ابا رايكم بصراحه

**za3franah** · 2011-01-17, 16:08

السلام عليكم ورحمة الله وبركاته

ابا اطرح عليكم قضيه

وابا الكل يشارك .. ويقول رايه سواء كان مع او ضد

زواج المواطنات (من اصل وفصل) من رجال
(عربي، بدون، هنود، ايرانيين، .. الخ)

والماده (حالة مادية الزوج) تكون شبه معدومه ..

انا عن رأيي شخصيا

انا ارفض فكرة الزواج رفض تام

لأسباب كثيره منها

1) دولة الامارات دولة قبليه .. تشوف الاصل والفصل في امور كثيره .. ما يهمها الفلوس (في بعض الشعوب) بس يهمها القبليه اكثر .. لانه الاصل يلعب دور ..هاي من الناحيه القبليه ..
اما من الناحيه الدينيه .. ففي حديث شريف لرسول صلى الله عليه وسلم يقول (تخيروا لنطفكم وانكحوا الأكفاء وأنكحوا إليهم) والشطر الثاني ما جاء في حديث آخر، وفيه: "وانظر في أي نصاب تضع ولدك فإن العرق دساس" أخرجه ابن عدي (6/178)
وعن حقوق الطفل قبل الولاده .. ومن اهمها هي حق الطفل في اختيار أم صالحة له .. يعني حتى الام لازم تختار من يكون الاب في نفس الوقت

2) طبعا الطفل ياخذ جنسية الاب .. يعني لو لا سمح الله .. سفروا الاب لاي سبب كان .. الولد غصب عن الام يروح مع الاب .. الا اذا كان تحت (7) سنوات ..بعد الـ(7) سنوات .. تسلم على ولدها خلاص بيروح مع الاب .. هذا اذا ما استغنت عن وجودها في الامارات وتروح مع الزوج

يعني انا اسفه جدا لاني فتحت هالموضوع .. يمكن كثير من الحريم ماخذين زوج غير مواطنين (او غير من مجلس التعاون الخليجي) بس هاي قضيه لازم اعرف اسباب تخلي المواطنه تبهذل عمرها وتبهذل عيالها معاها علشان هالزواج .. وبعضهن .. يعاندن الاهل والقبليه كلها علشان هالزواج

هل هم يحبون الزوج .. هو حب دخلوهن الققص الذهبي لهدرجة؟؟ انا ما اقلل الجنسيات الاخرى .. ولا اني اقلل من احترامي لاي شخص
بس قضيه احسها انتشرت بين البنات
واسمحوا لي جان غلطت بحق بنيه .. بس الله يخليكم ابا نقاش نظيف وهادي

المزيد من آخر المواضيع من نفس القسم:

**super lady** · 2011-01-17, 16:18

انا .......... ضد وبقوة

السالفه مش زواج وبس

والعيال..أمانه برقبتنا.. ومستقبلهم أماااانه

الارتباط لازم يكون بالعقل وبالقلب..

مو بالقلب وبس

**جرح وحداوي** · 2011-01-17, 16:24

انا مع الاخت ...

بس صدقووني الضروف بعض المراات تحكم..

اعرف وحدة كاانت معرسة من موااطن وياابت عياال وبهدلها وماخلااها تسوى بييزة واطلقت بعد فضااايح..وبسبة ضروفها الصعبة وتربيهالعياال اللي عقهى علييها اطرت تستر علي نفسها بزووج زلمة وعااشت معااه صاانها وصاان عياالها...

انا مع فكرة مجتمعنا ..بس والله الضرووف لها دور بنسبة 50 % والله المستعاان..

**دودوالحلوة** · 2011-01-17, 16:25

قال رسول الله(صلى الله عليه وسلم) اذا اتاكم من ترضون دينه وخلقه فزوجوه صدق رسول الله
موضوعج صح لكن انتي نظرتي للامور من ناحية وحدة.. لو وحدة تزوج مواطن من اصل و فصل و نسب و عقب استوت خلافات و قيل وقال تظنين ان الولد بيكون مصيره احسن؟؟
لو تزوجتي مواطن و نفس الشي ابن حسب و نسب تتوقعين انه ما يغلط و بيكون ملاك طاهر؟؟ يمكن الشخص الثاني بيكون احسن منه مليون مرة ... مثل ما ذكر فالحديث الشريف الدين و الخلق هم اهم شي فالريال الحديث ما ذكر من اي قبيلة او من اي بلد لأن فالنهاية كلنا بشر و كلنا عيال تسع... ما يستوي نقول هذا ولد قبيلة انا موافقة و هذا من قبيلة اصلها كذا او كذا او كذا يعني ما نباه او انه مب زين على العكس
وايد رياييل عيال قبايل سوو العجب فحريمهم بس في وايد منهم بعد على خلق ودين.. حنا ما نروم نعرف شو بداخل كل انسان و لا الظاهر اللي يحكم عالباطن
ويقولج المثل : يخلق من ظهر العالم فاسد

**خلاص يعني** · 2011-01-17, 16:59

انا بصراحة ضد كلام الاخت

الرسول صلى الله عليه و سلم في حديث قال بما معناه من جاءكم من ترضون دينه و خلقه فزوجوه
يعني اهم شي الدين و الخلق و اخر شي الحسب و النسب

شو فايدة الحسب و النسب و الولد ما ملتزم بصلاته و اخلاقه فالقاع
وايد ناس خذوا من برع و الحمد لله مافيه احسن عنهم ووايد ناس ماخذين من حسب و نسب ولاعنين خيرهم و خير اهلهم فوقهم بعد

و بعدين هذا نصيب و القدر من رب العالمين هو اللي يختار لنا اللي فيه الخير
انا اعرف ناس بحكم سكني فقرية تابعة لامارة الفجيرة و بما انه مدحاء منطقة تابعة لعمان
اعرف ناس ماخذين عمانية و الحمد لله عايشين عيشة حتى اهلهم ما كانو يتوقعونها
و ماقاصرنهم شي اهلهم كلهم عندهم و مدرسة و يروحون و كل مقومات الحياة الكريمة متوفرة لهم و لله الحمد

و استغرب من تفكير بعض البنات و الاهل
ما بيخطبون حق ولدهم بنت فلان ليش؟؟؟؟؟؟؟
امها هندية و الا مصرية
انزين شو يعني هالشي ولدكم بياخذ البنت ما بياخذ امها
و مداكم تبون البنت لانها متربية تربية صحيحة فامها الوافدة هي اللي ربتها على هالشي
الله يهديهم و يهدينا يارب

السموحة جاني طولت

**دانه الكون** · 2011-01-17, 18:52

قال رسول الله(صلى الله عليه وسلم) اذا اتاكم من ترضون دينه وخلقه فزوجوه صدق رسول الله
البعد عن الدين
و هذا سبب من اسباب الفساد الاخلاقي المنتشر في المجتمعات الاسلاميه

**Be careful** · 2011-01-17, 18:57

السلاام علييكم ورحمة الله وبركاانه ..
اناا الصرااحه مع وضد ع حسب الظروووف ..
والنقااط اللي ذكرتيها عندي تعلييق بسييط علييهم ع نقطه الاولى ..

1) دولة الامارات دولة قبليه .. تشوف الاصل والفصل في امور كثيره .. ما يهمها الفلوس (في بعض الشعوب) بس يهمها القبليه اكثر .. لانه الاصل يلعب دور ..هاي من الناحيه القبليه ..

انتي متأإكده من هالكلاام .. !!والله اول شي ايي ف باال اهل المعرس والعرووس المهر ..
يووم وحده بييها حتى ولو موآآطن قاال بيعطيها مهر قيمته 50000 ترفض ع طووول
تباا 100000ولا 20000..!!أهم شي عند بعض العوآآايل الامـآرآآتيه وخااصه قوم المظآآهر المهر
ويكوون فوووق فوووق والمعرس الله يعيينه لو صدق كاان يباها ومتعلق فييها ..!!

اماا بااقي الكلاام راي من راااي الاخت "خلاص يعني" من نااحية الاصل والفصل ..

**Maryam22** · 2011-01-17, 18:58

بالنسبة لي شخصيا.. أرفض خوفا من مصير عيالي فالمستقبل..

اباهم يعيشون بنفس الهنا الي انا عشت فيه مابا البهدله الي اشوف عيال المواطنات عايشين ..

سبق وخطبني واحد بدون والريال ماعليه رمسة.. كلمة زين شوي عليه.. ورغم ان بدون مكمل دراسته ويشتغل في دائرة حكومية ومأمن حياته.. بس ماحبيت اعرض نفسي لمشاكل انا في غنى عنها

وفديتها ربيعتي تفهمت الموقف (لأن اخوها) .. وما زعلت بالعكس حضرت عرسي وباركتلي وحضتني بعد..

بس شرات ما قالو الخوات في أحيان الظروف تحكم وما نعرف الأسباب للي سلكو هالطريق

**قطرية من قلب** · 2011-01-17, 18:59

طول عمرنا احنا يالعرب بنتم عايشين في العصر الجاهلي ... عصر القبلية .... الحمدلله والشكر ... عشان جذي بنتم مثل ما احنا عمرنا ما بنتطور ...

**Bonboon** · 2011-01-17, 19:01

لا فرق بين عربي و لا عجمي الا بالتقوى و العمل الصالح

مب كل الاماراتين عندهم الفصل رقم 1

اهم شي الاخلاق و يكون اماراتي و يحط الوحده بعيونه

**Haruna** · 2011-01-17, 19:07

اختي المشكله عندنا مب فالنسب والحسب والقبيله

هذا مب سبب الرفض للجنسيه الاخرى .. هذا مب عذر لنا لانه هالشي جداً تافه ونادر الناس تهتم

حتى الاخلاق والدين .. مب هي السبب لرفض الجنسيه الاخرى

يعني الحين انتي لو ياج واحد مواطن اخلاقه مب اوكي بترفضينه, بس مواطنه غيرج ممكن توافق! بحجة انه خاطرها تعرس, تبا تطلع من عند اهلها تبا تفتك من الدراسه او اي شي ثاني

يعني مب هذي المشكله والمشكله مب مشكلتكم حتى

المشكله مشكلة قانون, وسياسات .. المشكلة العيال اللي حتى لو ابوهم مب عايش فدولته, بيعتبرونه منها ما يعتبرونه من المكان اللي انولد فيه او الام اللي انولد منها

روحي شوفي كندا! شوفي امريكا!

اي فرد ينولد ع ارضها له الحق يحمل جنسيتها, ولا على اي اساس احنا عندنا جنسيه

المشكلة فالامارات ودول الخليج عموماً مستصعبين هالشي لسبب واحد

وهو انه المواطن عندهم له امتيازات, هالامتيازات ما تنعطى بلدان برع

مثال التعليم والطب

برع تبين تدرسين تدفعين من دم قلبج حتى لو مواطنه, هنيه عندنا المواطن له امتيازات ولو انها قليلة بس احنا تعودنا عليها وعلى وجودها وصعبه نستغني عنها

انا من وجهة نظري .. العلم والطب هذيلا اهم شي فالحياه, ولازم كل دوله تأمن هالشيين لكل المقيمين على ارضها سواء من مواطنيها او من مواطني الدول الاخرى وتتكفل كل حكومه انها تدفع المبالغ المطلوبه عنهم .. الا اذا حالة الدوله اقتصادياً سيئه جداً مثل فلسطين, السنغال, غينيا وجنوب افريقيا

**سوارة** · 2011-01-17, 19:13

**classic ladyy** · 2011-01-17, 19:37

و عليكم السلآم و رحمة آلله و بركآته ،

و آلله يـآ اختيه هذي حرية شخصيه ،

هي الي بتتزوج و بتعيش ويـآه ، !

و ليش ترمسين عن هالجنسيآت بكل قزز و اشمئزآز ؟

لدرجه انج شككتي بحبهآ لزوجهآ حلاآلهآ ؟ !!

أو انج تكلمتي انهآ حآبتنه قبل الزوآج بطريقه غير مبآشره ، !

آلله مآ جبر الإمآرآتيـه تتزوج إمآرآتي ،

و الحديث الي يبتيه ، حديث مب صحيح . . .

و هذآ الدليل . . . /

سئل العلامة عبد العزيز بن باز ـ رحمه الله ـ

س/ هل هذا حديث صحيح: تخيروا لنطفكم فإن العرق دساس؟

ج/ بسم الله الرحمن الرحيم، الحمد لله والصلاة والسلام على رسول الله وعلى آله وأصحابه ومن اهتدى بهداه أما بعـد: فالحديث المذكور نص أهل العلم على أنه غير صحيح .

،

و لو كآن هالكلآم صحيح ،

جآن مآ اتزوج سلمآن الفآرسي . . .

و جآن الشيوخ مآ زوجوآ بنآتهم لـ حكآم دوله خليجيه ،

،

أنـآ مب ضد الإمآرآتيـه تتزوج أي انسآن في هالدنيـآ ،

الي يهمني عقب هالزوآج ،

أهم شي اتكون عآرفه شو بتكون أتبآع هالزوآج من النآحيه القآنونيـه ،

المعروف انه الي تتزوج وآفد عآيش في الإمآرآت ،

اتكون حيآتهآ تختلف عن الي عآيشه مع زوجهآ في بلآده ،

لأنه القوآنيـن صعبه اشوي عليهآ ، كون عيآلهآ بيتعآملون معآملة الوآفد ،

مآ فيهآ شي اذآ الإمآرآتيـه خذت خليجي ، و عآشت ويآه في بلآده ،

و خآصةً عآدآتنآ و تقآليدنـآ وآيد متشآبهه ،

و فرة حصآه و تقدر اتزور أهلهآ بأي وقت ،

،

و مب صحيح انه زوآج الإمآرآتيـه مربووط بـ سآلفة تأخرهآ بالزوآج ،

لأن وآيد إمآرآتيآت ، خطبوهم وآيد شبـآب ،

بس النصيب آلله كآتبنه من فوق سبع سمآوآت ،

و آلخيره فيمآ اختآره آلله ،

،

أمآ الجنسيآت الثآنيـه ،

يكون من بلآد الشآم ، ايرآني ، أفغآني ، بآكستآني ،

أردد انه كيفهآ ، و هي حرية و هذي حيآتهآ. . .

مع اني أنـآ عني شخصياً ، مآ أرضى اتزوج وآحد خآرج ايطآر الخليج ،

،

يعني بختصر ردي و بقول ،

أنآ مب ضد الزوآج ، اذآ كآنت بتتزوج و بتعيش في بلآده . . .

و آلله يوفج آليميع ، !!

و تسلمين على هالطرحْ آلحلــوو . .

**jwelle** · 2011-01-17, 22:53

طبعا ضد

**منى الفقى** · 2011-01-17, 23:00

انا مع كلامك

الموضوع: ابا رايكم بصراحه

أدوات الموضوع

عرض

ابا رايكم بصراحه

المزيد من آخر المواضيع من نفس القسم:

المواضيع المتشابهه

رايكم يهمني...بجامات ام امنة..اتفضلوا وقولوا رايكم بصراحه

شو رايكم بالحنااا ؟؟ رايكم بصراحه

شو رايكم بصراحه ^_*

شو رايكم بصراحه