آخر التطورات بموضوع الاخت اللي حبها تحول الى الكراهيه بسبب زوجها ..

[اناناسة]

الموضوع مب لي بل لوحدة احاول اساعدها ...


حبايبي

آخر التطورات بموضوع الاخت اللي نزلت موضوعها قبل كمن يوم بحطلكم الرابط تحت

و هي تقول تبغي تدعون لها

تبغي تفضفض الا اذا حد عندها مشكله

مشابهه ممكن تعطيها من خبرتها و بارك الله فيكم

هني تعليقي البسيط على بعض الردود

اقول للاخت العزيزة اللي قالت صاحبه الموضوع ما فاهمه
زوجها و هالشئ سبب تعبها اقول قريب 20 سنه شو كانت تسوي؟؟ان الرجل او المراة كل هالسنين ما فهموا بعضهم متى بيفهمون؟ يوم ينلفون

بالكفن؟؟؟و اللي قالت السباحه و الحذاء و ماشابه

كماليات الحياة طبعا فديت روحهم هم يبغون يصلحون و يعطون دافع للزوجه اقول الحياة

السعيدة ما تمشي على اصول معينه بل يبغيلها قليلا من الفرعيات كي تدخل البهجه بحياة الزوجين

الزوجه تبغي فسحه و راحه بحدود الشرع طبعا و الزوج ايضا كذلك ... و الحين الى رسالتها الجديدة..

موضوعها القديم قبل يومين ثلاث:

http://forum.uaewomen.net/showthread.php?t=807407

اولا اشكر كل اخت غاليه ردت على موضوعي و دعت لي اقول الله يوفقكن مع ازواجكن و اهاليكن بارك الله فيكن ...

[/QUOTE]

آخر التطورات بعد ما اهانني انا اشوفها اهانه رغم ممكن هالشئ مب بنيته هو و لكن نحن مب متزوجين حديثأ حتى نراضي الطرف الاخر بالجنس اللي وقته مب مناسب بل بالحوار المفيد

اللي هو مفقود و كل حوار يتحول الى تحكم من قبل الزوج ...

..ثاني يوم دخل البيت كانه ما صاير شئ ابدا مب كأنني انا يومين و كنت ابكي ابكي على ضعفي انني ما اقدر اسوي شئ و اعارضه و اقنعه لان اللي براسه يسويه انا كل شئ ممنوع و هو كل

شئ مسموح بحد الشرع..عيوني يعوروني و تحتهم صايرة حفر من كثر البكاء ...دخل و قام

يناديني تعالي يا بعد عمري تعالي اجلسي عندي .. انزين ما في خلاف هالشئ يفرح و لكن مب بعد ما دمرني و دمر شخصيتي ... انا كنت عارفه هو متندم سمح لي بعد سنين اروح افسح عن نفسي هو ما يحب يشوف وناستي ينقهر و يتوتر و يدور الف حجه يمنعني هو يقدر بسهوله

يقول لا تروحين و يسكر الموضوع ان انا كنت طالبه اروح و لكن لانه كان باصراره هو و اقتراحه هو صعب على طول يمنعني لابد يخلق حجج ..المهم تميت

مبوزة مب مبوزة اكبر من التبوز تميت حزينه من خاطري مالي خلق لا اضحك و لا ابتسم و لا ابوز مثل الصنم لا غير ...اي شئ كان يبغي كنت اسويله من الاشياء اليوميه و مثلا يطلب شئ

يشرب اقول ان شاءالله و ايب له ...طاف اليوم بسلام و امس اتصل بنشل الصغار و بنروح نتسوق ها اعتذاره تسوق كانني انا محتاجه اخزن اغراض

عندي و اخليهم ديكور وين بلبسهم دام كل شئ ممنوع تقريبا؟؟ ما قلت لا و عادي كلمته بكل ترحيب و رحنا ..و انا كنت حاسسه بيصير شئ

احساسي و حاستي السادسه قويه جدا

في البدايه كل شئ كان عادي ما شريت شئ ما كنت ابغي اصلا مو محتاجه لشئ و لا صغير و الحمدلله على النعمه..عقب فجاة قال ليش لابسه

هالعبايه المرصصه؟ قلت اي عبايه؟؟ هذي مرصصه.؟؟؟ اللي اقصدها اللي اليد قطعه سترتش و العبايه تشل اربع من حجمي من وسعها +خمار طويل للركب اللي ينلبس على الراس +نقاب و

دلاق و قفازات و حذاء واطئ... قلت حرام عليك انا يوم طلبت هالعبي انت واااايد عجبوك و قلت حتى ما في داعي البس خمار فوقهن و خليتني اطلب اكثر نفس الموديل للاستخدام اليومي و انا قلت ما

اقدربدون الخمار , الخمار للمولات استر العبايه ما تلصق فيني و انت كنت مصر عادي بدون الخمار و الحين مع الخمار صارت ضيقه

انا والله يا بنات عرفت هاي بدايته و الباقي بالطريق ...قلت اوكي ما تبا ما بلبس ما بغيت

اعطيه حجج..انا وايد فرحانه اقصد كنت فرحانه و مستانسه مخلني اروح البحر ما تتخيلون شدة وناستي مهما اكتب ما اقدر اعبر ما بغيت اي شئ يخرب وناستي حتى لو اللي يآمر اقول ان شاءالله من عيوني

عقب شوي خذنا غداء لانني قلت مشتهيه الاكله الفلانيه على طول خذها لي و عقب دخلنا محل للرياضه قال بنشوف ملابس السباحه لج
يكون مستور قلت تمام..المهم خذنا و طالعين الا يقول الله يهديج انتي وين عن الدين وين عن الايمان وين كنتي و شو استويتي انتي طالعه من الدرب انتي بس همج و غمج تتكشخين تروحين لين النادي كل هالدرب بس عشان تستعرضين

جدام الحريم بكشختج و جسمج انتي كل همج الخقه و وووووو.. قلت خاف ربك يا رجل خاف ربك شو قاعد تقول؟؟ انا متى سرت استعرض؟؟ انا

حرمه مثلهم.. خاف ربك الله بيحاسبك على اللي قاعد تقول..نحن من يومين سكرنا هالسالفه .... الا

يقول مب انتي طلعتي ظهرج؟؟ والله يا بنات فتحه اللبس كان اقل من نص ظهري و من قال لا

تلبسينه ما لبسته ... المهم قلت انزين الحين خذنا شئ مستور كامل خلاص انا لبست هاك اللبس و انتهى وافقت ما البسه ..و نحن قبل يومين تفاهمنا

على الموضوع ...

قال يوم اقول طالعه من الدرب تقولين لا ...يا بنات انا شو سويت؟؟

بعد سكتت كنت حاسه بخطر و الموجه القويه اللي متاكدة بتيني.. كملنا تلفلفاتنا بالمحلات على امره هو لانني كنت حابه ارجع البيت قبل ما تقوم

العاصفه ..كنت اقول الصغار يوعانين خلنا نرد مب زين يأكلون من برع اكثر من مرة بالاسبوع كنت ابغي باي طريقه اسكر الموضوع بس هيهات

و نازلين نطلع الا يقول انتي اصلا تعرفي بعض المشايخ يختلفون ان المراة المسلمه تطلع شعرها جدام الكافرات( يقصد اهل الكتاب )

قلت جد سامعه و لكن هالمشايخ ان حبوا مسيحيه او يهوديه عادي بيتزوجونهم ,بيقولون مذكور بالقرآن انه عادي الرجل يتزوج من اهل الكتاب و هني انا وقعت عمليه اعدامي و مب منتبهه

قال هااا؟ ماشاءالله عليج تناقشيني بأمور الدين !!!!!

خلاص يا ام فلان ماشئ بحر

بس قلت ليش ؟؟؟؟و دموعي نازله.. قال لانج ما تعرفين شئ عن الدين لانج باعده عن الدين لانج طالعه من الدرب

قلت بو فلان حرام عليك جي تسوي فيني انا خاطري اروح انت قلت اروح مب انا ,انا عمري ما فكرت اروح كل هالدرب و رحت باصرارك انت.. انت كل يوم من بعد رمضان كنت تقول هااا رحتي؟؟

شو هالكسل روحي سوي رياضه تنشطتي و انا عقب شهر من الكسل و تطنيش السالفه لان الدرب بعيد رحت و الحين تمنعني؟؟؟؟

والله كنت اقول و اصيح نقابي تخرس من الدموع و قال ماشئ روحه سمعتي يوم قلت لا يعني لا .....

انزين يا اخواتي انا مب انسانه؟؟شو هالتعامل؟؟

ليش مالي حق استانس و افرح؟؟ ليش هو لما عنده مناسبه انا ادخنه و اجهزه و افرح لفرحته. ليش انا دايما طول هالسنين اشجعه يطلع مع ربعه يستانس يغير جو؟ انا اشجعه يصل ارحامه,,اصر عليه يعزم ربعه ببيتنا و اسويلهم احلى وليمه و احلى ديكورات ..وناسته تونسني فرحته تفرحني و حزنه يحزنني ليش انا مالي حق بشئ؟؟ انا انسانه الله خالقني من اللحم و الدم لي احساس لي قلب قلب كان يحبه يمووووت فيه لدرجه كنت اقول انا اغار بلجنه تكون لك حور العين انا ابغي اكون زوجتك بالجنه و ليش خرب كل شئ.. هو من البدايه جي بس ان الحب كان مغلق عيوني ..لين قبل سنه كنت اعشقه عشق..كل اللي يسوي ما كنت اشوفه كنت انساه انا كنت اعتقد انسى بس ينخزن فيني

و الحين من كمن شهر مثل البركان طالع و مبين نفسه و مدمرني..كل شئ كنت اقول من عيوني..يزعلني و نادرا يمد ايده بس صفعه وحده ناااااااااااااادرا و على طول دقايق و يحاول يضحكني اضحك و انسى كل مرة جي يزعلني و يراضيني و ارضى بسرعه ..كنت انسى لانني كنت احبه من كل فؤادي والله قلبي كان يدق يوم نكون بروحنا مثل يوم واحد توه يحب و لكن الحين منفجرة ما اقدر بنفس مقدار الحب اكرهه والله لو يعاملني بالطيب ما يجرحني بحطه على راسي و في قلبي ..

خلاص

ما احب يدقني ما ابغي يعاشرني اتوتر اتوتر ..لا تعتقدون امنعه لا والله بل اعامله بنفس الطريقه اللي يبغي بي مجامله مب قناعه...

ما احبه .. و لكن ما ابغي يصير له اي مكروه الله يحفظه من كل شر
.

تزوجت تحريت بيداريني تحريت الحب يكفي للزواج الله يأخذ الحب ان ها نتيجته ابغي احترام ابغي تقدير يا الله انا بموت ببيته و محد بيعرف عن حالي

ما اشتكي لاهلي عن يأخذون فكرة سيئه عنه هو بعيون الناس ملاك ملاك ما اقدر اخرب سمعته هو ساجنني ذابحني الله لا يسامحه لاول مرة اقول الله

لا يسامحه الله فوق و يعرف بحالي و نيتي ..حبي له متحول الى كراهيه لما يدش البيت ارتجف من التنرفز بس ما ابين له لما يزعلني و يراضيني كأنه شال سكين يذبحني ابتسامته توترني اعرف هي مؤقته اعرف يحبني بل هل الحب جنون؟؟؟؟

استغفرالله العظيم ...

انا بموت بموت منه اكره حياتي اكره كل شئ شبعانه من كلمات الحب شبعانه من الجنس المنوع هو يعرف كل اصول الجنس المثير لايعه جبدي .....في كل الصفات الزينه الا هالغيرة الغبيه و التحكم الاغبى ..السموحه والله مب من عادتي استخدم هالكلمات بل مقهورة مقهووورة

يشوفني موووول داون بالدين و هو مره نبي طايع من فوق ...و حاجز مكان بالجنه كل ماله يقول اكثر اهل النار من النساء اقول مب مشكله ان الله كاتبلي النار مب مشكله بس الله سبحانه رحيم الغفور و الناس اللي ما يرحمون الضعفاء...

الله لا يسامحه الله لا يسامحه والله اكتب و ما اشوف الكيبورد قلبي متروس و بينفجر لا تقولون عشان روحه البحر

انتوا اعمقوا بالموضوع هو يتهمني بالتبرج و انا متسترة من فوق لتحت يقول متبرجه شو يبيني اسوي؟؟

مشتاقه لاهلي

لبيت اهلي مشتاقه اروح انفد و ما ارجع يا ما دعيت يا ما دعيت اكيد ربي ما بينساني اكيد ما بينساني

لو مب بالدنيا بالآخرة يااا رب الله يرحمني برحمته ..

الحمدلله على كل حال الحمدلله كل واحد بياخذ نصيبه من الدنيا

و نصيبي هو و عذاب النفسي...سامحوني تعبتكم خذيت من وقتكم سامحوني..

[/QUOTE]

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية