المتزوج ....!!

[الفرعونية]

اسفه

انا وصلت 30 و مش مستعده اخذ متزوج

نص ربيعاتي الي سوووها ,,ماكلات هوا
الريال يوم يخلص شهر العسل يحن للاولى و عيالها
و يحس بتأنيب الضمير و التقصير تجاههم
البيت المستقل و الرفاهية ما بتعطيج مناعة ضد الغيرة و الحسرة

و انتي براحتج لو قادرة تعيشين مع نص زوج

صح ، الغيرة اساس كل واحدة ، وهاي فطرة سبحان الله مثل الرجل يوم ما يحب يشوف زوجته ولا حبيبته ولا حتى اخته تكلم رياييل ولا تسولف ، حتى شغلي هو يقول اصلا بتطلعين منه لانه كله اختلاط وخرابيط !!! بس انا برته ما عندي مانع لكن بنفس الوقت قلتله شغلي احبه ومافيها شي،هو احسه متفاهم يعني يقولي اشتغلي لكن مو مختلط ويمكن هو الحين تاركني ادلع لكن عقب ما نتزوج مافي براحتي؟ ههههه

مرحبا حبيبتي .,.~

انا صح بالنسبه لهالمواضيع عمري 21 سنه بس بقولج نصيحتي واتمنى تتقبيلنها .,.~

اختيه بس فكري بشي واحد .,.؟؟!!!

انتي لو كنتي بمكان الحرمه الاولى بترضين ريلج ياخذ عليج وحده غيرج .,.؟؟!!

ثاني شي تحبين تبنين سعادتتج على تعاسة غيرج .,.؟؟؟!!

ثالث شي تتحملين حرمة غيرج تشاركج في ريلج ويكون معاج مره ومره مع الاخرى .,؟؟؟؟!!!


اللي داااااائما اسمعه انه الزوج يحن للاولى اكثر ويكون غير معاها لانها ام عياله ,.,.~

حبيبتي انتي حسب مافهمت من كلامج انه بعدهم ايونج الخطاطيب فليش تاخذين واحد معرس .,.!!!

اذا كانو وايدين يدقون بابج فإنتظري زوج محد يشاركج فيه .,.~

وكوني على يقين القادم أفضل بإذن الله .,.~

واكيد كل بنت فينا تحب انها تعرس وتكون اسره خاصه فيها بس هالاسره مش على حساب سعادتج وتعاسة غيرج .,.~

الله يوفقج حبوبه ويرزقج الافضل وفكري واااااايد في هالموضوع .,.~

والسموحه منج ع الاطاله

شوفي هو مش كل يوم يدقون علي صراحة، وبنفس الوقت المشكلة انه كل اللي يجوني مثله؟ متزوج وعند عيال وانا الزوجة الثانية فهمتي كيف؟؟

او حتى الي مش متزوج ، للاسف سمعته مش لهناك، يعني تبع بنات ويسافر ديما والخ ، لكن اللي عجبني بهذا ، انه كثير متدين وما يحب يسافر الا ويا اسرته ولا تبع مولات ولا سهر ولا مقاهي وهالسوالف مال الشباب صراحة ما احب اتزوج شاب ياريتني اتزوج واحد ريال فاهم وعقل وكبير بالعمر بالثاثينيات ببس بتحصليه متزوج ! لازم؟ ، ومعروف بهالشي عشان لا تقولين يضحك عليكي ولا شي فهمتي كيف !

_____

شكرا لكل الي كتبوا لي ، لكن للحين انا موقفة الموضوع ، وافكر وافكر ، ومش عرفة فعلا اخاف اني اخذه وبعد شهر العسل مثل ما قلتن ينتهي كل شي ويحن لاولى ولعياله خاصة لو انا بعدني ما حملت او لو طلعت ما اجيب عيال هاي اكبر مشكلة !!

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[روان00]

انتي ميالة للريال ,,بدليل انج تمدحين في كل رد

و نحن ما اعترضنا على شخصه و نيته طيبة

بس حبينا نعطيج فكرة لما بعد الاستقرار تحت سقف واحد و روتين الحياه ,,

اذا شايفة انه فرصج قليله من الزواج بأعزب ,, او شخص خلوق ..
او راغبة فالزواج بشكل عام

توكلي عالله

[عيمانيه]

حطي عمرج فمكان مرته الاولى و شوفي

اذا حسيتي انه عادي عندج حزتها توكلي

[جواهر الصحراء]

انتي شو جنسيتج ؟؟ امبين من رمستج انج مش اماراتيه ؟؟
انا بصراحه اجوف انج بتهدمين بيت الزوجة الاولى وماله دااعي هالزواج ودام تقولين انه ايوونج خطاب واايدين تخيري الاحسن والافضل لج بينهم دامهم عزابية ليش تختارين تهدمين بيت على حساب سعادتج وصعب تكونين صديقة لها لانج بتكونين انتي اللي هدمتي بيتها واكييد ما بتتقبلج بسهوله وبعدين ما تقدرين تغيرين في فطرة خلقها الله في كل حوا واللي هي الغيييييييرة يعني هو مابيكون لج 100% زوجته الاولى وعياله بيكون لهم النصيب الاكبر في حياته ،، وما تقدرين تقوليله اشمعنى زوجتك واشمعنى عيالك هم قبلج في حياته واسمحيلي اادا كان كلامي قاسي بس ها راي مع احترامي لج

[ام منصور وحمد]

حطي عمرج فمكان مرته الاولى و شوفي

اذا حسيتي انه عادي عندج حزتها توكلي

انا معاها بالراي واقولج اختي صح الشرع حلل اربع

بس انتي بامانه قعدي مع نفسج واعكسي الموضوع وشوفي ردة فعلج وبعدين انتي الحين على البر وتتقبلين كل الاراء لكن بعد الزوااج بتحسين بالغيره وبتقارنين بينج وبينها وما بتتنازلين عن حقوقج باي طريقه

اختى فكري عدل وعطي نفسج الوقت الكافي للتفكير وعقب قرري

وبعدين موضوع السوالف بينكم اختى اظن هالشي معروف حكمه في الدين حتى لو نهايته خير


واخر جمله بقولها لج انتي لو من نفسج مقتنعه كان ما اشركينا بالراي ولا طلبتي المشووره يعني في شي بداخلج مخليج ماجله ردج عليه

الله يكتب لج الي فيه الخير اختى واتمنى ما تزعلين من رمستي

بس كلمة الحق ما تزعل

[laila226]

ربي يوفقج اختي

[رضآٳڪ يٳ ربٳه]

بصرآآحه احس حتى لو الزوجه الأولى واافقت ,,


بعد الزوآج بتحس بقهر وبتسويلج مشاكل


وآآيد بنات جي استوى لهم

وما سلموا من مشااكل الزوجه الاولى


هذا رأيي ..

[om_ahmed]

انا برد عليج بحكم اني زوجه ثانيه اذا انتي خطابج كثيرين تزوجي واحد لج ولنفسج ما انصحج ابدا بالمتزوج الا اذا محد يتقدملج وخايفه قطار الزواج يفوتج راسليني على الخاص اذا احتجتي شي زياده واسالي مجرب وانا ارجع اقولج كزوجه ثانيه ما انصحج

[ابتسامتي غير]

حبيبتي الطرف المستفيد هو
ببنت وشابه وما لها تجارب الخ

لكن اني يا اختي الكريمه

ليش نصيبك تكوني مع نص رجل؟؟؟؟


ليش تعيشي عمرك كله بصراع مع اخرى على قلبه


حياة الضر ولو وافقت هي مش سهله ولا هينه


الوحده لما بدها تتزوج بدها ترتاح مع انسان يكون بالكامل الها مثل ماهي بالكامل اله شريكته يعني

انتي انثى كامله ومحتاجه رجل بعطيكي وقته غير شغله الي بيشغله
فكيف لو عنده حياه ثانيه باطفال وزوجه نسايب الخ

ليش تكوني هامشيه حتى لو وعدك حاليا

ليش ممكن تقضي ليله لحالك وانتي قادره باختيارك تقضي كل ليله مع شريك ما بيفارقك ابدا


ليس كل ما يبرق ذهبا


النا بنت جيرانا تزوجت عقيد وكتب الها بيت في دبي


وقت ولادتها ما حضرها


شو هالحياه


حتى لما تعاتبيه بتكون الثانيه بتضحكله


اما لما يكون كله ملك الك لما يزعل منك بيرجعلك

مع الاخت

خذي لج عزابي احسن لج من عوار الراس ليش تبين تدخلين نفسج في دوامه

حسيت من لهجتج انج مب مواطنه ,, واتحملي ساعتها اللي بييج من زوجته

انتي متجنسه بس اتم الافضليه لبنت بلاده عنده وعند اهله

ترا مو بس مهم زوجته حتى لو اهله ما تقبلوج بتعيشين في جحيم وما بيقبلونج لان زوجته بنت عمه يعني منه وفيه

شو تسوى يوم اهله مايبونج ولا دخلتي عليهم سوو لج طاف ولا يعبرونج ولا يعبرون عيالج

[شغـٍٍٍٍٍٍـاير]

انا لو مكانج باخذ موافقه حرمته عسب ما اتصير مشاكل و اتحملني اللوم كله و اتقولي انا السبب في خراب بيتها.. لاني راح اكون ضرتها ..
هاي وجهة نظري انا ..

عفـــــووووا ...!!!
انا ضـــد الفكــره هاذي .. شو بعد اخــذ راي حرمـتـه ؟؟!!!

ليش هو يوم فتح لج الموضوع كانت مرتــه معاه و لا خذ شورها و يالج !!!
هو الريال و هــو بيده العصمه و هو اللي راح تعيشين معاه موب مــرته حبيبتي ...تخيلي لو درى انج خذتي شور مــرته !! ما تدرين يمكن انتي بدون قصد تجرحين رجولته و تكسرين كرامته كرجــل امكن يقول في خاطره : راح توافق علي بشور حرمتي و انا ما سوت لي قدر و اعتبار ...!! تخيلي هذا تفكيره ..
تبين تسلمين من شر المشاكل خلــج بعيد عنها ... مدام انه قال بيوفر لـج بيت مستقل لــحالج خلاص انحلت المشكله , لا لج خص بها و لا هي لها خص فيج و كل وحده بحالها ... و مدام الريال شاريج و بيحطج بعيــونه توكلي على ربج و ما عليج من حــد لا زوجتــه و لا غيره , تذكري هو ال أمر و ناهــي و لا دخلين مرته من اولها باجر راح تتدخل في كل شي لانج فتحتي لها الباب من البدايهـ ..
و استخيري و توكلي على اللهـ و شلي من بالج فكرة انه متزوج و عيشي حياتج معاه اذا صار من نصيبج يارب ...

[جرح وحداوي]

انا من رااي اول شي تسالييه لييش يبغي يعرس عشاان مايظلم بيته وخصوصا عندة عياال مااتبنيين حيااتج على حساب حياه ثانية.

واخطوة الثاانية الاستخاارة ماخااب من استخااار.مهماا عطييناج رااي مابيكوون مثل الاستخارة واقتناعج ان ربنا راايدلج هشي.

الله يوفقج ويجدملج اللي فييه الخيير

[sahoora]

لو انا بدالج مسسسسستحيل اوافق

لان الزوجه الاولى مسسسسسستحيل تفرح لهذا الزواج

مادري كيف تبنين سعادج على حزن غيرج

[m@rzouqia]

إذا هو فعلاً يبا يتقدم لج؟

ليش ما يسير يرمس أبوج؟ دايركت؟ ليش هاللقاءات والاتصالات وانتي كيف تسمحين له؟

مافي شي اسمه ارمسه بحدود ولا ببطيخ؟

اذا عيبتي الريال.. في شي اسمه يسير يتقدم لأبوج.. ويسألونج ويسمع رايج من خلاله..

مب كل يوم يدقلج ويقولج عن حياته.. وشويه عن حرمته.. وشويه عن مادري شو؟!!

اسمحيلي بس ها الشي غلط..

حتى لو مب مرتاح مع حرمته.. حتى لو محطي فباله ياخذج ك زوجة ثانية؟

أسلوبه في إنه يرمسج وما امبينكم شي .. يعتبر غلط..!

وللأسف انج تسايرينه في هالشي.. هذا أول شي..

ثاني شي..

انتي في البداية.. بتقولين اني ما بغار من زوجته.. وبعتبرها شرات اختي ولا صديقتي ولا من هالكلام..

وهو حتى بيلقي عليج نفس المحاضرة في إنكم لازم تكونون ويا بعض وغيره وغيره..

الكلام شي.. والحياة عقب شي ثاني..

اذا من الحينه يخبرج انه ( حرمته تتصل في وقت معين) وانتي غرتي؟ كيف عقب؟!!

خلج صادقة مع نفسج من هالناحية..!!

واذا على قولتج .. اتقدمولج وايدين وكلهم متزوجين.. يعني في فرصة يتقدمون لج زيادة.. ليش مستعيلة؟!


أنا ماعرف شو ظروف الريال وماعرف شو وضعه؟ وليش فكر بالزواج؟

بس دام انه يمدح في حرمته ؟ ويقولج انها مب مقصرة وياه؟ بس يبا يسترجع الأيام الخوالي؟

يمكن تكونين سبير لفترة وعقب يقولج باباي؟ ويحن لحرمته الأولى..

فكري في كل النواحي.. قبل لا تتخذين القرار..

وآخر شي..

ماقول غير حلات الثوب رقعته منه وفيه.. والله يهدي المواطنين..

والسموحة على مداخلتي بس هذا رايي..

[زيباشو]

لازم اتحطين في بالج هل اذا هو تزوج عليج الثالثة بترضين؟؟؟؟
اذا عادي عندج فتوكلي على الله والله يوفقج ان شاء الله ما دام ما يعيبه شي ^_^
وزوجته الاولانية انتي ما لج دخل فيها

حسابها مع زوجها ^_^ اذا ترضى بتيلس واذا ما ترضى بتبتعد وانتي مب السبب في هالشي ...

[حصه دبي]

عندنا مثل يقول البيت المسكون ما ينسكن مدام وايد خطاب يتقدمولج خلي الريال لبيته وحرمته وعياله وشوفي شعورج لو كنت مكانها 5 عيال و حبيبتي هاي نزوه