هل تصرفاتي صحيحة

[بنتي غلا روحي]

بعد ماطلعنا من بيت ابو بنتي قبل ست شهور وانا ماخليته يشوف البنت خير شر ليمن فقد الامل وراح للمحكمة وطلبها ورفضوا طلبه بس سوا تظلم وطلبوني عند القاضي خخخخخخخ يايبين لي ورقة من المحكمة بالحضور والله مت من الضحك عاطنهم عنوان بيت امي بالتفصيل من رقم شارع من رقم المنطقة والله شكله ياي عند باب بيت امي وماخذ البيانات كلها كامل (شغل ماشي ) ههههههههه
المهم رحت المحكمة وكلمني القاضي ليش ماتخلينه يشوفها قلت كرامة بنتي فوق كل شي ليش يطلعها من البيت محد قاله وكان القاضي شديد شوي بس انا بعد ماسكتت .
المهم اتفقنا يشوفها كل سبت وفي مكان عام بشرط مايوديها بيته ولاعند حرمته ولابيت اهله اللي مافيهم خير .
وقلت التواصل يكون مع الخدامة فقط لاغير مايخصه فيني ههههههههه
وخليت الخدامة تطرش له مسج بالرقم وعلى طول اتصل عليها المهم وشرف المعرس وشاف بنتي وطبعا اول سوال يستدرج الخدامة يبا يعرف اذا انا اتزوجت ولا لا صدق ملقوف خخخخ وعلى فكرة هو مايعرف عني اي شي خير شر ولافي تواصل بيني وبينه ولابين حد من هله ولا اهلي وحتى حرمة ربيعه حاولت معاي كم مرة اتكلمني كنت اطنشها مارد عليها
ابا اعيش حياتي بعيد عنه خلاص الوحدة لها كرامتها ليش انا مب رخيصة ومابركض وراء اللي باعني عشان وحدة ماتستاهل .
وحتى يوم يزور بنتي ماخليه يشوفني خير شر لايتحراني ميتة عليه اطرش خواتي لا اقول حق الخدامة اترياج بالسيارة والله لا اوريه من اكون مب انا اللي ابيع نفسي عشان واحد مثله باعني بكل سهولة وفراني وانا اللي كنت معتبرتنه كل شي في حياتي انصدمت صدمة كبيرة يوم اني عرفت حقيقته
حسبي الله ونعم الوكيل فيه ان شاء الله هو وزوجته واهله يارب وياخذ بحقي امين يارب
مهما صارت اصعب الظروف ماراح اصد وراي اطالعه اللي يبيعك بيعه والايام بيننا وراح يعرف قدري مع مرور الايام لكن بعد فوات الاوان .
واتمنى من كل قلبي وعندي ثقة بربي انه راح يرزقني ويعوضني باللي احسن منه بمليون مرة واخليه يتحسف علي قد شعر راسه .
وانا نزلت الموضوع هذا لاني عارفة انه راح يقرا موضوعي لانه بسلامته ينبش وراي ويقرا كل مواضيعي من زمان واحب اوصل له ولحرمته المصونة رسالة كما تدين تدان والدنيا دوارة مثل ماسويتو فيني راح يستوي فيكم وانا مالي غير ربي وماراح ينساني ابدا .

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[سوارة]

[أمـ سـعـيد]

بس شكلج يقول انج وايد مهتمه فيه
و الشيطان راكب راسج

التكبر مب زين التكبر ل الله وحده لا شريك له
وهاي بنته مثل ماهي بنتج
ليش تحرمينها من ابوه
هاشي بياثر فيها

بتساوي نفس النبته
اللي تزرعينها ف مكان وعقب تجلعينها من جذورها وتزرعينها مكان ثاني
اخر شي النتيجه
هالنبته تذبل

نصيحه مني

لا تدخلين بنتج ف مشاكلج
مشاكلج خليها ف صوب
وينتج ف صوب ثاااااااااااااني


و العناد مب زين
خلي الامور كلها على الله

صح أنا ماعرف شو المشكله اللي خلتج توصلين لين هالاسلوب

بس اذا رب العالمين يسامح ورحيييم وغفووور
ف من تكونين انتي عشان ماتسامحين

والسموحه

لو تبين شي

عندج الله تدعينه
مب الشيطان يمشيج ع كيفه

[× كوكو ×]

^
^
^

ما عندي أي اضافه على الي قالته * أم سعيد *
سوا انه احسن خطوة سويتيها انج ما تريتيه و عشتي حياتج ،
الله يوفقج ،

[نوف456]

لا إله إلا الله محمد رسول الله

[بنوتـــهـ]

لاتحرمي البنت من ابوهاا


واذا طرحتي الموضوع عشان توصليه لريلج بس


ف شخصيا ماكنت افضل هالشي !!

[كلي_جاذبيه]

فعلا طريقتج تبين انج بعدج تحبينه وتكابرين لانه فضل عليج زوجته الثانيه
المشاكل بينج وبينه البنت مالها ذنب تنحرم من ابوها على اي اساس تحرمينه منها ؟؟

[بهلولة]

زين شو تتوقعين يوم يدخل ويلاقي انج متعنية وكاتبه موضوع كامل عنه ؟؟؟!!!
انا اشوف ان قلبج بعده متعلق بالماضي
وهالشي ما اقدر الومج عليه
لانه احن الحريم يوم نعطي ازواجنا وبيوتنا نعطي من الخااااااطر
وصدمة كبيرة نلاقي الخيانة والجحود والنكرام من الطرف الثاني
وادعيلج من خاطري ان رب العالمين يبرد عخاطر
ويعوضج خير سواء في بنتج او بزوج صالح او بعمل
ويرزقج اللي تتمنينه

لكن امااااااااااااااانة حاولي انج ما تقطعين البنت عن ابوها
مو عشانه لا والله
فكري فيها هي وبس وبنفسيتها
ولا تطرين ابوها ابدااا جدامها باي سؤ
لا تبنين في البنيه امراض نفسية عسب مشكلة بينج وبين ابوها
وكوني انتي الام المضحية المحبة
ويارب يوفقج عزيزتي

[افناان]

ليش تحرمين البنت من ابوها ؟؟؟
المشاكل بينج و بينه ليش تدخلينها طرف في الموضوع؟؟!!

[بنتي غلا روحي]

عفوا خواتي لا احبه ولاشي لكن خله يعرف قيمة نفسه وهو اللي وصلني لهالمواصيل والله ماودي اوصل الامور لهالحد لكن هو اللي خلاني اتصرف معاه جذي انا لو كنت اباه اقل الايمان كنت بدور وراه واييب اخبار وعلوم عنه لكن والله العظيم والله يشهد اني ماعرف عنه خير شر ومخلتنه في حاله وبينا المحاكم تحل امورنا مع بعض فقط لاغير وماحب حد يقول اني انا مهتمة فيه لا بس حبيت اوصل هالرسالة لاني متاكدة انه يدور وراي ويموت يعرف انا وين ساكنة وشو هالحب اللي نزل عليه يحب بنتي هالكثر قبل فترة وفراها برع البيت سبحان الله مغير الاحوال

[مرآآيم]

مآ عليه حبيبتي

مهمآ يكون كوني أحسن عنه

ولآ تحرمين البنت من أبوهآ

يوم بتكبر بيأثر هالشي على نفسيتهآ

عسب بنتج ضحي وخليهآ ع الأقل بالأسبوع مرة اتشوفه واتحس بالأبوة

حتى لو كآن من ورآ خآطره أهم شي للبنت إن تحس إن عندهآ أبو يسأل عنهآ ويهتم فيهآ

بالبآجر يوم بتكبر بتسألج عنه شو بتجآوبينهآ

بيتشتت تفكيرهآ بسبة المشآكل اللي مآ بينج وبين أبوهآ

ربي يآخذلج حقج منه ومن حرمته لو كآنوآ ظآلمينج

بس انتي لآ تظلمين بنتج ^^

ولو كآن ينبش من ورآج فهآذي مشكلته ، هو اللي بيتعب مش انتي

صفي النية من صوبه وربي بيرزقج على قد نيتج ( وعلى نيآتكم ترزقون )

ربي يوفقج حبيبتي ويرزقج بالزوج الصآلح ويخليلج بنتج ^^

[عواش 18]

من خلال الضحك الي كاتبتنه بالموضوع ورغم مكابرتج الا انج بعدج تحبينه وتذلين عمرج يعني شوفني ما اهتم ها مب شي
وبنتج لا تدخلينها في السالفه هي مب وسيله تستخدمينها للانتقام من طليقج من حقه يشوفها ويظل معاها
كملي حياتج مثل ما كمل هو وكبري عقلج

[فطمطم]

الله يعوووضج خير اختي

[بنت زاايد]

البنت مالهااا ذنب...لو تحبين البنت صدق ماكان حرمتيها من ابوهاااا

البنت مالها ذنب يا اختي....تخيلي لو امج حرمتج من ابوووج شو بيكون موقفج... البنت تبغي ابوهااا محد يتخلى عن ابووه وامه

وعلى نياتكم ترزقوون

[sa7el]

أنتي ما تبينه ،، هاي حياتكم و أنتوا أحرار،، بس على أي أساس تحرمين البنت من أبوها،،، والله حرام،، هي شو ذنبها في أخطائج و للا أخطاء ريلج،،، حتى لو أنتي مظلومة اتحسبي عليه ليل نهار بس لا تحرمين البنت من أبوها،، و خلي هالشي بيد الله سبحانه اللي يعرف مصلحة البنت أحسن منج و من أبوها