فلان الفلاني!!

[أم نظارات]

خواتي اليوم صارلي موقف عجيييييب في الدوام.. صراحة حسيت أنه ضغطي طلع من راسي من كثر مارتفع...الله يسلمكن اليوم كان عندنا اجتماع... و المفروض أنه فيه ضيوف بيحضرون من أماكن ثانية خارج دوامنا ... و بما أنه كان عندي شغل عند السيكيورتي لازم أجيك عليه بنفسي اضطريت أسيرلهم وتميت يالسه هناك فترة لأنه كان ضروري أخلص هالشغل قبل الاجتماع ... و أنا يالسه مكاني و مندمجه فالشغل ... أسمع أصوات ضيوفنا الكرام بدو يوصلون ماشاالله ... و نحن عندنا نظام في دوامنا أنه أي شخص زائر لازم يظهر بطاقته أو جوازه أو أي إثبات شخصي .. يعني يظهر هالإثبات للسيكيورتي ... المهم حدروا اثنينه .. و واحد منهم كلم السكيورتي و قاله معاك فلان الفلاني و أنا ياي أحضر اجتماع بدعوة من فلان الفلاني ... جان يقوله الموظف ممكن بطاقتك لو سمحت؟ الريال استغرب و سأل السيكيورتي ليش البطاقة؟! قاله هذا النظام عندنا ... طبعا فلان الفلاني ما يازله أنه الموظف يطلب منه بطاقته...و عصب و تم يرفع صوته و سوا حشرة ... كيف أنا فلان الفلاني تقولي عطني بطاقتك؟ أنت ماتعرف انا منو؟؟ و ماتعرف أني أنا أسير أكبر الأمكان و أهمها بدون لا بطاقة ولا شياته!! و بعدين يوم بتتكلم معايه مفروض توقف و يوم بتشوفني ياي صوبك مفروض تقوم تستقبلني عند الباب!!! كل هالكلام وأنا سااااكته و أسمع حضرة فلان الفلاني !!!
المهم السيكيورتي قاله أنا آسف ماأقدر أخليك تحضر الاجتماع بدون ماتعطيني بطاقتك...هنيه الريال صدق انفجر مع أنه ربيعه لي معاه كان يحااااااول يهدي الموقف بس فلان الفلاني طبعا ماطاع ... و قال هالنظام يمشي عالكل إلا أنا .... صراحة ماقدرت أتمالك نفسي .. لأني صدق حسيت موظف السيكيورتي مسكين بدأ يرتبك ... سرت انا بكل هدوء و أدب .. و قتله خير أخويه شو السالفه..(( أوني ماعرف))! سألني أنتي أتداومين هنيه ؟ جاوبته بالإيجاب .. جان يقولي كيف تشغلون عندكم ناس مايفهمون؟! قتله أخويه ماله داعي للغلط.. الموظف من الصبح يفهمك أنه هذا نظامنا مع أي حد و أنت ماتبا تقتنع ألحينه امنو لي مايفهم؟؟ ((صراحة صدق عصبت)) بس طبعا فلان الفلاني شكله مايبا يفهم و جاوبني بكل غرور : أنا مب أي حد .. أنا فلان الفلاني!! قتله أنت و لاغيرك .. اذا ما عطيت الموظف بطاقتك مابتحضر الاجتماع.... قالي أنتي قد هالكلمة ... طبعا انا ماسويتله سالفة و صديت صوب موظف السيكيورتي و قتله: اسمعني ... اشطب إسم فلان الفلاني من قائمة حضور الاجتماع و سرت أكمل شغليه .... تفاجأت بأنه هالشخص الغير متحضر يزقرني بأسلوب همجي .. و يقولي ألحينه هذا كفو توقفين معاه؟؟ (( يقصد موظف السيكيورتي )) قتله دام أنه حاشم عمره و يحترم غيره أكيد بوقف معاه ... و رجعت مكاني أكمل الشغل ... و طبعا فلان الفلاني أونه طلع تلفونه و قام يتصل تلفونات مادري حق امنو !! أونه يبا يراويني أنه صدق شخص مهم ... بعد شويه وصل المدير لي مفروض أنه هو بيترأس الاجتماع و تم واقف يكلم فلان الفلاني و السيكيورتي .. و عقب يا صوبي و زقرني و سألني شو الموضوع فخبرته بالسالفه من بدايتها ... و عقب سأل الريال الثاني لي ياي مع فلان الفلاني و انصدمت أنه سوا عمره مايعرف شي أونه أنا من شوي واصل!!!!!!
المهم المدير حاول يهدي الموضوع و فلان الفلاني كان شكله يبا أي حجه عسب يرد يتضارب و يانا أنا و موظف السيكيورتي المسكين... عسب جذيه تم يطالع صوب صور شيوخنا الله يحفظهم كانن معلقات عند الريسيبشن... و سأل المدير بكل وقاحة: ليش صور شيوخنا جذيه مب عدله !!! كلنا استغربنا و أنا من القهر مارمت أسكت و سألته خير إنشاالله شوفيهن الصور؟ جان يقولي مب يايات سيده!! و نحن أصلا هالفترة في دوامنا كله صيانة و يعدلون المكاتب فشي طبيعي أنه أي لوحة معلقة تتحرك و تهتز من تأثير الدريل .... رد عليه المدير و شرحله الوضع .. و ماسكت طبعا .. و بصراحة أسلوبه كان وااااايد وقح و مستسفز و يقهر .....
المهم آخر شي وصل الموظف لي مسؤول عن ضيوف الاجتماع و فلان الفلاني تم يعطيه محاضرة عن أصول استقبال الضيف ..و أونه أنا عاادي بعطي السيكيورتي بطاقتيه بس ماريد لأنها مسألة مبدأ !!
أي مبدأ و أنت حتى ماتعرف تكلم الناس عدل!! طلع فلان الفلاني راعي مبادئ!!!
المهم أنا كلمت مسؤول الضيوف و قتله هذا إسمه انشطب من القائمة.... و هاذاك سمعني و قالي اتريي الترقية لي بتيج !! طبعا كان يطنز و قصده العكس ...
بس انا ماقصرت فيه سرت بسرعة و طرشت عنه تقرير لدوامه شرات أسلوبه .. يعني تقرير وااايد حلو..ههههههه
بصراحة بعدني مقهورة امنه .... كان وااايد مغرووووور و شايف عمره .. و ظالم.. حليله موظف السيكيورتي على آخر الدوام يا يشكرني و يعتذرلي ... قتله ماله داعي أصلا انا كنت موجودة من البداية و شفت كل شي ....
و الله يا خواتي انا واااايد أكره الإنسان المغرور,,, و يمكن موضوعي البعض يشوفه مب مهم بس حبيت أفضفضلكن لأني ماقدرت أخبر اهليه خفت السالفة تكبر لأنه أكيد اخواني مابيسكتون,,, لكن باجر إذا سوالي أي شي و الله ماأسكتله وأكيد باخبر اهليه ..... أنتن شو رايكن عزيزاتي ؟ انا تسرعت يوم طرشت التقرير لدوامه ؟ و لا زين سويت فيه؟

المزيد من آخر المواضيع من نفس القسم:

• مندوب يختلس 800 ألف درهم من شركته
• والد طفلة يتهم مستشفى بارتكاب خطأ طبي عند...
• إلزام مطلقة برد 187 ألف درهم لطليقها
• التمييز في دبي تقر أحقية الدائن بالورقة...
• إطلاق ساعد لتخطيط الحوادث البسيطة برأس الخيمة
• الحبس والإبعاد لآسيوي اختلس 49 ألف درهم من...
• حكم بأحقية امرأة في أداء شيك حرره زوجها...
• محاكمة 3 آسيويين بتهمة ترويج المخدرات...
• يقتل صديقه تحت تأثير المشروبات الكحولية
• 100 ألف درهم تعويضا لعامل أصيب بحادث سير

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[امطـار]

وعليكم السلام ورحمة الله وبركاته

لا ياختيه بالعكس من قال انه مب مهم

هذا مب اسلوب متحضر هذا اسلوب همجي ودينا ينهينا عن الغرور ..

ومعاج حق باللي سويتيه لانه بصراحه ينرفز

الله يعينج على هالاشكال

[دانة الامارات]

ما قصرتي فيه يستاهل ..

بس ان شاء الله ما يضرج فدوامج

وبعدين ليش الغرور .. اسميني ما احب اللي يتم يقول اا فلان وانا علان ..... شو يعني

[غاليه الحمادي]

فديت ام نظآرآت انا ^_^

كفو يالغاليه
هذا العشم ،،

الساكت عن الحق شيطان اخرس
و انتي ما سكتتي عن الحق .. و لو كان حق غيرج ..



ماقول غير الله ينصرج و يفتح عليج و يرزقج ياقلبي
و عسى ربي ينولج كل اللي بخاطرج يارب ..



وهمسه لـ فلآن الفلآني : تراا في اللي اكبر عنك .. انتبه لا ينبط راسك ^_^

[* ام خماس *]

هههههههه

امصدق عمره فلان الفلاني

اسميج ماا قصرتي فيه00لكن الله يعينكم في الدواماات ويع رااس الصراحه

ثاانكس حبوبة

[! بنت الورد !]

لا يا اختي الناس سواسيه والكبر لله مهب للناس ترى كلنا في قبر واحد .. وفلان الفلاني مصدق نفسه

[مينا القلب]

شو هالغرور ع شوووو ان شالله؟؟؟؟؟ ابا اعرف هو الا موظف حاله حال السكيورتي والفراش والمدير كلهم موظفين ,,,الله يحطه في هالموقف البايخ اللي سواه ,, لا احسن يوم سويتي جيه ,,والله ينصرج دنيا واخره ,,والله كفوا عليج يا أم نظارات يزاه واقل من يزاه

[ashash]

زين سويتي فيه .. عاااد هالاشكااال يباااالهم من يكسر خشمهم ..

و الله يعينج يالغاااليه عليهم ..

و الله يهنيج و يوفقج فشغلج و تترقين

[o.k]

أسميج ماقصرتي,عااااد ماعرف منو يتحرا عمره تراا!!!! اللهم لا شماته فهمتي شوو أقصد!!!!

إنتي ع حق والله ويوفقج ياارب..

[موزه عبيد]

أحس أنج تسرعتي أختي يوم طرشتي التقرير

لأنه هاالفئة يبون أسلوب غير هالأسلوب
و لا تستبعدين أنه يضرج

[tmyz]

good what u did .. if u could do something else.. plz go on with it.. show him how important he is.. i hate that kind of ppl.. and i don't like to deal with them.. but good that u didn't leave him do whatever he want.. Thanks dear sister for sharing the situation in here

[Dorkie]

زين سويتي فيه!!
انقهرررت

[GuMus]

يــــــــــــزااج الله خير اختي

و الله ينصرج دايما بالحق

[حبيته بجنون]

فديتج الغلا

انتي ماغلطتي باي شي

ومعاج الحق بكل شي صار

مادري ليش الناس تستغل اسمها ومنصبها في اشيا سخيفه مثل ابراز بطاقة العمل او الهويه!!

ع العموم حصل خير وعلى قولة البدو اجديتي فيه

الله يوفقج في شغلج وينولج اللي في بالج ياربيه

[أم نظارات]

فديتكن والله خواتي ... ارتحت من ردودكن الطيبة
و لو أقدر أسوي أكثر جان ماقصرت ... لأنه يستاهل و يعامل الناس على أساس أنهم حشرات جدامه
عزيزتي موزة عبيد ,,,, [[ قل لن يصيبنا إلا ما كتب الله لنا ]]
حتى لو تسرعت أنا مب ندمانة لأني نصرت مظلوم ..و الحمدلله أنه ربي قدرني على هالشي. . .
و ابرايه يسوي لي يبا يسويه ... هذا إذا كان فعلا يقدر يسوي شي...
لكن مني جزيل الشكر وخالص الدعوات بالتوفيق