تعبت نفسيا

**دلع و وله** · 2011-02-15, 17:46

السلام عليكم ورحمة الله وبركاته ..

عندي بنت بعد أسبوع بتخلص الشهر السادس بس متعبتني وايد ماترقد وتعودت ترقد من بعد الساعة 2 بالليل ولين الفجر عادي تقوم أكثر عن 3 مرات والله تعبت بالساعة الوحدة تقوم أربع مرات تعبت نفسيا كيف أنظم رقادها للعلم سويت إلها كل شي علشان أعودها على الرقاد من وقت مب نافع وياها أي شي
أنا أرضعها طبيعي وصناعي وبالليل علشان ترقد أعطيها صناعي وبعد ماينفع

أبغي مساعدتكم لأني صدق تعبانه

المزيد من آخر المواضيع من نفس القسم:

**أم أتافي** · 2011-02-22, 11:59

نفس بنتي الله يحفظها كملت السادس وبعدها
شبعتها وما شي فايده بس أحس بعدهم ما يتنظم رقادهم بها الوقت يمكن
بعد العشر شهور تقدرين تتحكمين برقادهم..........

**::ملاك::** · 2011-02-22, 17:32

شوفي أختي،، أول شيء،، شبعي البيبي عدل،، يعني لو بترقدينها الساعة 10،، الساعة 9:20 عشيها سيريلاك وخليه شوي غليئ وبعدين شربيها ماااي،، لأن السيريلاك يعطش،،
وعطيها الحليب و خليها ترقد،،
ثاني شيء لا ترقدينها من بعد الساعة 6،، خليها واعية الين الساعة 10:30 بعدين رقديها،، أول قترة بتتعب،، بس الين تتعود على هالجدول،،

**hamoudmam** · 2011-02-26, 16:54

جربي تخلي أخر رضعة ألها شاي الأعشاب "ميلوبا" بتحصلينه ف الجمعية و الكارفور.
فيه بعد عشبة أسمها "اللويزة" بتحصلينهاعند العطارين اللي ف السوق الإيراني بالشارجة (تفورين كلاس ماي و تحطين داخله خمس ورقات من هالعشبة عشر دقايق و تصفين الماي و ضيفي عليه سكر نبات و تعطينها تشربه بالمرضعة بالليل كأخر رضعة) تريح الأعصاب حق الياهال و حق الكبار و مهدئة وايد زينة....
إذا ما حصلتي العشبةعطيها بس شاي ميلوبا مال الأعشاب......
شربة الشوفان بعد وايد زينة مهدئة و تشبعها إذا تعطيها ألها كعشا( فوري شوية شوفان بالماي مدة ربع ساعة مع شوية ملح وعقب ضيفي شوية حليب طبعا حليب من صدرج أو الحليب الصناعي اللي هي تشربه خليها عالنار خمس لين سبع دقايق بعد و برديها شوي و حطيها ألها ف المرضعة مع توسيع "النيبل"-الخرم اللي ف المرضعة-. ممكن ثاني يوم تسوي ألها شربة السميد بنفس الطريقة......
إذا فيح حليب لا تعطيها صناعي لأنها الحين محتاجة بس ثلاث رضعات ف اليوم.....
وطمنينا عليها

**النرجس** · 2011-02-26, 20:28

الله يعينج

ان شاء الله البنات يفيدونج

**صمت الغلا** · 2011-02-26, 20:40

اول شى عوديها تنام الظهر ومن بعد العصر ما ترقد واكليها زين قبل لاتنام سيرلاك مثلا وفي شى مهم وايد سبحيهاوخليها ترقد واحلام سعيدة لج

**روح السلطان** · 2011-02-26, 21:17

مووفقه

**عروس كلاسيك** · 2011-02-26, 22:17

آآآآآآآآآآآآآآآآآآآآآآآآه نفس ولدي خلص الخامس ودش في السادس بس الرقاد عذاااااااااااااااااااااب

انا تعبت يرقد الساعة 1 او 2 لين 7 الصبح....بس ينش في الساعة الوحدة ثلاث اربع مرات...واللي يقهر انه ما بيرقد الا بالقماط وفي الساعة الوحدة يتبطل القماط 3 مرات ويظهر ايديه ويصيح ارجع اشله واقمطه ولين يرقد ...بس لاعت جبدي بالرغم من اني سويت كل شيء...شبعته اكل وسبحته وكل شيء بس بيرقد ساعتين متواصل عقب نفس الموال ما في فايدة

ما اعرف كيف اتخلص من عادة القماط هذي ومتى بتعدل ارقاده

الله يعينا

**دلع و وله** · 2011-02-27, 01:14

أنا بنتي ما تحب حتى لحاف عليها وبس تبي تنقلب على بطنها وهالشي مايد يخوفني بس الله يصبرنا عليهم

الموضوع: تعبت نفسيا

أدوات الموضوع

عرض

العرض المتطور