رحلة ^الدماني^ إلى يورو ديزني - الجزء الأول

[^الدماني^]

روعه الغاليه :
ذكرتيني بأيام أول والله حتى عيالي صاروا يتابعون معاي مواضيعك ويسألوني عنها

مدينة يورو ديزني من الأماكن اللي أحرص على زيارتها كل سنة تقريبا

منها اليهال يستانسون ...

ومنها أطلّع الطفلة اللي كامنة في أعماقي وكذلك بعلولي يرجع طفل ونسترد طفولتنا بالغصب



لكن رغم ذلك ما أحب أصورها !!!

بس السنة سويت لكم استثناء !

ومن بعد ما شبعت كرواسون ...



وجبن فرنسي ...



ودينش بيستريز ...



مخمخت و قلت بأسوي تقرير مفصّل يشرح لكم "القرحة ودواها" عشان يكون لكم مرجع .

وهذا التقرير أهداء مني لعيالكم ولعيال وفاء 2006 اللي دايما يتابعون تقاريري

وإهداء خاص لـ

شبل ليبيا

ولد فتاة ليبيا عشان على قولتها (ليها قصة)

نصائح ذهبية :

-عادة المدة المثلى لمدة الإقامة في يورو ديزني تكون 5 أيام عشان اليهال يشبعون ،
رغم ان في ناس يفضلون يتمون 3 أيام بس .

- بتحتاجين أحذية مريحة لأنج بتمشين مسافات .

- خذي وياج شنطة Messenger Bag اللي سيرها طويل عشان بتساعدج في سهولة الحركة
وخاصة اذا تحبين تركبين الألعاب.

- للأطفال الكبار ممكن تأجرين لهم عربات عند المدخل لأنهم ممكن يتعبون من المشي لليوم بطوله ، لكن مب مسموح لج تطلعينها خارج سور الحديقة !
اذا كان عندج مشوار للفندق وبتردين ، في هذي الحالة توقفين العربة عند المخرج
وبتردين بتلقينها مكانها لأن يكتبون اسم الطفل عليها !
والتأجير يكون ليوم واحد كامل فقط !

وهذي صورة العربة :



- حتى اذا سافرتي في عز الصيف ، هذا ما يمنع انج تشيلين جاكيتات للأحتياط لأن الجو متقلب جدا ودرجات الحرارة تنزل في الليل.



- اذا كنتوا ساكنين في فندق بعيد عن الحديقة وتحبون تقضون اليوم كله فيها ،
فأنسب وقت هو من الظهر لين منتصف الليل ، لأن الفترة الصباحية ما فيها استعراضات ،
تقدرون تتغدون فيها واليهال يلعبون والعصر يبدأ ألاستعراض
ويكون في استعراض ثاني مسائي وبعده على طول الألعاب النارية.

-تذكرة الدخول لليوم الواحد سعرها 115 يورو للشخص الواحد وجميع الألعاب في الحديقة مجانية

- المطاعم بصورة عامة أسعارها غالية.

والحين نبتدي :

يورو ديزني منطقة شاسعة



مكونة من :

- الحديقة نفسها (الألعاب)
- قرية ديزني (المطاعم والمحلات والفنادق ، على بعد دقايق من الحديقة توصلونها مشيا على الأقدام )
-استديوهات ديزني : ألعاب أكثرها تدور عن شخصيات ديزني الكلاسيك وبداياتها وطريقة ابتكارها

اخترنا فندق يورو ديزني



يعد أغلى فندق فيها لعدة أسباب !

اذا كانت الميزانية تسمح فأقترح تسكنون فيه ،
سعر الغرفة يختلف من موسم للثاني لكن في الصيف يبلغ ذروته (5000 درهم للغرفة الواحدة) .

المزيد من آخر المواضيع من نفس القسم:

• بسافر لكن ،.........
• رحلة ^الدماني^ إلى عالم والت ديزني -...
• سكن فى كولون ارجوكن
• كافيه الكورن فليكس Cereal Killer Cafe في لندن
• رحلة الي إيطاليا
• رحـــلتنــا عــبــر الخــطــوط البـــريــة...
• رحلة ^الدماني^ الساحرة إلى مراكش الحمراء
• رحلتي الى ارض الجمال اوربا من 7 الى 28 /8...
• رحلتي إلـــى ماليزيــــا ( الرقم١ ) شعارها
• رحلة راهيه دوم الى نيويورك أرض الحرية :)

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[^الدماني^]

والأسباب هي :

موقعه عند بوابات الدخول للحديقة



وفيه باب سحري يطلعج من الغرفة عالحديقة على طول



والفندق يوفر لج بطاقات FAST PASS اللي توفر عليج الإنتظار عند كل لعبة طول فترة اقامتج :
اذا كان الانتظار 40 دقيقة ، يدخلونج خلال 5-10 دقايق



ومثل كل فندق تتواجد شخصيات ديزني يوميا في الفندق عشان الأطفال يصورون وياهم



هذا الفندق سحري ! مكون من أكثر من 1500 غرفة على شكل قصر كبير ،
طول الوقت مشغلين أغاني ديزني الشهيرة
وتحسين انج فعلا في قلعة سحرية

المدخل




هذا اللوبي



ولقطه له من الطابق الأول



أكثر شي يعيبني يونيفورمات العاملين فيه مثل القصص الخيالية

هذا زي الرياييل



وزي العاملات






وفيه متجر لبيع منتجات ديزني وأهمها الكوستيومز ...

واستديو خاص لإلتقاط صور فنية للأميرات الصغيرات
(يتضمن السعر مكياج + تسريحة) لكن لازم حجز مسبق

وهذا مثال :

هذي أميرة أوروبية

[^الدماني^]

وأفريقية



الفندق فيه سبا وحوض سباحة وحديقة حلوة



غرفتي طاله عليهم



هذا شكل الغرفة (الريوق بوفيه مشمول من ضمن سعر الغرفة)



وقبل النوم يحطون لنا على المخدات شوكليت على شكل عملات ذهبية

وطبعا أهجم عليهم واقول : "آآآآآنا اللي آكل الذهب أكااااااااااااااااااال ، هـَـمّ !"



والحين بندخل الحديقة ...

عند المدخل بتلقون محطة القطار اللي ياخذكم لفة في أرجاء الحديقة



هذا شارع Main Street اللي في بداية الحديقة



فيه معظم المطاعم والمحلات
مثل Market House Delicatessen اللي فيه أكلات ومشروبات خفيفة



حبيت فيه مجسّم البدالة الجديييييييييم مال أول من ضمن ديكوراته

واتذكرت :"آلو بيروت من فضلك يا عينيّه ! عطيني بيروت وعجــّـل بالخط شوية"
(مع الاعتذار للشحرورة !)



واللي أحرص كل سنه اني أشرب من عندهم ألذ كاباتشينو عالماشي



ومن عند Gibson Girl

[^الدماني^]

ناخذ ألذ Waffle بالآيسكريم



ولازم ناخذ لفة عالمحلات اللي تبيع منتجات ديزني



وفرصة لليهال يشترون أدوات مدرسية من هناك



وحتى محلات الحلاوة



بتلقون فيها أشكال ميكي ماوس




ونوصل للقلعة اللي الكل يحب يصور وياها



وكانوا مسووين جدامها عرض خاص في الهواء الطلق شاركت فيه تقريبا معظم شخصيات ديزني
(بز يطير ، ليلو آند ستيتش ، توي ستوري 3 ، ميكي وميني ، غوفي ، دونالد دك ، شريك ، مونستر أنكوربيريتد)



ومن هناك تبتدي منطقة الألعاب على ثلاث اتجاهات :
(صورت نماذج بسيطة من الألعاب لكني نسيت اصور الـ Roller Coaster



أولا منطقة الألعاب اللي تناسب الأطفال الأصغر سنا



ومن ضمنهم أكثر ride نحبه كلنا وهو
Peter Pan's Flight



عبارة عن مركبه تطير بج فوق مدينة لندن كأنج تطيرين ويا بيتر بان



واحنا واقفين في الطابور شفنا سيكي شال ولده على كتفه :
الولد لافين شعره بعمامه والأبو حالق شعره !!!!
أنا استغربت ! قال لي بعلولي : عادي ! تلقين الأبو مرتد !



وكل خطوتين بتلقين الأكشاك اللي تبيع الكوستيومز لليهال ،

للأولاد ...

[^الدماني^]

وللبنات ...



ومن الرايدز الحلوة لكل الأعمار : It's a small world



واسم اللعبة مكتوبة بكل اللغات من بينها العربية



تركبين قارب وتسيرين في جولة حول بلدان العالم كلها



وطبعا ما نيوز عن الهند



لكن أحلى شي يوم تمرين عالبلدان العربية ،
مثل هذا العربي ومرته يحيونكم



وقصص ألف ليلة وليلة ...



والجواري يضربن بالدفوف



وحبيت أخبركم ان في قارب بدون كراسي مخصص لذوي الاحتياجات الخاصة ،
الكرسي المتحرك يدخل فيه بسهولة



ولمحبي السلاش تراه موجود في كل مكان



وشخصيات ديزني منتشرين في كل مكان ، يصورون ويا اليهال ويوقعون لهم أتوجرافات



وهذا توقيع ديزي ...



في لعبة بعد تناسب كل الأعمار

[^الدماني^]

عبارة عن قوارب في الهواء الطلق



تمر بكم على مجسمات صغيرة للقصص الخيالية مثل Beauty and The Beast



لكن أحيانا طوابير الانتظار تكون طويلة ...

لا تتملـّلون ! اتسلـّوا مثلا بتصوير جذور شجرة عدالكم !



أو أخذ لقطة للبنات الحلوات وهن يتشلبحن السور



واذا انتبهتوا عدل ممكن تشوفون LADYBIRD على ورقة نبتة وراكم !



أو حتى في الأعلى ... أكيد بتشوفون بالونة طايرة !



أو طيارة طارت !
فيها الحكومة ! دقت بو صلعه ! (خخخخ فرصة عشان تحـفـّـظون عيالكم أغاني الطفولة)



أو يمكن تكونين محظوظة وتشوفين قوس قزح



والحين بناخذ بريك عشان نتغدى ...

المطاعم منتشرة على كبر الحديقة لكن خذوا بالكم ان وقت الغدا يخلص بدري
(ما بين الساعة 2 و2ونص) ، لا تنسون عماركم في اللعب !

أكثر مطعم أحبه هو ...WALT'S

[^الدماني^]

ديكوراته عجيبة



لقيت عندهم صورة جديمة لعيال فريج أول



وأول آلة بدائية لتحريك الرسوم المتحركة



وصور وايد لوالت ديزني مبتكر شخصية ميكي ماوس !
ومن بينها هذي الصورة يوم كانت مدينة والت ديزني
مجرد حلم من أحلامه وبعدها حبر على ورق



طلبت من عندهم سالمون بالخضار ...امممم امممم



وميل فاي ...يمممم يمممم



ويابولنا قطعة تشيز كيك مجانية لأن بالغلط حطوا لحم خنزير ويا بيرغر بعلولي
وحبوا يعتذرون بهالطريقة بعد ما غيّروا له طلبه ، لكن بعلولي طلع أذكى عنهم
عشان يضمن انهم ما بيردون له نفس البيرغر ... قصاه نصين وبعدين ردّاه
حبيبي بعلولي ! بيسرسب زكاء



وعودة للألعاب ...

واحنا في الطريج لقيت حد يستغيث
^
^
^
^
^
^
^
أنقذونييييييييييييييييي !



تكملة الرحلة في الجزء الثاني على هذا الرابط بس لا تنسون ترفعون هذا الجزء قبل
http://forum.uaewomen.net/showthread.php?t=783969

[زم_قمر_ان]

تقريرج أكثر من رااااائع خاطرى

أخلى عيالى يشوفونه لكن مستحيل لانهم

بيصرو أنهم يسيرو يورو ديزني والصراحه خلاص

أنا الى أبا اسير لهااا رووووووووعه التقرير


نذهب للجزء الثانى


وننتظر جديدج

[مخمريه]

ماشاء الله التقرير رووووعه

[kash5ah_girl]

مبدعة يالدماني...مبدعة يالدماني
طيران على أجزائج الثانية

تحسسين الواحد انه مسافر وياج

أنا استفدت الصراحة من موضوعج لأن على بالي قبل ان الديزني لاند هي وحدة
ولكن غلط وخطأ...مع الدماني حفيدة بن بطوطة نستكشف خفايا العالم

[miss.blash]

ماشاءالله علييييييييييج .. ابدعتي حبووبه ..

تسلمين لنا ع هالاسلوب الحلووو ^_^

[Sweet_Soul]

استنانست على التقرير
وخاصة اني احب الالعااااب واااااااايد بس اكثر الي معاااي كلهم خوافات ما منهن فايدة

بسير الحين اكمل للجزء الثااااني
وصدق يوم ما يكونون لابسين يكون مرتد ؟؟؟ الا شو يسوون فيه اهله يوم يدرون ؟؟؟ ولا بس فصخها هناك علشان محد يدري فيه خخخخخخخ

اكثر وحدة بتستانس اختي لانها تموت في شيء اسمه ميني ماوس خخخخخخخ اكيد بتاخذ توقيعهااا
وانا بسير اخذ توقيع الوسيم الوحش خخخخخ كنت دائما اقول شكله كان احلى يوم وحش ليش ردوا امير اخر الفيلم هههههه

والى الجزء الثاني

[UmKhaloof]

• روووعه ما شاء اللـه علييج يا الدماني^^ ... وركض للجزء الثاني خخخخخخخ •

[ashash]

ياااااااااااا سلاااااااااااااااااااام
و الى الجزء 2

[كيفي قمر]

روووعـه . .
وطريقـه سردج أروووع . .