مشكلتي مب من حياتي الزوجيه مشكلتي باللي ساكنه معاي بالبيت

*** فايف ستار*** · 2011-02-20, 14:32

السلام عليكن ورحمة الله وبركاته

الحمد لله نحن صارلنا سنتين 7 شهور متزوجين وربي يدومنا مع بعض
مشكلتي مبينه من عنوانها وابي نصيحتكم ورأيكم بصراحه واذا انا غلطانه بعد خبروني

نحن ف بداية زواجنا سكنا ف بيت اهله يعني ف بيت عمتي ( وهيه خالتي ف نفس الوقت ) وعطونا غرفه صغيره ويا دوب تكفينا ولما حملت صار عندنا هم وين راح نحط البيبي حتى السرير ماله ما راح يكفي نحطه بالغرفه وقلنا حقهم نبدل الغرف لان حرمة ولدهم الكبير طلعت من البيت وغرفتها فاضيه بس قالو هذي الغرفه حق اخوه الصغير عسب نزوجه المهم باختصارنحن طلعنا م البيت ورحنا ويه حرمة اخوه وسكنا معم وطافت اول سنه بسلامه وهذي ثاني سنه وبدت المشاكل لاني ربيت ويبت ولد والحين عمره سنه و3 شهور وان حرمة اخوه عندها 3 عيال واصغرهم عمره سنتين ونص ودوم يلعبو ويه بعض وانا ربيت ولدها قبل ما اييب ولدي انا حتى يناديني ماماه واذاكر حق عيالها وهيه بالاول ما كانت تشتغل بس بدت شغل وخذت الليسن وصارت تتاخر توصل البيت عالمغرب وانا ما اشتغل لساتني قلت اربي ولدي بالاول وبعديها من يكبر راح ابدي شغل ان شاء الله ...
المهم انقلبت عليي فجأه بلا احم ولا دستور كأنها اللي يقول طلعو م البيت ما نبييكم صارت كل ما تيي م الدوام منتفخه طول الوقت وانا ااكل العيال والعب معاهم واذاكر ليهم ورغم انه عندنا شغاله بالبيت بس هم مب شغالتي شغالتها هيه وصارت لينا متقلبه بالبيت مره رايقه ومره معصبه وانا لما اروح السوق ما اشل ولدي يوم ايي البيت تقول لي تم وايد يصيح ومدري شوه طنشتها وشليت ولدي بس وربي الشاهد احس انه يوعان وبالباجر الصبح اسئل الشغاله اقول لها ولدي يصيح امس وايد تقول لي لا مدام ما اصيح ابد يالس يلعب وخبرت ريلي واستغرب وانا بعد استغربت وقالي طنشي وطنشت ومرت فترة وبعد رحت القريه العالميه وما شليته ويوم رجعت قالت لي تم يصيح ويصارخ ومدري شوه وما صدجتها وبالباجر سألت الشغاله قالت لي ابدا ما صاح بس يوم انا اعطيه ياكل قالت لي مدام انتي مالج شغل تاكليه انا يايبتنج حق ولدي وبس ومالج شغل بولدهم وعاد هنيه مووول عصبت وعصب ريلي وقلنا خلاص بنطلع عنهم قام اخوه وقال نحن نباكم بالبيت ومدري شوه وطنشنا الموضوع وقمت اشل ولدي وياي حتى لو عندي موعد بالعياده قمت اشله وياي بس امس انقلبت فجاه دشيت غرفتي اصلي واسمع ولدي يصارخ ومدري شوه وفتحت عليي الباب ودششته بالغرفه وطلعت ومن خلصت طلعت وقلت شو صاير قالت يصارخ وانا ابي هدوء بالبيت وانا طالعه من بيت عمتي عسب ابي هدوء ومدري شنو وبضربه بعد اذا صارخ قلت ليها اتحطي رهوتج ع ولدي هذا ما يفهم صغير بعده وقلت ليها تراه متعلم من عيالج طول الوقت يصارخو قالت ما تعرفي تضربيهم قلت يوم ابوهم قاعد ويسمعهم ما قال ليهم شي تبيني انا اضربهم وبعدين انا من اصبح الصبح بالبيت لحد ما تيي وعيالج يصارخو ويتضاربو بس عمري ما مديت ايدي عليهم يسد انتي تضربيهم بعصا وبعلاق الملابس عسب تذاكري ليهم ... وقامت نازعت الشغاله وقالت ليها ما ابيج تمسكي ولدهم واذا شفتي ولدهم طالع دخلي ولدي بالغرفه وقمت خبرت ريلي وظليت اصيح الحين نحن ندفع الايجار حالنا حالهم بالبيت ليج قاعد تسوي جي معانا اذا ما تبانا تقول مب كل مره تطلع علل واذا هيه تعصب وتتضايج لا ترد رهوتها عاليهال بس انا اللي سويته حق عيالها مول لا تحمد ولا تشكر ربها وشكلها اشتغلت وقبضت سياره وشاف عمرها علينا وحتى باجازتها ما تقعد بالبيت وتجابل عيالها ....

ادري طولت عليكم بس قلبي محروق من داخل والمشكله نحن ما نقدر ع ايجار بيت بروحنا وخاصة بدبي بس ما اقول غير لا حول ولا قوة الا بالله مردنا بنطلع

المزيد من آخر المواضيع من نفس القسم:

**a4nhs** · 2011-02-20, 14:39

الله يكون في عونج ياختي الافضل انج تسكنين في بيت روحك بعيده عن الهم والغم احسن لج وموفقه

**MOON_AD** · 2011-02-20, 14:42

الله ييسر امورج

**هزووفه** · 2011-02-20, 14:44

الله يعينج الغاليه .. ماشي حل غير انكم تطلعون ببيت بروحكم شكلها حرمة حميج متضايقه من وجودكم ببيتهم .. رمسيها انت وشوفي شو المشكله ليش دايم معصبه عليكم ..

**ام ميودي3** · 2011-02-20, 14:45

الله يعينج

**اخت بوحميد** · 2011-02-20, 14:48

الغلا
الله يوفقج يارب
ونصيحه لوجه لله اخذي ولدج معاج لابيضيق عليج السياره ولا شي

اخذي ماتعرفيين الناس شو في قلبهم يمكن اتضره عسب تقهركم وتطلعو

الغلا
في ابوظبي والعين اجارات ارخص عن الباقي والله يوفقج ويصلح حالكم ويسر اموركم

امسكي ولدج عندج عسب ماتحرق قلبج فيه

**الأحلام الملونة** · 2011-02-20, 14:57

المسكن مع آي أحد يجيب عوار الراس مش لأنهم موا زينين بس هذا الطبيعي الأطباع تختلف وكل أنسان يبي يرتاح

ببيت يخصة لزم تتفهمي الوضع يعني لو سكنتي مع أمك وأبوكي وأخوانك سوف يحدث نفس الشيء 00000

ووجع غلاء السكن أعلم جيدا هذا وجع ثاني بس رتبوا أموركم حتي لو تسكنوا بستديوا بس يكون حق أسرتك

أفضل من المشاكل والقهر 0000 الله يفرج همك ويقضي حوائجك 00000

**мiss.busџ** · 2011-02-20, 15:19

أحسن لكم تأجرووون شقة على قدكم ,,, بترتاحين وايد

*** ام خماس *** · 2011-02-20, 15:25

الله المستعاان .. حبيبتي الحينه الخواات يضااربن وهذا شي عاادي

مدام انكم في بيت واالحد ^^

اتفقي مع ريلج يأجر لكم غرفتين وصااله وما ضني بتطلع غاليه الشقه يوم بتكون

صغيرة ع قدكم ^_^

اريحلج انتي وريلج وحتى اخوه وحرمته .. البعد ولا ان ريلج وأخوه يخسرون بعض

عسب مشااكل يهاال وحريم !

الله يهدي النفوس ويسعدج عنووني

**C . D . F** · 2011-02-20, 15:33

لا حول ولا قوه الا باللهِ ..

\

**زم_قمر_ان** · 2011-02-20, 15:35

انتى قلتى تدفعو ايجار

يعنى مو ساكنين في بيتهااا

الله يهديهاا

هالفتره يودى ولدج ولالا تتدخلى في عيالهاااا

وقعدى في حجرتج

وربي ييسر لج بيت ترتاحى فيه

**بنت بحور** · 2011-02-20, 15:42

الله يكون بعونج ..

**تاجرة السعاده** · 2011-02-20, 16:04

روحي حبوبة استأجري شقة في الشارقه او عجمان ايجاراتهم ارخص .. واشتري راحة بالج.. وبعدين يوم تطلعين اخذي ولدج.. انا وين ما اسير اشل عيالي ويايه .. ترا محد يتحمل عيال غيره .. يصدعوني ولا يصدعون حد ويشتكي منهم..

**ملكة الاحاسيس** · 2011-02-20, 16:34

هذا الزمن لاتأمنين لحد غير الله

اما سالفه الاكل والشرب نصيحة لاتعتمدين ابداااا على اي شخص في هالموضوع صدقيني الطفل يحتاج امه

**جرح وحداوي** · 2011-02-20, 16:46

لاحول ولا قوة الا بالله...

محد فييه خيير الحيين ...

حاولي تشتغليين وتسااعديين ريلج وييبيلج شغالة تشوف ولدج وربج بيوفقكم ان شااء الله وبيفرجها عليييكم..

الموضوع: مشكلتي مب من حياتي الزوجيه مشكلتي باللي ساكنه معاي بالبيت

أدوات الموضوع

عرض

مشكلتي مب من حياتي الزوجيه مشكلتي باللي ساكنه معاي بالبيت

المزيد من آخر المواضيع من نفس القسم:

المواضيع المتشابهه

امنياتي المستحيلة . و حياتي . همومي . كل شي .اللهم اجعل همي الاخرة \ مشكلتي

مشكلتي الصحيه مأثره على حياتي العمليه ....

بنات ماعرف شو اسوي ف مشكلتي .. متعبتني ومخربه علي حياتي

مشكلتي واسرار بيتي الزوجيه