من جديد أخواتي تطبيق متميز ورائع لخبز الخمير السح(من الحين أقولكم الصور تجوع)

**شكولاتةuae** · 2011-02-15, 11:26

صباح الخير أخواتي . من فترة كنت منزلة موضوع خبز الخمير لكن للأسف الصور اختفت . ووايد استفسارات توصلني ويطالبون بإعادة تحميل الصور لانها تكون أوضح لتوصيل الفكرة عسى أن تكون خالصة لوجه الله تعالي وعون لكم في اتقان خبز الخمير بالسح مثل ما نسميه في الإمارات أو (بالتمر). بإسم الله نبدأ

خبز الخمير بالطريقة التراثية الصحيحة

استخدمت أكواب القياس للحصول على وصفة مظبوطة حتى في كمية ماء العجن . فإنشاء الله ما راح تلاقون صعوبة في اتقانها بإسم الله نبدأ بالمقادير

2 كوب طحين رقم 2

1 معلقة كبيرة خميرة فورية
1ملعقة طعام حليب بودرة
¼ ملعقة طعام ملح

½ كوب تمر او مثل ما نسمية (سح) نوعية ممتازة ويكون منزوع النوى .

أقل من ¼ كوب سكر او فنجان سكر

قليل من خيوط الزعفران

طريقة التحضير بإسم الله نبدا

في وعاء عميق نحط التمر

وراح نحتاج كوب ونص ماء حار مغلي نعاير الماي في كوب القياس

ونضيفه على التمر

ونحرك المزيج بواسطة ملعقة

بعدين نخلي المزيج على جنب لحد ما تهدى الحرارة شوي ويستوي السح لين .

بعد حوالي عشر دقائق نخفق السح بالخفاقة لتفتيت الاجزاء المتبيقية

يتبع عزيزاتي

المزيد من آخر المواضيع من نفس القسم:

**شكولاتةuae** · 2011-02-15, 11:32

وراح يصير شكله بهذي الطريقة

بإستخدام مصفاة دقيقة نصفي خليط التمر والماي

وهني عزيزاتي بعد ما تصفى الماي وتمت القشور

باستخدام ملعقة طعام قلبي الخليط لتنزيل الباقي من الماي وبظهر الملعقة اضغطي على الخليط بقوة لحد ما تنزل عصارة السح او الخليط الغليظ الصافي وفي الصور أدناه الطريقة

لحظوا عزيزاتي على طرف الملعقة هذا هو المطلوب من الضغط بالملعقة على الخليط لاني هذا المزيج فيه كل نكهة السح وهو الي راح يعطي الخبز النكهة المميزة جدا واللذيذة.

وهذي القشور الي تمت لحظوا كيف كان المزيج والحين هذا عبارة عن القشرة الخارجية لحبات التمير

وهذا الخليط النهائي عزيزاتي

نضيف السكر

خيوط الزعفران

الحليب البودرة

واخيرا الخميرة الفورية

ونظيف عزيزاتي الطحين دفعة وحدة لاني نحن متأكدين من المعايير بدقة

يتبع عزيزاتي

**شكولاتةuae** · 2011-02-15, 11:36

نبدأ نعجين عزيزاتي وفي الصور أدناه خطوات العجن بدقة لاحظوا

شكل العجين بعد الانتهاء من العجن لاحظوا أحبتي كيف العجينة دبقة ولزجة هذا هو القوام الصحيح لعجينة الخمير سواء بماي السح او بالماي العادي

لاحظوا كيف تشد ولزجة عزيزاتي

لكن في نفس الوقت اذا شليتيها من الصحن ما راح تلزق او تعاند وهذي المرحلة نحصل عليها من خلال العجين مدة لا تقل عن 5 دقايق بدون اضافة طحين او ماي يعني وهي لزجة عزيزتي اعجنيها .

وهذي صور اضافية لتوضيح اعمق

عزيزاتي لحظوا كيف العجينة اذا لمستها تلزق

بعد الانتهاء من العجين توضح في مكان دافئ لمدة ساعة ونصف إلى أن تختمر وفي الصورة أدناه بعد الاختمار

لاحظوا عزيزاتي الفقاقيع على سطح العجينة في الصورة أدناه.

مرحلة خبز الخمير (أهم مرحلة)

لمرحلة الخبز عزيزاتي راح نحتاج إلى العلبة والطابي الصغير مالها طبعا نحن في بينتا لحد الحين نستخدم الطريقة هذي لانها تعطي طعم غير طبيعي لخبز الخمير وتوصلج لنكهة والطعم الأصلي القديم لهذا النوع من الخبز.

يتبع أحبتي

**شكولاتةuae** · 2011-02-15, 11:37

وراح نحتاج أيضا عزيزاتي إلى صينية مفرودة وشوية طحين وبيضة وحدة

وفي صحن صغيرة ماي

نبدأ برش الصينية بالطحين بهذي الطريفة

وبعدين نبدأ بتقطيع العجين على شكل دوائر عزيزاتي لاحظوا العجينة كيف بعد ما اتخمرت بعدها لزجة لكل لما نمطها تطلع من الصحن عادي ما تم لازقة.

وهنا عزيزاتي بعد ما قطعت ثاني قطعة لحظوا كيف قوام العجينة تلزق لكن نقدر نتحكم فيها

وهني قطعت العجينة على شكل دوائر وهذا المقدار عزيزاتي ممكن يسويلج 4 خبز وسط و1 صغيرة . بس نحن في البيت نحب الوسط أكثر شي .

لاحظوا كيف عزيزاتي خيوط الزعفران واضحة فيها وراح يعطي طعم رائعة ونكهة مميزة .

نفرد أول كرة عجينة عزيزاتي بهذي الطريقة

وأنتبهوا عزيزاتي نحرص أن لا يقل سمكها عن 1.5 سم .

بعدين نبلل وجه العجينة بالماي بهذه الطريقة

ونلزقها على الطابي الخاص فيها بهذي الطريقة ونكون مشغلينه على اعلي حرارة مدة 5 دقايق قبل ما نبدا وعلى طول ندهن السطح بالبيض المخفوق كما هو موضح أحبتي تحملوا على أيدكم لاني النار راح تكون عالية. وبعد أقل من دقيقتين بتلاحظين الفقاعات بدت تتكون على سطح الخبزة.

بعد ما تلاحظين الفقاعات اجلبيها بهذي الطريقة

هني عزيزاتي أول ما انتفخت يعني بعد حوالي دقيقتين من القلب لاحظوا كيف منفوخة لكن بعدها بيضه نرجع نجلبها لحد ما تحمر

وهني بدات تكتسب اللون الذهبي عزيزاتي وانتبهوا لانها ما تطول ابدا يعني على طول تحمر ماشاء الله

يتبع أحبتي

**شكولاتةuae** · 2011-02-15, 11:39

وهني بعد ما احمرت بشكل نهائي عزيزاتي لاحظوا كيف اكتسبت اللون المحبب والمعروف للخمير وبعدها منتفخة .

الحين بواسطة الملعقة المسطح الطويلة نشل الخبزة ونحطها في مله .

وهذا شكلها من تحت عزيزاتي ومثل ما قلتلكم انتبهوا جدا لانها ما تاخذ وقت على طول تحمر ماشاء الله

نكمل باجي كور العجينة الي في الصينية

واترككم مع الصور النهائية للخبز بعد الإنتهاء اتمنى تحوز على رضائكم احبتي

والمميز في الخمير الناجح انه ينفتخ وتقدرين تفتحين الخبزة لاحظوا احبتي في الصور أدناه كيف تقدرين تفتحينها مثل الخبز اللبناني العادي.

ولاحظوا كيف من الداخل هشه جدا جدا جدا جدا جدا كأنها كيك على قولة اخوي^_^

اتمنى يكون الخبز حاز على رضائكم عزيزاتي

^_^ وعندي همسه بسيطة أقول للاخوات الي دايما يمرون على مواضيعي ويرفعونها بدعوة حلوه . تسلمون وهذا من ذوقكم العالي والله يجعه في ميزان حسنانكم.
وللأخوات الي يتواصلون وياي برسالة خاصة بدون كتابة الرد في الموضوع أقولهم (حياكم الله بأي وقت).
والأخوات الي يمرون مروم الكرام أقولهم (دعوه حلوه بظهر الغيب منكم تكفيني )

مع محبتي
شيف شوكلاتة

**أم خالد الحلو** · 2011-02-15, 11:53

ما شاء الله
مبدعة ^_^

بس ما احب عجاين الفرد .. ما عندي صبر للاسف في هالامور ^_*

ممكن أسوي العجينة بس بخليها ولازم أدور عقبها على حد يفرد وياريت حد يرضى خخخخخخ

**amaha** · 2011-02-15, 11:56

ربي يوفقك دوم اختي بصراحه انا الحين بدوم من اول مادوامت وانا بس اشوف طبخاتج والان انا حب الطبخ وماشاء الله عليج طريقتج في الشرح سهله وايد تسلم ايداج وربي يحفظج من كل شر اختج مها من قطر

**mallak24** · 2011-02-15, 12:10

ما شاء الله عليج عيني عليج بارده

**شكولاتةuae** · 2011-02-15, 12:12

المشاركة الأصلية كتبت بواسطة أم خالد الحلو

ما شاء الله
مبدعة ^_^

بس ما احب عجاين الفرد .. ما عندي صبر للاسف في هالامور ^_*

ممكن أسوي العجينة بس بخليها ولازم أدور عقبها على حد يفرد وياريت حد يرضى خخخخخخ

تسلمين اختي ام خالد الحلو على مرورج وردج . أفا عليج عطيني مس كول ^_^ وأنا بي بفرد لج العجينة . ما أدري ليش أنا أحب العجائن

**شكولاتةuae** · 2011-02-15, 12:15

المشاركة الأصلية كتبت بواسطة mallak24

ما شاء الله عليج عيني عليج بارده

تسلمين عزيزتي على مرورج .

**am mayd** · 2011-02-15, 12:20

الله يعطيج العافية ان شاء الله وتسلم ايدج والصراحة انا جربيتها الطريقة وسويتها على جدر الخمير الكهربائي وكانت حلوة بس اشويه خفيفة الخبزة لاني حليتها زيادة وهاذي تجربة اولى لي وان شاء الله الثانية اتكون احلى .

**شكولاتةuae** · 2011-02-15, 12:26

المشاركة الأصلية كتبت بواسطة amaha

ربي يوفقك دوم اختي بصراحه انا الحين بدوم من اول مادوامت وانا بس اشوف طبخاتج والان انا حب الطبخ وماشاء الله عليج طريقتج في الشرح سهله وايد تسلم ايداج وربي يحفظج من كل شر اختج مها من قطر

تسلمين الغلا على إطرائج ومرورج هذا من ذوقج الرائعة أخيتي ^_^

**شكولاتةuae** · 2011-02-15, 12:30

المشاركة الأصلية كتبت بواسطة am mayd

الله يعطيج العافية ان شاء الله وتسلم ايدج والصراحة انا جربيتها الطريقة وسويتها على جدر الخمير الكهربائي وكانت حلوة بس اشويه خفيفة الخبزة لاني حليتها زيادة وهاذي تجربة اولى لي وان شاء الله الثانية اتكون احلى .

مشاء الله عليج عزيزتي طبقيتها . أكيد انشاء الله في المرات القادمة راح تكون أحلى وأحلى . تسلمين على مرورج الرائع .

كل التقدير

**الرزينـــــــه** · 2011-02-15, 12:46

ناااايس ..
تسلم ايدج حبيبتي ^^

**ام شموه** · 2011-02-15, 14:22

مشالله عليه الله يعطيج العافية

الغالية

الموضوع: من جديد أخواتي تطبيق متميز ورائع لخبز الخمير السح(من الحين أقولكم الصور تجوع)

أدوات الموضوع

عرض