معاناتي ويه تحويل المعدة

[Optimistic]

السلام عليكم

بنات بغيت حد يخفف عني هال اللي سويته غلط ولا صح بنات تعبانه ظربني اكتئاب مالقيت حد اشكيله همي غير ربي والمنتدى عشان ابي اعرف هال انا الغلط والا الناس والا الدنيا ماعرف من وين ابتدي..

بكل اختصار بقووللكم سالفتي وانتو خبروني اذا انا مفروض ازعل والا لأ....

يا بنات انا من وعيت على الدنيا وانا البنت الدبدوبه .. الحلوة.. سبحان الله تميت متينه لين ما وصلت مرحلة الثانوية هنيه انصدمت فنفسي اكثر ... جتلت نفسي من الرياضة ومن الرجيم لين ماصار جسمي جسم عارضات الازياء وانا طويلة اصلا... المهم ماكملت الثانوية الا وخمس خطاب يايين يدقون بابي..

صار النصيب وخذني ولد خالي مع العلم انه فحياته ماشافني الاوقت الخطوبة.. المهم بعد كملت دراستي عنده ويبت ولدي الاول وبعد الولادة صار جسمي متين ماقدرت ارد لجسمي القبلي... المهم وقفت من العيال وكملت دراسة واشتغلت ومرض زوجي اللهم لا تبلي مسلم ... ووقفت وياه,, المهم بعدها حملت بولدي الثاني وبعدها بثلاث شهور بالثاني وهنيه المصيبه صارت بجسمي صرت واايد متينه وماخليت شي ماجربته ماشي فايده جسمي فضيع بسرعة امتن... وخاصة اذا ما مارست الرياضة مع العلم اني مرهقة من دوامي لانه طويل لين الساعة 4 وارجع ادرس ولدي واهتم باخوانه الصغار يعني ماعطي نفسي فرصة...

مابطول عليكم انا تعبت من متني وبغيت حل جذري مالقيت قدامي غير اني اسوي تحويل معدة المهم يابنات انا زوجي ما كان موافق ولا اهلي خاصة امي لانها وايد تخاف علي بس انا ركبت راسي ووقفت في ويههم كلهم وحطيتهم تحت الامر الواقع لانها هذي حياتي وانا تعبانة من جسمي ومن تطنيز الناس
حتى اخواني يتطنزون علي ويخقوون باجسام حريمهم وانا اتقطع وكله فكوم ويوم خوات ريلي يطنزن بعد فسويت العملية ,,, والحمدلله نجحت .. احين صارلي 10 ايام خسرت 11 كيلو بس تصدقون مهب سعيدة بهالشي لانه امي تطالعني بنظرة شفقة كاني شووو اقووووووووول ... ودايما تقولي انتي خربتي نفسج .. احين الله يستر عليج مايظربج شي فالمعدة... صرت مارقد مهب من العملية لا من نفسيتي التعبانه... الدكتور اليوم حولني على عيادة النفسية لاني حتى كلام مالي خلق ويه حد لاني عارفة بسمع تعليق...

بنات صار معرفة الناس اني بديت اخسر من وزني واضعف تهديد اللهم تخيلو جارتي كنت دايما اقول لها خلينا نطلع نمشي شوي عشان نضعف تقوللي ماريد انا مهب متينه وايد ... احين تشل الخدامة وتطلع تمشي بس عشان محد يغلبها وغير الحريم الباقيات فالعايلة ,,, بنات بس اريد اعرف هل انا اتخذت القرار الخطئ يوم اني سويت العملية ولا لأ ... تحياتي

المزيد من آخر المواضيع من نفس القسم:

• اهم أسباب تراكم الدهون في الظهر وطرق التخلص...
• بغيت خلطة تسمين
• حيل ذكية لخسارة الوزن بفعالية وفي وقت قصير
• اسرع طريقة للحصول على بطن مسطح
• اهم أسباب ثبات الوزن أثناء الرجيم وطرق...
• احذري هذه الانظمة فهي تخسس لكن تدمر
• رجيم قاس جدًا سريع المفعول لنسف الدهون بالجسم
• تعرفي على رجيم الكورن فليكس
• تعرفي على جدول في السعرات الحرارية للخضروات
• افضل حمية غذائيّة لإنقاص الوزن بسرعة

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[salamh]

لالالا يا اختي قرارج صح والحمد لله مدام انج ضعفتي وجاراتج هي غيرانين منج وانتي خلي ارادتج قويه وضعفي واغلبي كل صحباتج وبتصيرين رشيقه ولا فيه داعي للقلق ولا الاكتئاب واقري على نفسج يمكن عين والله معاج

[جميلـه]

ماشاء الله علييج .. بالعكس اختي المفرووض تفرحيييين وابد ماتضاايجيين خلي كلام النااس
وراا ظهرررج وخلي ارادتج قووية وان شاء الله بتصيرين حلوووة اهم شي ف عين ريلـج
صدقيـــني لوو سمعتي كلام النااس بتتعبيييين خذيهاا نصيحة مني لاتسمعينهم شفتي حتى جاتج غيرانه منج لانج بتصيرين احلى منهاا عسب جي احليلهاا تحااول تضعف .. لا تفكريين فيهم خل يوولوون وصدقيني انتي صح صح بكل اللي تسويينه استمري وان شاء الله كلهاا فتررة وبتصيرين احلاااهم كلهم وبترتااحين من تعلييقااتهم اللي ماالهاا معــنى ..

و السمووحــة فدييتج

[بنت الأمل]

حبيبتي مادام انج سويتي العمليه خلاص توكلي على الله ولا تستسلمين للاكتئاب ابدا

حتى الصورة الحلوة والخير كله جدام عينج وخلي الافكار الحلوة هي اللي تسيطر على مخ وحتى لوضجتي حاولي

اتتخلصين من هاي لافكار قولي الحمدلله ربي وفقني وسويت العمليه وان شاء الله بيرجع جسمي حلو ورشيق مثل اول

واحسن واحسني الظن بالله وتفائلي والحاله النفسيه ترا نص العلاج وعليج بالدعاء ثم الدعاء واكثري من الاستغفار

ربي لاتكلني الى احد ولا تحوجني الى احد واغنني عن كل احد يامن اليه المستند وعليه المعتمد وهو الواحد الاحد

الفرد الصمد لا شريك له ولا ولد خذ بيدي من الضلال الى الرشد ونجني من كل ضيق ونكدوحصني عمرج كل يوم

بالفاتحه والمعوذات 7 سبع مرات اقريهن وانفخي في ايدج وامسحي جسمج الصبح والمسا

والله يسير امورج الغاليه ويارب نسمع عنج كل خير

[برق لمع]

لا حبيبتي بالعكس وايدين مسوين وايد فنانين وفنانا واستوو روعه
بذكر لج بعضهم
حسين الجسمي
ديانا كرزون
هدى حسين
مياده الحناوي
ليلي علوي
مي نور الشريف
وغيرهم وغيرهم

[Optimistic]

Salamah و جميلة

شكرا على رفع معنوياتي

[Optimistic]

بنت الأمل مشكورة على الدعاء انا محتاجتة وايد

وبرق لمع انا شفتهم وصح هم من بره حلوين بس ممحد يعلم فب نفسياتهم وعلى العموم مشكور على المرور

[برق لمع]

بنت الأمل مشكورة على الدعاء انا محتاجتة وايد

وبرق لمع انا شفتهم وصح هم من بره حلوين بس ممحد يعلم فب نفسياتهم وعلى العموم مشكور على المرور

من اي ناحيه نفسيتج تعبانه ليش خايفه
على فكره اي وقت تبين تقدرين اتردين معدتج مثل ما كانت هذا الحلو في تحويل المعده اذا ندمانه خلاص
وليش اتكونين ندمانه دام كل شي تمام

[أم سارة]

انا العمليه ماماذتنج ومب تعبانه منها عادي يمكن لانج تعودتي على شي وحاليا نمط حياتج تغير كونج بتتبعين نظام غذائي مختلف اتصدقين حتى انا ودي اسويها بس محد مشجعني

[Optimistic]

يا جماعة انا العملية مهب مأذتني انا نفسيتي تعبانه من الناس محد مشجعني عليها والكل يقولي اتسرعتي لاني صغيرة فالسن ... وعلى فكرة برق لمع العملية هذي مافيها رجعه مثل اول لانه تحويل مجري الاكل يعني يقصون المصارين ويوصلونها بالمعدة ... واكثر شي مزعلني تعرفين شو.. نظرة امي وزعلها علي انا عمري ماسويت شي غصب عنها الا هالمره وهيه كل مما تشوفني تصيح وتقولي كلام يقطع قلبي... والناس احس الكل تغير علي يكلمني بطريقة ماعرف اوصفها على العموم مشكورين لتفاعلكم

[ورود إماراتية]

اختي توكلي على الله دام سويتيها وخلي امج وكل من حولج يحسون بسعادتج مب تحسسينهم انج مضايجه

الغاليه ها قدر والله كاتبلج تسوين ها العمليه والحمدلله على كل حال اقري سورة البقرة والقرآن كله خير وبركه

واستغفري ان شاء الله الله بيهون عليج وبتحسين براحة بال ولازم تحسسين امج انج مرتاحه وها اهم شي وعيشي

حياتج عادي والله يسهل امورج

[umsa3ed]

الحمد لله على السلامه الحين العمليه سويتيها وما ينفع الكلام وان شاء الله توصلين للي تبينه وانتي بخير بس داومي على اخذ الفتامينات

[برق لمع]

امج مثل اي ام اتشوفج تضعفين قلبها يعورها مب انها زعلانه
اما الناس خلي يولون خلي ثقتج بنفسج اكبر من جيه ما عليج من الناس الناس ما يتمنون الخير لاحد ولا يعيبهم العجب
ما سمعتي وانتي بكرامه قصة جحا والحمار
يقولج جحا وولده وحمار يمشون النا س ضحكو عليهم شو هالاثنين يمشون ويمشون الحمار وياهم
قام جحا يلس ولده على الحمار ومشا الناس شافوهم ضحكو قالوا شوفوا هالولد يالس ومخلي ابوه المسكين يمشي نزل الولد يلس جحا على الحمار شافوهم الناس قالوا ويه شو هالابو يالس على الحمار ومخلي ولده المسكين يمشي عشان يرضيهم يلس جحا وولده على الحمار شافوهم الناس قالوا صدق ما فيهم رحمه اثنينهم يالسين على هالحمار المسكين التعبان
نزل جحا ونزل ولده وشالو الحمار ومشو شافوهم الناس وضحكو قالو هذول ميانين شالين الحمار ويمشون
حبيبتي رضاء الناس غايه لا تدرك انتي سويتي هالشي وان شاء الله بتوصلين للنتيجه الي تبينها وما عليج من الناس

[عزة نفسي2002]

راضي امج بكلمتين حلوات و حسسيها انج راضية جدا بالعملية و نتايجها انج صرتي مرتاحه و بالتالي قادرة انج تجابلين ريلج و عيالكم ..و كل حد يتدخل عطيهم كاااش انج مرتاحة و غايظيهم باللبس الحلو و الدلع
مادري وين مشكلتج المفروض ترقصين من الفرح انج نزلتي 10 كيلو في لمح البصر..

[على البالْ]

فديتج عقي كل شي ورا ظهرج، انتي المفروض احين تركزين على نفسج؟
العملية وسويتيها، رياضة اترومين تمشين في بيتج وقت ما تفضين سواء كنتي بروحج والا حد وياج حتى لو الخدامة وياج !
لا تهتمين للي حولج، صدقيني ما اييبون الا المرض، ركزي ع دوامج و ع عيالج و ريلج و ع نفسج.
و خلي الايام اتمر و بمرورها بتشوفين كيف انتي تغيرتي و كيف اللي حولج بينبهرون فيج، سواء اللي كانوا يطنزون عليج والا اللي خايفين عليج !
بس اباج تهتمين بعمرج ونفسيتج !
صدقيني صدقيني صدقيني، اساس الامراض هيه النفسية التعبانة !
و انتبهي على عمرج انتي مسويه هالعملية و اظن تدرين شو اضرار النفسية الـ down عليها !
شدي حيلج،
و كل ما بغيتي حد يوقف وياج بتعرفين انه نحن هنيه في القسم نعاني مثلج، البعض بدون عملية شاد حيله ويحاول يكسر راي كل اللي حوله بالرياضة و بتخفيف الاكل، وانتي ادرى كيف معظم المتان يحبون الاكل وايد !
يمكن المعاناة اللي جمعتنا بهالقسم ، بس اعرفي انه ما انفتح هالقسم الا عشان نشجع بعضنا ونتبادل الخبرة ويا بعض.
ربي يسهل عليج يا رب و يعطيج ع قد نيتج، و يبعد عنج كل شر.
شدي حيلج الغالية.