الادراكية مثل البازل والأحاجي

بالنسبة للكتب للأسف المتوفر في المكتبات هو خاص للكتابة والطفلة في سن 3 سنوات ونص للحين اناملها ضعيفة لازم تدرب اول على تنمية هذي الانامل قبل مسك القلم مثلا عطيها اوراق تقطعها باصابعها وتلون بالألوان الشمعية المتينة وتشكل بالصلصال والوان الاصبع
اذا حابة تعلميها الحروف والارقام وفري لها بطاقات فيها صور وكلمات وحروف وارقام تنباع في المكتبات
في محل التعليم المبكر بتحصلين قصص وكتب حلوة للسن 3 سنوات مفيدة لبنتج بالاضافة للالعاب

**منى الحمادي** · 2011-10-09, 12:35

المشاركة الأصلية كتبت بواسطة نهاوندة

مرحبا اختي الكريمة منى انا عندي بنت عمرها 4سنوات بس مادخلتها شو تنصحين اعلمها الحين بالبيت جزاج كل خير فيديني بالرد اكون شاكرة لج نهاوندة

هلا اختي الغالية
علميها بعض الكلمات والحروف والارقام والالوان والاشكال الهندسية ويفضل ان يكون التعليم محسوس بواسطة الالعاب والبطاقات والصور والالفلام التعليمية

**منى الحمادي** · 2011-10-09, 12:38

المشاركة الأصلية كتبت بواسطة مون لايت

هلا اختي ..............
انا بنتي في كجي تو بس مادري شو بلاها في البدايه اوكيه حابه المدرسه الحين ماتبا تسير كل يوم صياح لين ادخلها الباص ............ شو الحل برايج ؟؟؟؟؟؟؟؟؟؟؟؟؟

هلا اختي
اول شي لازم تعرفين السبب اللي يخليها ما تبا تسير الروضة يمكن احد يضربها من الاطفال في الروضة او في الباص او يمكن هي تسهر وما تشبع رقاد او .... فاذا عرفتي السبب نقدر نحل مشكلتها
بس اذا ما في سبب انتي حاولي تسيرين معاها الروضة وتجلسين في صفها لحد ما تحس بالاطمئنان وبعدين تتركينها في الروضة وحاولي دايما تحببيها بالدراسة واهتمي فيها وكلمي معلمتها تدير بالها عليها

**منى الحمادي** · 2011-10-09, 12:41

المشاركة الأصلية كتبت بواسطة اليامي

هلا اختي عندي ولدي في الكيجي 1 ما يبا يمسك القلم ولا يردد الحروف كله يقولي لا مع اني سويت كل شي وياه حتى سويتله اوراق عمل عشان اساعده بس هو ما يبا عطيني الحل وكيف اتعامل وياه

هلا اختي
اول شي لا تغصبينه على الكتابة طفلج للحين عضلات يده تنمو وانامله ضعيفة بحاجة للتدريب على مسك القلم
سوي له تمارين مثل مسك الكرات الصغيرة والكبيرة - يمسك اللوان العريضة - يقطع الورق بيده بدون مقص - التشكيل بالمعجون والصلصال - التلوين بالوان الاصابع.

الموضوع: أنا في خدمة كل من يطلب المساعدة في رياض الأطفال

أدوات الموضوع

عرض

أنا في خدمة كل من يطلب المساعدة في رياض الأطفال

المزيد من آخر المواضيع من نفس القسم:

المواضيع المتشابهه

مدرسات رياض الأطفال

رياض الأطفال

معرس يطلب المساعدة

رياض الأطفال