دفعت الثمن غالي

[لحن التعاسه]

السلام عليكم بنات
أنا بنت عمري 22 سنة أنا لي 3 خوات أكبر مني وأخت أصغر مني
أنا وأختي ألي أكبر مني بسنه وألي أصغر مني بسنتين نتشابه نسخه وحده وطول بعض سبحان الله وألي مايعرفنا يتحسبنا 3 توائم ... وكنا ثلاثي مرح عكس خواتي الثنتين الكبار
المهم كنا في الصيف وعندنا إجازه الصيفية سافرنا مصر أنا وأهلي وكنت ناجحه والحمدالله ترتيبي الرابعه على الصف .. أكبر وحده من خواتي شافها واحد إماراتي في مصر تعرف على ابوي في مصر وصار يطلع ويانا هو وي اهله ولما رجعنا البلاد خطبها بشكل رسمي وتزوجت الحمدالله .. أختي ألي بعدها تزوجها ولد الجيران بعد أختي ب6شهور ... بقينا نحن الثلاثي المرح أختي ألي أكبر مني وأنا وأختي الأصغر
كنا نطلع المول مع بعض والحدايق حتى صديقاتي صديقاتهم والعكس دخلت الجامعه وكانت اول سنة لي وأبوي الله يحفظه طلعلي رقم يديد وموبايل يديد أنا وأختي ألي أكبر مني بسنه بس هي دخلت قبلي الجامعه بسنه
المهم كنت فرحانه بالتلفون شكله يديد والبطاقه رقمها مرتب ثاني اسبوع من استخدامي للبطاقه ياني مسج مكتوب فيه (مابتنزل سعرها شوي؟؟ أنا لقيت نفس الموديل بأقل سعر لكن لونها ماعجبني) مافهمت المسج ولا عرفت المرسل بس حسيت انه مغلط فمسحت المسج وطنشت
مر يومين وياني اتصال من نفس الرقم الغريب مارديت وبعدها وصلني من نفس الرقم ( خلاص بعطيك عنها 70 ألف ألي أنته طالبهم عسى بس ما أنباعت؟ ) دخلت غرفت اختي ألي أكبر مني بسنه وقلتلها الموضوع قالتلي تعالي نمسخره ونقوله (خلاص من صوبك) ونحن مب عارفين شو هالشي ألي يقصده أصلا وطبعا أنا رسلت المسج وهو رد علي بمسج (هات صورة من الجواز وأنا بجهز ورقة البيع والمبلغ موجود) طبعا كان يخاطبني بصيغة المذكر لانه مايعرف اني بنت أنا بطلت حلجي !! شو هالغبي المهم ضحكنا وطنشت الموضوع ... ثاني يوم كنا أنا وأختي لطريقنا للجامعه بعد مانزلنا اختي ألي أصغر مني المدرسه ياني مسج وأنا في السياره (صباح الخير أخوي ماقلت لي وين أقدر أشوفك ؟؟) قلت حق اختي هذا من صجه ؟؟ قالتلي اكتبي مسج قوليله (تعال العصر عند اتصالات العين) خلينا نشوفه بدون مايدري .. وفعلا بعد ماخلصنا الجامعه قلنا لدريول روح الاتصالات وكانت الباركنات زحمه وكلها سياير قلت لاختي الحين شقايل بنعرفه ؟؟ قالتلي طرشيله مسج قوليله شو عندك من المواتر وطرشتله بس مارد بمسج على طول اتصلي وقمت أناقز من الخوف مكاني قلت لأختي يتصل شو أسوي؟ شو أقول ؟ ورطينا ؟ قالتلي بندي في ويه وفعلا بندت في ويه وطرشلي مسج ( عسى ماشر ليكون غيرت رايك ؟ أنا قدام باب الاتصالات أتريا) ونزلنا أنا وأختي من السياره ذابحنا الفضول نبا نشوف هالانسان وشو هالشي الي يبا يشتريه.. المهم نزلنا وفعلا لقينا واحد طويل مجسم لابس كاب أحمر وشعره طويل وسايح ولابس نظاره شمسيه كبيره كلاسيك ماسك أوراق ... حسيت بشي داخلي يقولي أن هالانسان طيب وحرام هالحركات الي نسويها فيه نحن مشينا من عداله لكن من كثر ماكنا نشوفه الريال شك فينا مشى ورانا وأنا نشف دمي من الخوف رغم ان شكله والله مايخوف لزق ورانا وقال لو سمحتوا ونحن مطنشين كأن حد يركض ورانا اتصل على رقمي وتلفوني في أيدي النغمه عاليه رن تلفوني على طول عرف أني صاحبت الرقم بس حس بحركاتنا وطريقة مشيتنا وضحكنا وتطنيشنا لما زقرنا ان نحن نتمسخر الريال طلع أختفى ورجعنا نحن السياره ميتين من الضحك بس في شي بداخلي من اول ما شفته قلبي ناغزني وصلنا البيت وبالعادة أنام حزت العصر لكن جفاني النوم حاسه بتأنيب الضمير وأتقلب في الفراش عكس أختي ألي نامت من اول سدحه.. المهم قعدت اشوف التلفزيون ولا اسمع صوت مسج ولما فتحته ( ماكان له داعي هالحركه ألي سويتيها المفروض اني أفهم أنج ياهل من اول ما صكيتي بويهي لكن ماضنيت أنج بنت وبنت فاضيه بعد عطلتي اموري كلها عشان حركه مالها داعي ) حسيت أني اعرق وانا أقرى المسج حتى بطني عورني .. المهم مر أسبوع على السالفه وانا كل يوم فليل أفكر بالموضوع وأتحسف على سخافتي انا وأختي قلت ليش ما أدزله مسج اعتذر المهم أعتذرت وقلت له اسفه كنت أتوقع انك بعد تستهبل مثلنا لما وماعرفت شو تقصد بالمسج.. الريال طنش مارد علي بمسج ولا شي بعد مادزيتله المسج حسيت براحه على الأقل لما اعتذرت حتى لو مافي رد منه مرت الايام وكان عند اختي ألي أكبر مني بسنه تراي عشان تاخذ الليسن أنا خذيت الليسن قبلها لكن ماعندي سياره عندنا دريول يوصنا وكنا انا واختي الاصغر في كرفانت الانتظار مال المرور حاطين قلوبنا على يدينا ونشوف أختي من بعيد والشرطي واقف عدال السياره مامدها تمشي الا نزلت منها لانها دعمت القمع رسبها على طول ودخلت علينا وعينها تدمع وكل العاده من يوم نحن صغار متعودات نحضن بعض لمن نصيح حضناها أنا وأختي وقعدنا ننكت عشان تضحك وطلعنا من المرور ونحن في الدرب وصلني مسج دعاء للمهموم قريته بس الرقم مب غريب لكن مب قادره اتذكره طنشت ورجعنا البيت فليل كنا في غرفت أختي الاصغر نشوف فلم وصلني مسج ثاني من نفس الرقم ( من يوم شفتج وأنا ماوقفت تفكير فيج رغم اني كرهتج لكن قلبي يقول انج طيبه) على طول عرفته بس صدمه يا بنات كاتب نفس الكلام ألي قلته في قلبي لما شفته ترددت أقول لخواتي عن المسج المهم مثل ماقلت لكم أن أنا وخواتي نشتابه بشكل كبير قلت في خاطري هذا من يقصد ؟؟ وبعدين معقوله ماعلق مثل باقي الناس على أن نحن توأم والله شكله ماشافنا عدل قاعد يجذب أو يبا ينتقم ... اكثر من فكره دارت في بالي وانا ميوده التلفون ونمت وصحيت الصبح على مسج منه عن الصباح ومن هالكلام قلت السالفه طالت وتشمخت دزيتله مسج ( لو سمحت لاتطرش مسجات ولين هنيه وخلاص) وفعلا ماطرش بعدها مرت الايام وكان موعد تراي اختي إعاده مره ثانيه ومن رسوبها أول مره وهي ضاربنها احباط وخوف رغم أنها تسوق عدل وهي الي معلمتني السواقه بس ترتبك من الشرطه وقررنا أني أنا الي أسوي التراي بدالها ونحن نتشابه وايد ومستحيل حد يميز وفعلا سويت التراي ونجحت وعطوها موعد تراي الشارع ومن الفرحه نحن الثلاث كأنا شخص واحد نصفق ونضحك من الفرحه كأنا 3 أشخاص في جسد واحد المهم قدمت تراي الشارع ونجحت وطلعت ليسن لأختي ومثل ماقلت لكم نحن عندنا لياسن لكن ماعندنا سياير نخلي الليسن للمستقبل من يدري واحتفالا بهذا اليوم قررنا نسير العين مول نتغدا هناك نحن الثلاث تخيلوا يا ناس كنا قاعدين ناكل ونضحك وفجأه وكأن حد يقولي شوفي يسارج مع أني والله مب من النوع ألي يتلفت ماحب اتلفت في الأماكن العامه تخيلوا لقيته قاعد على الطاوله ألي على يساري وماسك جريده نفس الشخص ونفس النظاره الكبيره الكلسيك كانت على الطاوله زادت نبضات قلبي وطلعت من جو خواتي وأنا سرحانه ولتفت مره ثانيه لقيته يشوف صوبنا وعينه تتنقل بيني وبين خواتي ومبين عليه مستغرب خواتي كانوا يسولفون ومب منتبهين على طول قلتلهم خلونا نروح وقفت انا أول وحده ورحنا
رجعت البيت يا ناس وانا أفكر فيه ليش مادري إعتذار واعتذرت ومسجات ووقفت بينا ليش هالاحساس الغريب وليش هالصدفه الغريبه قلت الحين بيطرش مسج ومر اليوم بطوله ولا حتى رن تلفوني ثاني يوم بعد الجامعه قلت لأختي خلينا نمر على أختي الثانيه ونروح المول طبعآ النيه كانت مب صافيه ولا تلوموني فيني شي غريب يقول أني بشوفه مره ثانيه ومادري ليش ابا اشوفه اصلا ولا قادره اصارح خواتي رغم أنهن وايد قراب مني .. المهم رحنا المول وكنت أسابق خطواتي للمطاعم وخواتي مستغربات مايلحقن علي وطلبنا غدا وأنا اتلفت على الناس يمين ويسار لكن مافي حد والله العظيم في شي بداخلي يقولي انه موجود وأني بشوفه لكن محد بين الناس أصلا المول كان شبه فاضي وكالعاده خواتي مندمجين بالسوالف وانا في عالم ثاني واحساس غريب ان هالشخص موجود وبشوفه خلصنا وقمنا على اساس نرجع للبيت ولكنه مو موجود بين الناس خلصنا غدا وقمنا وفيني الاحساس قاعد يزيد ونزلنا الدرج والاحساس كل ماله يزيد لين وصلت مخرج باب المول شفته وشهقت بداخلي هالمره غير فيني احساس يقول ان هالشخص لي وأني احبه ويحبني وهو رغم تشابهنا نحن الثلاث كانت عينه تركز علي كلها لحظات ونحن راكبين السياره وانا مثل المينونه اتلفت ورى وامشي وهو يمشي ويلتفت مثلي أختي مالاحظت ولا عرفته ولا حتى أنتبهت له وهو يطالع فيني
رجعنا البيت وأنا اتعوذ من البليس ماريد ادزله مسج ولا اريد اتصل هذه مب عوايدي ومر اليوم وانا ماوقفت تفكير فيه اصلا كان بالنسبالي شخص مجهول بس هالاحساس ذبحني بعد كم يوم الوالد تعبان وعنده الربو الله يحفظه ويطول بعمره كان منوم في المستشفى وبعد الجامعه رحنا نشوف ابوي التمينا نحن الثلاث فوق السرير على حضن ابوي مثل القطاوه وأمي تقول وخروا عن ابوكم تعبان شوي والا سمعنا دقت الباب كانوا ريايل ياين يطمنون على الوالد نحن على طول لبسنا العبايا وطلعنا من الغرفه عشان يدخلون وياخذون راحتهم عند أبوي أمي راحت تشوف صديقتها مربيه في قسم ثاني وأختي الي أكبر مني راحت الكفتيريا هي واختي الاصغر وأنا كنت في كراسي الممرات يالسه وبدى الشعور الغريب وقمت أتعوذ واستغفر قلت في خاطري هذا الشعور نتيجة لما اقعد بروحي وقمت أتمشى في القسم وأغني أغنية بصوت خفيف بداخلي لكن الشعور كل ماله يزيد والله ومالكم حلفان اني اشوفه قدامي وفي ايدينه 3 اكياس وهالنظاره ألي ماعنده غيرها انصعقت وأقول في خاطري هذا جن ولا انس نفس الشي هو مبين عليه مستغرب وتباطت خطواته بس انا سرعت خطواتي ومريت من عداله وكأنه نزع مني شي ولقيت في ويهي خواتي ورجعنا لغرفة الوالد وبعدها رجعنا البيت حاولت انام حاولت ماشي فايده وصلني مسج وعلى طول نقزت وقريته (ممكن اتصل فيج وتردين الموضوع ظروري) نطيت من السريروامشي للغرفه يمين ويسار.. شو اسوي؟؟.. اخبر اختي؟؟.. ابند في ويه ؟ ولا اسبه .؟ شو اسبه اصلا انا ماصدقت انه طرش مسج وقطع تفكيري صوت رنت التلفون هو متصل رديت عليه بصوت متقطع وكاني عجوز من الربكه وهو عباله نايمه لما سمع صوتي جذيه قال اسف على الازعاج وصك التلفون ياللللللله حسافه عباله نايمه وانا اصلا جفاني النوم من طلع هو بحياتي فشله ارجع اتصله واقوله لا ماكنت نايمه ومادري كيف مرت هذيج الليله ...كان عندي دوام الجامعه الصبح وانا بدى حالي يعتفس والسرحان زاد وخواتي حسوا كانت عندنا كلاسات في نفس الوقت انا واختي بس كل وحده في مكان وكنت ماشيه صوب الكلاس رن تلفوني الا هو وباقي على كلاسي 4 دقايق رديت الو الو مب مصدقه حتى ان هو مب عارف شو يقول قالي اسألج بالله أنتي جن ولا أنس؟؟ نفس الكلام أل كنت أقوله بخاطري في المستشفى قتله أنا ألي أسألك بالله أنت شو ..؟؟ كيف تقول نفس الكلام ألي أقوله بخاطري وكيف ألاقيك صدفه وقبل ما ألاقيك يبدى فيني شعور غريب على أني بشوفك؟؟ والله يا بنات أنه قالي كنت حاس بشوفج في المول وكنت حاس أني بشوفج في المسشتفى بس لاتسأليني عن هالإحساس لأني مستغرب وايد منه.... نفس احساسي يا ناس ......الكلاس طاف وأنا تحت المضلات اتكلم وياه وكأني أعرفه من زمان وهو نفس الشي ساعه ونص ونحن نتكلم وفينا أشياء وايد تتشابه ونضحك مع بعض فجأه نقول نفس الكلام مع بعض ونضحك على عمارنا وقبل ما أسكر قتله تعال صج شو كنت تبا تشتري ب70 ألف ضحك وقالي قلبج سكت لحظه وضحك على انه يمزح ورجع يقولي انتي تسوين ملايين .. وسكتنا لمدة دقيقة وانا مصدومه من الغزل وكأنه يلمح لحب وهذه أول مكالمة وقالي سياره واحد حاط اعلان ورقمه يشبه رقمج .....تميت على علاقة معاه 8شهور أكلمه في التلفون بس.. ولا كنت أفكر اشوفه ولا حتى هو ولو تسألوني كم مره في هال8 شهور شافني صدفه ماقدر أحسبهم لدرجة أني أشك أنه يتبعني وهو يشك اني اتبعه صحيح هي 8شهور بس عرفت كل شي بحياته وهو نفس الشي وكان فيني احساس أنه بيخطبني من أول مكالمه لما كنت في الجامعه تحت المظلات وفعلا بعد 8 شهور طلب مني رقم الوالد ترددت وايد واختي الأكبر مني كانت حاسه أني مخبيه عليهم شي المهم عطيته رقم الوالد بعد معاناه وترجي وفعلا اتصل عليه ويانا البيت هو وامه وخواته واهلي مستغربين كيف عرفونا بس أخته رتبت الموضوع وقالت انها شافتنا في المستشفى لما كان الوالد منوم وسألت عنا المهم تخيلوا المصيبه امه وخواته ركزوا على اختي الأكبر مني وأختي ماكانت تعرف بعلاقتي معاه كانت كاشخه وتحاول تبرز نفسها وشخصيتها قدامهم وتضحك وتسولف وياهم وكانها تقولهم انا المقصوده وانا مالي اي وجود أنا احب أختي لكن هذا الشخص لي أنا ...وأهله فهموا غلط وأختي فهمت غلط .. وبعد ماراحوا بدى ابوي يمدح في الشخص ويتمنى السعاده لأختي وأنا الدنيا كانت تلف وتدور فيني .. اتصلت فيه وقتله أنت السبب ليش ماقلت لأهلك عن أسمي خليتهم يركزون على أختي واختي مسكينه عاشت الدور قالي انه بيصلح الموقف بس قتله لا تصلحه ولا شي بتجرح أختي وبخسرها بسبب غلطتك وأهمالك تحمل النتيجه وسكرت في وجهه وتخيلوا أختي كل ساعه تدخل وتطلع واحسها بطير من الفرح.. وهي تمدح فيه شافت صورته في تلفون اخته وتقولي لو شفتي خشمه ولوشفتي عيونه ولو شفتي.... وأنا أقول بخاطري هذا كله شفته قبل لاتشوفينه أنتي ...ماقدر أصارحها الحين تاخرت وايد خصوصآ أنها المسكينة فرحانه وأختي من النوع الحساس وتتاثر بسرعه.. ولا أقدر اتقبل فكرت ان يتزوجها أو ينتهي الي بينا وكل واحد يروح بطريق والله بموت أنا ماعرفت الحب إلا معاه وألي جمعني فيه أشياء غريبه ماعرفت لها تفسير لا أنا ولا هو كل ألي أعرفه أني أحبه ويحبني... ليش؟ كيف؟.. مادري ولا يهمني .. اليوم قاعده امسح صوره صوره من تلفوني ومسح مسجاته واحس بيغمى علي مب مستوعبه الصدمه.. بخسره في كل الحالات لأن مستحيل اوافق عليه اذا ردوا وقالوا انهم غيروا رايهم مايبون اختي ويبوني بعد مافرحوها!! .. أبوي بيشك في سمعت أختي ... وحالته الصحية ماتسمحله يتقبل أي صدمه والموضوع تشربك بغلطه من أهله
انا في حالة صدمه ياناس

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية