احساس غريب

**غزير الدمع** · 2011-06-20, 20:54

مرحبا خواتي العزيزات
صار لي فترة افكر فهالشي... يمكن حد يقول هاي شو تبا الحين ويا موضوعها، سخيف او ماله معنى، ما علينا، انا بقوللكم شو اللي يضايقني... اللي يضايقني احس اني ما اعرف ابتسم، لا جدام الناس و لا حتى يوم اتصور... يوم يقوللي ابتسمي احسها تطلع مصطنعة. و دايما اللي يشوفني يقول عن ملامحي انها جدية و عصبية (صح انا عصبية بس مخففة منها و احاول اتخلص منها) بس و الله اللي يعاشرني يقول ان قلبي طيب و كبير... و حتى يوم اقعد ويا الاهل فالبيت او ويا الناس برا البيت احس اني مكتئبة و حزينة و ما اريد اكلم حد، ابا اكون بروحي و ما ابا اكون بروحي ف نفس الوقت... يعني كأني ضايعة و ما اعرف شو ابا... مخي يفكر و يفكر و يفكر (حتى انهم يقولولي انتي ما تمتنين من كثر ما تفكرين) شو اسوي، احس انه لازم الواحد يفكر و الا انا غلطانة؟؟؟

بليز اذا وحدة عندها فكرة شو ممكن اسوي تخبرني و ربي يجزي الجميع من خيره و فضله

المزيد من آخر المواضيع من نفس القسم:

**Vanilla.Box** · 2011-06-20, 20:58

اللهّم اغننا بحلالك عن حرامك ،

وبطاعتك عن معصيتك ، وبفضلك عمن سواك ،

اللهّم لا تكلنا إلى أنفسنا طرفة عين ،

اللهّـــم آميـــن .

**فيراندلفلي** · 2011-06-20, 21:04

لاتفكرين بالاشياء اللي تضايقج واللي تخليج انسانة سلبية

خليج وايد كول لا تضحكين بس ابتسمي للي حولج .. انتي تحسين انها مصنعة لانه تشوفينها مب لايقه عليج

وانتي غلط تحكمين على نفسج .. الناس اللي تحكم عليج ^_^

شوفي يوم تختلطين بناس شاركيهم الكلام لا تقعدين ساكته واتفكرين باشياء مالها علاقة بلي ينذكر

اصلا حشرن مع الناس عيد .. يوم تسولفين مع احد تحسين في شي بداخلج طلع

لا تعزلين نفسج عن الناس بسبب افكار وهمية تدخل عقلج ..

**سفيرة دبـي** · 2011-06-20, 21:09

امممممم يمكن من الملل لو انتي ما تدرسين و لا تشتغلين يصير عندج مثل العزل ما تبين تكلمين حد وانتي مناج تسولفين وجيييه و حتى ممكن فكرج كله يكون منولوج داخي يعني ترمسين روحج من داخلج بصوتج الداخـلي

وهالفراغ لازم تملينه و بترجع لج الحيــاه و بتصيرين عفويه و بدون قصد تسولفين و تضحكين

**the duchess** · 2011-06-20, 22:13

بالعكس اختي دام تبتسمين ما تكون مصطنعه
وخلج بشوشه ومبتسمه
وبتشوفين حتى للناس الي ما تعرفج يشوفونج وهم مبتسمين وشعور حلو

**bellegirl** · 2011-06-20, 22:29

جربي عند المرآة اختي وتدربي على الإبتسامـة

الإبتسامة مهارة تكتسب ^^

وربي يوفقج لكل خير

**فتاه صابره** · 2011-06-20, 22:37

ممممممم انا بعلمج خخخ ابتسم وايد بويه كل احد

حاولي صح توقفين يم المرايه وشوفي نفسج وانتي تبتسمين وكرري العمليه كم مره..

حاولي تبتسمي اكثر مع خواتج اهلج ربيعاتج ومع اليهااال

بتتغير نفسيتج وااايد

والله يعووضج خير يااااااارب^^

**محامية الغرام** · 2011-06-20, 22:47

اختي انا اعرف عدل شو الحاله الي انتي فيها ... انتي تحسين ان في شي ناقصنج بس مب عارفه شو هو ؟؟؟
وبعد تحسين بسعاده ناقصه ؟؟؟!!! صح ؟؟
تبين صدق تخوز عنج كل هالاعراض ؟؟؟ و تكون عندج عزيمة و اراده ؟؟
انا بقولج خطوات و حاولي تتبعين لو على الاقل ثنتين او ثلاث منهن و ان شااااااء الله بتدعيلي من قلبج
1. اقري سورة البقره يوميا ... لا تقولين طويله و ما اقدر و مشغوله هذا الشيطان يوزج لا حطي في بالج ان بقرايتج لها فيها خير و سعاده و تفائل و اجر كبير وايد ... و الاستغفار
2. هاتي حصاله و حطي فيها كل يوم الصبح درهم درهمين حتى لو نص درهم بنية الصدقه و كل نهاية شهر او كل اسبوعين جمعي المبلغ و تصدقيبه صدقيني بتحسين براحه فظيييييييعه ان شاء الله
3. اقري كتب عن التفائل و كيف تكونسن انسانه متفائله من الكتب الحلوه (كتاب اسعد امراة فى العالم كتاب لا
تحزن للعريفي...بعد في كتب متنوعه عن الشخصيه و اكتساب الناس و من حولج )
4. ألعبي مع الاطفال وايد حاولي تقضين ساعه كامله مع طفل من سن 4 أشهر لين سن 3 لان هالعمر من الاطفال يكونون توهم يتعلمون الابتسامه و الكلام و خصوصا اطفال الي في 4 أشهر و 5 اشهر يحاولين يغاغون و يظهرون اصوات حلوه عصبا عنج بتنجذبيلهم و حتى لو مشيتي او كنتي في سوبرماركت وشفتي طفل ابتسميله و سويله حركات بعيونج تضحكه او لوحيله بايدج مثل باي
5. ابتعدي عن اي شي محزن او يغث القلب اي مسج محزن او كلام شعر فيه خيانه و هجر و وفراق هذا كله ابتعدي عنه لانه يرسل لج طاقه سلبيه
6. امشي و ألعبي رياضه حتى لو ربع ساعه يوميا
7. دايما اذكري الاشياء المضحكه لانها بتخليج تبتسمين ... و ابتعدي كل البعد عن انج تقعدين بروحج حاولي قد ما تقدرين

اتمنى انج اطبقين بعضهن مب شرط كلهن و ان شااااااااااء الله يتغير حالج
الله يوفقج و يسعدج دايما و تكون بسمتج مرسومه على ويهج ان شااااااااء الله

**ღcute girlღ** · 2011-06-20, 22:51

**غزير الدمع** · 2011-06-20, 23:00

Vanilla.Box: اللهم آميييييين

فيراندلفلي: يمكن مرات افكر بسلبية عن نفسي و هالشي اللي يدفعني اني افكر بمواقف سلبية صارت لي، احاول اني افكر بايجابية بس توني فالبداية. الصراحة فالدوام مرات وايد اطلع من الغرفة او اشغل نفسي بشي ثاني لانه كل اللي فالغرفة اللي وياي معرسات و امهات و سوالفهن مرات مو بس عن عيالهن، شي مرات يدخلن فاشياء زوجية شوي فالعمق... تخيلي موقفي وقتها >_<

سفيرة دبـي: ههههه فديتج و الله، مخلصة جامعة و اشتغل بعد... و يصير عندي هالمونولوج الداخلي من ايام الجامعة بحكم اني احب اكتب قصص. و زي ما قلتي المفروض اني املي الفراغ اللي موجود حاليا باشياء ايجابية

the duchess و :bellegirl: بسوي بنصيحتكم و ببدا ابتسم فالمراية (و منها تمرين للويه ^^)

فتاه صابره: ما اقول لا، حياج. بعد بسوي بنصيحتج مع انه علاقتي ويا خواتي احسها تغيرت، بس شو نقول... الله المستعان

**غزير الدمع** · 2011-06-20, 23:15

محامية: حبيتج الصراحة (و كلكم و الله ردودكم بردت فوادي) عرفتي اللي فيني... و ان شاء الله، ان شاء الله اسوي اللي قلتي عليهن كلهن و ربي يقدرني باذنه... سورة البقرة مداومة عليها يوميا من فترة كم شهر و لله الحمد... و الاستغفار احاول اني اداوم عليه مع اني انسى مرات (استغفر الله العظيم من كل ذنب عظيم)، و الصدقة الحمدلله ع كل شي، الكتب موجودة بس اول عشان الدوام مو محصلة وقت اقراهن بس الحين بحاول اقراهن.... امممم العيال... ما اعرف مرات احس اني ما اطيق حتى اسمع صياحهم، و اكه زنهم اللي فوق الراس، مع اني ويا عيال اخواني اوكي (مع اني ما ايلس وياهم وايد)... اكيد ابتعد عن الاشياء السلبية لاني اعرف انها ما تسببلي الا الاحباط و اليأس و حتى الناس السلبية احاول اني ما اقعد وياهم عشان ما اتأثر باللي يقولونه و يسوونه... الرياضة اوكي ما فيها شي ان شاء الله... و القعدة بروحي ما اقعدها الا يوم اقرا سورة فالمصحف او يوم اقرا كتاب محتاج تركيز او يوم اييني الالهام و الافكار عشان اكتب
مشكوووووووووووووورة و الله ع الكلام الحلو و ربي يسعدج ويا حبايبج و يرزقج من خيره

اللهم وفقني و اخواتي في منتدى سيدات الامارات لما تحب و ترضى و ارزقنا من حيث لا نحتسب

**نسيم الليل37** · 2011-06-20, 23:30

قولي جييييييييييييييز

لووول .. فدييتج حبيبي

محد مآـيعرف يضحك

جربي جدآم المنظره وعوودي روحج من تشوفين حد ابتسمي له >> ولج صدقه ^__^

سبحــآن الله وبحمـــــــــــــــــــدهـ ..~

**الأحلام الملونة** · 2011-06-21, 01:44

أكيد حبوبة ناقصة شيء لذلك توجهة لله بصلاة الحاجة وأنت ساجدة أطلبى من الله ينور بصيرتك وبفرجها على فلبك

ثانى شيء الملابس المكياج من الأمور التى تغير من النفسية وايدددد يعنى وأنت بالبيت تكشخي وتلبسى ملابس

فرحة بألوان تحبيها وحطي مكياج سوف تتحسن نفسيتك كن جميلآ ترى الوجود جميلا

الأنسان تتراكم بداخلة الهموم والأفكار لزم نتغلب عليها بالمسح من داخل المخ والنفس

تغير الجوا من الأمور التى يحتاجها الأنسان لزم أجازة من وقت لأخر حتى لو الذهاب للأمارة أخرة وقضاء ويك أند

بفندق وتعملي أشياء لم تجربيها من قبل تعرفى الحديقة المائية بدبي روحى بيوم الحريم ولعبي هذا المكان ينسا

الأنسان كل شيء فية يرجع لطفل ونحن نحتاج ذلك من وقت لأخر أنا أم ولى عيال شباب أروح وستأنس وما أشعر

بفارق العمر ---------- أقولك سر خبرت عيالي نفسي أرسوق الجيست كي وبقيت بنفسهم وعملوا لى مفاجئة حجزوا

بفندق بالشارقة أسمة فندق الشاطى علي البحر وحجزوا لى ساعة بالصباح الباكر وما فى ناس وستمتع أستمتاع

غير عادي وضحكت من كل قلبي حبوبة الدنيا لا تسوا نشيل عمرنا أكثر من ما تستحق ----------

الله يوفقك ويسعدك ويرزقك بالزوج الصالح والزرية الصالحة يارب

**الحلوة رورو** · 2011-06-21, 07:01

غلاتي عادي.. عيشي حياتج

أنا عن نفسي 24 ساعة أفكر و من كثر التفكير حاسة في مزرعة فدماغي خخخخخ ما أعرف شو هذا لكن المهم

الابتسامة ما تحكم على شي، يعني تعالي شوفي صوري بتطيحين عالأرض من الضحك.. ابتسامتي ولا ابتسامة هامستر!!

و عادي عايشين الحياة هههههه ترا الدنيا مب مظاهر ^-^

أما عن إنج كئيبة فعاادي حبوبة، الموضوع بما فيه إنه إنتي وايد تفكريين

عادي والله ^-^

smile and live ur life.. and kick anyone who says anything to u ^^
fight fight fight

and do ur best
wish u all da best sweetie

**ماحد شراتي** · 2011-06-21, 09:22

كلنا نمر بفتره مالنا خلق حق اي حد ونبي نقعد بروحنا وجيه ..يمكن من الملل او الروتين..
بس خلج ايجابيه وفكري بشي ممكن تكسرين فيه الروتين ..

بالنسبه للابتسامه هممم حاولي انج تربطين هالشي بتفكيرج يعني حاولي انج ما تخلينها مصطنعه قولي بينج وبين نفسج ببتسم ابتسامه حلوة عسب تتطلع الصورة حلوة ..هالتفكير يكون سريع ما اعرف كيف اشرحلج بس اعتقد انج فهمتيني صح؟؟

ربي يحفظج ويسعدج ^^

الموضوع: احساس غريب

أدوات الموضوع

عرض