أأأأأه يالقهر عند باب مستشفى الكورنيش .....

**المـــها** · 2010-05-25, 14:41

مرحبا خواتي شحالكن عساكن كلكن بخير ؟
اول مره انزل موضوع في هالقسم عن موقف مريت به عند مستشفى الكورنيش. بس من القهر والله امس ماقدرت ارقد ..
لو نتكلم عن مستشفى الكورنيش بلاويه وايد ..انا مابتكلم عنه ..

خلصت فحوصاتي وطلعت على الساعة عشر ونص وانا طالعه القى عيوز على كرسي مخلينها على زاوية واحد من الاعمده اللي برا وتتلفت كانها تدور شئ ،كنت بكمل طريجي بس من شفتها فز قلبي قلت لايكون حد مخلنها ونساها ترا في هالزمن تتوقعون اي شئ، وذكرتني بيدتيه ربي يطول بعمرها ،ورجعت لها وسلمت واسألها :حد وياج خالتيه ليش مخلينج هني ،قالت :بنتي الدريول نزلني وبيوديني داخل ،قلت لها حسبي الله عليه على الاقل يحطج داخل عند الانتظار ويرجع لج عقب ,وسحبت يدي قالت لي انتي تعالي ورا العمود علشان الظله وخنقتني العبره ودمعتي على عيني حليلها .ويلست تتشكى لازم يخلون مواقف خاصة للحريم وقلت لها انا بوديج الغرفه في اي طابق قالت الرابع وردت شوي قالت لا بس بيدورني الدريول ومابيلاقيني ،قلت لها يزول زاله ربي ،وهي حليلها ماخلتني يوم شافتي كرشتي جدامي ،قالت بتريا شوي بيي .وشوي ياي الهندي يهز راسه ويتضحك ولقا له هزبه اونه الشرطة ماتخليه قلت لها قوله ماما كبير بيخلونها الشرطة والا انته سبال .
(حسبي الله ونعم الوكيل حسبي الله ونعم الوكيل)

ورحت وعيوني تخر من الدموع قلبي عورني عليها
حرام عليهم والله مطرشينها ويا الدريول لا خدامة ولا شئ نحن يداتي كلهن مسوين لهن خدامات بس علشان يروحن وياهن وين مايروحن ..انزين مطرشيننها على الاقل حد من الحريم توديها وتكون معاها ، ياحسافة بس لو عندي عيوز في البيت والله لاحطها فوق راسي وما افارجها دقيقه
الحين اخواتي ترضن يدتكن يخليها الدريول في الشمس ،وخاصه جونها هالايام وااااايد حر

والله انقهرت من قلبي علشانها هالعيوز حليلها

المزيد من آخر المواضيع من نفس القسم:

**أم لطوف** · 2010-05-25, 14:44

الله يعينها يا رب

**ام سعيد1** · 2010-05-25, 14:46

الله المستعان ياما بنشوف وااااايد
وهذا ترا شويه بعد

*** ام خماس *** · 2010-05-25, 14:48

الصرااحه قهر اقل شي بطرشهاا مع خاادمتهااا

بروحهاا مع الدريول وهي لا حول ولا قوة

**بطة بيضاء** · 2010-05-25, 14:52

مسكينة الله يعينها

للاسف كلن لاهي بحياته و ناسي اللي ربته و تعبت عليه

**حبي w** · 2010-05-25, 14:56

اخ يا قلبي غمضتني والله....

**UmKhaloof** · 2010-05-25, 14:58

هاذي آخرت التربيه....ربتهم وكبرتهم وبالأخير عقوها ع الدريول يتحمل مشاويرها.....

حسبي الله علييهم ....

**سلفريدج** · 2010-05-25, 15:01

آآآآآآآآآآآه من آآخر زمن ..............

ليش نحن نتمنى اهلنا بعدهم موجودين وهاذيل....استغفر الله العظيم

**ام عمر1** · 2010-05-25, 15:06

كل لاهي ورا مشاغله الدنيويه ومب محصلين وقت لاقرب ناسهم،،
الله يستر ويعينا على تربية اعيالنا ويجعلهم بارين بنا

**وا إسلاماه** · 2010-05-25, 15:11

لا حول و لا قوة إلا بالله العلي العظيم
قال عليه الصلاة والسلام: (رغِم أنفه، رغم أنفه، رغم أنفه، قيل من يا رسول الله؟ قال : من أدرك والديه عند الكبر أحدهما أو كلاهما ثم لم يدخل الجنة ) رواه مسلم، والمعنى أن من أدرك والديه أو أحدهما عند الكبر ولم يبر بهما لم يدخل الجنة، ورغم أنفه، أي وأنفه لصقُ بالتراب من الذل.
بس منوا يفهم ؟

**ralbadi01** · 2010-05-25, 15:14

لا حول و لا قوة إلا بالله
ماتت الرحمه في قلوب البشر!!!

**ثمرة حبنا** · 2010-05-25, 15:16

الله يعينها والله ويسخر لها عيالها

**جوهرة القصر** · 2010-05-25, 15:18

حرام عليهم والله وين عيالها يخلونها ويا ريال غريب بروحها كيف هانت عليهم .... غمضتني مسكينة

**ومــVIPــن** · 2010-05-25, 15:18

وحليلهاااااااااااااااا ....

الله اليعياااايز بركة البيت ...

**كشكش** · 2010-05-25, 15:19

الله يعينها يا رب

الموضوع: أأأأأه يالقهر عند باب مستشفى الكورنيش .....

أدوات الموضوع

عرض

أأأأأه يالقهر عند باب مستشفى الكورنيش .....

المزيد من آخر المواضيع من نفس القسم:

المواضيع المتشابهه

مستشفى الكورنيش وما أدراك ما الكورنيش ؟!!

الولاده في مستشفى زايد العسكري والا مستشفى الكورنيش

مستشفى النور أو مستشفى الكورنيش

مستشفى الكورنيش/ او مستشفى الواحه

وين أحسن مستشفى الكورنيش ولا مستشفى المفرق