ما في مشكله ما لها حل،، قصة زواجي

**عشق_الإمارات** · 2010-12-30, 15:04

السلام عليكم ورحمة الله وبركاته

قصتي بدات من قبل 8 سنين من اول يوم زواج.. ومن فتره وانا ابا اكتب لكم قصتي وخاصة يوم اقرا مشاكل العضوات في المنتدى لكن مشكلتي ما اعرف اعبر ومش شاطره في الكتابه والحين تشجعت ورتبت افكاري وكتبتلكم قصتي لعلني افيد فيها خواتي العضوات،، ونصيحتي لكل زوجه مقهوره او عندها مشاكل زوجيه (الصبر ثم الصبر) لأن اكيد من بعد الصبر فرج باذن الله

والحين خلوني ابدا بقصة معاناتي اللي بدت من اول يوم زواج ..............

دخلت علي امي تقولي في ناس ياين يخطبونج وابوج سأل عن الريال والكل مدح فيه والريال مقتدر وما عليه قاصر وأهم شي انه ريال مصلي وقايم بأهله وانا كنت قبلها سامعه السالفه من عند اختي المعرسه بس سويت نفسي ما اعرف شي،، وما طلعت امي من عندي الين ما خذت الموافقه من عندي،، وكان هذاك الوقت عمري 18 سنه وكنت اول سنه كليه

وطبعا انا خليت نفسي طبيعيه وثقلت عمري عند امي مع اني كنت من داخلي طايره من الفرحه لأني بكون اول وحده في شلتي تعرس،، وكنت انا تقريبا وحيده فالبيت لأن خواتي الثنتين اللي اكبر عني متزوجات وكانت عندي اخت اصغر عني وكانت فترتها في كريد 8 واخواني اثنين ولا واحد منهم معرس فالبيت كان ممل،، المهم مرت على السالفه اسبوع وانا اتريا اعرف شو اليديد في السالفه وليش وليش..... الخ

على الأسبوع الثاني يات امايه تقولي ترى ام الريال اتصلت وتقول أنهم يبون اييون عسب يشوفوني ويتعرفون علينا وفي نفس الوقت الريايل يتفقون على المال والعرس والأمور الثانيه،، في البدايه استغربت كيف يبون يتفقون على المال والمعرس اساسا ما شافني وانا بعد ما شفته ولا كنت اعرف شكله بس رد امي اونه الريال يدور على البنت النظيفه وعلى السمعه الطيبه،، انزين بس انا بعد ابا اشوفه يعني ممكن يكون مش حلوو وجيكر وبعدين يطيح في جبدي لكن هذي الأسئله كلها اختفت مع فرحتي بفكرة اني بعرس وبيكون عندي ريال يدلعني ويوديني وياخذلي اللي اباه

ويا اليوم الموعود يوم الخميس وعالساعه 8 المسا وصلوا الجماعه بيتنا وانا وخواتي وبنات خالتي وعمي طبعا مرتزين عند الدريشه اللي تطل على الحوش وطبعا سوينا اسكان على الريايل اللي ادخلو الميلس،، وكل وحده تخمن من عندها منو فيهم المعرس،، يلسوا الحريم مع امي وخالاتي وحريم الأهل وبعد ساعه دخلت انا عالحريم وسلمت عليهم ويلست وياهم وقعدت اسولف مع خواته ومن اول يوم حسيت ان اهله ناس طيبين وخواته في منتهى الذوق مع انهم ناس ما شاء الله عندهم خير بس ناس في قمة التواضع،، ونحن يالسين شوي الا يا اتصال لأم المعرس واسمعها ترمس وتبارك وبعد ما سكرت تقول لأمي وللحريم مبروكين اتفقوا الريايل وقامت ام المعرس تسلم على امي والحريم يسلمون على بعض ويسلمون علي ويباركون لي وانا مستغربه من اللي يصير،، كيف يتفقون وهو ما طلب يشوفني وانا ما شفته !!!!!!!!!

المهم بعدها قامو الريايل وتعشوا وبعد العشا ياتني امي تقولي قومي ادخلي الغرفه اللي عند ميلس الريايل لأن المعرس يبا يشوفج!! قمت وانا اقول في خاطري تووو الناس،، المهم عدلت نفسي ودخلت هناك مع امي وخالة المعرس،، شوي والا بو الشباب داخل مع اخوي يلسه اخوي على الكرسي اللي مجابلني على طول،، هو من دخل انا ما شفته بس سمعته يوم يسلم وكل حين خالته تقوله شوفها عدل وترد تقولي يا فلانه ارفعي راسج وشوفي ولدنا وتقريبا ثلاث مرات وانا ارفع راسي واطيح عيني في عينه وارد انزل راسي،، انتهى اليوم على خير وكنت هذيك الليله اسعد مخلوقه يمكن في العالم حسيت اني قلبي فز يوم شفته واني حبيته من اول نظره،، وهو ما شاء الله عليه جميل وشخصيه وكل المواصفات اللي البنت تتمناه موجوده فيه

وبعد اسبوع كان موعد الملجه وبعدها باسبوعين اتفقنا اننا نسوي حفله الملجه،، ام المعرس قالت ان المعرس ما يبا حفله كبيره يباها حفله صغيره وعائليه،، وفعلا صارت الحفله والجماعه موول ما قصروا وكل شي نباه يوصل لنا وزياده لدرجة ان الكل كان حاسدني على ريلي واهله،، والله يا خواتي ان عمي ابو ريلي زاد على مهري مبلغ من عنده هديه لي عسب بس ما يقصر علي شي (فديت عمي يا ربي)

ويوم الملجه وانا قاعده على الكوشه ييت حزة دخول المعرس،، دخل مع ابوه وابوي واخواني وانا كنت خايفه وفي نفس الوقت طايره من الفرح لأنه بيمسك ايدي بحس فيه قريب مني وخاصة اني ما تلاقيت معاه من بعد النظره الشرعيه وحتى ما تكلمت معاه في الفون،، طلعو الريايل ويته اخته تقوله بوس راسها وفعلا باس راسي وسلم علي وانا منزله راسي من المستحى وخذت اخته ايده وايدي واشبكتهم ويا بعض وانا طول القعده على السايلنت وهو نفس الشي،، وخلصت الملجه بعد سوالف تلبيس الشبكه وقص الكيك وشرب العصير... والخ ،، وطول القعده ما كان بيننا كلام الا كلمات عابره قليله

وفي نفس اليوم وبعد ما خلصو الأهل العشاء يت ام المعرس تقول انهم بينزلون لنا العشا في الميلس،، دخلنا الميلس وكان العشا موجود،، واذكر يومها ما قدرت اكل شي غير الحمص وشوية هريس واذكر هو بعد ما كل غير شي بسيط،، وكل حين كان يقولي كلي لا تستحين،، وكلامنا كان كله اساله يسالني اياها وانا اجاوبه وبعدها استاذن انه يروح وانا دخلت غرفتي ببدل شوي والا اتيني امي تقولي ريلج يباج برع،، شوي ونزلت تحت ولقيته يالس في السياره،، قالي تعالي اركبي حذالي براويج شي،، ركبت عنده عطاني موبايل مع بطاقة تليفون،، قالي شغلي التليفون الحين بكلمج وانا طالع عالخط لأنه كان بيروح دبي عنده شغل هناك

ونفس الليله كلمته الين اذان الفير وكلامه كله كان عباره عن اوامر او اشياء عنه،، يعني شو الأشياء اللي يحبها في الحرمه وشو الشي اللي ما يحبه،، وشو اللي مفروض انا اسويه وشو اللي انا ما اسويه وحسيت انه مش مهتم يعرفني انا شخصيا او يعرف شو اللي اباه وشو اللي احبه،، بس بعد ما شغلت بالي لأني كنت فرحانه بفرح كل اللي حولي وخاصة امي وابوي وغير عن جذي حبيته وحبيت كلامه وهدوئه واسلوبه البارد معاي مع انه ما كان يقولي حب،، بس اللي كان شاغل بالي كثرة المكالمات اللي كانت اتيه يوم كنت اكلمه،، وكان عادي يخليني ربع ساعه عالخط الثاني،، وغير ان اتصالاته كانت قليله كانت زياراته بعد قليله بس اهلي كانوا عاذرينه بحكم انه الولد الكبير في البيت وكان الصبح عنده دوام والمسا كان ماسك شغل ابوه،، فكان ايينا في الأسبوع مره وحده يتغداء عندنا او يتعشى،، يمكن مرتين او ثلاث مرات يانا البر وبات عندنا في العزبه وهاي المرتين بس اللي طلعت فيهم وياه في السياره على اساس يمشيني في البر وكنت احس انه بعيد عني وما كان يقولي كلام حلو او حتى يحاول يمسك ايديني بس هاي الثلاث مرات كانوا عوض عن كل شي لأني كنت على الأقل اشوف ابتسامته في يهي وكان يسالني اذا كنت ابا او محتاجه شي!! وامانه هو ما كان مقصر علي من ناحية المصروف
مرت الأيام وتحدد عرسنا بعد ثلاث شهور من وقت الملجه،، و قبل العرس سافر المانيا مع ابوه للعلاج وقعد هناك ثلاث شهور وقبل العرس بعشرة ايام رجع البلاد وكانت خلال هاي الفتره الاتصالات من بينا قليله

وصلنا ليوم العرس ودخلت القاعه ووصلت للكوشه وبعدها دخل هو وابوه واخوانه وابوي واخواني وعيال عمي وخالاتي ما شاء الله ما تم حد من شبابهم وشبابنا وما دخل،، وبعد يلسه قصيره على الكوشه وبعد ما قصينا الكيكه وشربنا العصير والأمور الثانيه اللي يسوونها كل العرايس قمنا بنروح للفندق اللي كان حاجزنه عسب نبات فيه الليله وعلى اساس اليوم الثاني نسافر لشهر العسل،، وفي نفس اليوم طبعا انا سويت منااااحه وانا اسلم على خواتي وعلى بنات الأهل وخاصة امي،، وطول الطريج وانا رايحه الفندق وانا دموعي على خدي واحس اللي قاعد عندي في عالم ثاني وتفكيره بعيد عني تماما،، كنت حاسه باحساس غريب وانا معاه يمكن كان خوف من شي مجهول وفي نفس الوقت كنت عارفه اني بامان معاه (شعور غريب جدا)
والشي الثاني اللي خلاني استغرب ان التليفون عنده موول ما كان يسكت من المسجات اللي كانت وراء بعض،، وانا كنت اطمن نفسي ان هذيل ربعه يباركون له عالعرس او حد قاعد يسوي سوالف معاه

وصلنا الفندق وطلعنا الغرفه فوق،، واغراضي كانوا خواتي مودينها الفندق من الصبح فدخلت على طول فتحت شعري وبدلت ثيابي وتوضيت وصليت ركعتين وبعدها رتبت نفسي وانا في حاله من الخوف الغير طبيعي،، كنت احس اني ارتجف من الخوف وكلامي كان عباره عن حروف متقاطعه،، بالمناسبه طول هاي الفتره تراه ما كان موجود عندي في الغرفه،، هو وصلني للغرفه وقالي انا بنزل تحت اتريا اخوي ايبلي سامان وكمل تقريبا فوق الساعه او اكثر الين ما رجع الغرفه،، ويوم احنا دخلنا الغرفه كانوا يايبين لنا العشاء فقالي انتي تعشي انا مب مشتهي اتعشى !!!!!!

انا طبعا ما تعشيت لأني استحيت اقرب الأكل بروحي مع اني كنت ميته يوووع ومن الصبح على لحم بطني،، بعد ما عرف اني ما راح اتعشى قام وسحب ترولي الأكل وطلعه لبرع ورد هو فتح التلفزيون وقعد يلف على القنوات واذكر انه يلس يشوف رسوم (توم ان جيري) ههههههه وانا يالسه شرات العنز وفيني رقاد،، وحسيت اني منرفزتنه بقعدتي وانه هو فيه شي مش طبيعي وان بداخله كلام بس مش قادر يقوله،، الشي الوحيد اللي قالي اياه روحي نامي انا بعدني بسهر الين صلاة الصبح،، وفعلا قمت انا وحطيت راسي على المخده وبعد صراع طويل قدرت اغمض عيني يمكن لنص ساعه او حتى ساعه وبعدها نشيت لقيته هو منسدح على الكنبه والتلفزيون شغال وقمت قلت بسكر التلفزيون وبلحفه وبرد انام،، وانا شاله اللحاف في ايدي انتبهت على تليفونه يولع لأن البطاريه منخفضه وانا من ولع لفيت اطالع الفون بس اللي شد انتبهي وخلاني اتسمر في مكاني ان الخط كان مفتوح بس الرقم مش مبين يعني هو طول الليل كان فاتح الخط مع حد،، ما قدرت اشل التليفون واشوف الرقم وحسيت ان تفكيري انشل وعلى طول فهمت ان الموضوع فيه بنت،، وعسب جي رديت مكاني على السرير وبعد خمس دقايق قررت اني اشل الفون واسكره واشوف الرقم،، وفعلا شليت الفون وسكرت الخط ورديت فتحت السجل ولقيت نفسي اتصل على اخر رقم وتم التليفون يرن ويرن بس ما شي رد،، حفظت الرقم على اساس اني بتصل من تليفوني وانا في هذيك اللحظه اللي برجع التليفون مكانه رن والا هو نفس الرقم فقام ريلي على صوت النليفون وانتبه ان التليفون في ايدي وانا لحظتها وبحركه لا اراديه ومن الخوف عقيت الفون عليه وقلت رد عليها،، اللي يجوف ريلي وما يكون يعرفه بيحكم عليه انه عصبي وحازم وانا الين يوم العرس ما كنت اعرفه واايد وكنت اخاف منه ومن شخصيته لأني كنت كله اشوفه حازم وشخصيته قويه،، ياني الين ما واقفه ويقولي بصوت عالي انتي ليش تشوفين تليفوني وانا انسان حر وانتي ما لج خص باللي اسويه،، وانا انسان مجبر ومب مخير وانا وانا وانا...... الخ،،، وبعدها عادي رد واتصل عليها وقالها شوي وبتصل وهي شكلها ما كانت تبا تسكر وهو تنرفز عليها ويقولها بصوت عالي اقولج بتصل

وانا في هاي اللحظه ما اقدر اوصفلكم شعوري كيف وانا اسمعه يكلم وحده لكن اللي كسر جمودي وخلاني ادخل في حاله من الصياح الهستيري حتى هو ما توقع ان يصير فيني هالشي،، قعد يقولي هذي انسانه انا احبها من سنين بس اهلي الله يسامحهم ما خلوني اخذها وانا اباها وباخذها اذا مش الحين بس بيي اليوم اللي باخذها فيه وبالحلال،، وانا خذتج عسب ارضي اهلي،، ومن عقب هذا الكلام انا دخلت في حاله من الصياح الهستيري لدرجة انه هو خاااف وما كان عارف كيف يتصرف ولا شو يسوي وطبعا قعد يحاول يهديني واونه الأمور راح تتصلح واللي بيرضيني هو بيسويه،، ورديت عليه كيف بتصلح الأمور (بالطلاق) يعني ارد بيت اهلي مطلقه بعد ليله وحده من الزواج عسب الناس تاكل ويهي وتنقدني،، ومن بعدها دخلت الحمام وكملت صياح الين ما حسيت اني خلاص ارتحت وهو كان برع يحاول معاي عسب افتح له الباب وطول هاي الفتره تليفونه يرن واكيد كانت هي اللي تتصل،، بعدها بشوي تلبس وطلع من الغرفه وانا بعدني كنت في الحمام،، ومن حسيت اني هديت قمت وتوضيت وطلعت بصلي لقيت ان الشمس بدت تطلع،، خلصت وصليت ورجعت عالسرير ودمعتي في عيني وحاولت اغمض عيوني وانام بس ما قدرت وكنت اصيح بس بدون صوت من الصدمه

مر علي الوقت كانه دهر وغفت عيني وما نشيت الا عالساعه 12 الظهر وكان يوم الجمعه وكنا بنطلع من الفندق بنفس اليوم وبنروح بيت على اهله على اساس طيارتنا الساعه 10 بالليل،، دخلت الحمام سبحت وتمسحت ولبست لبس الصباحيه كاي عروس عاديه،، ودخلنا حزت الصلاه وصليت ووصلت الساعه 1 وهو بعده كان برع وبدا بالي ينشغل وكنت خايفه انه ما يرجع ويخليني في الفندق بروحي وفي نفس الوقت كنت مستحيل اتصل عليه واكلمه،،بعد شوي الا لقيته داخل الغرفه وعلى طول وصل الين شنطته وطلع ثيابه ودخل يسبح وخلص من الصلاه وبدا يلبس على اساس اننا نسوي جيك اوت ونطلع،، وانا اساسا كنت مجهزه اغراضي وشنطتي وكنت في حالة تأهب وكنت ميته من اليوع والعطش وكنت ابا اكل أي شي اسد به اليوع

طلعنا من الفندق متوجهين لبيت ابوي فديته على اساس بنتغدا عندهم ومن بعدها بنسير بيت ابوه نتعشى هناك ومنها على المطار،، وشنطة السفر كانت في بيت ابوي وشنطته هو كانت في بيت ابوه

المزيد من آخر المواضيع من نفس القسم:

**عشق_الإمارات** · 2010-12-30, 15:05

وطول الطريج ونحن رايحين لبيتنا انا ساكته وهو ساكت وكنت مش عارفه شو اسوي او شو بيصير معاي، الين قريب البيت قالي بعد الغداء بنطلع وبنسير انييب شنطتي من بيت ابويه وبنقعد عندهم شوي وبنرتاح الين وقت السفر،، حسيت بكلامه انه كان يبا يطمن اني ما ارح اتكلم عند اهلي باللي صار واني برضى اسير وياه،، فرديت عليه (ان شاء الله) وانا فعلا ما كانت لي نيه اني اقول لحد باللي صار لأني ما كنت ابا اغث اهلي واكسر خاطرهم من اول يوم وكنت ناويه اني اعيش هذي الحياه بروحي واحاول احل مشاكلي بنفسي الين الله ييسرها علي

من دخلت حوش بيتنا وحسيت ان الدموع بتنزل من عيني بس تحاملت على نفسي وخليت نفسي طبيعيه ودخلت وسلمت على امي وخواتي وعمتي وخالتي اللي كانت موجوده عندنا،، ومشى الوقت على اكل وسوالف وضحك وفعلا نسيت اللي صار بالأمس،، ووصلنا حزت الطلعه ويوم يا وقت اني اسلم على امي ما قدرت اتحمل اكثر وقعدت اصيح من خاطري والكل كان يظن اني اصيح عسب اني بسافر وبفارقهم بس الحقيقه كانت شي ثاني،، وامي المسكينة كانت توصي ريلي علي وتقوله تحملها تراها صغيره واذا شفت شي عليها كلمني وانا اللي بكلمها،، وبعدها ركبنا السياره نبا بيت ابوه وانا بعدني كنت ا صيح فصديت صوبه وقلتله ما ابا اسير بيت ابوك،، سالني وهو في حالة استغراب (ليش ما تبين تروحين،، لازم نروح نسلم عليهم وبعدين شنطي موجوده هناك لازم اروح ايبهن) وانا كنت مصره لدرجة اني ترجيته وقلتله الله يخليك نزلني بيت اهلي وانت روح ييب سامانك وتعال بعدين شلني،، انا ما اريد اشوف هلك،، لأني فعلا حزتها كنت كارهه اهله وحسيت ان حياتي تدمرت بسبتهم لأنهم كانو عارفين ان ولدهم متعلق في وحده ثانيه،، المهم بعد محاولات اقتنع باني ما اسير بيت اهله وقالي خلاص بنطلع دبي الحين وحاولت معاه اننا نرد بيت اهلي عسب ابدا ثيابي بس ما طاع وقال من نوصل دبي بحجز فندق وبنبدل هناك وفعلا اتصل على اخوه واتفق معاه ان الشنط ايبهن الدريول الين دبي

بدلنا وخلصنا لبس وطلعنا على طول للمطار وكانت الساعه 8 وطيارتنا كانت الساعه 10 وشي،، دخلنا وخلصنا امور السفر وقعدنا في الكوفي الين حزت الأقلاع وطول هاي الفتره كاننا اغراب والكلام من بيننا قليل جدا،، قمت استاذنته ابا اسير اخذلي اكل عسب اتعشى لأني ما احب اكل الطياره،، فقام هو معاي عسب ايي معاي وانا رفضت وقلتله ما له داعي اتيي معاي اعرف الطريج وبروح روحي لكنه رفض وقالي روحه بروحج ما شي وريلي على ريلج،، خلصنا عشاء وطلعنا الطياره اللي كانت متوجهه لماليزيا،، 7 ساعات مدة الرحله ونحن في صمت كنت اتمنى انه يكلمني ويفتح معاي أي موضوع لأني احبه كنت اباه يقولي سامحيني وكنت على طول بسامحه لأني احبه وما كنت اريد اخسره،، والله اني طول الفتره اللي كنت فيها في المطار عيني كانت مركزه على تليفونه،، كنت ابا اعرف اذا هي تتصل فيه او لا وحسيت انه ما كلمها طول اليوم الا يوم دخل الحمام لأنه طول فحسيت انه كلمها الا اكيد كلمها لأنه يحبها وانا كنت مجرد زوجه بالأسم فقط

وصلنا لماليزيا وكانت سفرتنا 5 ايام ماليزيا وعقبها بنطير استراليا 4 ايام وعقب بنرجع كوالالمبور ليلتين ومن بعدها بنرد البلاد يعني مدة الرحله 11 يوم،، سفرتنا كانت جدا عاديه عباره عن طلعات ورحلات وكنا نصادف وايد متزوجين وكنت احسدهم على الفرح اللي في عيونهم وكنت متحسره على نفسي وخاصة اني كنت البس وادلع نفسي وهو حتى مش قادر يقرب مني،، وهو كان من بين فتره وفتره ينزل تحت اللوبي اكيد عسب يكلمها ويوم نطول برع كان طول الوقت يتراسل معاها عن طريق المسجات لأن عينه ما كانت تفارق التليفون،، الين خلاص طفح فيني الكيل وفي اليوم الثالث قررت اني افتح معاه الموضوع واشوف اخرتها معاه لأني حسيت نفسي ذليله ومجبوره عليه وكنت ناويه بالليل افتح معاه الموضوع،، وفي نفس اليوم رجعنا الفندق قريب المغرب ودخلت انا ابدل ثيابي وتمسحت وصليت،، ورديت ادور عليه ما حصلته فقلت اكيد نزل يكلم البرنسيسه فقررت اني البس وانزل تحت في اللوبي اغير جوو،، وفعلا لبست وتعدلت ونزلت تحت وخذتلي كوفي ويلست تحت في اللوبي اشوف اللي رايح واللي ياي،، شوي الا اشوفه ياي من برع الفندق وفعلا كان يتكلم في الفون ومن شافني انهى المكالمه وعلى طول يا صوبي وهو معصب انتي شو نزلج تحت بروحج!!! وانا بكل برود رديت عليه يعني انت تطلع وتنزل ومحد يقولج شي ومخلني انا فوق بروحي،، مليت من اليلسه ونزلت يعني ما ارتكبت جريمه،، وهو بعصبيه يوم تبين تروحين مكان كلميني وانا بوديج لكن ما تنزلين بروحج،، وطلعنا فوق الغرفه وبديت انا ارفع صوتي عليه واقوله انت فيك وفيك وهذي اللي فيها وفيها.... وطبعا ما خليت كلمه ما قلتها عنها وهو طبعا يدافع عنها ومستعد يغلط علي بس هي محد ايي صوبها،، وكان يقولي انتي عليج بنفسج ومالج خص فيها وانا انسان حر بتصرفاتي واللي اسويه محد له شغل فيني ومع كثر الكلام والصياح والصريخ طلبت انه يردني البلاد على اساس يعيش حياته ونتفارق لأني عرفت لحظتها ان ما في امل الريال يحبني وينساها،، وهو ريال عنيد وشخصيته واايد قويه وما يحب حد يمشي كلمته عليه فقالي ما شي رده الين ما نخلص المده وبعدين يوم بتردين البلاد سوي اللي تبينه ورد قالي انا بتزوجها هذي يعني بتزوجها سواء رضيتي او لا،، وبعد اللي صار دخلت في فراشي انام ودمعتي على خدي واتحسر على حياتي وسمعتي اللي بتضيع في حال اني تطلقت وانا بعدني ما كملت شهر،، بعد نص ساعه ياني ولا كان صاير شي على اساس ننزل نتعشى وانا سويت نفسي نايمه وما اريد العشاء،، وبعدها طلع وانا يلست اصيح بصوت وكاني ياهل وتميت على هاي الحاله تقريبا اكثر من نص ساعه الين انهد حيلي وتعبت،، وقمت تمسحت وصليت وبعدها كملت صياح وانا على السجاده وبعد ما حسيت اني ارتحت قمت وطويت السياده ورجعت مره ثانيه للسرير لأني كنت احس بصداع شديد من زود الصياح وقلة الأكل،، شوي والا اسمعه داخل الغرفه وكان يايب اكل معاه على اساس نتعشى في الفندق،، في البداية رفضت اني اتعشى بس لاني كنت يوعانه فقمت خذت لي عشا ويلست على طرف بروحي اتعشى،، وانا اتعشى قالي بعد ما اخلص بنزل الأستعلامات وبخليهم يدورون على اقرب حجز لأننا بنرد البلاد،، تجمدت وما عرفت شو اقول (يعني هو يباني خلاص ارد بيت هلي!!) طيب انا شو اسوي وشو اقول لأمي وابوي وكيف ارد بيت اهلي،، فقلت خلني اعانده وقلتله بس انا الحين ما اريد ارجع،، وهو يقولي لا لازم نرد وتم يحلف لي ويحاول يقنعني انه يبا يرد على اساس ان طلع له شغل ضروري وعلى الحاحه وحلفانه حسيت انه فعلا في شي ضروري،، وقالي لا تكلمين حد من اهلج على اساس انه ما يباهم يعرفون اننا ردينا البلاد !!!

حصلنا رحله في نفس اليوم على الساعه 3 وكان ما شي وقت جدامنا غير اننا نرتب اغراضنا بسرعه ونطلع المطار على طول،، وطول الفتره اللي كنا موجودين فيها بالمطار كان انسان ثاني،، وكان يكلمني ويمسك ايدي طول ما نحن ماشين،، وحسيت ان في شي مش طبيعي قاعد يصير وخاصة انه كان مصر اني اغلق موبايلي وكانت حجته اننا قريب بنركب الطياره وشو يعني اذ سكرتي الفون الحين او بعدين،، وركبنا الطياره وفي حوالي الساعه 10 وصلنا مطار دبي ونزلنا واستلمنا الشنط وعلى اساس مفهمني باننا بناخذ سياره توصلنا لبوظبي وهناك هو حاجز فندق بس من طلعنا من بوابة المطار شفت اخويه في ويهي وكان مويه صوب ريلي سلم عليه ورد يا صوبي وسلم علي وانا مستغربه من كل اللي يصير،، لحظتها عرفت ان في شي صاير وهم ما يريدوني اعرف فقمت اسال اخوي (شو اللي صاير،، حد فيه شي،، امي ابوي اخواني خواتي شي بلاهم) واخوي ماسك ايدي ويمشيني الين السياره ويقول محد بلاه شي بس انتي اركبي السياره وبتعرفين،، ركبت السياره وانا ارتجف من الخوف وكنت اتريا اخوي يركب ويخبرني باللي عنده وانا متاكده ان الأخبار اللي عنده ما تسر،، ويوم ريلي كان يبا يركب عند اخوي جدام رد عليه اخوي اركب عند حرمتك وراء،، وخبرني اخوي بالخبر اللي ريلي كان يعرف عنه وليتك يا اخوي ما خبرتني ):
خبرني بموت عمتي وولد عمتي بحادث سياره،، وولد عمتي الله يرحمه كان اخوي بالرضاعه وكنا مترابين ويا بعض من يوم نحن صغار وكان يتيم فمن وعيت على الدنيا وانا اشوف ولد عمتي هذا شرات اخواني وكانت صدمتي بفقدهم كبيره،، ومن الصدمه كنت اصيح وللأول مره احس بحضن ريلي واول مره من ملج علي حسيت به قريب مني،، كان طول الخط حاط راسي على ريله ويقرا علي ويحاول يهديني ويصبرني الين وصلنا بيت عمتي اللي كان ملاصق لبيتنا،، وعلى دخلتي للبيت لقيت خواتي يتريوني الا اختي الصغيره اللي كانت حالتها صعبه لأنها كانت وايد قريبه من عمتي بحكم انها هي اللي مربتنها،، واذكر اني ما حسيت بنفسي الا وانا على السرير في بيت عمتي،، من الصدمه وشوفة الناس اغمى علي،، مرت ايام العزاء ناس داخله وناس طالعه وما كنت اشوف ريلي في اليوم غير اخر الليل،، وكنت فترتها ابات في بيت ابويه وهو كان يبات في بيت ابوه وكملنا اسبوع على هالحال،، وفي اخر يوم من العزاء ياني البيت عالليل بعد ما الناس راحو،، وياني اخوي يقولي ريلج يباج في الميلس،، فقمت وسرت اشوفه وسلمت عليه ويلست عنده وسالته اذا كان تعشى او لا،، وقبل ما يطلع قالي بخليج الليله هني وباجر بمر اتغدا عندكم وعقبها بشلج وبنرد بيتنا،، ومشيت معاه الين سيارته وهناك كانوا عيال خالتي واقفين مع اخواني سلم عليهم وركب السياره وانا وقفت شوي اسولف مع عيال خالتي واخواني،، وانتبهت على ريلي انه ما حرك سيارته وبعده واقف وقمت سرت صوب السياره واشرلي تعالي اركبي السياره،، وبعد ما ركبت قالي ليش واقفه تسولفين معاهم ،، قلتله هذيل مش غرب هذيل عيال خالتي وانا متعوده اسولف وياهم!! ورد قالي انا ما احبج تسولفين وياهم وما ابيي يكون بينج وبينهم غير السلام وبس،، وقالي الحين ادخلي وباجر بيي اشلج

ومرت الليله ووصلنا لليوم الثاني ونشيت من الصبح احوم في البيت والحزن بعده كان في القلوب لأن اللي فارقونا ناس عزيزين،، وشوي ولقيت امي يايه من برع وقمت يلست معاها وتمت تسولف عندي وتسالني عن ريلي وكيف تصرفاته معاي،، وانا تميت امدح فيه وخليته ملاك جدامها لأني فعلا كنت اشوفه جذي بس للأسف لو يكون قلبه ملكي انا وبس،،،، وتمت امي وحليلها توصيني عليه

وبعد صلاة الظهر يا ريلي البيت وتغدينا كلنا ارباعه وكان يسولف ويضحك مع اخواني وابويه وحسيت انه كسر جو الحزن اللي كان في البيت وحسيت انه قريب مني ومن اهلي،، وبعد الغداء طلعت حجرتيه وبدلت ثيابي ونزلت بروح معاه لبيت ريلي اللي اول مره ادخله من عرست،، وكنت مكمله تقريبا 15 يوم عالعرس،، ووصلت لبيت ريلي وسلمت على عمي وعمتي وخوات ريلي اللي كانوا في استقبالنا ومن عقبها دخلت قسمي اللي كان عباره عن غرفتين وصاله ومطبخ تحضيري في حوش بيت ابوه،، واذكر ان في نفس هاي الليله انا صرت زوجته ومرت الأيام هاديه من بينا بس بعدني احس ان قلبه مش لي مع انه كان ياخذ حقه الشرعي مني وكنت احس انه يكون متلهف علي حزتها وخاصة يوم كنت البس واتعدل له

البنت اللي كان يعرفها ما كانت تفارق تفكيري وخاصة يوم كنت اتخيل انه ممكن يكون يسوي معاها كل الأشياء اللي يسويها معاي وكان ما زال الرقم محفور في ذاكرتي بس ما كنت عارفه كيف ومن وين اتواصل وياها وخصوصا اني ما كنت اريد حد من خواتي او ربيعاتي يعرف بالسالفه وبعد تفكير طويل اتصلت من رقمي وعلى اساس اذا بعدها تكلم ريلي بتخبره وهو بدوره بيي يكلمني ومنها بعرف ان العلاقه من بينهم مستمره بس اللي صدمني ان الرقم اللي اتصلت عليه مقطوع !!!!

**عشق_الإمارات** · 2010-12-30, 15:06

كان دايم السهر برع والويكند باستمرار كان ينزل دبي واتصالاته علي كانت قليله وانا طلعاتي كانت معاه قليله ونادره جدا،، كنت اقضي مشاويري مع الدريول او وحده من خواته،، يعني هو كان عايش حياته معاها بس انا ما كان في ايدي شي اسويه وخاصة اني كنت افتش في تليفونه على رقم غريب او شي عسب امسكها عليه بس للأسف تليفونه كان خالي من أي ارقام غريبه وكان حريص جدا اني ما امسك عليه شي وتصير بينا مشكله،، وبعد 4 شهور من العرس ولله الحمد طلعت حامل والكل استبشر بهذا الحمل وهو حسيته كان فرحان ومستانس بس بعده كان بعيد عني بعواطفه وقلبه،، وفي نفس الفتره كانوا اللي فالبيت مشغولين بتجهيز لعرس اخت ريلي اللي كان بعد عرسي 4 شهور واسبوعين بالضبط

وفي يوم العرس وفي القاعه بالتحديد كنت اول مره التقي مع ربيعات خواته وكانوا يمرروني على الطاولات اتعارف واسلم عليهم على اساس اني اول مره اشوفهم،، ومن بين البنات حسيت بوحده فيهم طول العرس ما شلت عينها من علي واللي زادني حيره ان اخت ريلي كانت وااايد تمدح فيني عندهم بالذات وانا كل ما كنت اصد صوبها كنت اشوفها تتكلم في الفون،، المهم عدت الليله وخلصنا من العرس ورحت ركبت السياره على اساس بنرد البيت وهو نزل القاعه على اساس بيسلم على اخته وبيشوف اذا يبونه يشل شي ويوديه البيت وفي اثناء ما انا قاعده في السياره انتبت ان في شي يضوي تحت السيت وعرفت انه موبايل،، وقمت مديت ايدي تحت السيت وشليت الموبايل ولقيته يرن وعلى طول ضغطت على زر الرد وسمعة صوت وحده وعقبها على طول سكرت في ويهها ودخلت على سجل المكالمات ما لقيت الا رقمها ورقم ارضي اتوقع انه رقم بيتهم،، وبعدها دخلت المسجات ولقيت اخر مسج هي مطرشتنه (حبيبي انا بعدني في القاعه وما اقدر ارد عليك لأن صوت الفرقه عالي وبطلع بعد نص ساعه واترياني عند الباركنات) ومسج ورا مسج الين فتحت المسج اللي كسرني من الداخل (اشتقت لحضنك وااايد ومشتاقه اكثر يوم تلعب بشعري،، خلنا نطلع هالأسبوع دبي) وبعدها ذكرت فعلا هو كان من قبل اسبوعين في دبي وبات هناك على اساس عنده شغل واكيد كان معاها واكيد هي باتت معاه،، ويمكن يكون متزوجنها؟؟ فقمت وطرشتلها مسج فيه كله سب واهانات عسب اعرف شو بتكون ردت فعلها وقلتلها اني انا حرمته وانا ام اعياله وخاصة اني حامل وانتي الا وحده من الشارع يلعب وياها وبيفرها،، وبعدها فتحت على المسجات وانا بعدني ابا اقرا باقي المسجات انتبهت عليه وهو ياي صوب السياره فغلقت الموبايل وحطيته عندي في الشنطه،، اول ما ركب السياره حسيت انه متغير ومن صوته عرفت انه معصب وعرفت انها اكيد اتصلت على تليفونه الثاني وقالتله ان في حد رد عليها وتم ساكت..

حرك السياره وعند اول اشاره مد ايده تحت كرسي السياره وما حصل التليفون فصد صوبي وقالي انتي شليتي شي من السياره،، ورديت عليه (شي مثل شوو؟) ورد علي بصوت عالي اقولج انتي شليتي شي من السياره؟؟
رديت: هيه شليت التليفون اللي خاشنه وشفت اللي فيه،، قالي: عطيني التليفون،، قالتله: ما بعطيك اياه وبكسره جدام عينك،، وقام وقف السياره على طرف،، وكلمه مني وكلمه منه وبدا صوتنا يعلى وانا طبعا ما قصرت فيها تميت اسبها وخليتها هي وبنت الشوارع واحد،، ومسك شنطتي بيطلع الفون وحطيت ايدي عالشنطه وقام يشد الشنطه ولوى ايدي وفتح الشنطه وشل التليفون وانا بعدني ابا اخذ التليفون من ايده بس هو رفع وشدني من شعري ودز راسي على دريشة السياره وصفعني على ويهي،، ساعاتها تمنيت ان الأرض تنشق وتبلعني لأنه ضربني على شانها واول مره يمد يده علي،، ضربني مع اني حامل وفي اشهري الأولى!! خذ مني التليفون وطلع البطاقه وكسرها وعقها في الشارع ورمى الفون في الدرج وحرك السياره وانا طول الطريج اصيح واصيح بس بدون صوت وكنت احس بحرقه كبيره في قلبي وحسيت اني بموت من الكتمه،، وكان طول الطريج تليفونه يرن وهو ما يرد الين غلق التليفون

وصلنا البيت نزلت ودخلت قسمي عادي وسرت خذتلي بيجامه ودخلت الغرفه الثانيه وقفلت علي الباب وقعدت ساعتها اصيح من خاطري وبصوت وما همني انه يسمعني وخذت قراري ان على اول الصبح بلم اغراضي وبرد بيت ابوي لأني بهين نفسي اذا تميت عنده وخاصة انه مد يده علي،، وبعد ما هديت طلعت من الغرفه لقيته منسدح على السرير بدون ما يبدل كندورته وما صد صوبي ابدا،، شليت شنطه وقمت الم ثيابي واغراضي فيها وهو قاعد ويشوف وساكت،، لميت الأشياء المهمه وحطيت الشنطه على جنب ورديت للغرفه الثانيه انام الين يطلع الصبح وبتصل على دريولنا ايي يشلني،، شوي ولقيته ياي وراي ويقولي: طلعه من البيت ما شي،، وهذا هو بيتج،، قلتله: سامحني ما عاد لي بيت يلمني معاك يا ولد الناس،، بعد ما مديت يدك علي خلاص راحت الموده من بينا وحل مكانها الكره والبعد،، وعاد الحين عيش حياتك مع الأنسانه اللي تحبها وما لك شي عندي وحتى اللي في بطني هذا لي انا وبس......................

وصار بينا جدال ونقاش وكان اسلوبي انا حااد معاه وصوتي مرتفع وهو كان يناقشني بس باسلوب هادي لأنه كان عارف اللي سواه مش هين،، الين حس اني ما راح اعدل عن قراري فقالي: اذا طلعتي من البيت ما لج رده،، رديت عليه بعناد وكلي اقتناع: وانا ما بطلع من البيت عسب ارد له مره ثانيه،، ومن الليله هذي كل اللي من بينا انتهى وعلى باجر انا في بيت هلي

وفي الفتره اللي نحن نتجادل فيها ما اسمع الا صوت سياره تهرن وكان حزتها محد فالبيت لأن الكل كانوا بعدهم في قاعة العرس،، شوي وقام ريلي يهرول الين طلع بالحوش وانا طلعت صوب الدريشه شفت سياره غريبه على البيت وشفت وحده واقفه عندها وهي تصيح وتصارخ،، وصل ريلي صوبها وكان ماسكنها من ايدها يبا ريكبها السياره بس هي ما كانت راضيه وانا على طول استنتجت ان هذي هي الينت نفسها اللي يعرفها ريلي،، لبسة عباه لأتي كنت لابسه بيجامه وسرت صوب السياره وبعدها البنت تصيح وبصوت مسموع وتقوله كيف حرمتك تقول انها حامل وانت تقول انك ما ييت صوبها،، يعني انت تكذب علي.... وانا متفاجأه من اللي اسمعه ومن اللي شفته!! طلعت هي نفسها البنت اللي كانت في العرس وكيف يتكلم عني عندها،، يعني انا ما لي احترام وقدر عنده!! وهو اول ما شافني يقولي ادخلي داخل وانا واقفه واقوله: ما اريد وبتم اشوف المسخره اللي تصير جدامي،، وانا بكل برود رديت عليها وقلتلها هيه انا حامل وهذا شي طبيعي لأن اللي واقف عندج ريلي ولا انتي ناسيه،، وهي كانت مثل المينونه تصيح وشوي ما القاها الا تبا تهجم علي وقام ريلي مسكها وركبها السياره،، وفي نفس الوقت اهله داخلين البيت واخوه الصغير من شاف السياره على طول ياا ركيض صوبنا وخواته نفس الشي وخواته ما كانوا يدرون اني اعرف عن اللي بينها وبين ريلي فالكل كان مستغرب،، واهله كلهم كانوا عارفينها وعارفين ان ريلي يباها بس ابوه حلف عليه ما ياخذها،، حلفت علي عمتي ادخل قسمي قبل ما يوصل عمي وتصير مشكله وقامت دخلة بناتها داخل وقالت لريلي ان يشل البنت ويطلعها من البيت،، وفعلا ركب ريلي وساق عنها السياره ووصلها وانا دخلت قسمي بحسرتي وتموا خوات ريلي عندي الين طلبت منهن انهم يخلوني بروحي

بعد ساعه تقريبا رجع البيت وانا كنت في الغرفه الثانيه ومرت الساعات وطلعت الشمس وما اذكر اني نمت في هذيك الليله واتوقع حتى هو ما غمضت عينه،، وعلى الساعه 8 الصبح دخلت الحمام وتغسلت وانا طالعه من الحمام لقيته يالس عندي في الغرفه،، وقالي: انتي الحين مصره تروحين بيت اهلج،، رديت: هيه، والحين بتصل على الدريول ايي ويشلني.. انت مش غلطان ابدا،، انا اللي غلطانه لأني دخلت حياة انسان مشغول في حب انسانه ثانيه.. انا المفروض اطلب منك السماح اني شغلتك وخذيتك من حبك،، وكنت اصيح وانا اقوله هالكلام وكنت اتقطع من داخلي لأني حبيته وتعلقت فيه
ولما حس اني مصره على موقفي قالي: خلاص اصبري الين الساعه 11 وانا بروحي بوديج،، لأنج اذا رديتي بيتكم بروحج ما لج رده عندي.. وانا بوديج كمن يوم الين ترتاحين ويهدا بالج وبعدين بيي اشلج

(بنات انا بكون مشغوله في الويكند وان شاء الله بعد الويكند بكمل لكم قصتي)

**bellegirl** · 2010-12-30, 15:20

يزاج الله خير أختي

ما كملت القرايـة ولي رجعـة ان شاء الله تكون النهايـة زينـة

**الزيزفون** · 2010-12-30, 15:37

لا حول ولا قوة إلا بالله غمضتيني أتريا التكملة و عساها تكون فرح

**Stylish 5o5a** · 2010-12-30, 15:40

عوار قلب والله العظيم

في انتظار التكمله على احر من جمر يالغاليه

**الريف اليماني** · 2010-12-30, 15:40

نتريآ آلتكمله !

**ضاع عمري وراك** · 2010-12-30, 15:45

لاااااااااااااااااااا؟؟

كملي كملي بلييييييييييييييييييييييييييييييييييييييز

**المقر** · 2010-12-30, 15:46

المشاركة الأصلية كتبت بواسطة الريف اليماني

نتريآ آلتكمله !

**فدى روحك** · 2010-12-30, 15:54

قريت . . بنتظارج ؟
لاتبطيين بلييز

**أنثى كامله** · 2010-12-30, 16:01

احس اندمجت وايد في القصه و تأثرت وااااايد

اتريا التكمله حبيبتي

**قلب طفلة** · 2010-12-30, 16:17

وحليلج والله شراتج قلة هالزمن

نترياج

ويارب تكون الامور منتهية باشياء تسر الخواطر والله يوفقك دنيا وآخرة يارب

**أم غزلان** · 2010-12-30, 16:21

فديتج والله قلبي عورني عليج

والله انا لو مكانج ماتميت دقيقه بعد من اول يوم العرس برد بيت اهلي مابذل عمري حقه

صدق مب كفووو وهاي قواة عين فيها تي لين البيت وفوق ها يرقد وياها !!

معرسين ولا استغفر الله

اتريا البقيه وان شا الله النهايه سعيده

**الهنوف الحلوه** · 2010-12-30, 16:31

الله يعينج غنااتى عورتى قلبى ..

**Єℓĵoяч** · 2010-12-30, 16:43

ياويل حالي عليج هالكثر شايلة بقلبج ومستحملة ><

اتريا التكملة بأحر من الجمـــرْ

الموضوع: ما في مشكله ما لها حل،، قصة زواجي

أدوات الموضوع

عرض

ما في مشكله ما لها حل،، قصة زواجي

المزيد من آخر المواضيع من نفس القسم:

المواضيع المتشابهه

انا قلت يوم زواجي ماقلت عيد زواجي نزين

التكـمــــــــــــله :: ما في مشكله ما لها حل،، قصة زواجي // قصة الاخت عشق الامارات

زواجي ان شاء الله قريب بس عندي مشكله .. ممكن تساعدوني