كرهتها ود ودي اسفرها

[عشوقه راك]

السلام عليكم ورحمة الله وبركاته

بدش ف موضوعي والي هو شغالتي الاثيوبيه الي لاعت جبدي منها وريلي مب راضي ايسفرها اونه خل اتكمل السنتين اقوله هاي ماكملت سنه واحسني بيني يوم يا بضربها يا برتكب فيها جريمه شنعاااااااااء>>>>داشه جو الاكشن

وانا اخاف اظلمها خاصه انها اول شغاله عندي وانا حامل فيمكن ايكون مأثر فيني
بس كل الي اخبره ايقولي اني صح بخبركم بعض المواقف

الموقف الاول:
ان بشكارة جيرانا اثيوبيه مسيحيه(شهر 8 سافرت وفتكنا من غثاها) وشغالتي مسلمه المسيحيه كل مره اتقولها انها سوت شي شغالتي تبغي نفسها حتى كريمات يايبه الها كريم سنفره وتبيض وتنظيف وتقشيرما ادري حق اشو ..و مره المسيحيه قالت لشغالتي انها بتسوي تمليس ويت اتخبرني قلتلها لا انتي يايه تشتغلين مب تتعدلين قبل لا تسافري بسويلج تمت تتحرطم اونه المشط ما يمشي ف شعري قتلها يعني شعرج من 26 سنه اتسحينه بس من يتي عندنا وقف ما يستقبل المشط
وعقبها بفتره كنا ظاهرين انا وريلي الظهر الا الحبيبه اتقولي ان المسيحيه يتها الصبح وجان اتسويلها شعرها عاد انا هزبتها واتنازعت معاها

الموقف الثاني
لما ايب الها يونيفورمات ما ايتمن يوم وتقطعن اونه لما تصلي ؟؟؟؟ كيف؟؟اونه يوم تركع ينطر البنطلون ويوم اتكبر ينطر القميص قلتها يوم بتصلي البسي كندوره وعقب ردي على اليونيفورم بس لا حياة لمن ينادي لين هزبها ريلي وقاللها انها بتلبسه حتى لو منطر وبنشتري غيره من معاشج
((للعلم انا لما اكلمها او اامرها اتسوي شي ما اتسويه او اتم اتراددني الا اذا ريلي نازعها يعني انا مب مهم اتنازع عادي عنها))

الموقف الثالث وهذا الي يقهر::
الحبيبه ما ادري من وين الها شي من ثيابها ومن فتره خليتها اتعقهن ف الزباله ولكنها طلعتهن عقب ما ماشافتني رحت والسبب الي خلاني اعقهن لانهن شفافات وشي منهن جدام ووسخا ومطرطرات و الغريب ان الثياب اليداد الي شارتنهن الها ماشي منهن وين سارن ما اعرف
وكذا مره شفتها تلبس هالكنادير الشفافه بدون ثياب داخليه وهي حظرتها اتساوي الحوش او اتنظف الانترلوك الي جدام البيت وحتى لما تدخل اتنظف والبارحه كان ريلي موجود وكنا بنطلع وبالنصيب هو داخل واول ما طلعت الصاله شفتها لابسه كندوره شفافه من الي عقيتهن عنها وبدون ثياب داخليه يعني كل شي امبين ((الله ايلوع جبدها)) عاد انا انفجرت وتميت اتنازع وهي والله العظيم تضحك وحلفت ان شفتها جذه مره ثانيه لا تلوم الا نفسها


خواتي انا ما البس جدامها امفسخ سواء قمصان او غيره حتى اذابلبس بناطلين وقمصان لازم ملابس داخليه وانا مب من طبعي اضرب او اتم اتنازع و ريلي من النوع المسالم جدا حتى لما اشتكيله منها ايقول شو اقولها هي حرمه كبيره وعاجل وعيب انازعها ومن غيرانا وهو وايد انخاف ع بنتنا يعني اليوم الي انازعها فيه اتم حاطه ايدي ع قلبي لا اتسويبها شي

شو اسوي والله تعبت منها تعبت

هالمواقف ابسط شي يستوي

المزيد من آخر المواضيع من نفس القسم:

• طريقة ازالة الدهون من الاوني بسهولة وفعالية
• طريقة عمل منظف للزجاج طبيعي في المنزل
• خطوات تنظيف المنزل بوقت قليل وبدون تعب
• افضل طرق تعطير غرف النوم سهلة وفعالة
• طريقة عمل معطر هواء طبيعي في المنزل حصري
• طريقة تنظيف العباية السوداء من بقع المناكير
• طريقة تنظيف الجينز بسهولة وفعاليه
• طريقة تنظيف حوض المطبخ بسهولة وفعالية
• فوائد تخزين القهوه في الفريزر
• كيفية استخدام الخل لتنظيف السجاد