مشكلتـي ..

[عيون أبوها]

مرحبا شحالكم ..؟

امممممممممم حبيت اعرض عليكم مشكلتي

يمكن تساعدوني لأني مب عارفه كيف أفكر ..

اول شي انا عرست و عمري 18 سنة وعرست سنة 2006
يعني السنه اللي طافت وكان عرسي في شهر سبعه

والحينه كملت سنه من عرست

المهم ندخل في الاهم

الفرق بيني وبين ريلي 7سنين

اول شي ما خلاني ادرس في الجامعه وانا نسبتي كانت في الـ 90

و على قولته انتي ما بتتفرغين لي ومستحيل تيبين عيال في وقت الدراسه

متى اترياج تفضين لي يووم بيصير عمري في الثلاثين

المهم خلوا هاي المشكله

المشكله الثانيه وحده من حريم اخوانه تعايرني

اونه ليش ما حملتي لايكون فيج شي ..

وانا بصراحه قلت حق ريلي ما ابا عيال الحينه لأن بعدني صغيره

وهيه دومها كل ما اشوفها تعايرني

و على فكره تراني ساكنه ويا اهل ريلي

بس عندنا ملحق و بصراحه ملحق فخم و انا مستانسه عليه

يعني ما عندي مشكله ويا عمتي والا عمي والا خواته

صح نسيت

وبعد وحده من حريم اخوانه تكرهني كره فضييييييييييييييييييييييييييييييييييييييع

مره كانوا ناس بييون عند قوم عمتيه

فدخلت المطبخ اسوي سويتات يت وقالت خووزي انتي ما تعرفين يا الياهل

لهاي الدرجه شايفتني ياهل وما اسوى >>>>>> والله اني عقبها سرت اصيح

لأني واايد حساسه و زياده عن اللزوم

وريلي مب مقصر ويايه الحمدلله

بس شوروا عليه

كيف اقنعه اني ابا ادرس

و شو حلول المشكله الثانيه ..؟

والسموحهـ ..

المزيد من آخر المواضيع من نفس القسم:

• لأنّه جعل الفقير ييعش مع المؤمنين لا مع...
• الإكتئاب طاعون العصر الحديث بحث مرجعي...
• كيف تكون إيجابيا ؟
• كيف تتعامل مع ذاتك بطريقة صحيحة؟
• كيف تقوي ذاتك؟
• كيفية تطوير الذات بطرق بسيطة
• افضل طرق لتطوير الذات وزيادة الثقة بالنفس
• اهم المهارات التي تحتاجها لتطوير الذات
• طرق تطوير الذات في مجال العمل
• اقتباسات ~ مُهرة القَصر

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[بنت_البلاد]

هلا اختي...
اقعدي مع ريلج وحااولي تتفاهمين معاه وتشووفين شو الي يفكر فيه... وشو الي في باله..
لانه يمكن هو عارف انه دراسة الجامعة طوويلة أقل شي اربع سنين... وهو يمكن يبي عيال او يهال..
واذا درستي خاايف انج ما تبين اليهال وتأجلين الموضوع لين بعد الدراسه وتنشغلين فيها.. هو بيكون وصل الثلاثين...
فلازم تشووفين هو شو يبي وانتي وشو تبين وتتوصلين لحل يرضي الطرفين.. يعني حاولي انج ما تفكرين بنفسج بس.. فكري في نفسج وريلج بعد...
وان شاء الله تتوصلين لحل يرضي الطرفين.. وتحقق رغبات كل واحد...
اما بالنسبة لحريم اخوان ريلج.. ما اعرف شو اقوول لج.. حاولي انج تكسيبنهم يعني قاابلي سوء المعامله بحسن المعامله منج.. وان شاء الله الله يزرع المحبة في قلوبهم لج... واذا ما فاد الموضوع.. حاولي انج تتجنبينهم بس.. وابتعدي عن المشاكل..
واولا واخيرا اختي مالج غير الدعااء. .. ان الله يسير امورج ويحقق الي في بالج.. وبيعدج عن المشاكل..
اتمنى اني فدتج..
اختج
بنت البلاد

[Sweety]

الله يعينج اختي

بس اذا انتي اتحسين عمرج ماتبين عيال وانتي صغيره وفي نفس الوقت تبين اتكملين دراستج...لو ماتزوجتي في هالعمر جاان احسن لج

يعني لو كملتي دراستج وعقب حسيتي عمرج مستقره هاك الساعه بتحسين انج سويتي اللي ايريحج...وعن حريم اخوان ريلج طنشيهم لانهم اكييد يغارون منج ولا جاان مارمسوو ولا بطلوو حلجهم..اهم شي انتي وريلج متفقين اتسوون اللي تبونه وماعليج من حد

والله يوفقج اختي

[%Om_Khalid%]

حبيبتي اذا ريلج مايباج اتكملين دراستج .. خلاص أجلي الفكرة حق بعدين ... احملي وييبي عيال يكبرون معاج لين متى بتاجلين فكرة الحمل بعد ..

وبالنسبة لحريم اخوانج .... اللي بتطول لسانها عليج ردي عليها بس مب بوقاحة .. يعني لا تسكتين واتبينين انج ضعيفة .. والله قهر اللي يسكت ويحترم غيره يشوفونه ضعيف وياكلونه بقشوره.... وخلي علاقتج فيهم سطحية ... اهم شي علاقتج بعمتج وعمج وخوات ريلج تكون ممتازة وماعليج من الباقي تراهم ما بيفيدونج.........

[بنت الشوامس]

اللي بتقولج ليش ماحملتي قوليلها اسالي ربج ...واللي بتقولج يالياهل اضحكي وطلعي لانهن مايسون هالحركات الا اذا غيرانات منج ... وليش ماتبين تحملين هذي سنة الحياة ودامج منعتي سنة خلاص الريال معرس عشان اييب عيال ..

[نــــوره]

ما عليه أختي

انتي تحسين انج حساسه لانه بعدج صغيره

و الي تقولج يااااااااهل من غيرتها

و الي تقولج ليش ما حملتي تراها بعد غيرانه

ليش انتي مرتاحه لا حشرة يهال و غيره و هن عندهن يهال

بس انتي كوني الاحسن

عامليهن بالطيب

قوليلها يوم الله بيكتبلي بحمل

حاولي تكسبينهن لو انهن يسون حركات

بالاخير انتو أهل .. و لج الأجر بحسن المعامله

[العذوب]

أنا أقول لج الشور اللي يرضي ريلج ويرضيج


حاولي انج تحملين


هاتي لج بيبي يسليج ويسلي ريلج


عقب حطي مانع حمل وادرسي


يكون البيبي كمل 4 أو خمس سنين


وتكونين درستي وخلصتي


البيبي عمره ما يكون عائق للدراسة


بس نحن نحب نحط معضلات


بعدين الفرق بينج وبين ريلج موب كبير


الفرق بيني وبين خطيبي 10 سنين

[عيون أبوها]

مشكورات خواتي على ردودكن اللي تريح البال

بس تعرفن كل ما فاتحته بسالفة الجامعه عصب وقال لي انا قلت ماشي يعني ماشي

وهوو عصبي زياده عن اللزوم ..

وانا ما ابا احمل من الحين احس بعده جدامي الوقت

صحيح اني لازم ارضي ريلي

بس بعد انا دراستي اهم من كل شي

احس حرام هالنسبه تروح ع الفاضي

بس مب عارفه ارضي ريلي والا ارضي نفسي

و يشهد الله اني مب مقصره وياه

كل يوم اتكشخ و اتعدل له

انا قلت له بدرس و مب مشكله بتفرغ لك بعد في نفس الوقت

قال لي لا دراسه ماشي

مب عارفه شو اسوي وياه ..؟

وعن سالفة حريم اخوانه
ادريبهن
كلهن يغارن لأني اصغرهن ..

وانا من فتره اتجنبهن وما ايلس وياهن وايد

والله المستعان

والله يهدي ريلي ان شاء الله

[&المزيونه&]

الله يعينج اختي 000شكل ريلج امصمم ع رايه000 نصيحتي لج سكتي عن الموضوع لأنه لو حنيتي بزياده بعند أكثر 00عل وعسى ف يوم من الأيام يعرض لج تدرسين 00خاصه وانه مامقصر وياج 000والله يوفقج

[قانونيه]

ما شالله البنات ما قصروا
و اذا هو يبا بيبي ييبيله عشان الكل ايعرف إن مافيج شي
و بعدين كملي دراستج يوم البيبي اشوي يكبر
خليه عند اهلج
وايد بنات جيه و الحمد لله كملو دراستهم و عندهم يهال
الله يوفقج


سلام

[ساحرة العيون]

الله يعينج اختي

[فيونكة]

شوفي ياعيوني ,,
بالنسبة للدراسه انتي اقنعيه انك بتوافقين بينه وبين الدراسه وانك ماراح تقصرين بالنسبه له بشي
وعموما اغلب الرجال اللي بالبدايه مايبون زوجاتهم يدرسون او يشتغلون يقتنعون بالنهايه
ولايصير همك الشاغل هالموضوع
ثانيا بالنسبه للي يعايرك بأنك ماحملتي واللي يعايرك بأنك صغيره اول شي ردي رد يسكتهم يعني صيري حقانيه ولايهمك شي وترى الحقران يقطع المصران

بالتوفيق حبوبة

[منشغل بالها دوم]

الله يوفقج و يسر أمرج
الحريم غيرانات منج و على طاري العيال تبغين تسكتينهن قولي ( مايخصج ) للي تتخبرج
دايركت عشان يعرفن أنه بيهن رد هب يستهينن بج ولا تيبين طاريهن لريلج أبدا عشان ما يحس
أنه عندج نقص ولو كنتي من نفسج ماتبين
الدراسة ليش ماشرطتوا له من البدايه ؟
ريلج من النوع الرياييل يوم تيه بنت الحلال المزيونه يتعلقبها ( حب تملك ) يعني لصالحج
أما الحل فهو من عند رب العالمين
أهم شي خلي أعصابج باردة و تعرفين أن الحرب تمر بجولات فيها الخسر و الربح
و العضوات عندهن أفكار جربي مب خسرانه شي !!!!

[العنـــــود]

البنات ما قصروا فديتهن ...

[أمورة]

ما عليه أختي

انتي تحسين انج حساسه لانه بعدج صغيره

و الي تقولج يااااااااهل من غيرتها

و الي تقولج ليش ما حملتي تراها بعد غيرانه

ليش انتي مرتاحه لا حشرة يهال و غيره و هن عندهن يهال

بس انتي كوني الاحسن

عامليهن بالطيب

قوليلها يوم الله بيكتبلي بحمل

حاولي تكسبينهن لو انهن يسون حركات

بالاخير انتو أهل .. و لج الأجر بحسن المعامله

صح لسانج نوره. انا مع نوره في كلامها. خلج بعيده عن المشاكل لو شو ما صار و حاولي ما تبينيين حساسيتج