متضايجه من نفسي .. =(

**احسآس الغلا** · 2011-04-19, 03:23

السلاام علييكم

شحالكم خواتي؟

هاي اول مشاركه لي فمنتداكم الحلووو والي شجعني احط مشكلتي هي ردودكم الحلوه

انا مشكلتي اني واايد حساسه واصيح يدام اي حد .. مثل لو حد صارخ علي او تضاربت معاه او كلامه جرحني على طول الدموع تطلع من عيوني وهالشي صدق مضايجني والكل يطنز علي ومحد يحترمني .. =(

حاولت وحاولت اني امسك نفسي وما اصيح يدام حد وفنفس الموقف الي احس اني بصيح فيه اقول بخاطري لا تصيحين انتي قويه بس الاقي دموعي روحها تنزل .. صدق تعبت ><

وغير اني حساسه احس شخصيتي ظعيفه واذا حد زعلني او جرحني ورد فنفس الوقت رمسني عادي ارمس ولا جنه شي صار وبسرعه انسى وماحط شي بخاطري .. وهم طبعن مستغلين هالشي دوم يجرحون ويقولون عادي بترضى ><

وبسرعه احس اني ازعل من اي كلمه تجرح حتى لو كان مجرد سوالف بس انا بسرعه انجرح ><

وانا مب جريئه ومثلن لو بنات يالسين يسولفون من الاهل او الغريب ما اشاركهم بسوالفهم واتم ساكته مستمعه فقط لا غير .. بس مع الي انا وايد معاهم ودوم معاهم هاييل غير عادي ارمسهم

يعني صدق احس طفرت من نفسي كرهت حالي وشخصيتي خاطري اتغير خاطري اكون انسانه ثانيه

دوم يقولون لي ريلج ما بيتحملج محد يتحمل وحده تصيح بسرعه وحساسه ! .. =(

اخاف باجر لو اتزوجت ريلي ما يحترمني ويمل مني بسرعه ويطلقني هىء

ااه شوروا علي شو اسوي .. لاني صدق تعبت .. =(

المزيد من آخر المواضيع من نفس القسم:

**العنود20** · 2011-04-19, 03:26

**my best life** · 2011-04-19, 03:42

أويلي ويلاه نفس مشكلتي بالضبط كانج تتكلمين عني
الله يعينا ، ان شاء الله نلاقئ حل
ربي يوفقج فالدنيا والاخرة

**مرآآيم** · 2011-04-19, 03:43

اختي أنآ قبل كنت أعآني شرآت مشكلتج
عن سآلفة إني دوم سآكته
فحآولي تندمجين ، اظهري ، سيري مكآن التجمعآت
وجآبلي النآس وانتي بشوووشة
ترى ايسآعد وآآآيد
أول شي حآولي ترمسين ويآ ربيعآتج بالفون وشوفي كيف حآلتج
وبعدين حآولي اتسولفين ويآهم ويه بويه
ومثل مآ هم يجرحونج لآ اتحطين ببآلج إن الكلمة اللي بتظهر منج بتجرحهم ومآ قلت إنج اتعآملينهم بالمثل
أقل شي اتسوينه انج اتدآفعين عن عمرج
اظهري عصبيتج وزعلج من هالسآلفة وصآرحيهم وقوليلهم مب اتشوفوني سآكته تآخذون رآحتكم وتتعدون حدودكم
بعديين صدقيني بيحترمووونج

أمآ سآلفة إنج حسآسة واتصيحين بسرعة ترى تتعلق بنفس مشكلة ضعف شخصيتج
انتي اتحطين بخآطرج ولو مآ اتدآفعين عن عمرج بس اتيمعين كل الجروح بقلبج وتنفجرين بالصيآح
فلو قويتي شخصيتج صدقيني بتحسين عمرج مع الأيام إن مب أي شي ايصيحج

والله ايعينج =)

**احسآس الغلا** · 2011-04-19, 04:16

my best life : ههه فدييتج والله صدق كلامج الله يعيناا ~ اميين

مرآآيم : انا اسولف وعندي ربيعات بس الي مب متعوده عليهم هاي المشكله ما اقدر اسولف الا اذا هم سولفوا واذا سكتوا اسكت يعني ما اقدر انا افتح مواضيع واسولف فيها واتناقش وارتبك وايد واستحي ><

ااه ما اقولج ما ازعل والله اني ازعل بس احس الدموع هي الي تخرب وتخليني ظعيفه يدامهم فهم ما يحترموني وياما واجهت وقلت هالكلام يجرحني بس طاف وحياتج ><
واذا زعلت يقولون والله انتي حساسه وتكبرين المسائل وليش تزعلين انا كنت اسولف ><

صح كلامج باخر نقطه والله اني احاول اقوي شخصتي وادور فالنت واقرا بس ما شي فايده ><

مشكورين ع المرور والردود حبايبي ^^

**أم أريج** · 2011-04-19, 07:32

اللهــمـ إني أصبحـــت أشهدكـ وأشــهد حملة عرشكـ وملائكتكـ وجميع خلــقكـ أنكـ أنت الله لا إله إلا أنت وحــدكـ لا شركــ لــكـ وأن محمداً عبــدكــ ورسولــكـ ..

**ماحد شراتي** · 2011-04-19, 08:53

حيااتي والله...اصعب شي يوم الانسان ما يقدر يتحكم بمشاعره ولا دموعه..بس الدموع مب ضعف شخصيه بالعكس هذا لانج حساسه..بالنسبة لربيعاتج حاولي انج تكلميهن باللي مضايقج واكيد هن بقدرن هالشي اما الباقي فحاولي انج ما تنزلين دمعه جدامهم وطنشي وخلج قويه وماعليج من حد ..

موفقه حبيبتي

**حنين1212** · 2011-04-19, 11:31

الحمدلله ع كل حال

**نونو ماما** · 2011-04-19, 12:34

الله يوفقج

**فجــر الليالي** · 2011-04-19, 12:50

:
:

حبوبهـ ..
ابدي شوي شـــوي ..
و ركـزي ع نقطـهـ و عآلجيها ..
عقب انتقلـي لـ اللي عقبهــآ ^^

مثلاً / اتحسين انج تستحين ، ركزي ع نقطة المستحى أوول شي ..
حاولي تكسرين هـ الصفه فيج ..
اتدربي انج اتقوين نفسج و تستوين جريئه أكثر ..
اقري كتب و مقالات نفسيه بخصوص هـ الشي ..
عندج وااااايد مواقع و منتديات متخصصه بهالشي ^^

و عقب تدريجيا انتقلي لـ باقي الاشياء اللي اتحبين
اتغيرينها فـ عمرج ..
و ان شاء الله مع الوقت بتتغيرين لـ الافضل ان شاء الله ^^

و دامج طالبه فـ هـ الشي طبيعي فديتج ^^
هـاي هي الفتره اللي تتكون و تنصقل فيها الشخصيه ..
فـ ان شاء الله مع الوقت بتكبرين و تتغيرين لـ الافضل =)

:
:

**راعية ظبي** · 2011-04-19, 13:09

وانا بعد نفسج وما اعرف كيف اتصرف

**الأمل عنـواني** · 2011-04-19, 18:29

اختي حياج اول شي في منتدانا ومرحبا بج
اول شي لازم تقتعين انه كل واحد فينا فيه عيوب وفيه حسنات
والكمال للخالق سبحانه وتعالى
مني الي فهمته انه انتي متظايقة من موضوعين :
1) حساسيتج لما حد ينفج فيج وما تبين تصيحين جدام الناس
2) انج تستحين تسولفين وما تحبين تختلطين

وثقي في عمرج وما عليج من الناس
اذا فيه شي تحبينه شرات الرسم او القصيد او اي نشاط يونسج سوويه
كل ما تتظايقين وتحسين انج بتصيحين جدام الناس سحبي عمرج وغيري المكان وتذكري لحظتها اي شي يظحكج ( ادري بتقولين مب وقته ولا مالي خلق) بس جربي دايما جيه اسوي تذكري مقطع مسرحية ولا شي تحبينه وخلي نفسيتج تتغير لين ما تطلعين من المكان الي فيه الناس
يوم تسيرين غرفتج قفل على عمرج الباب
هناك لج حرية الاختيار في التنفيس عن نفسج
ساعات اكتب ال ف خاطري واصيح شوي وارتاح بس شراتج وشرات كل حد ما احب اصيح جدام العالم

ونصيحتي صلي بالليل وطلبي من الله انه يحسن خلقج مثل ما احسن تصويرج وربي ما بيخليج صدقيني
هو الي خلقج ويعرف نقاط ظعفج وقوتج
وطمنينا عنج ربي يحفظج

**الأمل عنـواني** · 2011-04-19, 18:31

وعلى سالفت انج تستحين ترمسين ويا الناس جربي سولفي ولا تستحين ما يقص الراس الا الي ركبها

**احسآس الغلا** · 2011-04-19, 20:14

فديتكن والله مشكورات واايد ع النصايح واتمنى اقدر اطبقهاا .. =(

والمشكله انا مب صغيره عمري 27 سنه .. ><

الله كريم .. =(

**مجنونة و تجنن** · 2011-04-19, 20:24

سبحان الله و بحمده عدد خلقه و رضا نفسه و زنة عرشه
سبحان الله و بحمده عدد خلقه و رضا نفسه و زنة عرشه

الموضوع: متضايجه من نفسي .. =(

أدوات الموضوع

عرض

متضايجه من نفسي .. =(

المزيد من آخر المواضيع من نفس القسم:

المواضيع المتشابهه

متضايجه

متضايجه

ع الدنيا سلام كلن يقول نفسي نفسي

هل تعتقد بأنك مريض نفسي وتحتاج مراجعة طبيب نفسي ادخل واختبر نفسك ..