قصة ابتزاز وتهديد اختي بصورها

**روح السعودية** · 2011-03-09, 03:17

السلام عليكم

انا قلت بنزل سالفة اختي للعبره من حفر حفره طاح فيها
والسمووحه السالفه طويله وبعد مختصره منها قد ما اقدر

قبل كل شي خواتي ابيكم تدعون للبنت بالهدايه وبدون سب و غلط رجاءا اعرف ان الغلط راكبها بس الدعاء لها بالهدايه افضل من ان ندعي عليها

اختي متزوجه من فتره قريبه وكانت مطلقه مرتين ماصار نصيب والحمدلله على كل حال
وبقوول لكم بداية السالفه هاذي اللي هي البنت الراس المدبر بثانويه عامه عمرها 20 وعندها بيبي و مضافه عندي وعند اختي بعض الاشخاص مضافين بالصدفه عندنا حنا 3 وابدااا ماكانت علاقتنا فيها انا واختي هذاك الزود اللهم تبادل برودكاست لا اكثر واذا زادت كيفك اخبارك و بس

بيوم من الايام تكلم شخص من اللسته وكان كلامه يعطيني اسمي و معلومات عني ونفس الشي اختي صارت اختي تستجوبه من عطاك معلومات عني وعن اختي قال فلانه تقرب لكم هي عطتني وانتو ادري مابينا وبينكم الا تبادل برودكاست بدون كلام لكن استغربت انها تتكلم عليكم وتقول اشياء خاصه فيكم وانا اعتبركم مثل خواتي قالت له اختي ابي اثبات انها هي اللي تعطيك معلومات عنا قال شوفي ياختي البنت تكلمني وتصور وتنشر صورها بس انا ماني ولد حرام احفظ صورها واطلبي مني طلب واخليها تنفذه قالت خلها تصور وتعطيك وفعلا تصور وغير الكلام اللي تقوله كلام عيب وبقوووه
وصار هالشخص ينصح فيها و يعطيها نصايح وشاف مامنها فايده قال شوفي يابنت الناس والله لو ماتادبتي بدق بيتكم وبكلم ابوك واخوانك وبعطيهم صورك يادبوونك هي خافت و فكرت بفكره للاسف طلعت لاخوها الصغير تقريبا ابو 23 سنه وقالت اني انا واختي معرفينها على واحد و مدبرين لها مكيده طيب شلووون يافلانه معرفينك و توزعين صورك قلت لاختي خلينا نبعد عنها بخيرها وشرها ونحذفها و حذفناها كلنا

ومرررت الايام ونسيينا السالفه

الا اختي تتفاجا الاسبوع اللي طاف برساله بالبريد باسمها وهي على بالها وحده من صاحباتها تطلبها تقبل الاضافه وقبلت الاضافه
وقال لها انا ولد واعرف انك راعية شباب و نمتي مع 5 شباب و عندي صورك قالت طيب وبعدين المطلوب وش تبي قال منتي مصدقه و شبك كام يوريها الصور ما شاافت شكل الولد اللهم ايد و ماسك الصوره واختي فكرت ودقت على اخووي و طلعت هيئة الامر بالمعروف والنهي عن المنكر (((بالسعوديه وبالتحديد الدمام )))
والشيخ طلب منها تستفز الولد يبونه يهدد و يبتزها وهي مره تشد معه ومره ترخي معه ليييييييييين يطلب منها موعد مقابله وفعلا صار يدخل يهدد لو ما تنفذ اللي يبيه بينشر صورها بالفيس بوك و يووصل لزوجها الكلام ويطلقها((زوجها مبتعث بامريكا يرتب وضعه وبعدها تطلع له))
قالت وش تبي توصل له من كل هذا وهو يرد بكلامه مطلقه مرتين ولها عين تتكلم و راعية فنادق تطلع الامارات تكمل البزنس حقها و ترجع و كلام وقح والفاظ استفزازيه و شيخ الهيئه قال لها خلي يقول اللي يقول لا تردي عليه لو غلط عليك بصالحك كل هذا ولا تخافي ترى عندنا امر ملكي اي شخص يبتز و يهدد وينشر صور بنت على طوول سجن بدون كفاله لووو عنده واسطات ماتنفعه
والولد طلب بالبدايه 5 الاف و جلس يستفز ويستفز لييييييييين وصل المبلغ 60 الف و طلب رقم اختي وعطته قال انتي يا واطيه بنزل راسك بالارض و بتعيشين تحت رجلي ذليله وعطته الرقم و تبي رقمه رفض يعطيها قال انتي تسكتين انا متى مابغيتك برسل لك مسج وين نتقابل وكل شي بالمسج فهمتي يا ......... وفعلا بيوم الاثنين 7\3 تم كل شي وصلها مسج المكان وطلعت الهيئه مع اخوي وابوي وقالوا لهم عن المكان المتفق عليه وكل شي وكان الشيخ الله يجزاه خير قال ماخليك لا تخافي بكون معك عالجوال لحظه بلحظه وعطيني الاشاره بس ونمسكه
دخلت اختي المجمع وجاها اتصال من شخص يقول لها فيه ولد عند بوابه رقم كذا عطيه الظرف ويعطيك الصور وطلعت وشافت ولد ابو 11 سنه و عطاها الصور قال هاتي الظرف صررخت عليه قالت انا ما اعطيك المبلغ الا لييين اشوف اللي يكلمني و يجيه الحاارس و يعطيه كف ويعترف بكل شي يقوول مووو انا انا مالي دخل هم قالولي قاله اعترف من اخلص قال بنتين وولدين بالمكان الفلاني فوووق جالسين و طلعوا رجال الهيئه و الشرطه يااااكثرهم حوول المكان حصار وامسكوهم واختي انهارت وجلست تبكي بحرقة قلب دقت على اخوي و جاها واخذها لمركز الهيئه و مانزلت ماقدرت كانت منهاره كليا من اللي صار

شوي جاها اخوي يقول لها اسماء اللي مسكوهم فلانه بنت خالة امي وفلانة مرت اخوها للاسف و عيال اختها 12 13 و ولد عمها 17 (((((اختي كانت تظن ان طليقها نسخ صورها و هو اللي يهددها)))))
قالت لا مستحيل قووول غير كذا انا ما ضريت احد و سمعتي ماعليها كلام والحمدلله دخلت لبنت خالة امي المركز قالت لها ابي اعرف انا وش ذنبي وش سويت ومن معطيك الصوووووووور قالت معطيني واحد صرخت عليها قالت كذاااااااااااااابه اعرف نفسي والكل يعرفني ماعندي هالاشياء الله يبعدني عن الحرام
قالت سرقتها من غرفتك وانتي ماتدرين
اختي كانت محتفظه بصور بتلفونها وورتها صورها اللي ترسلها للشباب قالت ليش انا ماسويت مثل ماسويتي لانك من عرضي وشرفي سمعتك سمعتي مارضيتها عليك سترت عليك سكتت و قالت سامحيني
وقال الشيخ عررض الناس مهوو لعبه وتنازل مافيه اللي سويتوه مهو شوي
اما زوجة اخوها تقول لو يعرف زوجي بيطلقني
قال اخوي تتطلقي موو بغيتوو لاختي الطلاق وخراب البيووت وحفرتوا لها هذا انتو طحتو بالحفره اللي حفرتوها لاختي
وتنازل ما اتنازل دام قلوووبكم مارحمت احد الحين فكرتوا بانفسكم

واختي تقولي انا افكر بامها وابوها مريض القلب وش حالهم الحين
قلت مابيدك شي القضيه ثابته عليهم لا محاله و اعترفوا على انفسهم هم اللي جنوا على انفسهم وانتي مالك دخل
اما عن زوجة اخوها تبرررت منها ورجعت بيت اهلها ولا تعرفها ولا شي من اللي صار
وبالتحقيق طلعت اختي للبنت قالت لها حسيتي من العدو ومن الصديق الحين وينها اللي ساعدتك تبررت منك ماتعرفك ابد وانا ضريتيني و ابوي وقفنا معك وضمممممت اختي وتبكي و تقول سامحيني قالت حنا اخوات واكثر من اهل رحنا والا جينا
واليوم اختي تنازلت عن حقها الخاص بعد ماشافت ابوها يبكي و امها وكل شوي تطيح عليهم وللامانة اهلها وقفوا بصف اختي واعترفوا ان اختهم هي اللي غلطت بحق اختي
وحاولت ان الشيخ يتنازل عن الحق العام رفض قال القضيه ماهي بسيطه ابد ابتزاز وهي اعترفت بكل شي والبنت ربي يهديها ويصلحها لا زالت بالحبس وماندري يقبل الراي العام انه يتنازل عن القضيه وتطلع او تاخذ عقوبة السجن

اتمنى انها بداية توبه و صلاح للبنت وعبره لغيرها كثييييييير من اللي يسوون هالحركات

والحين ودها تجيني الامارات تغير جو القلق اللي عاشته

الموضوع: قصة ابتزاز وتهديد اختي بصورها

أدوات الموضوع

عرض

قصة ابتزاز وتهديد اختي بصورها

المزيد من آخر المواضيع من نفس القسم:

المواضيع المتشابهه

خط هاتف لشكاوى ابتزاز الفتيات قريباً

مقطع صوتي لشاب يبتز فتاة بصورها ويطلب منها النباح

استاند لتوزيعات ولادتي من صنع ايدي والتوزيعات عقب بصورها