ماقلتلك غالي

**ساره السويدي** · 2010-03-15, 20:39

إلى والدي ومعلمي وقدوتي ‏"بوسيف‏" وأترككن لتبحرن مع هذا البوح النبطي الذي وإن حاولت أن أبدع في صياغته لن أوفي والدي حقه ‏..

سبحان من خلاك واحد من الناس
وانت الذي يابوي مافيه مثلك

تملك مشاعر صافيه وقلب حساس
وتخصنا به بالغلا والتملك

قدرك على عيني ومرفوع ع الراس
ويوم(ن) بلا شوفتك والله مهلك

يابوي لو فيني من الهم لاباس
وبشل فوق حمول ذا الهم حملك

إلا انت لاتحزن ولاتترك الياس
يعرف طريقك ، دوك قلب(ن) فزع لك

ياقدوتي ، يابسمتي ، أعذب انفاس
اللي تنفسها الحنايا بوصلك

من كثر ما انا معجبه فيك لو كاس
عذب(ن) حرام اشرب أنا منه قبلك

موتة ظما احسها صدق نوماس
ولا عقوق(ن) مننا (ي) اقرب أهلك

سميت ولدي بأسمك ابغيه ينقاس
ويشبهك في شكلك وقولك وفعلك

يخجل وقارك منك يادر يا ماس
يامن جمعت وصوف صعبك وسهلك

والارض لي تمشي بها يوم تنداس
ينبت عليها ياسمينك وفلك

ويصير مسباحك على يدينك ألماس
وسجادتك ديباج غالي انغزل لك

ماقلتلك غالي ..! و وش ينبت الساس
غير المطر و الوبل يازين وبلك

لو تطلب عيوني وهبتك بلاقياس
وقلبي قبل روحي يابويه وصل لك

ان غبت ينشد عنك زرعك ولأغراس
وتنشد مطاياك وحلالك وإبلك

وان جيتها تفرح بجيتك بلباس
غالي و تداريها ... مداراة طفلك

الشوق في وسط الحنايا له اجراس
تدق وانته دقت اجراس لجلك

يابعد كل الناس ياكل هالناس
أموت فيك وأعشقك موت كلك

جاك الغلا . شعر انكتب فوق قرطاس
وواقراه يا بوسيف ع مهل مهلك

كريمتك :

أم منصور
16-3-2010

المزيد من آخر المواضيع من نفس القسم:

**مهاوي89** · 2010-03-15, 21:05

روووووووووووووووووووووووووووعة
تسلم أناملج ياأم منصور
دمعت عيوني

**رحاب الحياة** · 2010-03-15, 21:11

سبحان من خلاك واحد من الناس
وانت الذي يابوي مافيه مثلك
كلمات رااائعة ومعبرة
فعلا انت ايها الاب تستحق كل التقدير فمهما حاولت ان اقدر جهدك فلن استطيع نعم انت والدي
لك كل التقديؤ والاحترام

**احلى منكن** · 2010-03-15, 23:06

الله يحفظ لج صح السانج ماعليج زود يا ام منصور

**ساره السويدي** · 2010-03-16, 12:10

سلمتن خواتي ويسلم حضوركن

اسعدني مروركن جميعا لاحرمني الله منكن

**مرحباني** · 2010-03-18, 23:16

صح لساانج يالغلااا

والله يحفظ لج الوالد ويخليية لكم يارب

**هطول** · 2010-03-18, 23:20

رووووعه هالابيات

**خذني بحضنك** · 2010-03-18, 23:55

.. تسلمين عزيزتي عالكلمات الرائعة ..
وربي نآيس ..
ننتظر مزيدج .. ^ ^ !! ~~

**>>الحنين<<** · 2010-03-19, 00:40

ما شاء الله ..كلمات رائعه كروعة حضورك .. حفظ الله لك والدك وولدك وألبسكم ثوب السعادة ..

**بسوووووم** · 2010-03-19, 02:26

تسلمين أختي ع الكلماات الرووعة

**ساره السويدي** · 2010-03-20, 03:24

بارك الله فيكن

**أوتار الحزن** · 2010-03-20, 20:45

سلمت اناملج عزيزتي

كلمات روعه .. عسى الله يديمه ذخر لج ان شاء الله

**ساره السويدي** · 2010-03-21, 17:34

أسعدني حضوركن ومتابعتن المستمره

وشكرا من القلب

**بسوووووم** · 2010-03-23, 23:41

تسلمييين اختي ع الابياات الاكثر من روووعة
صدق الابوو غاالي

**بنت القبيسيAJ** · 2010-03-26, 02:23

صح لسانج

والله يحفظ لج الوالد

الموضوع: ماقلتلك غالي

أدوات الموضوع

عرض

ماقلتلك غالي

المزيد من آخر المواضيع من نفس القسم:

المواضيع المتشابهه

كل شي غالي و عقب يقولون المهر غالي شو بينا نحن ؟

عطر غالي

مهري غالي غالي غالي ... وانا .....؟؟؟؟؟

ماقلتلك يالغالي -قصيدة لراشد بن طناف