لا طايلة أرض ولا سما ..

**متغطية ببرقع** · 2011-07-30, 15:38

خواتي انصحوني ضاقتبي الوسيعة
انا مالجة من 3 سنين .. كلمته قبل الملجة وكان وايد أوكي وياي بس ف أول يوم ف الملجة اكتشف انه بخيل هو وأهله واهلي وايد اتضايقوا حتى شبكة ما يابلي وناقشته ف الموضوع قال يعني ما سويتلج شي ابدا وعصب وعقب جم يوم قال بتسكنين ف بيت ابوي واهلي مشترطين عليه بيت بروحي قلتله تفاهم ويا اخواني وقال انتي بقنعينهم
هالموضوع طول بيني وبينه ونحن كنا ندرس وخلصنا وانا توظفت وهو لا تم متضايق ويقولي سيري قولي حق اهلي انج ما تبيني وتمينا ع هالموال شهرين وعقب دشينا ف سالفة الفلوس قلتله اول راتب بوزعه قال ما يحق لج تصرفين دون شوري قلتله ها شقاي وتعبي واهلي احق اعطيهم وايد عصب وتضايج عقب طلب مني 2000 اعطيه شهريا عشان يطلعه سيارة قلتله واذا ما وافقت قال ورقتج بتوصلج وايد استوى بينا مشادة وانا ف كل الحالات اطيب خاطرة مشينا حياتنا ونحن هالمواضيع بينا من غير وايد شدد علي ف مسألة الطلعة برا البيت كان اييني مكان شغلي ياخذ اللي يباه ويروح وطبعا تسلف مني اكثرمن مرة انا كنت وايد اتضايج احس ان الريال ما ياخذ من مرته وخاصة انا بعدنا مالجين وايد كان يطري موضوع الطلاق والله اني كرهته بس كان الغلط انه يوم ايي ما كنت اقدر اقاومه بسرعة اندمج معاه
وقلت حق اختي عن سوالفنا قالت دام جي اوله خلاص كلمي اخوانج والله كنت اكرهه وايد احسه مراهق يلعب طبعا هني هو قال لا ما صار شي بينا وانا اباها وجي قلتلهم ماباه النفس عافت ورمسنا اهله ماشي فايدة ما يبون يطلقون ويقول هي تباني وانا متأآكد طبعا كان ف خاطره لما كنا نيلس مع بعض وجي دشينا محاكم ودخلنا ناس ماشي فايدة هالكلام قبل 3 سنين ولين احين هو مصر اني اباه وان اهلي غاصبيني ع الطلاق
وقبل يومين يا بيتنا طبعا بعد ما اتصل اخوي فيه عشان يشوف شو عنده .. قال انتوا اللي موقفين بطريجنا ولا هي تباني وعندي أدلة وعندي رسايلها
والله أخوي تضايج وايد وطلع معصب وقال دشي يبا يسلم عليج ودشيت قال اشقتلج قلتله ها اللي ياي رمس فيه .. ما عندك رمسة غيرها .. قال اتخيلج ف كل مكان ابا اكون جريب منج .. قلله انا رمستي وحدة ما عندي غيرها وظهرت عنه
بس حسيت اني مشتاقه له وابا ايلس عنده عقب اتذكر اللي سواه واقول لا اخاف يهيني ويعذبني ..
الغلط اللي سويته اني ما خليت حد ما خبرته عن سواياه وسبيت اهله جدامه وجدام اهلي لان كل حد يسألني ليش بغيتي تنفصلين اقوللهم كل شي .. رجعت استخير للمرة الرابعة بس ما احسني ارسي على شي .. اهلي مولية ما متقبلينه
انصحوني خواتي .. تعبت من الصياح والهم

المزيد من آخر المواضيع من نفس القسم:

**دلووعتهم** · 2011-07-30, 15:49

الله يعيينج عليه

**الكـــــاذي** · 2011-07-30, 15:51

لا حول ولا قوة الا بالله،،،

ما أعرف شو أقولج،، غير انج تستخيري،،

بس المفروض ما يآخذ منج درهم واحد

وهو الملزوم يصرف عليج،،

الله بكتب لج الخير وين ما كان،،

**متغطية ببرقع** · 2011-07-30, 15:53

آآآآمين يارب
ادعولي خواتي ..

**laila226** · 2011-07-30, 16:12

الله يعينج اختي المفروض انه ما ياخذ منج ولا فلس
ها وانتو بعدكم مالجين وهو جي يستغلج واذا عرستي الله يعينج عليه

**اسيرت شوق** · 2011-07-30, 16:16

الله يعينج

**فجر الغلا** · 2011-07-30, 16:17

الله يعينج اختي وايسر امورج

**عطر 77** · 2011-07-30, 18:55

لو انا بمكانج بسير اخلعة , حشى ما ينطاق , هالناقص بعد حرمة تصرف على ريال !!
عيل هو ليش متزوج اصلا ؟؟ مايدري ان المسؤوليه كلها عالريال .. ودام كل شوي ياب لج سالفة الطلاق , خليه يطلع رجولته ويطلق ,,, ماشي رياييل غيرة يتقدمون لج
صدق يقهر ويبط الجبد .. الوحده ارحم لها اتعنس ولا تاخذ واحد بخيل

**uaelrose** · 2011-07-30, 16:28

اختي
هو اللحين يشتغل و الا بعده ما يشتغل؟؟؟؟؟؟؟؟؟؟
اذا ما يشتغل يعني هو ما يقدر يتحمل مسؤوليتج
يا اما تشرطي عليه انه يشتغل و اساسا لو رحتي للمحكمي خبري القاضي انه ما يشتغل و لا صرف عليج و بالعكس خذ فلوس من عندج
بعدين القاضي ممكن يطلقج منه ، هو لما يقول انج انتي اتحبيه و تبينه ، طيب القاضي وين
خبري القاضي انج ما تبينه و انه ما يشتغل

**om3laawi** · 2011-07-30, 16:31

اذا بدايته جي احسه ما ينفع لاتفكرين تردين له .. واذا قدرتي سيري اروحج المحكوم وقولي ما باه وخبريهم عن سواياه .. ماشي الا جي والله يعينج ..

**BabyLove** · 2011-07-30, 16:50

جدمي عقلج و أهلج قبل مشاعرج

الزواج مب حب و خلاص

و على حسب كلامه مبين أنه واحد راسه يابس و يبا يلعب عليج عشان الفلوس

الغالية.. شوفي رضى أهلج أول .. لأنه ريال مثل هل الأشكال ما يستاهل تضيعين حياتج عشانه

**متغطية ببرقع** · 2011-07-30, 16:55

مشكورات خواتي يلي طافن موضوعي
ادعولي ادعولي الله يهديني للصوااااااااب لاني ثلاث سنين وانا ع هالحالة

لما سرنا المحكمة هو تعهد انه يصرف علي ويقوم بشؤوني بس انا احسني خيفانة ارجعله بعد سالفة المد والجزر بيني وبينه وبين اهلي واهله ..

الناس كلت ويهيي

ادعوووووووووووووولي خواتي ( سبحان الله وحدة منكن يستجاب دعائها )

**عطر رومانس** · 2011-07-30, 17:03

حبيبتي ..
المكتوب ينقرا من عنوانه ...
واللبيب بالإشارة يفهم ...
اتمنى لج التوفيق

**ام اغلى ناسي** · 2011-07-30, 17:15

الله يعينج

ويهدي ريلج

**{ آحلى دلع ..** · 2011-07-30, 17:20

ردي آستخيري فديتج

تطلقين عقب ملجـ’ـه آحسن من تطلقين عقب العرس . .

وربي يكتب لج الخير وين مآكآن ^.^

الموضوع: لا طايلة أرض ولا سما ..

أدوات الموضوع

عرض

العرض المتطور

لا طايلة أرض ولا سما ..

المزيد من آخر المواضيع من نفس القسم: