على شفا حفرة من الدمار ..

[Unreachable]

السلام عليكم ورحمة الله وبركاته

ترددت الف مرة قبل ماانزل الموضوع
بس اللي فقلبي والله حمل وثقل يوزن جبال

انا كلها شهرين وبتزوج ..
انا مالجة من 9 شهور تقريبا
انا وريلي متفاهمين الحمدلله ونحب بعض وايد .. بس ريلي أحيانا يجلب جلبات فظيييعة والله
أحسه إنسان مب طبيعي ومريض نفسياً ..

تخيلوا انا بس طلعت عشان اتشرى بس مال ساعه طلعت ويا اختي ورديت البيت
وهو اصلا مسافر .. نسيت اطرشله اني طالعه .. فيوم جعت البيت طرشتله مسج وقتله بكل حسن نية حبيبي انا كنت طالعه ورديت من شوي

والله انه سفل فيني وخلاني انا والسافلات الواطيات واحد

ما خلا لا زباله ولا خمام ولا لوث ما شبهني فيهم

قسما بالله انه سواها فيني كمن مرة بس سكت عنه قلت بيصطلب ويمكن من زود حبه هو جي يسوي
بس وصلت فيه لدرجة انه يشك في أخلاقي وإخلاصي .. يقولي هيه طلعي واتصيعي ماعندج حد يصلبج !!!! ... جيه انا وين سرت بيت دعارة ولا ديسكو ؟؟؟؟!!!!!

والله إني استويت مااطيقه لانه شكاك ولسانه وصخ وما يحترمني مول

ياكثر ما يهددني بالطلاق بس هو مب قد رمسته وما يتجرأ بس أونه يبا يزيغني

يبا يحسسني بسيطرته وسلطته علي بس ما يروم وهالشي اللي يقهره زيادة

انا بنت متربية فبيت محافظ اهلي واثقين فيني وطلعاتي ويياتي ويا بنات العايلة اكثر شي
أدرس في جامعة مختلطة من 3 سنين والحمدلله محد تجرأ علي لان المحترمه ينجبرون يحترمونها غصب .. وقبل الملجة هو اللي شجعني عالدراسه وقالي بخليج تدرسين الماستر برع البلاد وياي ان شاء الله .. في البداية كان منفتح والله ... الحين مستوي كريه والفاظه وصخة

ويخليني انا والبنات اللوث في نفس المستوى بس لاني احيانا اطلع بدون مااخبره .. مع اني اطلع من بيتنا بشور واذن اهلي ..حشى عليه والله اني مااشرد ولا أواعد حد ,, بس والله أحس مااروم استحمل منه هالشي .. قمت اتجرأ عليه واطعنه فرجولته واوله انت مافيك ذرة رجولة وشرف لانك تطعن فشرفك اللي هي انا .. والله مااعرف شو اقولكم
من يومين كنا نخطط كيف نرتب حجرتنا واغراضنا وحجزنا حق شهر العسل
والحين وضعنا واصل للحضيض
والله ان نفسيتي متدمرة واحس اني مااقدر اتحمل اكثر عن جي

ومااحب اسمع طاري الطلاق مول ولا افكر فيه
ابا حل .. ابا اسلوب ولا طريقة اقدر اسيطر فيها على مشاعره واسلوب كلامه وياي
ابا أغيره .. مابا اضعف .. لاني أحبه وهو يحبني .. بس هالحركات تخليني اخذ منه موقفوانجرح جرح كبير ومستحيل انساه لو بعد سنين .. لان التجريح والله صعب صعب صعععب !! ....

والله دعوة حلوة منكم بنات بان الله يهديه ويهديني ويسخرنا حق بعض ويهدي باله وقلبه عليه

الحمدلله على كل حال

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية