احس اني غريبه

**Noura311** · 2011-03-04, 22:51

بنات انا حبيت اكتب عن نفسي في هالقسم ماعرف اذا كان مناسب هالمكان للكلام الي بقوله <<<<<<<
بنات انا ووايد متضايقه من نفسي ودوم مكتئبه والسبب شخصيتي <<<<<<
بخبركم كيف يعني انا ماخذه ولد عمي وصارلي معرسه 5 سنين وعايشه معه اهله ولاكن تخيلو علاقتي معاهم سطحيه ماقدر اسولف واندمج معاهم ابدا وحتآ اذا صارت تجمعات عائليه اضل ساكته وبس واحس بضغط
ابدا ماقدر اندمج مع حد حتآ ريلي بعد علاقتي معاه سطحيه ومحدوده اتقولون اخوان <<<<<<
وانا عندي ولدين
وحتا يوم كنت في الكليه كنت جي بعد علاقاتي سطحيه
خاطري اعرف كيف اكون اجتماعيه
وبعدين ماعندي ثقه بنفسي ابدااااا بسبب لون جسمي انا سمرااااا ولاكن عندي تصبغات في جسمي يعني الرقبه اسمر عن الويه بواااايد واماكن واااايد بعد في جسمي وهالشي متعب نفسيتي وااااايد <<<<<<

خاطري حد يقدر يساعدني بنصيحه
انا عمري 24

المزيد من آخر المواضيع من نفس القسم:

***كلي ذوق*** · 2011-03-04, 23:02

فديتج تعوذي من شيطان
واستغفري وايد
والله يشيل اضيج عنج يارب

**جوزفين مارش** · 2011-03-04, 23:16

يحليلج والله ،،، مادري شقولج بس ترا الزوج له تاثير علا الزوجة وكذلك الزوجة لها تاثير ،،،، يعني اذا علاقتكم قوية صارحي ريلج بمشاعرج قوليله كل شي اعتبريه اخ وصديق وتحاوري معاه وشوفي رايه شوبيقولج ،،، انا جيه اسوي ويا ريلي ماخبي عنه شي ،،، واذا شافني ساكته متضايجه مستحيل يخليني لازم يعرف شو سبب سكوتي وظيجتي تدرين ليش؟ لاني مهمه بالنسبة له ونفس الشي انا بعد اعامله بالمثل،،،، شاركي زوجج حتا بالتفاصيل الممله تراها حلوة بين الزوجين،،،، اتقربي من ربج وكلميه بعد صلاتج بصوت مسموع وفضفضي لربج بعد وادعي وااايد انه يغير من شخصيتج للاحسن وفكري فنفسج انتي كيف تراج انتي عارفه نفسج عدل وحاولي تتواصلين مع المقربين وتقارنين نفسج لمن اتكونين معاهم كيف ولمن اتكونين مع الغير ،،،،

**bellegirl** · 2011-03-05, 00:11

ربي يوفقج اختي

ولي عودة إذا الله أراد

**سوارة** · 2011-03-05, 00:30

**HONG** · 2011-03-05, 01:11

المثل يقول " لكل فعل ردت فعل"

ابدئي انتي بالكلام
نشي الصبح صبحي علي اهل ريلج اقعدي معاهم شويه خذي الاخبار
ممكن تقرين موضوع بجريده وتحولينه معاهم لموضوع نقاش
شوفي الاشياء المشتركه وحاولي تدخلين من هالصوب وجي بيكون عندكم اهتمام واحد
اطبخي طبخه يديده ومضمونه من النت او حد من ربيعاتج وخذي رايهم
اطلعو مره مع بعض تتمشون
لازم تعدلين علاقتج معاهم ترا عيالج باجر بيكبرون وبيدخلون معاهم ،، فاذا تميتي جي علاقتج معاهم ومعاملتهم لعيالج بتبين ،،

انتي وريلج بتمون ويا بعض ان شاء الله طول العمر ،، اكيد بيي فتره كل واحد بيمل من الثاني هاذا شي طبيعي
عشان جي بين فتره وفتره حاولي تسوين له مفاجئه حلوه ، اهديه هديه ، شوفي اذا في شي مشترك حاولو تطورونه ، اطلعو اتمشو بروحكم يوم، ويوم مع العيال لمكان يديد ،،

ابدئي هالامور شوي شوي ومع الايام بتتعودين اهم شي ارادتج انج تبين تتغيرين ، ابذلي مجهود وربنا بيوفقج
واهتمي بنفسج وبهواياتج واذا في حد شرات هواياتج خلوكم مع بعض ,,

**ح ـوؤور** · 2011-03-05, 01:25

حبيبتي لو أنتي شفتي نفسج ملـآك وآلله آلنآس بتشوف ملـآك ملـآك . .

حبيبتي لـآ تفكرين بهآلتفكير آلشكل من عند آلله وأحلى شي لمآ آلشخص يكون رآضي على نفسهـ لـآ تحسسين

آلنآس بهآلتفكير آلله يخليج عسب مآ يودون عليج شي . .

آلسمرهـ ولـآ آلبيضهـ وآلله آللي بتتزين بتطلع حلوهـ حبيبتي ودي عنج هالتفكير . .

ربي يوفقج دنيآ واخرهـ يآ رب . .

**بهلولة** · 2011-03-05, 10:27

انتي يالسه تترين من الناس هم اللي يبدون وياج
زين انتي ابداي ومدي ايدج
ابداي مثلا من المنتدى
شوفي البنات الزينات واللي ظروفها مثلج واطلبي صداقتها
افتحي قلبج لريلج
ابداي بكلمة حلوة بهدية صغير
اهل ريلج اتقربي منهم بالكلام الطيب والسؤال عنهم بالفون والهدية من فترة لفترة خاصة عمتج
وخلي الوالده تدعيلج
ترى دعواتها سهااااااااااااااام ما تخيب باذن الله
ويارب يحبب خلقه فيج
امين

**أحلا ورده** · 2011-03-05, 10:56

حبيبتي اول شي اتقربي لربج اكثر عسب اسير الضيجه ..
غلاااااي حاولي تقرين البقره يوميا .. (انا كنت شراتج بس الحمد لله من بديت اقره البقره اتعدلت نفسيتي اللهم لك الحمد )
قولي اذكار الصباح و المساء ..
تبين اتكونين اجتماعيه سولفي قولي نكت اقري مواضيع دينيه و خبري عمتج عنها الحريم الكبار يستانسن ع الدين .. لو كانت عمتج تحفظ قران قوليها عمتيه بحفظج و بعدين بسمعلج .. التغير يبدأ من الداخل .. غيري طريقه تفكيرج .. بتتغير حياتج للاحسن بفضل رب العالمين .. حمياتج حسب اعمارهن و هن شو يحبن .. كلميهن بالموضوع التي يحبنها تقربي منهن اكثر اطلعي معاهن برع .. هي مهارات بس يبالعها ممارسه و ان شاء الله بتتقنينها ..
دعواتي لج بالتوفيق ... اختج أحلا ورده

الموضوع: احس اني غريبه

أدوات الموضوع

عرض

احس اني غريبه

المزيد من آخر المواضيع من نفس القسم:

المواضيع المتشابهه

اي وحده عندها جلابيه غريبه-عبايه غريبه - الخ تسدحهم هني

مشكلة ربيعتي غريبه ومب غريبه !!

قصه غريبه