دمي نازل وايد

**حنان الهاجري** · 2010-05-28, 12:22

خواتي انا بالشهر الثالث تقريبا فنهايته وامس جيكت عالدم واصل 7 والدكتورة هزبتني وعطتني فيتامينات شو تقولون خواتي هل هالشي ممكن ياثر عالجنين وهل ممكن تفيدني هالحبوب؟

المزيد من آخر المواضيع من نفس القسم:

**شفى روحي s** · 2010-05-28, 12:32

انا احيد انه مب زين يأثر عليج بلشهوور الأخير
والجنين يتغذى على دم الأم أخذيي الفيتمينات ون شااء الله بيرتفع

وربي يتمم عليج حمل ويرزق كل محرووومة ويسهل علينا ياربالعالمين

**وردتبسم** · 2010-05-28, 12:37

فديتج اكلي طماط وايد تراه يرفع الدم

**فديت عيونه** · 2010-05-28, 12:40

كان الله ف عونج ..

وما تشوفين شر .. وان شاء الله يرتفع دمج ...

عليج بالفيتامينات والحبوب الي تعطيج اياهن الدكتوره ..

وكلي كيوووي ^^ وشربي عصير طماط وكلي جرجير ..

وحاولي كل يوم قبل لا ترقدين تاكلين تفاحه ..

وعسى خير يارب ..

وترا انتي في البدايه وجيه دمج ناقص .. اهتمي ف صحتج عشانج وعشان البيبي ...

وطمنينا علييج ^^

**فاطمةالحمادي** · 2010-05-28, 12:42

الله يثبته لج يا حنان..وحاسبي اتغذي عدل
كلي سلطات وفواكه...واشربي حليب وعصاير فرش دوم
ولا تنسين فيتامينات الحمل..

والف مبرووووووك

**أحب خواتي** · 2010-05-28, 12:49

أكيد بيأثر و لا ماكانت نازعتج وين بيكون فيج شدة تشلين عمرج و دمج نازل صعب يا اختي انا مريت بنفس التجربة صرت ادوخ ماتحمل امشي خمس دقايق يا حبيبتي اكلي جرجير فالسلطة اكلي جبدة الدجاج لأنها خفيفة فالطعم اكلي سبانخ ((في فطاير و ملوخية)) وايد بيفيدج خلال اسبوعين بيعتدل دمج انشاله بس دومي على هالأشياء

انا اسوي جبدت الدياي و طعمها لايعلا علية فنااااااانة فنانة فنانة

بعطيج طريقتها و شوفي جان ماحبيتيها

يبي صحن جبدة دجاج من الجمعية غسلي بهري بهار خفيف ربع ملعقة صغيرة من كركم\بزار عربي\فلفل احمر
و تبلي ..... حطي فالجدر زيت زيتون ربع كوب راس بصل مقطع صغار شيطيه خفيف و و حطي فوقة الجبدة و خلية اول على نار عالية دقيقة و بعين و طي النار و سكرية الجدر عشر دقايق و بعين ضيفي من نفس \\\البهارات السابقة نص ملعقة صغيرة و الفلفل حسب الرغبة و ماجي مكعب\مع ملعقة كبيرة ثوم \ و رشة هيل و جرفة \راس طماط صغير مقطع صغار و و اوراق نعناع و اوراق بقدونس و شرائح فلفل بارد سكرية لين يخف الماي يعني من 5 لين 10 دقايق و هني

لازم كل المقادير السابقة عشان النكهة تكون صحك\و زيت زيتون اخف مايمتن

و ذا تبين تخففين من ريحت الجبدة قبل الطبخ حطي عليها ملح و ليمون خمس دقليق و غسلي الجبده عقب

**حنان الهاجري** · 2010-05-28, 13:08

مشكورين بارك الله فيكم ربي يسعدكم ويعطيكم كل ما تتمنونه

**hamoudmam** · 2010-05-28, 13:31

نفس ما قالوا لج الأخوات ركزي عالجبدة وايد مال الدياي أو البقر أو الخروف بس غسليها عدل قبل لا تطبخينها و اشربي عصاير فريش ركزي ععصير الرمان لأنه يساعد عالتتبيث و عصير الشمام عشان يساعد في تكوين أعضاء الجنين و الحليب طبعا و البرتقال و ييبي من الكارفور أو الجمعية الشمندر (عرفتيه طبعا لونه أحمر) فوري كمن حبة و يلفيهن و اطحنيهن في مولينكس ويا عصير البرتقال و شوية شكر هذا وايد زين عشان حالتج اشربيه كل يوم.
ويارب يطمنج عالبيبي

**رحلة أمل** · 2010-05-28, 14:25

اكلي تمررررر في وحده كانت كاتبه انه دمها كان ناقص ويوم كلت التمر زاد معدل الدم عندها ..

**حنان الهاجري** · 2010-05-28, 14:31

مشكلتي اني امر بفترة وحام صعبه جدا وعشان جيه ما تقبل اي شي

**hamoudmam** · 2010-05-28, 14:48

حبيت أنقل لج هالموضوع عن فوايد الشمندر الأحمر

عصير الشمندر مع عصير الجزر يفيد المصابين بـ : توسع الاوردة ، وتصلب الشرايين وضغط الدم المرتفع ، واضطرابات القلب ، الناتجة عن توسع وسماكة الاوعية الدموية . يساعد على بناء كريات الدم بسبب احتوائه على الفسفور والبوتاسيوم والكبريت .

عصير الشمندر مع عصير الجزر مع عصير الخيار مع عصير البقدونس يكون مزيجا ينظف ويشفي المرارة والكبد والكلى وغدة البروستات وجميع الغدد الجنسية ويفتت الحصى ويفيد المصابين بالسل ، والسرطان والتهاب الاعصاب ويفيد للوقاية من الرشوحات ايام الشتاء .

فقر الدم
تشبه عصارة الشمندر الاحمر في خصائصها دمنا البشري . إذ يحتوي على الحديد وتعمل على توليد خلايا الدم الحمراء وتزود الجسم الاوكسجين النقي كما تساعد الرئتين في اداء وظيفتها النفسية

**بنت ابوظبي** · 2010-05-28, 15:03

هلا وغلا

فديتج انا يوم ربيت دمي وصل 6 وهزبووني وبغوا ينقلوون لي دم بس هلي ماارضوااا
قاالوا من اكلها ومن شربها وان شاء الله بتستوي اوكي
وقعواا ع مسؤؤليتهم

فتجنبي هالشي لان صدق بدووخين كله احس بدووخه
كلي ملووخيه , عصير افكاادو , كبده , سباانخ ’ فووااكه , خضاار ,

**ام وزوز** · 2010-05-28, 17:46

والله انا نفس مشكلتج الغاليه وزيدولي جرعة الحديد يسببلي امساك بس اكله شو اسوي
وهو الوحام في البدايه كنت ما اقدر اكل اي شي ارجعه انصحج اختي اجبري نفسج شوي على الاكل من سلطات وملوخيه وخاصه التبوله فيها كل شي

**الجريحه_555** · 2010-05-28, 18:12

للرفع

اللهم ارزق كل وحدة تتمنى الحمل بالذرية الصالحة عاجلا غير آجل اللهم آمييييييين

اللهم عاملنا برحمتك

وبشر الصابريييين

اللهم إني أحمدك على كل المحامد ما علمت منها وما لم أعلم وأشكرك على كل النعم ما علمت منها وما لم أعلم.

ربي لا تذرني فردا وأنت خير الوارثييييييين

**عاشقة يسوفي** · 2010-05-28, 18:27

اكيد ياثر حبوبه انا يوم كنت في الرابع نزل دمي ووصل 10 وقالت لي الدكتورة خذي حديد مرتين فاليوم

وكلت سلطه وخذت حديد وفيتامينات والحمدلله وصل 11 مره ثانيه الدكتورة تقول انه البيبي يسحب منج

ويتغذى ولازم تهتمين وتعوضين واللا بياثر عليج وع البيبي لازم الام تعوض وتهتم عرفتي

الموضوع: دمي نازل وايد

أدوات الموضوع

عرض

العرض المتطور

دمي نازل وايد

المزيد من آخر المواضيع من نفس القسم:

المواضيع المتشابهه

ظهري وايد يعورني يوم أوقف وايد ولا أيلس وايد