قصه حملي ....

**Al_Dloo3aa** · 2009-12-15, 01:17

السلام عليكم ورحمه الله وبركاته
هلا بخواتي الحبيبات
حبيت اكتبلكم قصه حملي من كثر ماقرا مواضيع البنات اللي تبا تحمل ومستهمه واللي تاكل ادويه واللي اتحاتي الدوره واللي واللي .....كله في سبيل كلمه ماما وبابا وما ينلامون صراحه
امممم
تزوجت بعمر 17 يعني اول ماخلصت الثنويه وزوجي كان اكبر عني ب4 سنين تقريا المهم توقعت احمل من اول اسبوع لان الدوره كانت امخاصه عني قبل العرس بكمن يوم .ز طاف اول شهر ماشي حمل ثاني شهر ريليكانت عنده دوره في البلاد بس في اماراه ثانيه واستمرت يمكن 6 شهور وطبعا كان مايي الا في الويكند مرن هالشهور ابسرعه ماشي حمل عقب مرو هالشهور اللي قام يتخبر ماحملتي طبعن انا لا جواب امايه اتحركت وقامت ودتني عند اوراس اوراس فحصت عليه قالت بنتج مافيها شي الحمدلله بس لازم ريلها يسوي الفحص
خبرت ريلي بالسالفه قالي يصير خير طبعن هو سار فحص بدون مايخبرني وقالوله عندك دوالي بس هالشي مايعيق الحمل
ريلي تطمن واهنيه بدت رحلتي في العلاج
نسيت اخبركم ريلي خلص الدوره وداوم في اماره ثانيه بحكم شغله وانا قعدت في بيت اهليه لاني كنت ادرس وكان ايزورني بس في الويكند يومين ايي الاربعاء ويروح الجمعه بالليل (ايام ماكانت الاجازه يومي الخميس والجمعه )
وانا احوس بهالدخاتر كل يوم موديني عند دكتوره وكل يوم اجرب شي والناس كل يوم يعطوني وصفه وخلطه واسم دكتوره لين خلاص لاعت جبدي استمريت على هالشي سنه تقريبا وكل مره اسير عند دكتوره اتقولي مافيج شي عقب سنع انتقلت عند ريلي في نفس الاماره قلنا يمكن يمكن الايام اللي اشوفه ماتصادف ايام التبويض (شوفو الع>ر معقوله سنه ونص ولا يوم صادف تبويض )

تعبت من المستشفيات والدخاتر وكل دكتوره لازم تتعبث فيني ومدري شو قلت خلاص ما بروح (سويت تلقيح ومافاد _سويت غسيل للرحم _كلت كلوميد _يعني الدكتوره كانت تمشي معاي شوي شوي خطوه خطوه ونحن مافينا صبرحتى مساد تمسدت عند وحده يزاها الله خير
اخر شي طفرت قلت لريلي سير سو فحص مره ثانيه جان يقولي انا سويت فحص مره ثانيه
(طبعن بدون مايخبرني )وقالولي لازم عمليه وانا زغت اسويها لانها بمكان حساس وايد
طبعن ماتتخيلون انا كيف صار شكلي الوان الصدمات ع ويهي قلت له وانا متبهدله بين الدخاتر وانت خايف من العمليه وماخفت علي من ها كله
(مع>ور الريال يخاف من العمليه لانها بمنطقه حساسه جدا وثاني شي في دخاتر قالوله ما يحتاي عمليه وفيه دخاتر قالوله لا يحتاي طبعن هو رجح راي اللي قالوله ما يحتاي)

المهم خلاص تعبت قلت بلجا لربي لانه اكيد ما بخيب ظني وتميت استغفر استغفر وقلت لريلي انت بعد استغفر وقلت خلاص بشل سالفه الحمال من راسي (لانه صدقوني النفسيه تلعب دور واحس هالشي اللي كان يتعبنا اكثر )
يوم من الايام وانا قاعده اسولف مع وحده يزاها الله خير (عدها بنت وعقب صارلها تكيسات ومنع الحمل واتعالجت عند وحده وحملت )اتقولي ليش ماتروحين عند دكتوره اسمحولي خواتيه نسيت اسم الدكتوره بس كانت عيادتها في مجمع العباره بدبي قالت هالدكتوره عالجتني بفضل الله وثم فضلها حملت اتخيلو بنتها العوده عمرها 13 سنه وعقب حملت بالثاني )قلت يلا خلني اجرب
وفعلا سرت مع ريلي ودشيت عدها طبعن قالتلي مثل كل مره مافيج شي الحمدلله
وطلعت من عدها واقفين عند الكاونتر بندفع وكان نفس العياده شي دكتور عراقي خاص حق الرياييل عاد الفتره اللي واقفين بندفع قعد يسولف مع ريلي وقاله ريلي الحرمه مافيها شي بس انا فيني دوالي وجي قاله الدكتور خلني افحصك ريلي سار عنده وفحصه قاله فعلا انت محتاي عمليه ولو ما سويتها الدوالي بتتفاقم وبتزيد وبتسببلك عقم لا سمح الله
(اتخيلو )
(طبعن مازلنا على الاستغفار واحس هالسبب اللي سبحان الله يسر لنا انشوف هالدكتور )خلاص رجعت البيت مفوله على ريلي قلته هالتاخير كله بسبتك تقريبا سنتين محرومه بسبب خوفك وقعدت اصيح واصيح (يعني ماانلام الصراحه الضنا غالي )
قال خلاص بسوي العمليه واللي فيها فيها سار مركز علاج في بوظبي شافه الدكتور وعطوه موعد للعمليه عقب شهر
عاد انا اتريا هالشهر يخلص كان اطول شهر بحياتي عاد بتيلكم الصدمه قبل ما يخلص الشهر بسبوع اتصل الدكتور لريلي وقاله فيه بروفيسور بيي من المانيا ا>ا بتترياه يسويلك العمليه عقب شهر
(شو تتخيلون حالتي اهنيه )ريلي استانس قال خلاص يتريا انا هاك اليوم خلاص مافيني حيل بعد اتريا شهر ثاني طبعن رفضت وتميت اصيح واحب ايدد ريلي واترجاه
مافيني صبر خلاص طفرت بمعنى الكلمه وعقب ماشافني خلاص منتهيه وافق يسويها المهم سار في الموعد المحدد وسوا العمليه كان هالشي شهر 12
المهم ع شهر واحد صار بيني وبين ريلي تاج بسيط بسبه نفسيتي التعبانه قلت بريح بيت اهليه كمن اسبوع امم وكنت ابدن شاله فكره اليهال من بالي (حتى كنت اقول لريلي يوم كنا نتعالج خاطريه اجرب حبوب منع الحمل بس شكلي بحياتي ما بجربها لانه ماعندي اعيال اصلن عسب امنع الحمل )
المهم كان باقي عن الدوره كمن يوم واحس باعراضها من الام وخمول ورطوبه يعني جنها بتي خلاص واصلن صار شي عادي عندي كنت اترياها واقول يلا هل تنزل ماحب حركات التاخير (لووول )
مر تقريبا اسبوع عن موعد الدوره وانا مازالت اعراض الدوره فيني جان امايه اتقول بروح بشتريلج فحص حمل انتي حامل انا ماسكه قوطي الالويز والعب به واحركه اقول من قالج حامل حاسه بالدوره قالت ع ضمانتي قلتلها اوكي ادري انج بتنصدمين بس يالله جان اتشل قوطي الالويز من ايدي واتفره عني خخخخ (اتريا الدوره من الخاطر خخخ شفتو حاله الياس اللي وصلتها )
اليوم الثاني امايه ودتني الصيدليه طبعن انا ما نزلت قاعده بالسياره اترياها شرته (قاعده اتقول لراعي الصيدليه واحد شيبه مسكين اتقوله انا يريد ها التحليل لبنتي ادعيلها اتكون حامل رفع الشيبه ياحليله ايده يدعيلي قالت له امايه لو بنتي حملت بييبلك هديه خخخ ) رجعنا البيت دشيت الحمام تكرمون اسوي التحليل امايه نست السالفه خخخ وانا بالحمام اتريا الفحص طبعا قاعده اغني واقول اكيد سالب بعد شو
امممممممممم شوي قاعده اطالع الخط طلع والخط الثاني طلع قسم بالله هاللحظه مدري شصار فيني جني غفيت او سرت عالم ثاني المهم شي صارلي ظهرت من الحمام مستانسه ماسكه التحليل اراوي امايه والكل يصرخ وايبيب متفيجين والكل يركض يبي يبشر ريلي لانه كان في الاماره الثانيه
وسيده اربع اقفل الباب وخليتهم برع يضاربون يبون البشاره اتصلت لريلي قلت له عندي لك ابشاره قال شو حامل قلت هيه كان يسوق صيح ويل من الخاطر ماصدق بغى يغمى عليه خخخخخ
ياي طر السكه يقولي معرف كيف وصلت كنت بعالم ثاني
الحمدلله ربي رزقني ببنوته وعقبها السنه اللي بعدها بعد واللي بعدها واللي بعدها (ماصدقت الاخت لووول )كل سنه قمت احمل اتحيدون يوم اقول بحياتي ما بجرب منع الحمل الحين الحمدلله امنع خخخخ
لين مايكبرون شوي الصغاريه ربي يحفظهم ويخليهم لي ولابوهم
طبعن الاستغفار اهم شي احس هو الشي اللي فتحتلي ويسرلي ابواب الحمل
واقول حق كل وحده لا تقنطين من رحمه ربج هو القادر على انه يرزقج مثل ما رزق زكريا وزوجته (القصه في سوره مريم ) ووايدين ناس الله رزقهم ببركه دعائهم واستغفارهم مع الاخ> بالاسباب المساعده
وربي يرزق كل عاقر وعقيم ومحروم ال>ريه الصالحه المعافاه ويفرحهم
امين
نسيت اخبركم عن الشيبه راعي الصيدليه خخ اليوم الثاني امايه شرتله كيك وودتله بس للاسف كان مش موجود عطت اللي وياه بالصيدليه وعطته افلوس جيه هديه مبلغ رمزي يعني )
ادعولي ربي يحفظلي اعيالي ويخليهم لي ولزوجي وادعول لكل محروم ربي يرزقه
بنات ترا فيه انواع من الدوالي اللي اتصيب الرياييل وكله سببه ياللبس الضاغط او الحراره الزايده او الجلوس او الوقوف الزايد وفيه اسباب ثانيه طبعن مو شرط كل دوالي يحتاي لها عمليه لا فيه دوالي تتعالج بالادويه واطيب وفيه منها لا يحتاي لها عمليه وفيه منها كوي وفي منها ليزر وفيه منها ماتمنع الحمل يعني كل واحد يختلف عن الثاني
اشكركم على ردودكم الحلوه وعلى الدعاوي الطيبه ويارب لكم بالمثل
حبيت اقول كمن نقطه
اول شي يا بنات الاستغفار مب بس انج تستغفرين بس لتحقيق الشي اللي تبينه وعقب تنسينه لا الاستغفار حاجه نفسيه مريحه وخاصه انه علاج رباني لامراض جسميه ونفسيه وعقليه بعد
ثاني شي بخبركم على اكبر عدو يخليج ماتحملين وهو التفكير صدقوني يابنات توكلوا على ربكم في كل شي لانه بيده الارزاق سبحانه شو فايده التفكير دام الله مقسم الارزاق لانه هالشي ما بيقدم ولا بياخر شي بل انه سبب رئيسي في منع الحمل لانه الحاله النفسيه وايد تاثر
ثالث شي اتمنى كل وحده عدها قصه حمل او اي شي مشابه مرت به تكتبها حقنا وحق البنات عسب يستفيدون وتبعث شوي في نفوسهم روح الامل والتفاؤل
وايد فرحت يوم قريت اللي كاتبه انا استفدت من القصه واللي قالت بعثتي امل فينا واللي تفائلت لانه هالهدف اللي بغيت اوصله
واتمنى من كل وحده حتى اللي عندها اعيال تدعي حق اللي ماعندها والله يابنات كنت ادعي حق غيري مثل ماكنت ادعي لنفسي لاني حسيت بمعاناتهم وعرفت شعورهم ولا تنسون فيه ملك يقول ولك بالمثل
ربي يحفظلكم اعيالكم ويرزق ويفرح كل محرومه ياااااااااااااارب

الموضوع: قصه حملي ....

أدوات الموضوع

عرض

قصه حملي ....

المزيد من آخر المواضيع من نفس القسم:

المواضيع المتشابهه

حملي وما ادراكم ما قصة حملي

قصة حملي

حملي شو صار فيه!!

ابي احسب حملي

حملي في خطر