تجربتي مع عملية المنظار لازالة وكي التكيسات...

**لمعة خرز** · 2010-03-26, 08:15

مرحبا ...

اولآ تحمدولي على السلامة
قبل البارحه سويت عملية لكي التكيسات على المبايض بواسطة المنظار...
انا متزوجه من 4 سنوات ونص وكنت ومازلت اعاني من التكيسات الشديدة ...اخذت حبوب السكر الجلوكوفاج والميتافورمين و6 شهور حبوب منع الحمل وكلوميد وابر ومنشطات ....ولا نفعوا معاي

زرت كل المستشفيات ان ام سي...الامارات الدولي...عيادات خاصة...طبيبات امراض الحمل والولادة بدون فاييدة...كلهم يقولون ان فيني تكيس بسيط.....

الدورة كانت اتيلي كل 3 شهور وغزيييييييييييييييييييرة...ويقولولي ما فيج شي...

وبعد معاناة 4 سنين ونص من العلاج والادوية حسيت بخيبة امل...وقررت لاخر مرة ومن بعد مديح الناس قررت اسير مستشفى الوصل في دبي...

سويت عندهم تحاليل واشعه وقالت لي الاستشارية ان عندي تكيس فضيع بشكل كبير وانا ضعيفة يعني حتى الرياضة والريجيم ما يفيدوني لاني وايد ضعيفة....قالت لي 4 سنوات ونص من اخذ الادوية وايد خطر والعلاج هو كي التكيسات بالمنظار...وقالت لي 70% من اللي يسوون العملية يحملون خلال شهر بعد العملية...

توكلت على الله وسويت العملية قبل امس....

بعطيكم التفاصيل..طبعآ من قبل سوولي كل التحاليل وجهزوهم وقالولي تعالي تاريخ 24-3-2010 الساعه 6 الصبح وانتي صايمة يعني كنت صايمة من الساعه 12 بالليل ورحت المستشفى دخلت القسم الساعه 6 الصبح....

على طول جهزولي الابرة اللي يحطونها في الايد وطوني ملابس العمليات لبستهم وكنت خايفة وايد...وسحبو مني دم وشافو وزني وضغطي والاجراءات الروتينية...

على الساعه 11 الصبح دخلت غرفة العمليات عطوني المخدر والبنج واول ما حسيت ان بغيب عن الوعي قلت اشهد ان لا اله الا الله واشهد ان محمد رسول الله (سبحان الله يمكن ما ارد اعيش من بعد العملية على الاقل انطق الشهادة) واخر شي اذكره هو اني تشهدت وبس....ما حسيت بنفسي الا يوم نشيت من البنج واول ما فتحت عيني شفت الممرضة في ويهي تزقرني فتحت عيني وحسيت اني شلقه لاني كنت اشوف كل شي منقسم نصين ههههههههههههههه

المهم اول شي سويته حطيت ايدي على بطني لقيت انهم مسوين 3 خياطات على بطني وحدة على السرة و 2 على المبايض يمين ويسار....

المهم رحت الغرفة في القسم وما قصرو من دكاترة وممرضات الصراحه حسسوني اني في مستشفى خاص من العناية والاهتمام...الله الشاهد ما قصرو....المهم عقبها بساعه يت الدكتورة وقالت لي ان من خلال المنظار اكتشفو ان عندي تكيسات كبييييرة وحرقتهم كلهم ^_^ وقالت لي ان اشعه الصبغه اللي سووها خلال العملية بينت ان عندي بطانه الرحم الهاجرة... وقالت لي ان هالشي يأخر الحمل وصعب احمل بسرعه...قالت لي هو عبارة عن فتحات في بطانه الرحم يدخل فيها الدم وقت الدورة وينحبس الدم في جدار الرحم ويستوي مثل اكياس دم على الرحم مما يؤدي الا انتفاخ الرحم وينسد ويسد قنوات فالوب والبويضة ما تنزل في الرحم.....

يالله وانا من 4 سنوات ابلع في هالادوية والسبب شي ثاني...المهم قالت لي انهم نظفو الرحم خلال العملية وقالت لي 3 شهور بتعطيني كلوميد عشان احمل لان مفعول العملية يتم ل 6 شهور بس وعقب يرجع الرحم المهاجر مرة ثانية ....

وقالت لي علاج حالتي هو الحمل لو حملت بتنحل المشكلة ...فقالت لي بعد 3 شهور لو ما حملت بتسويلي يا اما اخصاب صناعي يا اما اطفال الانابيب..

وتميت في المستشفى لين اليوم الثاني على العصر طلعت من المستشفى...

العملية ما تعور ابد موووول ما تعور والحمد لله بس وجع بسيط مكان الخياطة بس عادي تتحملينه مب وجع كبير يعني ما يباله مسكنات ولا شي....

ادعولي بنات اني احمل خلال هال 6 شهور .... ^_^ وبس اي سؤال انا حاضرة

المزيد من آخر المواضيع من نفس القسم:

**وهج الذكرى** · 2010-03-26, 08:56

ان شاء الله يتحقق اللي بقلبج

**ام حمده** · 2010-03-26, 09:47

حمدالله على سلامتج وان شاء الله حمالج جريب من دون اي تدخل من الدكاتره

**لمعة خرز** · 2010-03-26, 09:52

ان شاء الله يا رب ^_^

**nano1984** · 2010-03-26, 10:08

الحمدلله ع سلامتج يا لمعة
وان شاء الله ربي يمن عليج في القريب العاجل

نفس تجربتي تماماً

لكن أنا الحين كملت 6 شهور ولا حملت

لازم أفكر في العلاج الحين

المنظار ممتاز من ناحية الكشف ع الرحم بشكل كامل

أنا تبين فقط عندي من وجود تكيسات كبيرة جداً & صغيرة

حتى الدكتور تعجب من الأشياء الي طلعت منها من مواد الخ......

ان شاء الله ربي يمن علينا قريباً

اللهم امين

**لمعة خرز** · 2010-03-26, 10:12

هلا نانو انتي سويتي المنظار والكوي؟ وشوعطوج بعد العملية؟ اقصد ما اعطوج ادوية؟

**كشيخه بوظبي** · 2010-03-26, 11:10

الحمدلله على سلامتج والله يرزقج ويزرق كل محرومه بالذريه الصالحه

على حسب معلوماتي ان اللي يسون كي ما يحملون 5 سنوات لان الكي يسبب التصاقات في الانابيب والله اعلم انا اختي تعاني من التكيسات ووورم ليفي في الرحم من 2004 تعالج ولليوم ما حصل حمل

جربوا الحجامه ^_^ اذا ماصار حمل وان شاء الله تحملون

**لمعة خرز** · 2010-03-26, 12:45

المشاركة الأصلية كتبت بواسطة كشيخه بوظبي

الحمدلله على سلامتج والله يرزقج ويزرق كل محرومه بالذريه الصالحه

على حسب معلوماتي ان اللي يسون كي ما يحملون 5 سنوات لان الكي يسبب التصاقات في الانابيب والله اعلم انا اختي تعاني من التكيسات ووورم ليفي في الرحم من 2004 تعالج ولليوم ما حصل حمل

جربوا الحجامه ^_^ اذا ماصار حمل وان شاء الله تحملون

هلا عزيزتي ...لا الكي الحين متطور مب نفس الكي القديم اللي يسوي التصاقات...قبل كانو يكوون المبيض كامل .الحين الطب تطور يسون ثقوب صغيرة على الكيس نفسه وما يستوي التصاقات...انا كنت اتحرى ان يسوي التصاقات بس سألت كذا دكتورة وقالولي ان الطب تغير والحين يسوون بالدريل الحراري.........

**nano1984** · 2010-03-26, 16:00

المشاركة الأصلية كتبت بواسطة لمعة خرز

هلا نانو انتي سويتي المنظار والكوي؟ وشوعطوج بعد العملية؟ اقصد ما اعطوج ادوية؟

عزيزتي أنا سويت كي للتكيسات مثل ما قلتي تثقيب ونفخ الأنابيب الي هي الصبغة

وبان عندي انبوب مسكر والحمدلله فتح

وحالتي بعد المنظار قالي الدكتور الحمدلله ما تحتاجين شي

بس بما اني الحين كملت 6 شهور لابد من العلاج

وبخصوص الأدوية الحين أنا مستمرة على الجلوكوفاج بس

ما أخذ شي ثاني صح والفوليك أسيد

بس نصيحة تمي متاعبة ويا الدكتورة لأن حالة عن حالة تفرق

وربي ان شاء الله يوفقج وأي سؤال أنا حاضرة

**ام الغالي08** · 2010-03-26, 16:06

الله يرزقج بالذرية الصالحة عاجلا غير اجلا يارب العالمين

**pancake** · 2010-03-26, 16:08

ان شاء تحملي من أول شهر

**دندوشـــه** · 2010-03-26, 16:25

الحمدالله على سلامتج ...
الله يرزقج الذريه الصالحه قريييييييييييييييييبا

**قلـRDـب** · 2010-03-26, 17:43

الحمدلله على سلامتج والله يرزقج ويزرق نانو و كل محرومه بالذريه الصالحه

**nano1984** · 2010-03-26, 17:53

المشاركة الأصلية كتبت بواسطة قلـRDـب

الحمدلله على سلامتج والله يرزقج ويزرق نانو و كل محرومه بالذريه الصالحه

اللهم آمين تسلمين يا قلبي

ما تقصرين على الدعوة الطيبة

**bissanza** · 2010-03-26, 18:26

الحمدلله ع سلامتك وإن شاء الله تحملين عاجلا غير آجل اللهم آمين..

الموضوع: تجربتي مع عملية المنظار لازالة وكي التكيسات...

أدوات الموضوع

عرض

تجربتي مع عملية المنظار لازالة وكي التكيسات...

المزيد من آخر المواضيع من نفس القسم:

المواضيع المتشابهه

عملية المنظار لتكيس المبايض

عملية المنظار احدرووو حبوبات .. ضروري

عملية إزاله التكيسات,,, منو سواها

منوه فيكم سوت عملية المنظار الرحمي؟

خلاااااااااااااص تعبت بسوي عملية المنظار للتكيـــــــــــــــــــس