ريلي مايطلعني مثل الخلق..

[ظبيااانية*]

السلام عليكم ورحمه الله
شحالكن خوااتي .. عساكن بخير
اليوم عندي موضوع حابه اتناقش فيه وياليت نقدر نعطي حلول لهالموضوع
لان انا متأكده ان وااايد مثلي يعانن من هالموضوع مع رياييلهم..
ربي يسلمكم انا متزوجه من سنتين ف بوظبي بداية زواجنا ماسرت شهر عسل بس كنا نظهر اذا مب تمشيه ناخذ اغراض واذا مب اغراض ع الاقل الاقل تاخذ عشا ونتعشى فالبيت بس احين والله لو اقولكم اني ماسرت بوظبي صارلي 3 شهور بتقولون هاي جذابه وهي ساكنه فيها اللهم بس اسير بيت اهلي وارد.. والله اني محتاجه اغراااض حقي وحق بنتي خاصه تعرفون الياهل يباله ملابس يديده بين فتره وفتره ومخلصين الشتاء ويبالنا للصيف وكل مااقوله نسير بوظبي ابا اغراض يقولي زحمه وبوظبي ما تنداس بس هو عادي يسير بوظبي فالاسبوع مرتين وثلاث ويا ربعه.. وانا اشوف ربيعاتي وخوااتي دوم يطلعن ويا رياييلهم ودوم يقولن سرنا وسرنا وانا مقهوره وساكته!!
كلمته من يومين بخصوص الطلعات واني ابا اتمشى واغير جو شوي وبالمره ابا اغرااض ودوم يالسه فالبيت مليت ومر الشتاء وخلص وللحين مايلسنا فحديقه او مكان عام جان يعصب ويقولي احمدي ربج غيرج مايطلع خير شر وانتي تطلعين بين فتره وفتره..!!!
عطوني حل شو اسوي معااه اذا ماطلعناا احين ونحن صغار ونستانس بحياتنا متى نطلع؟؟
واذا ماطلعنا احين وعندنا واحد لايزعجنا ولا يطفرنا متى بنطلع بعد مايكثرون العيال؟
عطوني حل اكلمه مره ثانيه وثالثه ولا شووو والمشكله اني عصبيه واذا مصخها عادي اتضارب ويااه ونتزاعل بالايام وانا ماابي هالشي ف شو تشورن علي ويزاكن الله خير ..

المزيد من آخر المواضيع من نفس القسم:

• مخاطر كثرة ممارسة الجماع على الزوجين
• اسباب عدم الوصول للنشوه اثناء الجماع
• صفات الزوج المتنمر وكيفية التعامل معه
• الفرق بين الضعف والعجز الجنسي
• اهم فوائد الزنك السحرية للصحة الجنسية للرجل
• طريقة تنظيف المنظقة الحساسة بعد الجماع
• طريقة التعامل مع الزوج الصامت
• نصائح لحياة زوجية ناجحه
• فوائد الضحك للعلاقة الحميمة
• الزواج الثاني بين الأيجابيات والسلبيات

للحصول على تفسير لحلمك .. حمل تطبيقنا لتفسير الاحلام :
اجهزة الاندرويد : تفسير الاحلام من هنا
اجهزة الايفون : تفسير الاحلام من هنا

[غاليه الحمادي]

الصراحه !!
الله يعينج ..
مآدري شقولج .. انا نفس طبعج .. شوي عصبيه و مآحب احد ما يعطيني حقي ..
و حطيت نفسي في موقفج ..


امممم .. جربي معاه مره و مرتين و ثلاث .. لكن حطي في بالج انه بيرفض طلج عسب ما يخيب املج
و حاولي معاه .. شقولج بس . اتوقع الاخوات المعرسات بيفيدونج اكثر


الله يستر عليج يالغلا
و يخليلكم البيبي =)

[al7b]

أحـــلى ما بين الزوجيــن التفأهمــ .....
يعنيــ خذيــه حبــه حبــه .. اذا قالجــ زحمــه ... قوليله ... عاديـــ بنتريا الزحمــة ... المهمــ ناخذ اغراضنــا ,,,.. وحاوليـــ اتضيفين من بين كلماتجــ ... أكسسورات ... و إذا مااع المرة الاولــآ المرة الثانيـــة ... و حنــيً عليـــه بس بطريقة حلوة ....

.. بس أنا مستغربــه 3 شهووؤر !! و اغراضــج !! ... و البيبي !! ..

اللله يوفج ما بينكمــ و يصلــح شانهـ ...

[جروح الزمن11]

حبيبتي حاولي تقنعيه بطريقه حلوه وبالهداوه ومن غير عصبيه ولا مشاكل

وان شاء الله يرضى ويبطلعج

[taktak]

انا صح اني موب متزوجة بس اللي اعرفه انه الريايل ايوون بالمساحل والكلام الحلو شو اتسوين بعد لازم تعطينه كملتين حلوات

[ام الغالي08]

اول شي الله يعينج والله يهديه ان شاء الله
وبخصوص الطلعة كلميه مرة واثنين بس باسلوب هادي حتى توصلووون لحل يرضيج ويرضيه حتى لو تتفقون على يوم بالاسبوع خاص لج تطلعون وتستانسون فيه
وانا من راي تعتمدين بعد على عمرج وتحاولين تاخذين الليسن والله يوفقج

[عواشهـ]

اختي انا كنت امر فهالحاله بس الغلط ظهر مني يعني منج انتي سوري بس بفهمج
هو ما يظهر وياج لانج ما اتحسسينه ان الظهره وياج حلوه عسب جي يظهر دووووووم ويا ربعه خطواتي الي انا اسويتها
اول شي حبيببته فالبيت و يلست البيت قمت اسوي اشياء وااااايد ما اخليه يظهر و منها كنت استغل وجود بنتي انها تباك و جي واشوي اشوي قام يحب ييلس فالبيت عقبها اشوي اشوي قمت اقوله يالله اسير بيت امي و انرد لان قريب انتي قولي بنسير نشتري عشا و بنرد و اششوي اشوي بيحب الظهره وياج بس يوم بتظهرين لا اتحسسينه بالمسئؤؤليه لانه ما يظهر وياج لان هو حاط اباله انها مسؤاليه وشل البنت و اتحمل امن الحرمه و جي لا حسسيه انج مستانسه و سولفي و اضحكي يعني خلي الطلعه اشوي اشوي احلى
يعني باختصار يبالج وقت لان الريال مثل الرياهل الي اتعودينه بيمشي عليه و ها رايي وشكرا..

[سار90]

سايريه
الله يعينج

[ومــVIPــن]

اول شي : لااااااااااااااااااااااااااااااااااااااااااااااااا ااااااااااااااااااااااااااااااا للعصبيه >>>حبيبتي خلي عمرج ريلاكس لما تكلمنيه ...لا تعصبين لما يرفض طلبج انتي ما تعرفين ظروفه يمكن الريال مشغول ولا مفلس ولا ولاولا.....

وثاني شي : مثل ما قالن خواتي .... اشي تبينه خذيه بالسياســــــــة والكلام الحلو ( حبيبي - عمري - حياتي من هالرمسه ..

والله يوفقج الغاليـــــــــــــة..

[دانتيلا _كيوت]

مرحبا الغاليه
الصراحه الغلط منه المفرووض يسوي لكم وقت وفي الشهر يطلعكم طلعه خاصه لج و لبنوتج بس هو مايحب من الاساس

شكله مايحب يكون حد وياه في السيره والرده
بس انا بنصحج نصيحه ^^ لا تطلبيين انج تطلعيين موول ,,, بس نغزيه بالرمسه قولي له امس قريت عن فندق غاوي في المكان الفلاني او قرييت عن مطعم حلو خلنى نرووح ونتعشى فيه انا وانته وبنوتتنا بأسلووب حلو ترى الضرابه والعصبيه تخلي الريال يزيد في العناد صدقيني ^^ خبره مال سنه لول


تعاملي وياه بأسلوب انتي اختاريه بعييد عن العصبيه والضرابه يعني مثلا قولي له (( حبيبي خاطري اليوم اكل بيتزا من المطعم الفلاني ونروح نيلس على الكورنيش نتمشى..,,, او مثلا شو رايك نروح ندور بالموتر مابا ارووح اشتري بس ابا احووط لو في الموتر

خليه يحس انج تبين تطلعيين وياه مب تطلعيين لحاجه ,,, يعني لا تقوليين له فلان ابا اطلع اخذ اغراض لبنتي و للبيت وجي .....

لا قولي له غناتي ابا اطلع وياك نغير جو ابا استانس وياك ونرمس رباعه ,,,,

^.^ اتمنى انه يحس فيج
واتمنى هو الي يطلب منج انه يطلع وياج مب انتي ^.^ والله يهديه يا رب

بس العصبيه ما بتوديج مكان الا بتعبج انتي ^.^ واهم شي صحتج

[كاموميل]

كلنا فالهواء سوا انا معرسه من 8 شهور و عمره ماقالي قومي نسير نتحوط الا فأول أسبوع و عقب انا الي قمت اطلب منه و بطلعة الروح طبعا هو يطالع على اخوه المعرس الي فار المسؤولية كامله على حرمته وهو متفيزر و يحوط و لا يطلعهم ولا يشوف طلباتهم و امهم تشجعهم على هالشي تبا الحريم الي يكدن و الرياييل مرتاحين جالبين الادوار ماشاءالله

[الجـــوريـــ]

حبوووبه .. انتي حاااطه مبدأ (( غيري يطلعن مع رياييلهن وانا لا ))

=====> انزين اشعنه امنكده على عمرج ؟! اطلعي استانسي مب لازم وياااااه .. يعني تحبسين عمرج وتنعزلين عن النااااس عسب والله ريلج ما يطلعج ؟! ما يصير حبووبه اصلا هالشي بيأثر ع نفسيتج ..

اطلعي مع اهلج .. خوااااتج ..اربيعاااااتج .. واستانسي .. اذا هوو ما يحب يطلعج ع الاقل انتي اطلعي احسن من مااشي ..

وربي يعينج انشالله

[Ayesha]

حبوووبه .. انتي حاااطه مبدأ (( غيري يطلعن مع رياييلهن وانا لا ))

=====> انزين اشعنه امنكده على عمرج ؟! اطلعي استانسي مب لازم وياااااه .. يعني تحبسين عمرج وتنعزلين عن النااااس عسب والله ريلج ما يطلعج ؟! ما يصير حبووبه اصلا هالشي بيأثر ع نفسيتج ..

اطلعي مع اهلج .. خوااااتج ..اربيعاااااتج .. واستانسي .. اذا هوو ما يحب يطلعج ع الاقل انتي اطلعي احسن من مااشي ..

وربي يعينج انشالله

انا وياج 100 بالميه الصراحة..في من الحريم مره معتمدين على ارياييلهم اعتماد كلي اذا ماظهرني مابظهر..!

3 شهور وانتي مجابلة هالاربع حيطان لو انا مابروم اتحمل الصراحة..و هو بعدين لي شافج اتسيرين و اتردين يمكن ايحس اشوي على دمه!

[حلى دنياي]

للرفع

[نعيمية دلع]

ها الي ناقص يحرمج من الطلعه الي يقول انتي تبين تحومين اهو يحمد ربه انج بس تبين اغراض ما قلتيله ابا اسير باريس شو هالحاله رمسي حد من اهلج خاصه انج ف بدايه حياتج