نسكت ولا نخبر اخويه .. !!! بليز ابي رايكم ؟

[غلا قلبي A]

السلام عليكم ورحمة الله وبركاته ..


شحالكم بنات ؟!


بنات انا بخبركم بسالفة حرمة اخويه .. و قولوا شنسوي .. تعبنا والله ..

بنات من قبل .. سنه تقريباً اكتشف
نا ان مرت اخويه ترمس واحد واخوي درا و سووا بلبله و قال لأمي انا ما ابيها وخلاص بطلقها .. بس اهي تحججت بالعيال .. مع انها مب داريه عنهم .. ولا شو كلوا حتى الرقاد يرقدون بالصاله ما يرقدون بحجرهم .. ولا دراسه ولا نظافه .. !!

و كلنا كنا ويا اخويه .. بس شو .. للأسف اخويه طخ عن السالفه و هون .. !!
ليش ما ندري .. يمكن لان ما عندها حد هني اهلها كلهم برا الدوله واهي مستحيل اتسير اتعيش عندهم ..
المهم بعد فتره يمكن ما تعدت الست شهور .. تموا ويا بعض ..
مره اخويه شك فيها مره ثانيه و قال لها هاتي فونج .. و اهي ما طاعت تعطيه فونها ..
وعرف انها ترمس واحد .. و ردينا على نفس السالفه الاوليه و خبر امي و قال مابيها و بطلقها
بس شو .. !!
طخ عن السالفه مره ثانيه وقال لها لو تبين ما اطلقج بيعي سيارتج وودري دوامج بس ولا وحده من هالاثنين سوتهم .. وكلنا يا بنات مستغربين معقوله في ريال جيه .. لهالدرجه ما عندك كرامه .. ولا واحد من اخواني كلهم حارين .. بس هذا ما ادري طالع على منو .. عقب اختي رمستها .. وقالت لها جابلي عيالج و خلج حرمه عاقل ترى اخويه بيسفرج عند اهلج .. و بتمين هناك و من هالكلام واهي خااافت .. !

و من عقب هالسالفه صارت ملاك .. بالنسبه لأخويه .. طبعاً
ماتطلع من البيت .. ما ترمس فون وايد .. و
ما تحط ميك اب يوم تطلع .. و تجابل عيالها
يعني صارت مثل ما اخويه يبي ..
وكل اللي ف البيت قلنا خلااص ربي هداها .. وحمدنا الله
بس يوم اخويه يكون زام ما كانت تقر ف البيت كله برا شكلنا فيها .. بس ما خبرنا اخويه بهالشي لان نعرف ما بيسوي شي ..
وتمت فتره جيه .. إنسانه مطيعه لأخوي .. !! لين مره سبحان الله ربي كشفها ..
كانت يالسه ع لابي ترمس بالمسن و عندي ف اللاب تتسيف المحادثات .. وانا بين فتره وفتره امسح المحادثات اللي ما ابيها .. المهم ومره كنت يالسه احاوط شفت ايميل غريب فتحته إلا الصدمه الكبيره والطامه العوده ..
اتخيلوا بنات .. محادثه بينها وبين واحد يداوم وياها .. و المحادثه كلها استغفر الله كلام غزل ..
انا والله دارت الدنيا فيني .. ما عرفت شو اسوي .. خبرت اختي .. و قالت انا ما يخصني بالسالفه ولا بدخل عمري .. لان اخر مرتين اخويه كان كله يشاور اختي .. واهي اللي كانت وياه ..
فقالت لي انا اعرف ان اخوج ما بيسوي شي بيتم يقول بطلقها وبيعصب وعقب بيطيخ عن السالفه .. ولا بيسوي شي .. فليش اتعب عمري .. ويوم اختي خبرت امي .. تمت متضايجه وايد وايد .. وقالت ما اعرف شو اسوي ..
وشفنا محادثات ثانيه ف لاب بنت اختي ..
واللي يعرف بهالسالفه .. امي و اختي واخويه اللي وايد وياي .. واخويه محرج يقول لازم اتخبرون ريلها ..
بس ..
وما نعرف شنسوي هل نخبر اخوي اللي هو ريلها ولا لا .. ؟!
اخوي يقول قولوا له .. انا قلت .. اعرف الحبيب ما بيسوي شي نفس كل مره .. !!
شوروا عليي بنات شو نسوي .. ؟؟؟ ولا نتريا ربي لين ما يكشفها ..
و للعلم بنات الصدمه الاكبر ان مرت اخويه تستوي بنت خالتي بعد ..

و السموحه طولت عليكم وايد .. بس ما كنت ابي اخش عنكم شي ..

المزيد من آخر المواضيع من نفس القسم:

• طرق تجنب الزوجة تدمير حياتها الزوجية
• افضل الطرق للتعبير عن حبكِ لزوجكِ
• جارتهم فرقت بين اخي وبين زوجته
• طرق التعامل مع الزوج الذي يتجاهل زوجته
• افضل طرق التعامل مع الزوج الذي يهين زوجته
• افضل طرق التعامل مع غضب الزوج بذكاء
• اجمل افكار لاستقبال زوجك من السفر
• اهم العادات التي تؤدي الى تدمير الحياة...
• افضل طرق التعامل مع الزوج المستفز
• نصائح مفيدة لنجاح العلاقة الزوجية