زوجي ما يعجبه شي فيني تعبت و الله تعبت

[أوهام الحب]

السلام عليكم خواتي

انا داشة باسم يديد لاني أعاني مشكلة كبيرة مطيرة النوم من عيني و متعبتني

أنا متزوجة من 5 سنوات و عندي طفلين و متنت وايد في ولادتي الأخيرة و تغير شكلي وايد (طبعا تعرفون المتن كيف يغير شكل الحرمة)

استوى وزني فوق وايد .. المهم اني حاولت اخفف وزني و لازلت أحاول لكن طبعا النزول بطيء لأنه عندي شحوم .. الحين بتقولون سيري اعرضي موظوعج في قسم الرشاقة .. لا انا مب هذا موظوعي انا موظوعي انه ريلي وايد مستوي يكره شكلي .. كل يوم يعايرني و يسمعني كلام جارح و انا اقوله اصبر يا فلان انا بظعف بس يبالي وقت .. يقولي انتي جذابة كله جيه تقولين و ما تظعفين .. و كلامه هذا يأثر فيني وايد و يقلل من عزيمتي .. يباني في يوم و ليلة استوي غصن البان .. و انا ماروم استوي جيه اصلا .. هو مول مب متقبل شكلي و متغير علي وايد .. حتى انه ما يعاشرني و كاره قربي .. انا احس اني مب لهالدرجة قبيحة .. انا صحيح متينة بس جميلة وايد الحمدلله كل اللي يشوفني يقولي هالكلام و اعرف كيف ارتب عمري و ألبس و اتمكيج .. لكن للأسف كل هذا ما ايي شي في عين ريلي .. و كل ما ألبس شي ولة اتعدل أسأله شو رايك فيني يفاجئني و يفشلني و يقولي أظعفي الأول عقب بقولج شو رايي فيج .. انا تعبت من هذا الاسلوب بمووووووت كل يوم اصيح و احس انه كارهني و انه يتحسر على الاجسام الرشيقة .. و انا للأسف من اشوفه جيه عزيمتي تقل و أنا عمري ولا شي .. انا اصلا مب عارفة كيف أحب عمري و اثق في نفسي .. من كثر ما ريلي يعيب علية طول الوقت و مب عاجبه شكلي فقدت ثقتي في نفسي و استويت اشوف عمري قبيحة .. مع اني عمري 25 سنة بس يا بنات يعني في عز شبابي و هو اكبر عني ب15 سنة يعني مب صغير عسب يفكر بهاي الطريقة ؟

اعطيكم مثال البارحة .. يالسين نسولف و هو يتأفأف عسب انه باجر دوام .. قتله الله يعينك و عادي لا تشيل هم الدوام و جيه .. جان يصارخ و يقولي انتي شو هامنج انتي بس يالسة في البيت و مرتاحة ما تعرفين اني اتعب و الحين تقولين لا تفكر في الدوام و جيه .. انا زعلت قتله ليش ما تباني اخفف عنك ؟

جان يقولي حق شو تخففين عني وي ويهج !!
قتله و بلاه ويهي ليش كله تعيب عليي ؟ يعني انت اللي ملك جمال العالم .. ليش تعيب على خلقة الله و ليش تزوجتني اصلا اذا انا مب عايبتنك ؟
جان يقولي سيري شوفي شكلج في المنظرة و شوفي جسمج بعد و بعدين تعالي تكلمي وياي !!

أنا الصارحة انصدمت وايد من كلامه و تميت طول الليل اصيح و سرت الحمام اطالع على ويهي و جسمي اشوف اني واااايد احسن عن غيري و اني حلوة الحمدلله و الشكر ما فيني شي غلط ولا اعاني من اعاقة و لا مشوهة عسب يقولي جيه ؟؟

تميت اصيح طول الليل ما نمت و اليوم مب رايمة انسى كلامه .. ليش يسوي فيني هذا كله ؟
انا أوجه سؤال لكل حرمة متينة مثلي هل ريلج كارهنج و يعيب عليج طول الوقت ؟
هل ريلج ما يعاشرج و لا حتى مرة في الشهر ؟
هل ريلج يقولج سيري شوفي عمره في المنظرة ؟

ماعرف كيف اتصرف وياه .. احس عمري بطلب الطلاق خلاص مب قادرة .. مب مجبورة اعيش وي شخص كاره شكلي لهالدرجة و كله يعلق علي .. يكفي ان هو اكبر عني بوايد هذا ما يشفعلي يعني ؟؟

جاوبوني الله يسعدكم

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[دلووعتهم]

الله يعييييييييييييييينج عليه

[نصراء]

الله المستعان
الحل بيدينج
ضعفي
وان شااء الله بيتغير
امبونهم هالرياييل نحااس

[ام رشووووووود]

اه حبيبتي حاسه فيج والله ""بس بقولج شي ""لو انتي كنتي رشيقة هو كان يحبج وما كنتي تسمعين منه اي شي يجرحج""صح؟؟ ""والحين يوك متنتي وصرتي مب رشيقة عاقولته يكرهج وما يحبج""هذا معناه انه ما يحبج انتي بطبيعتج لو رشيقة او متينه ""بس يحب مظهرج ""وهذا ريال ما يستاهلج ""بس انا بقولج انتي لا تهتمين فيه واثبتي وجودج ""وسوي رجيم ورياضه ولا تسالينه ولا اتقوليله الحين كيف شكلي لا البسيه وخليه هو اللي اي ويعلق عالشكل الجديد "" بس اهم شي خلي عزيمتج قويه وكلامه الجارحه هذا خليه دافع لج ""ولا تيلسين اتصيحين وتتعبين نفسين لانج كل ما تعبتي نفسيا كلما ذاد وزنج ""وانتي بعدج صغيرة ""ودوري بالنت عالوصفات تخسيس وابدي من اليوم ولا اتخلينه اشوفج مجروحه او مكسوره عشان ما يستقل هالشي خلج قويه ""وبالتوفيق

[salamh]

لالا تعطينه ويه وايد وتسالينه عن رايه فيج خلي عندج ثقه في نفسج وامدحي عمرج ولا عليج منه وحاولي تضعفين بشوي اشوي لان الريال اذا عطيتيه ويه وايد يتمادى ويتفسق والله يسر امرج

[جامعية]

قعدي معاه جلسه صريحه بدون عصبيه بدون تقليل من شأنه................الريال مايحب جي ابد

واذا حسيتي انج بتغلطين عليه او بتعصبي...قومي من مكانج

قوليله عطني بيزات وبروح للعيادة عسب اخفف من الوزن ويسوون لي جلسات

او تقبلي الانفصال عنه بشكل مؤقت مثلا يومين

و اذا حسيتي ماتغير او يمكن شايف له شوفه....تفاهمي معاه بالطلاق

المهم بدووووووووووون عصبيه وكتمي

[والله انثىQQ]

الله ايعينج حبوبه

[راعبية]

الرييال ما يعيبهم شي من استوت الدنيا ولا تضايقين عمرج باللى صار
سولي لج حميه ورياضه وغيري من جدولج--وعلى سالفة الدوام حتى ريلي جي يعصب ما يتحمل اني ادخل او اعلق اسكت بس اذا طرالي شي ...........حتى انا بعد ما اربي ان شاء الله ناويه اسوي حميه ورياضه --فخاطريه اتعلم سباحه ورقص ..

[Hno0odah]

الغاليه لا تستهمين والله الرياييل مناكر
لا يعجبهم العجب ولا الصيام في رجب
على كل حال الغاليه
الحل بيدج
وانا من رايي انج اتقوليله تباني اضعف
اول شيء احجزي في نادي رياضي والتزمي فيه لا تهملين عمرج اكثر لا عشان العيال ولا عشان حد
ولا اتسوين هالشيء بس عشان ريلج لا انا اقول جي لأن ابغيج اتسوين هالشيء لنفسج قبل كل شيء
وثاني شيء جربي اتروحين العيادات اللي يسوون تمارين بالاجهزه
ثالث شيء خففي من اكلج واذا حسيتي عمرج ما اترومين اتخففين من الاكل
انا من رايي تشتركين في اللي يبون الاكل لين البيت للرجيم وبينفعج لأنه نفع وااايد بنات انا اعرفهم
او جربي تمشين على اكل ونصايح نيتروشن عمتيه حيل ضعفت عن طريقه

يعني الغاليه حركي ساكن سوي شيء
لنفسج ولا تهملينها اكثر

واكيد هو يوم بيجوفج انت جي ... بتتعدل نفسيته وبيعرف ان انت هب هامله عمرج
وقاعده اتسوين المستحيل عشان ترجعين شرات قبل

والله يهدي ريلج يارب ... لأن جد اسلوبه اسلوب استفزاز

[آم سع ـيد]

فديت روحج وآلله آلله يعينج ..

بخصوص موضوع آلمتن ..

آقترح عليج تييبين آلآت ريآضيه وخآصة آلة آلمشي وتحطينهن عندج في آلبيت ..
وتخصصين لج سآعتين آو ثلآث سآعآت تلعبين فيهآ ريآضه ..
وآحدري آلنت وبتجوفين وآيد ريآضآت يستعملونهآ لتخفيف آلوزن وحآولي تطبقيهن مرتين ع آلآقل في آليوم ..
وآنآ آقولج .. آلرشآقه مطلوبه .. وحلو تهتمين فعمرج ..

وبخصوص كلآم ريلج آلجآرح ..
آنآ آقولج حآولي تسوين آللي قلتلج عليه فوق .. وخلآف عطيه آحلى ى ى ى بولبآس.. هع
وكوني وآثقه من عمرج غنآتي .. لآن آذآ خليتي عندج ثقه بترومين تردين عليه بآلكلآم آللي تبينه ..
آبني شخصيتج وثقتج فنفسج .. ولآ تخلين موضوع آلمتن وكلآم ريلج آلعآئق فهآلشي .. بآلعكس خليه حآآفز لج عسبب تعززين ثقتج فيج..

آسميهم يقهرون هآلريآييل لآ يعيبهم آلعيب ولآ آلصيآم فريب ..
يبون حرمه تييب لهم عيآل بس يبونهآ تكون عود خيزرآن من رشآقتهآ ... ولو بشورهم آظني حتى وهي حآمل مآ يبون كرشتهآ تبآن >> يبآلهم تكفيييخ ..

بآلتوفيج عزيزتي ..

[كشيخه بوظبي]

الله يهديه ان شاء الله

[دانتيلا _كيوت]

انتي مسويه له وايد اعتبار مب شرط تسأليينه اذا كشختي هاا حلو او ناايس
خله هو يعبر اذا يبا يعبر
ولا تسألييين جنج يالسه تشترييين وتكاسرييين وتترشيينه ع شان يقولج شي حلو
لا حبوبه
انا بنصحج اهتمي بشعرج وجسمي وروحي النادي اذا في مجال وسوي رياضه حتى لو ضعفتي ثابري على النادي
غيري شي في يومج مب لازم تيلسيين في البيت
واذا كان ريلج موجود في البيت يلسي وياه وخلج عااااااااادي واذا علق قولي له يزاك الله خير
كشخي لنفسج قبل ريلج نصيييييييييييحه

[ح ـوؤور]

خلج وآثقه من نفسج وخليه يقول آللي يبغيهـ يقولهـ بس ثقتج فنفسج لـآ تعدمينهآ . .

يمكن هو متضآيج من شي ويآي حاط حرتهـ فيج . .

سوي آللي تقدرين عليه وهو مب صغير وبعدين ريآيل فعمر ريلج ترى أكثريتهم جي . .

يعني يبغون يردون لشبآبهم ومن هالـأشيهـ . .

آلمهم أنتي سوي آللي تقدرين عليهـ وخلي أخر حل لج هو الطلـآق مب أي مشكلهـ تستوي قلتوآ طلـآق وطلـآق . .

فكروآ فعيآلكم قبل . .

وإن شآء آلله نفييدج وربي يسهل عليج ويفرج همج ويوفقكم ويآ بعض ولـآ يفرقكم . .

[نسمات الفجر]

الله يعينج
صلي قيام الليل و ادعي ان الله يهدي ريلج و يجملج فعينه و ينزل عليكم مودة والرحمة

و حاولي اتنزلين وزنج و خلي عندج عزيمة قوية عشانج انتي بالاول عقب هو سيري النادي و سوي رجيم والله راح يوفقج لانج تبين ترضين ريلج

يا اختي الرياييل انواع في الي يحب المتن و فيه الي يحب الرشاقة وانتي ريلج من هالنوع

اصبري واحتسبي و الله راح يوفقج و يصلح من بينكم

و الطلاق عمره ما كان حل للمشاكل بالعكس هدمار وخراب بيوتوانتي عندج عيال و كل شيء يتصلح بالعقل غناتي

[للي المهيري]

اه حبيبتي حاسه فيج والله ""بس بقولج شي ""لو انتي كنتي رشيقة هو كان يحبج وما كنتي تسمعين منه اي شي يجرحج""صح؟؟ ""والحين يوك متنتي وصرتي مب رشيقة عاقولته يكرهج وما يحبج""هذا معناه انه ما يحبج انتي بطبيعتج لو رشيقة او متينه ""بس يحب مظهرج ""وهذا ريال ما يستاهلج ""بس انا بقولج انتي لا تهتمين فيه واثبتي وجودج ""وسوي رجيم ورياضه ولا تسالينه ولا اتقوليله الحين كيف شكلي لا البسيه وخليه هو اللي اي ويعلق عالشكل الجديد "" بس اهم شي خلي عزيمتج قويه وكلامه الجارحه هذا خليه دافع لج ""ولا تيلسين اتصيحين وتتعبين نفسين لانج كل ما تعبتي نفسيا كلما ذاد وزنج ""وانتي بعدج صغيرة ""ودوري بالنت عالوصفات تخسيس وابدي من اليوم ولا اتخلينه اشوفج مجروحه او مكسوره عشان ما يستقل هالشي خلج قويه ""وبالتوفيق

وانا مع هذا الكلام الصح