انا والخدمات

**سميتك الغالي** · 2010-03-30, 02:38

السلام عليكم ورحمة الله وبركاته

انا بدخل بالموضوع على طول

بنات انا امعرسه وساكنه بيت اهل ريلي مشكلتي انه يوم انظف غرفتيه واطلع الزباله وانتن بكرامه خاري الحجره واطلب من البشكارات يشلنها ويعقنها برع
اول شي يسونه ينبش فيها اتخيلن اي شي اعقه يشلنه نفس بقايا شموع او غراش عطور او حتى يعني مكياااج

والموضوع وااايد مضايقني يعني بالمره ماشي خصوصيات والشي الاعظم اتخيلن انا من فتره كنت استخدم جهاز حمل لقيته بحجرتهن لانهن شالينه من زبالتيه يعني مستخدم

والافضع من هذا من فتره كنت طرشت ريلي سوق ياخذلي تنوره انا شفتها وما كان شي قياسي فقالت لي حرمه عقب يومين بيبون منهن
ويوم اتصلوا بي المحل طرشت ريلي جان ريلي يشوف بدله عيبته وكانت التنوره شارت تنورتيه بس درجه افتح حتى انا انصدمت يوم شفتها يعني ما شي فرق
مره وانا اكوي ملابسيه جان تتصل بي اربيعتيه واندمجت بالسوالف ولا تنورتيه احترقت شويه ويوم ريلي عرف حلف اني ما ارد لبسها وقال هو بيرد ياخذلي شراتها بس ما لبس اي شي فيه عيب
وعقيتالتنوره وبعد فتره انعزمت عل حفلة غدى في بيت يرانا ورحت وكنت لابسه التنوره واذا بي اشوف بشكرت بيتنا لابسه شراااته يوم دققت شفت انها تنورتيه اللي عاقتنها

وما خفيه اعظم واكيد المعرسات يعرف شو الاشياء اللي تستخدم وتكون اسرار بين الريال والحرمه

الحين لو برمسهن استحي لانهن ثنتين مالات البيت واصلا انا وعمتيه وعمي وريلي واخو ريلي اي كل شهر مره بالمختصر هن خدمات البيت فمااعرف كيف اروم ارمسهن

ع فكره انا ساكنه بغرفه وزباتلي ما بتكون اكثر من جيس بحجم جيس الجمعيه يعني ما يسوى انا ولا ريلي نظهر يشارع وانعقها
ساعدوني ابى احل الموضوع

المزيد من آخر المواضيع من نفس القسم:

**سميتك الغالي** · 2010-03-30, 02:47

حبيباتي نحن ساكنين بفلا

انا عندي غرفه وحده فوق وزباله ما بتكون اكثر من جيس اصغير

واشكركن على الردود

**عيون ساره** · 2010-03-30, 02:52

لو منــــج ما بعق الزبــآآآله يوم ايي ريلي بخبره ف سالفـــه عسب يحط حل على هالموضوع لو مــج يا انا يا ريلي يسير يعق الزباله واذا عقيتي شي كسريه ولا قطعيه قطع قطع ..عسب يتأدبن ..

**سميتك الغالي** · 2010-03-30, 02:56

ثانكس ع الردود

**extra** · 2010-03-30, 02:57

مافهمت ؟يعني الخدامات ياخذون الأغراض اللي انتي فارتها في الزبالة يعني ما تبينها؟
إذا جي قصدج عادي وين المشكلة تراج فارتها ماتبينها خل ياخذوها
بعد هن طفوووووس كيف يفتشون الزبالة
الله يعين

**غرشة نوتيلا** · 2010-03-30, 03:53

أختي بالنسبة للملابس ليش تعقينهم في الزبالة وأنتي بكرامة
أول شي تصدقي فيهم ويكون لج الأجر ..
وثاني شي لا سمح الله في خدامات مكارات ياخذون الملابس ويسون فيها
سحر والعياذ بالله ربي يحميج ويحمينا والجميع

فاسلمي ع روحج عندج ملابس ماتبينها على طول صدقات
لا تفكرين تعطين الخدامات ولا تفرينهم وياخذونهم ..

أما باقي الآغراض غير الملابس اذا تشوفينها مهمة وماتبغين الخدامات يشوفوها
قولي حق ريلج يعق الزبالة برع حتى لو كانت صغيرة .,
لأن الخدامات ماينفع ترمسينهم لأن يدخل من اذن ويطلع من الثانية ..

والله يعينج عليهم ^^

**تسونامي** · 2010-03-30, 04:15

انتي اصلا ماتبين الاشياء الي عقتيها ليش محترقه عليها

وحرا م تفرينها اذا كانت جيده او ما فيها خراب فتصدقي فيها افضل

والشغالات اكرميهم علشان يبعدون عنج والافضل ان ريلج اذا طالع من الفيلا

يرمي الاغراض التالفه الله يعينج ويعينا

**بهلولة** · 2010-03-30, 08:53

ممممممممممم
تعرفين كنت بحط رد ثاني ومسحته بصراحة حركة الشغالات مو حلوة ابدا وتقهر وكنت بقولج اهزبيهم
لكن حطيت عقليتي بعقليتهم وتخيلت هالاشياء اللي نشوفها تافهه
هم يشوفونها بذخ وشي كبير
اللي تبين تعقينه وما تبين حد يمسه حطيه بكيس زبالة بروحة وعقيه بنفسج
وهذا اسلم حل

**ام درياه** · 2010-03-30, 09:08

الكل يعاني من نفس المشكله
بيني وبينج انا هزبتهن وقلتلهن اذا شفت الاشياء اللي اعقها في الزباله عند وحده ياويلها والي تبا شي تقولي
مثل باقي الميك اب اذا يبن شي منه وانا عاقتنه في الزباله يقولون لي بس اقولهن مب حق هنيه في بلادج استخدميه والملابس اطرشها للجمعيات الخيريه والزباله تنعق في الدرام بدون تفتيش
والسموووووووووووووووووووووووووووووووحه

**ديــايــه** · 2010-03-30, 09:37

وخير ياطير جيس واحد ...

عقيه بروحج ولا يفتشون باغراضكم ..

ها البشاكير كلهم جي ..

ينبشون ويبون يشوفون يمكن عاقه شي يبونه ..

فالاحسن بروحج عقيها مافيها شي .. ولانه جيس اصغير اسهل لج روحج تعقينها ..

اسالي عمرج ها السوال ..

بروحج تعقينها وماتخلين حد يدخل في خصوصياتج ..

او ينبشون اغراضج ويشوفون خصوصياتج ويعرفون انتي شوه مسويه وشوه صار من بينكم؟!!

وانتي براحتج ..

**StranG LOovE** · 2010-03-30, 10:17

خلى ريلج يكسر راسهم ينخاف منهم الشغالات عن يسون لج عمل ولا شى

**أم يوسف 85** · 2010-03-30, 10:22

حبيبتي هاذي سوالف الخدامات
ولازم تتوقعين هالشي منهم

مدام انتي جربتي مرة ان يسوون فيج هالحركة لازم كنتي في المرات الثانية تنتبهين
مب تخلينهم كل مرة يفتشون في زبالتج

نصيحتي اي شيء من الثياب تقطينه اخذيها وقطعيها بالمقص
واذا عندج شغلات شخصية حطيها في كيس ثاني واي وقت تطلعين تقطينه في الزبالة الكبيرة

هاذي بالنسبة لي احسن حل
ولاتقعدين تسوين لج مشاكل مع الخدامات مدام هم مب خداماتج

**cute uae** · 2010-03-30, 10:28

المشاركة الأصلية كتبت بواسطة بنت زايد 1

لا تحطين الزباله برع وخلى ريلج يعقها برع وهو طالع ابرك لج واستر لج والله يعينج ^^

**جروح الزمن11** · 2010-03-30, 10:32

المشاركة الأصلية كتبت بواسطة بنت زايد 1

لا تحطين الزباله برع وخلى ريلج يعقها برع وهو طالع ابرك لج واستر لج والله يعينج ^^

**أم دانووه** · 2010-03-30, 11:58

مادري احس الموضوع عادي جدا

مرات خلاااص ابغي اتخلص من الشنط و تجي و بعض الملابس فاعطيهن حق

خدامتيه تلبسهن او تاخذهن بلادها احسها جدا عاااادية

لكن ممكن هن من كثر ما مفتقرات لهالامور ينبشن بالزبالة اكرمج الله

اكرميهم فديتج و اشتري لهن عطوور حتى لو مال 5 او 10 دراهم تجي

و اشتري لهن تنانير او لبس يزااج الله خير

وبتلقينهن خلاااص بطلن يسون جذه هذا من رأيي

لنه لو عندهم الجديد و البديل صدقيني ما بيرضن فالقديم و يشلنه

=====

وإذا ما عيبج كلامي من رأيي انج تعقين الزبالة اكرمج الله برووحج او يوم ريلج بيطلع برا للصلاة

او الدوام خله يعقها عااادي ما فيها شي دامها كيس صغير بــــــــــــس

ولا تجرحينهن بكلااام ..

ممكن تقولين لهن انتو ليش تشلون الاغراض من الزبالة خلاااص هااي ما تنفع تبون شي خبرويني

انتي خذي لهن وفي ميزان حسناتج

الموضوع: انا والخدمات

أدوات الموضوع

عرض

انا والخدمات

المزيد من آخر المواضيع من نفس القسم:

المواضيع المتشابهه

عروض فكره للابداع والتصميم الفني والخدمات المطبعيه