قصتي

**2gather** · 2010-11-03, 01:14

بسم الله الرحمن الرحيم
السلام عليكم خواتي العزيزات
الصراحة انا اول مرة اشترك في المنتدى وحبيت اسولف معاكم
ابا اقولكم شو اللي استوى معاي
انا صار لي الحين 6 شهور من تزوجت من ولد خالتي
بعد زواجنا بشهرين حملت والحمدلله وعرفت اني حامل بتاريخ تسعة شهر يوليو
ما تتوقعون كيف كنت مستانسة والله اني في هاك اليوم ما رقدت من الفرحة حتى ريلي كان مستانس لانا كنا نتريا هالشي بفارغ الصبر
المهم بدا شهر رمضان وان طبعا صمت مع ان الدكتورة قالتلي الاحسن انج ما تصومين بس انا ما سمعت الكلام
وكنت كل اسبوع اروح عند الدكتورة عسب تفحصلي بالسونار
آخر مرة رحت وسمعتني نبض الجنين والله اني طرت من الفرحة يوم سمعته حسيت بالامومة وان في كائن حي في بطني لازم اهتم فيه وآكل اكلات صحية لاني بالعادة ما آكل عدل بس من حملت قمت اهتم
عطتني الدكتورة موعد بتاريخ 19 من شهر سبتمبر يعني بعد العيد
بس الله ما كتب اني اكمل الحمل وقبل الموعد بأسبوع نزلي دم خفيف وخبرت ريلي وعقب وداني عند الدكتورة
يوم كشفت علي قالت نبضه وقف يعني الجنين توفى
والله يوم قالت هالكلام انا اللي قلبي وقف وحسيت اني انا اللي مت وماتت احلامي وفرحتي معاي انصدمت لدرجة اني ما كنت مصدقة كلامهاواباها تكشف مرة ثانية ورحنا كذا مستشفى وكلهم قالوا نفس الكلام وقالولي اتريي لين ما الجنين روحه ينزل وعقب بنسوي تنظيف
نفسيتي تعبت وايد والله ما كنت ارقد بس كله افكر واحس بالذنب يمكن انا السبب في اللي صار
الحمدلله على كل حال
المهم نزل الجنين في اليوم الثاني عاد يوم شفته تميت اصيح سبحان الله كان صغير يعني يمكن شهر ونص تقريبا وعقب رحنا المستشفى طبعا بعدين دخلوني غرفة العمليات وبنجوني
ما حسيت الا يوم خلصوا ونقلوني الغرفة الثانية خلاص كنت متحطمة ويوم اشوف ريلي اصيح اكثر والله ما قصر تم معاي وكان يهديني كل ما اصيح
الدكتورة قالتلي لازم ما تحملين الا بعد 4 شهور الان الرحم الحين ضعيف ولازم ترتاحين
والحين الحمدلله احول انسى اللي صار واسلي نفسي بأي شي عشان ما اتذكر
خواتي ادعولي اني احمل ويثبت انشالله
واسمحولي ع الازعاج

المزيد من آخر المواضيع من نفس القسم:

**الكـــــاذي** · 2010-11-03, 01:21

الله يعوضج بالذريه الصالحه ويرزقنا ويرزق كل محروم

**منى الروحm** · 2010-11-03, 01:21

فديتج ربي بيعوضج ان شاء الله

**االمراسيم** · 2010-11-03, 01:23

الله يرزقج حبيبتي صبري

**دلووعتهم** · 2010-11-03, 01:25

الله يرزقج ان شاء الله بذريه الصالحه ويعووووضج ياارب

**أمــيــرَهـ** · 2010-11-03, 01:26

والله صيحتييييييينى

الله يرزقج حبيبتى انا عندى خالد وندى ومع ذالك يوم طيحت البيبى الثالث كنت بمووووت نفسج كأنه اول بيبى

لا تحاتين حبيبتى واكيد قريب بتكونين حامل وطمنينا عليج

**aldana** · 2010-11-03, 01:34

الله يعوضج يأرب

**ناعسه الطرف** · 2010-11-03, 07:46

الله يعوضج ويرزقج قرررريب ان شاء الله ويثبت حملج
وعقبال الكل يارب

كثري من الاستغفار واقري قرآن

**mazyo0na** · 2010-11-03, 01:43

الله يعوووضج خير حبيبتي

لا تزعلين وخلي عندج يقين بإذن الله بييج اللي ينور عليج حياتج بس انتي عليج بالصبر توكم انتي وريلج بأول حياتكم

ان شاء الله بتييبين غيره وبترسين البيت عيال

الله يرزقج ويرزق كل محرومه الذريه الصالحه ويثبته لج ان شاء الله

**عسولة99** · 2010-11-03, 01:44

الله يعطيج ان شاء الله

**alia_emirates** · 2010-11-03, 02:20

حبيبتي انا مريت في نفس الموقف والله ما اقص عليج حاسه فيج بس تدرين انا كنت حزينه بس الله عوضني بعد 6 اشهر ولا يهمج هاي خيره وتصدقين يوم كنت حزينه الحين احس عمري غبية لان هاي حكمة ربج الحين يلا شدي حيلج وانشاء الله راح تحملين

**ارضي ربي** · 2010-11-03, 02:25

الله يرزقج ذريه صالحه يارب ويثبت الحمل حقج يارب العالمين

**or_nahyan** · 2010-11-03, 02:34

الله يرزقج ان شاء الله بذريه الصالحه ويعووووضج ياارب

**رحيــــل** · 2010-11-03, 02:38

الله يرزقج بالذريه الصالحه ويرزق كل محرومه يااااارب

**غـنـاتےَ K** · 2010-11-03, 02:51

مريت في نفس حالتج وأول بيبي بعد لكن الله كريم

أسأل الله الرحيم يرزقني واياك وكل محرومة الذرية الصالحة المعافى ... أسأل الله العظيم أن يرزقنا الذرية الصالحة ويبشرنا بالحمل

الموضوع: قصتي

أدوات الموضوع

عرض

العرض المتطور

قصتي

المزيد من آخر المواضيع من نفس القسم:

المواضيع المتشابهه

قصتي و آآآآآآآآآخ من قصتي

قصتي

قصتي والسكوووول =(...قصتي يعني شعري من جداام مب الاستووري خخخخ