قاعات الاعراس المشهورة في دبي بالأسعار والتفاصيل >> مجهود شخصي ^.^

**الغر الحشيم** · 2010-10-01, 12:47

مرحباا

كيفكووون يا عرايس و حريم و صبايا ؟

اليوم شفت موضوع وحده من البنات تسأل عن قاعات و فنادق الاعراس في دبي و رديت عليها رد طوييل عريض ههههه و قلت بكتب الرد في موضوع منفصل عشان يستفيدون البنات ^.^

طبعاً كل عروس تحلم يوم عرسها يكون راقي و على مستوى و القاعة من أهم الاشياء الرئيسية اللي الناس يحكمون من خلالها على العرس =)

الصراحة المفروض الوحده ما تستخسر على عرسها لأنها ليلة فالعمر و تسوي اللي تقدر عليه حسب ميزانيتها و بالمعقول .. مب تقول والله كلها ساعتين و الناس ما يعجبهم العجب و بيتعشون و يمشون ايدهم فالطوفه !

عموماً يا حلواات انا بخبركن المعلومات اللي اعرفها عن أشهر قاعات الأعراس في دبي و هذا مجهود شخصي مني و رايي الشخصي قد يحتمل الصواب أو الخطأ لأن الناس اذواق و اللي يعجبني يمكن ما يعجب غيري

و اللي تبغي تعرف كم بتكلفها القاعة تضرب سعر المينيو في عدد المعازيم .. مثلاً المينيو للشخص على 200 و معازيمكم 600 بتطلع عليكم القاعة 120 ألف

و على فكرة انا ذكرت فالمعلومات اللي كتبتها ارخص مينيو في كل فندق .. يعني يبدأ من هالسعر اللي حطيته و طاالع و كل ما كان المنيو اغلى يكون احلى و أرقى طبعاً لكن كل واحد و ميزانيته :

انا الصراحة حضرت وايد اعراس في معظم قاعات دبي

بس لين الحين اشوف قاعة بني ياس في جراند حياة احلى و ارقى قاعة =)

لأنها وااسعة و شرحه و خدمتهم ممتازة 10/10 و الأكل واايد حلو و أسعارهم مناسبة جداً و الكوشة تقدرين تلعبين فيها على راحتج لأن المساحة واسعة .. و سعر المنيو 220 للشخص و القاعة تشل 1500 شخص و فالويكند اقل عدد 800 أما الأيام العادية 550

قاعة الراس في انتركونتيننتال فيستفال سيتي الصراحة أكلهم مب ليين هناك و ما عيبني و الاضاءة كئيبه و ما تستاهل 255 درهم للشخص ! بس الحسنه الوحيده خدمتهم ممتازة جداً و يحطون فلبينية عند كل طاولة تخدمج و تقربلج الأكل و كل شي .. و اعقد القاعة تشل 800 شخص

قاعة الكريستال حياة ريجنسي اسعارهم رخيييصة بالمقارنة مع باقي القاعات (اعتقد المنيو على 160) و الأكل حلو و الخدمة زينه و الاضاءة ممتازة لكن مشكلتها الأعمدة اللي على النظام الجديم مخربه عليها لانها تفصل الناس عن بعض و احس ضيجه و مب شرحه و الطاولات يلصقونها في بعض زحممة

القاعات الكبيرة في المركز التجاري شرات قاعة مكتوم و زعبيل روووعة اذا تطلبين المنيو الـ vip مب العادي و خدمتهم ممتااازة 10/10 و الأكل وايد حلو و كل شي راقي و مرتب بس مشكلتها ما تنفع الا حق الاعراس الكبييرة و اللي على مستوى .. لكن قاعة الملتقى الصغيرة ما عيبتني ابد من كل النواحي و يبدأ المنيو العادي عندهم من 170 درهم

قاعة الجوهرة في ميناء السلام حلوة و راااقية و خدمتهم روعة و البوفيه اذا تحبين يسوونلج برع يعني آوت دور يطلعون المعازيم ياكلون و يرجعون و عندهم بوفيه حلويات من أرقى ما يكون و القاعة شرحة و واسعة و الاضاءة قوية لكن المشكلة بالنسبة لنا نحن اهل الشارجة هي المسافة لأن جميرا بعييده علينا و بعد أسعارها غاالية لكن ماعرف كم

قاعة الراشدية في البستان روتانا واايد حلوة و مرتبه و شرحه و أكلهم حسب المنيو اللي تطلبينه و احلى شي عندهم بوفيه الحلويات روووعة يحطونه فالنص لكن الخدمة و الأكل مب شرات جراند حياة (طبعاً جراند حياة أرقى) .. و سعر المنيو عندهم يبدأ من 165 يعني يناسب كل الميزانيات و أقل عدد فالويكند 550 شخص

قاعات البوم لا تفكررين فيها نهائياً لأن الأكل بايت و بارد و الخدمة زفته بمعنى الكلمة و القاعات مب من حلاتها اصلاً ! يعني هالرخص بيطلعونه من عيونج .. الا اذا بتسوين منيو vip طبعاً بيعاملونج معاملة خاصة و كل شي غيير

قاعة فندق بارك حياة هااي كلاااس و روووعة الصراحة من كل النواحي لان الفندق من مجموعة الفنادق الفخمة luxury hotels في سلسلة حياة العالمية .. الأكل حلو و الخدمة راااقية و كل شي اوكي لكن القاعة صغيرة للأسف يعني مناسبة للأعراس العائلية و اعتقد ما تستوعب اكثر عن 370 شخص و سعر البوفيه عندهم يبدأ من 250 درهم

امممم هذا اللي اعرفه عن فنادق و قاعات دبي و ان شاء الله تستفيدون ^.^

و اللي عندها أي استفسار انا فالخدمة

المزيد من آخر المواضيع من نفس القسم:

**قلب عموري** · 2010-10-01, 12:54

شو عن قاعة كراون بلازا ؟

**الغر الحشيم** · 2010-10-01, 12:59

المشاركة الأصلية كتبت بواسطة قلب عموري

شو عن قاعة كراون بلازا ؟

هلا حبيبتي

قاعة كراون بلازا انا سايرتنها من سنييين يعني ما اقدر احكم عليها الحين

بس بشكل عام كانت حلوة و أكلهم بوفيه في قاعة ثانية يفتحونها على قاعة العرس و خدمتهم اوكي و سعر المنيو عندهم يبدأ من 140 درهم

بس الحين مادري كيف مستوى القاعة و شو اللي اتغير فيها و احس انها صارت جديمه

**شووقـ** · 2010-10-01, 13:21

مفيـــــــــد الصراااحه ,, مشكووورة و ربي يجعله في ميزان حسنااااتج خيتي ..

كنت محتاره وين في اي فندق كان في خاطري جراند حياه و رحت بحجز لكــــــــن للأســــــف اهلي شويه و معازيمي و يا اهلي و اهل المعرس ما يسوون 400 ... و طبعــــــا قاعه الاميره غير عن قاعه بني ياااس في جراند يعني الصراااااحه انصدمت يوم شفت قااعه الاميـــــــرة صغيييييره و موووليه ما عيبتني

و الحين محتاره بين المركز التجاااري و البستااان روتانا قاعه الراشديه .......؟؟؟؟

حياتي عندي سؤااال وين اكبر قاعه مكتوم ولا زعبيل في المركز التجاااري ,,, اتوقع زعبيل لنها تشل 800 بس مادري عن مكتوم .. معازيمي 400 الى 450 و ما ابغــــــي قااعه الملتقى << بــزايه لووول

**ام رشوودي** · 2010-10-01, 13:24

يزاج الله خير ونفرح بعرسج يارب

**سوارة** · 2010-10-01, 13:28

اللهُمَ يا حي ياقيوم اللهم من اراد بي هم فـهممه ..
ومن اراد بي فساداً أوظلالاً أوتيهاً فـ رد کيده في نحره ..
و اجعل تدبيره تدميره يارب العالمين
۞َاللهٌمً اجٌعُلنُيً قُرٍةَ عيُنً لُزٍوُجٍيَ واجٌعٍلَهِ قُرٍةً عيُنٍ لُيٍ اللهٌمٍ آمًيُنٍ۞َ
4

**الغر الحشيم** · 2010-10-01, 13:35

المشاركة الأصلية كتبت بواسطة شووقـ

مفيـــــــــد الصراااحه ,, مشكووورة و ربي يجعله في ميزان حسنااااتج خيتي ..

كنت محتاره وين في اي فندق كان في خاطري جراند حياه و رحت بحجز لكــــــــن للأســــــف اهلي شويه و معازيمي و يا اهلي و اهل المعرس ما يسوون 400 ... و طبعــــــا قاعه الاميره غير عن قاعه بني ياااس في جراند يعني الصراااااحه انصدمت يوم شفت قااعه الاميـــــــرة صغيييييره و موووليه ما عيبتني

و الحين محتاره بين المركز التجاااري و البستااان روتانا قاعه الراشديه .......؟؟؟؟

حياتي عندي سؤااال وين اكبر قاعه مكتوم ولا زعبيل في المركز التجاااري ,,, اتوقع زعبيل لنها تشل 800 بس مادري عن مكتوم .. معازيمي 400 الى 450 و ما ابغــــــي قااعه الملتقى << بــزايه لووول

هلا غناتي

العفو فديتج و لا شكر على واجب ^.^

اممم المشكلة القاعات الكبيرة معظمها يحطون لها عدد كبير فالويكند !

و قاعة زعبيل و مكتوم ما انصحج فيهم اذا العدد بحدود 400 لان القاعة كبييرة و بيطلع شكلها فاضيه و اصلاً الستاير البيضا اللي مغطين فيها اليدران ما تعيبني و احس لازم تسوين ديكور كامل للقاعة عشان تطلع على مستوى و بيكلفج وايد

انا اشوف قاعة الراشدية اوكي من كل النواحي و سعرها مناسب بس اختاري بوفيه الحلويات ويا المنيو و ان شاء الله يطلع عرسج راقي و مرتب و تطلعين احلى عروس ^_^

و اذا تبغين قاعة فخمه عندج بارك حياة مناسبة للعدد اللي عندج بس بعد صغيرة و انتي تبغين قاعة واسعة يعني ما تنفع

و صدقج قاعة الأميرة انا ماحبها أحسها يايه بالطوول و مب شي ! بني ياس احلى بواايد

**مربوشة دبي** · 2010-10-01, 14:00

يسلمووووووو

**آسيره عيونك** · 2010-10-01, 14:04

وايد حلوو ..ماقصرتي وجزاج الله خير

خاطري حد يكتب عن قاعات بوظبي لاني محتاره وين احجز ><"

**M!ss Bl!ng** · 2010-10-01, 14:33

.
.

حرام

ليش اتقولون Al Ameera Ballroom مب حلوة

أنا سويت عرسي فيها وكل شي كان طالع خيالي >,<

زعلت

.
.

**أمة الله** · 2010-10-01, 14:36

موضوع حلو ومكمل لموضوع عن قاعات الاعراس في الامارات مع المواصفات والاسعار

قاعة حياة رجنسي ابدا ما حبيتها وخاصة الاكل..لقيت قطعة الدياي مب مستوي وللاسف يمكن تحسين بهالشي في معظم الفنادق وحتى ان ريحة الاكل (البايت) توصلج

ويزاج الله خير ويوفقج وكل بنات المسلمين

**الغر الحشيم** · 2010-10-01, 14:42

المشاركة الأصلية كتبت بواسطة M!ss Bl!ng

.
.

حرام

ليش اتقولون Al Ameera Ballroom مب حلوة

أنا سويت عرسي فيها وكل شي كان طالع خيالي >,<

زعلت

.
.

افااا كله ولا زعلج M!ss Bl!ng

انا ما قلت انها مب حلوة بس ما حبيتها شخصياً لوول

ما عيبتني لانها يايه بالطول عشان جيه =)

ولا الأكل و الخدمة و الاضاءة و كل شي اوكي فيها

بس بني ياس احلى و شرحه اكثر عن الأميرة عرفتي فديتج ^.^

**fetoon** · 2010-10-01, 15:21

مروج روتانا يلي ينب برج خليفه

منيو بي 220 درهم وقاعه تستوعب 400 نفر وكلهم حلوو

لانه عرس اخوي سوينا هناك

**باااااربي** · 2010-10-01, 15:24

موفقه ويزاج الله خير

**شيطونــه** · 2010-10-01, 15:37

وآاآاآاآاآاآاآاآاآاآاو ♥ . ♥

موضوعج الصراحه متعوب عليـــه
يعطيج الف عافيــه غنـآتي :*

انا الصراحه مادري وين بيحجزون حق عرســي
اوني مستويه خجوله و ماتأمر ههههه
بس كنت اتمنــى في مدينــة جميـرا قاعــة آرينــا
لانها شرحه و تقدرين تصممين الي تبينه فيها

بس اتوقع يا قاعــة زعبيــل ولا جراند حياة بنـي يــاس
لانهن هذيل الي في نص دبي تقريــآ

الله يتمم لنـا علـى خير يارب

مشكــوره حبوبي ع الموضوع
حسيت صدق انــي استفدت و اطمنت من قاعــة بنــي يــاس و زعبيــل ههههه لاني كنت وايد احاتي ماتصدقيـن شكثــر
بـس الحين عادي كـــول ^.^

يعطيج الف الف عافيه

الله يوفقج وين ما تكونين يالــغر و ايسر امورج و يرزقج من اوسع ابوابه يــارب .. قولــي آآآآمين

الموضوع: قاعات الاعراس المشهورة في دبي بالأسعار والتفاصيل >> مجهود شخصي ^.^

أدوات الموضوع

عرض

قاعات الاعراس المشهورة في دبي بالأسعار والتفاصيل >> مجهود شخصي ^.^

المزيد من آخر المواضيع من نفس القسم:

المواضيع المتشابهه

المسموح .. والممنوع في اطعمة الاطفال .. مجهود شخصي ..^^

قاعات الاعراس

قاعات الاعراس..

قاعات الاعراس